آپ کیلئے ایک اہم تقریب

جب یسوع مسیح زمین پر تھا تو اُس نے خدا کی بڑائی کرنے والی ایک تقریب کا آغاز کِیا۔‏ یسوع نے اپنے پیروکاروں کو صرف یہی مذہبی رسم منانے کا حکم دیا تھا۔‏ یہ خداوند کے عشائیے کی تقریب تھی جسے آخری کھانا بھی کہا جاتا ہے۔‏

ذرا اس تقریب کا باعث بننے والے واقعات کا تصور کریں۔‏ یسوع اور اُسکے شاگرد عیدِفسح منانے کیلئے یروشلیم کے ایک بالاخانے میں جمع ہیں۔‏ اُنہوں نے فسح کا رسمی کھانا ختم کر لیا ہے جس میں برّے کا بھنا ہوا گوشت،‏ کڑوا ساگپات،‏ بےخمیری روٹی اور سُرخ مے شامل ہے۔‏ بیوفا شاگرد یہوداہ اسکریوتی کو باہر بھیج دیا گیا ہے جو بہت جلد اپنے مالک کو پکڑوائیگا۔‏ (‏متی ۲۶:‏۱۷-‏۲۵؛‏ یوحنا ۱۳:‏۲۱،‏ ۲۶-‏۳۰‏)‏ اب یسوع اپنے ۱۱ وفادار رسولوں کیساتھ اکیلا رہ گیا ہے اور متی ان میں سے ایک ہے۔‏

چشم‌دید گواہ متی کے مطابق یسوع نے عشائیے کا آغاز کچھ اسطرح کِیا:‏ ”‏یسوؔع نے [‏بےخمیری]‏ روٹی لی اور برکت دیکر توڑی اور شاگردوں کو دیکر کہا لو کھاؤ۔‏ یہ میرا بدن ہے۔‏ پھر [‏مے کا]‏ پیالہ لیکر شکر کِیا اور اُنکو دیکر کہا تم سب اِس میں سے پیو۔‏ کیونکہ یہ میرا وہ عہد کا خون ہے جو بہتیروں کیلئے گناہوں کی معافی کے واسطے بہایا جاتا ہے۔‏“‏—‏متی ۲۶:‏۲۶-‏۲۸‏۔‏

یسوع نے اِس عشائیے کا آغاز کیوں کِیا؟‏ عشائیے کے وقت اُس نے بےخمیری روٹی اور سُرخ مے کیوں استعمال کی؟‏ کیا یسوع کے تمام پیروکاروں کو اِن علامات میں سے لیکر کھانا پینا تھا؟‏ اِس عشائیے کو کتنی مرتبہ منایا جانا تھا؟‏ علاوہ‌ازیں،‏ کیا یہ تقریب آپ کیلئے واقعی اہم ہے؟‏