کیا ہمیں فرشتوں سے مدد مانگنی چاہئے؟‏

کیا مشکل‌اوقات میں فرشتوں سے مدد مانگنا موزوں ہے؟‏ بہتیرے لوگ ایسا سوچتے ہیں۔‏ درحقیقت،‏ نیو کیتھولک انسائیکلوپیڈیا بیان کرتا ہے:‏ ”‏ایک شخص صرف اس وجہ سے فرشتوں سے دُعا کرتا ہے تاکہ وہ خدا کے حضور ہماری شفاعت کریں۔‏“‏ کیا ہمیں شفاعت کیلئے فرشتوں سے مدد مانگنی چاہئے؟‏

خدا کا کلام خدا کے صرف دو وفادار فرشتوں،‏ میکائیل اور جبرائیل کے نام بتاتا ہے۔‏ (‏دانی‌ایل ۸:‏۱۶؛‏ ۱۲:‏۱؛‏ لوقا ۱:‏۲۶؛‏ یہوداہ ۹‏)‏ چونکہ بائبل میں ان فرشتوں کے نام آئے ہیں،‏ اسلئے ہم یہ سمجھتے ہیں کہ ہر ایک فرشتہ نہ صرف لاشخصی قوت ہے بلکہ ایک منفرد روحانی شخصیت رکھتا ہے جسکا کوئی نہ کوئی نام ہے۔‏ تاہم،‏ دیگر فرشتوں نے اپنے نام ظاہر نہیں کئے ہیں۔‏ مثال کے طور پر،‏ جب یعقوب نے اُس فرشتے کا نام پوچھا جو اُس سے ملاقات کیلئے آیا تھا تو اُس نے بتانے سے انکار کر دیا۔‏ (‏پیدایش ۳۲:‏۲۹؛‏ قضاۃ ۱۳:‏۱۷،‏ ۱۸‏)‏ بائبل میں فرشتوں کے ناموں کی کوئی فہرست نہیں دی گئی تاکہ انسان اُنہیں حد سے زیادہ توجہ نہ دینے لگ جائیں۔‏

فرشتوں کی ذمہ‌داریوں میں انسانوں تک خدا کے پیغامات پہنچانا شامل ہے۔‏ دراصل جن عبرانی اور یونانی الفاظ کا ترجمہ ”‏فرشتہ“‏ کِیا گیا ہے اُسکا مطلب ”‏پیامبر“‏ ہے۔‏ تاہم،‏ فرشتے بلندوبالا خالق تک ہماری دُعائیں پہنچانے کیلئے درمیانی کا کام انجام نہیں دیتے۔‏ خدا نے واضح کر دیا ہے کہ ہماری دُعائیں صرف اُسکے بیٹے یسوع مسیح کے نام سے خدا ہی سے کی جانی چاہئیں،‏ جس نے کہا تھا:‏ ”‏میرے نام سے جوکچھ باپ سے مانگو وہ تمکو دے۔‏“‏—‏یوحنا ۱۵:‏۱۶؛‏ ۱-‏تیمتھیس ۲:‏۵‏۔‏

اگر ہم موزوں طور پر یہوواہ خدا کے پاس جاتے ہیں تو وہ ہمیشہ ہماری سنتا ہے۔‏ بائبل یہ یقین‌دہانی کراتی ہے:‏ ”‏[‏یہوواہ]‏ اُن سب کے قریب ہے جو اُس سے دُعا کرتے ہیں۔‏ یعنی اُن سب کے جو سچائی سے دُعا کرتے ہیں۔‏“‏—‏زبور ۱۴۵:‏۱۸‏۔‏