خدا کے پیغمبر نوح کے نام ایک خط

‏”‏پیارے نوح،‏ مَیں نے بائبل میں کئی بار پڑھا ہے کہ آپ نے ایک کشتی بنائی تھی جس میں آپ اور آپکا خاندان سیلاب کی تباہی سے بچ گیا تھا۔‏“‏

مُلک فن‌لینڈ میں رہنے والی پندرہ سالہ میناماریا نے اپنا خط ایسے شروع کِیا۔‏ اُس نے ایک ادبی مقابلے میں حصہ لیا جو قومی سطح پر ہو رہا تھا۔‏ مقابلے میں حصہ لینے والوں کو ایک ایسا خط لکھنا تھا جو کسی کتاب پر مبنی تھا۔‏ خط کو یا تو مصنف سے یا پھر کتاب میں کسی کردار سے مخاطب ہونا تھا۔‏ مقابلہ میں حصہ لینے والوں کے خطوں سے ۴۰۰،‏۱ خط چنے گئے اور انہیں مقابلے کے بورڈ کو بھیجا گیا۔‏ ایک خط کو پہلا اِنعام دیا گیا۔‏ اسکے علاوہ دس خطوط کو دوسرا اِنعام ملا اور دس کو تیسرا اِنعام دیا گیا۔‏ میناماریا یہ سُن کر بہت خوش ہوئی کہ اُسکے خط کو تیسرا اِنعام ملا۔‏

نوح کی موت کو تقریباً ۰۰۰،‏۵ سال گزر چکے ہیں۔‏ پھر میناماریا نے اُسکے نام خط کیوں لکھا تھا؟‏ وہ کہتی ہے:‏ ”‏مقابلے کے بارے میں سُن کر جو کتاب پہلے میرے ذہن میں آئی وہ بائبل ہی تھی۔‏ بائبل جن اشخاص کا ذکر کرتی ہے انکے بارے میں مَیں نے اتنی بار پڑھا ہے کہ مجھے ایسے لگتا ہے جیسے مَیں اُنکو ذاتی طور پر جانتی ہوں۔‏ میرے لئے وہ آج بھی زندہ ہیں۔‏ مَیں نے نوح کے نام اپنا خط اسلئے لکھا کیونکہ اُسکی زندگی بہت ہی دلچسپ اور انوکھی تھی۔‏“‏

نوح کے نام میناماریا کا خط یوں ختم ہوتا ہے:‏ ”‏آپکا اِیمان آج بھی ہمارے لئے ایک بہت اچھی مثال ہے۔‏ بائبل میں آپکی زندگی کی بارے میں پڑھ کر دوسروں کو بھی اِیمان کی راہ پر چلنے کی حوصلہ‌افزائی ملتی ہے۔‏“‏

اس نوجوان لڑکی کے خط سے ہم دیکھ سکتے ہیں کہ بائبل واقعی تمام لوگوں کیلئے ”‏زندہ اور مؤثر“‏ ہے۔‏—‏عبرانیوں ۴:‏۱۲‏۔‏