۶۶۶—‏محض ایک پہیلی نہیں

‏”‏اُسکے سوا جس پر نشان یعنی اُس حیوان کا نام یا اُسکے نام کا عدد ہو اَور کوئی خریدوفروخت نہ کر سکے۔‏ حکمت کا یہ موقع ہے۔‏ جو سمجھ رکھتا ہے وہ اِس حیوان کا عدد گن لے کیونکہ وہ آدمی کا عدد ہے اور اُسکا عدد چھ سو چھیاسٹھ ہے۔‏“‏—‏مکاشفہ ۱۳:‏۱۷،‏ ۱۸‏۔‏

حیوان کے اِس نام یا نشان میں یعنی ۶۶۶ کے عدد میں بہت سے لوگ دلچسپی رکھتے ہیں۔‏ حیوان کے عدد کا ذکر ٹیلی‌ویژن اور انٹرنیٹ کے علاوہ فلموں،‏ کتابوں اور رسالوں میں بھی ہوا ہے۔‏ بہت سے لوگ اِس عدد کے مطلب کو جاننے کی کوشش میں ہیں۔‏

بعض کے خیال میں ۶۶۶ مخالفِ‌مسیح کا نشان ہے جسکا ذکر بائبل میں ہوا ہے۔‏ دیگر سوچتے ہیں کہ یہ عدد حیوان کے خادموں کی شناخت کیلئے اُنکو دیا جائیگا۔‏ انکے خیال میں یہ نشان یا تو انکے بدن پر گُدوایا جائیگا یا پھر ان کے جسم میں ایک مائیکروچپ کی شکل میں ڈال دیا جائیگا۔‏ دوسروں کا خیال ہے کہ ۶۶۶ ایک طرح سے کیتھولک پاپائیت کا نشان ہے۔‏ یہ لوگ پوپ کے لاطینی لقب کے حروف کو ہندسوں میں تبدیل کرکے ۶۶۶ کے نتیجے پر پہنچتے ہیں۔‏ یہ بھی کہا جاتا ہے کہ یہی نتیجہ شہنشاہ ڈائیوکلیشن کے لاطینی نام سے یا پھر شہنشاہ نیرو کے عبرانی نام سے بھی اخذ کِیا جا سکتا ہے۔‏ *

خدا کے کلام میں ۶۶۶ کا جو مطلب بیان کِیا گیا ہے وہ اِن تمام عجیب‌وغریب تصورات سے فرق ہے۔‏ اسکی وضاحت اگلے مضمون میں کی جائیگی۔‏ بائبل کے مطابق جب خدا اِس بُرے نظام کو تباہ کریگا تو وہ لوگ جن پر حیوان کا نشان درج ہے خدا کے قہر کا نشانہ بنیں گے۔‏ (‏مکاشفہ ۱۴:‏۹-‏۱۱؛‏ ۱۹:‏۲۰‏)‏ اِس سے ظاہر ہوتا ہے کہ ۶۶۶ صرف ایک پہیلی نہیں جسے تفریح کیلئے بوجھا جا سکتا ہے۔‏ یہوواہ خدا نے اِس راز کو ہمارے لئے آشکارا کِیا ہے۔‏ وہ محبت کا عظیم نمونہ اور روحانی روشنی کا سرچشمہ ہے اِسلئے وہ اِس معاملے میں ہمیں روحانی تاریکی میں نہیں رکھتا۔‏—‏۲-‏تیمتھیس ۳:‏۱۶؛‏ ۱-‏یوحنا ۱:‏۵؛‏ ۴:‏۸‏۔‏

‏[‏فٹ‌نوٹ]‏