یہوواہ کا کلام زندہ ہے

استثنا کی کتاب سے اہم نُکات

یہ ۱۴۷۳ ق.‏س.‏ع.‏ کی بات ہے۔‏ چالیس سال پہلے یہوواہ نے بنی‌اسرائیل کو مصر کی غلامی سے رِہا کِیا تھا۔‏ اِس عرصے کے دوران بنی‌اسرائیل بیابان میں پھرتے رہے کیونکہ ابھی تک اُنکی اپنی سرزمین نہیں ہے۔‏ آخرکار اسرائیلی ملکِ‌موعود کی سرحد پر پہنچ جاتے ہیں۔‏ اِس ملک پر قبضہ کرتے وقت اُنکو کون سی مشکلات کا سامنا کرنا ہوگا اور وہ اِن سے کیسے نپٹ سکیں گے؟‏

دریائےیردن کو پار کرنے اور ملکِ‌کنعان میں داخل ہونے سے پہلے موسیٰ اسرائیلیوں کو اپنی ذمہ‌داری نبھانے کیلئے تیار کرتا ہے۔‏ وہ کیسے؟‏ تقریروں کے ذریعے وہ اسرائیلیوں کی حوصلہ‌افزائی کرنے کیساتھ ساتھ اُنہیں تاکید کرتا،‏ نصیحت کرتا اور آگاہ بھی کرتا ہے۔‏ موسیٰ اُنہیں یاد دلاتا ہے کہ اُنہیں پورے دل‌وجان سے یہوواہ کی عبادت کرنی چاہئے اور دوسری قوموں کے غلط طریقوں کو نہیں اپنانا چاہئے۔‏ موسیٰ کی یہ تقریریں بائبل کی کتاب استثنا کا ایک بڑا حصہ ہیں۔‏ اِن تقریروں میں پائی جانے والی اصلاح ہمارے لئے بھی فائدہ‌مند ہے کیونکہ ہم ایسی دُنیا میں رہتے ہیں جہاں دل‌وجان سے خدا کی خدمت کرنا آسان نہیں۔‏—‏عبرانیوں ۴:‏۱۲‏۔‏

استثنا کی کتاب تقریباً دو مہینوں کے واقعات کا احاطہ کرتی ہے۔‏ (‏استثنا ۱:‏۳؛‏ یشوع ۴:‏۱۹‏)‏ آخری باب کے سوا،‏ موسیٰ نے اِس پوری کتاب کو لکھا تھا۔‏  * آئیے ہم دیکھتے ہیں کہ اِس کتاب میں پائی جانے والی اصلاح پر عمل کرنے سے ہم پورے دل‌وجان سے یہوواہ خدا کی خدمت کیسے کر سکتے ہیں۔‏

‏’‏وہ باتیں جو تُو نے اپنی آنکھ سے دیکھی ہیں بھول نہ جانا‘‏

‏(‏استثنا ۱:‏۱–‏۴:‏۴۹‏)‏

اسرائیلی اب ملکِ‌موعود پر قبضہ کرنے کے لئے تیاری باندھ رہے ہیں۔‏  اُن کی حوصلہ‌افزائی کرنے کے لئے موسیٰ اپنی پہلی تقریر میں بیابان میں ہونے والے کچھ واقعات کی یاد تازہ کرتا ہے۔‏ موسیٰ بتاتا ہے کہ یہوواہ نے اسرائیلیوں کے مقدمات کو نپٹانے کے لئے لائق اشخاص مقرر کئے۔‏ یہ ان کی راہنمائی کرنے کا ایک پُرمحبت انتظام تھا۔‏ پھر موسیٰ انہیں یاد دلاتا ہے کہ دس جاسوسوں کی بُری رپورٹ کی وجہ سے پچھلی نسل ملکِ‌موعود میں داخل ہونے سے پہلے ہی مر گئی تھی۔‏ ذرا سوچیں کہ ان مثالوں کا اسرائیلیوں پر کیسا اثر پڑا ہوگا جو ملکِ‌موعود کو اپنی آنکھوں سے دیکھ رہے تھے۔‏

یہوواہ نے اسرائیلیوں کو اب تک اپنے دُشمنوں پر فتح سے نوازا تھا۔‏ اسلئے اسرائیلیوں میں ملکِ‌موعود پر قبضہ کرنے کی ہمت ہے۔‏ کنعان کے تمام لوگ بُت‌پرست ہیں اس وجہ سے موسیٰ اسرائیلیوں کو بُت‌پرستی سے آگاہ کرتا ہے۔‏

صحیفائی سوالات کے جواب:‏

۲:‏۴-‏۶،‏ ۹،‏ ۱۹،‏ ۲۴،‏ ۳۱-‏۳۵؛‏ ۳:‏۱-‏۶‏—‏اسرائیلیوں نے یردن کے مشرق میں رہنے والے کچھ لوگوں کو تباہ تو کِیا لیکن دوسروں کو کیوں زندہ چھوڑ دیا؟‏ یہوواہ نے حکم دیا تھا کہ اُنہیں بنی‌عیسو کیساتھ جنگ نہیں کرنی تھی۔‏ کیوں؟‏ کیونکہ وہ یعقوب کے بھائی کی نسل تھی۔‏ اسرائیلیوں کو نہ موآبیوں اور نہ عمونیوں سے لڑنا تھا کیونکہ وہ ابرہام کے بھتیجے لوط کی نسل تھے۔‏ لیکن اموری بادشاہ سیحون اور عوج کا بنی‌اسرائیل سے کوئی خونی رشتہ نہیں تھا اسلئے وہ ملکِ‌موعود پر کوئی حق نہیں رکھتے تھے۔‏ اِسکے علاوہ سیحون نے اسرائیلیوں کو اپنے ملک سے گزرنے کی اجازت نہیں دی تھی اور عوج لڑائی پر اُتر آیا تھا۔‏ اِسلئے یہوواہ نے اسرائیلیوں کو حکم دیا کہ وہ اِن بادشاہوں کے شہروں کو اور اِن میں رہنے والے تمام لوگوں کو تباہ کر دیں۔‏

۴:‏۱۵-‏۲۰،‏ ۲۳،‏ ۲۴‏—‏مورتوں کو تراشنا منع کِیا گیا ہے۔‏ کیا فن کے طور پر مجسّمے بنانا بھی اس حکم میں شامل ہے؟‏ جی‌نہیں۔‏ یہاں ایسی مورتوں کا بنانا منع کِیا گیا ہے جو ”‏سجدہ اور عبادت کرنے“‏ کیلئے استعمال کی جاتی ہیں۔‏ خدا کے کلام میں مجسّمہ‌سازی کرنے اور تصویریں بنانے کیلئے منع نہیں کِیا گیا ہے۔‏—‏۱-‏سلاطین ۷:‏۱۸،‏ ۲۵‏۔‏

ہمارے لئے سبق:‏

۱:‏۲،‏ ۱۹‏۔‏ بنی اسرائیل نے ۳۸ سال بیابان میں گزارے تھے حالانکہ ’‏کوہِ‌شعیرؔ کی راہ سے حورب سے قادس‌برنیع تک محض گیارہ دن‘‏ کا سفر تھا۔‏ اسرائیلیوں نے یہوواہ خدا سے نافرمانی کرنے کی کتنی بڑی قیمت چکائی۔‏—‏گنتی ۱۴:‏۲۶-‏۳۴‏۔‏

۱:‏۱۶،‏ ۱۷‏۔‏ یہوواہ کے معیار نہیں بدلتے۔‏ جو بھائی آج کسی کلیسیا کی عدالتی کمیٹی کا حصہ ہیں،‏ وہ طرفداری یا کسی کے ڈر کی بِنا پر فیصلہ نہیں کرتے۔‏

۴:‏۹‏۔‏ اسرائیلی تب ہی کامیاب ہو سکتے تھے جب وہ اُن ’‏باتوں کو جو اُنہوں نے اپنی آنکھوں سے دیکھی تھیں‘‏ یاد رکھتے۔‏ آج نئی دُنیا بہت قریب ہے۔‏ اِسلئے ہمارے لئے بھی یہوواہ خدا کے کلام سے اُسکے شاندار کاموں کے بارے میں سیکھنا اور انہیں یاد رکھنا بہت اہم ہے۔‏

یہوواہ سے پیار کریں اور اُسکے احکام پر عمل کریں

‏(‏استثنا ۵:‏۱–‏۲۶:‏۱۹‏)‏

اپنی دوسری تقریر میں موسیٰ اسرائیلیوں کو کوہِ‌سینا پر دی گئی شریعت کی یاد دلاتا ہے۔‏ وہ اُس میں سے دس احکام کو دہراتا ہے۔‏ شریعت میں سات قوموں کے نام بھی دئے گئے تھے جو تباہی کیلئے مقرر کی گئی تھیں۔‏ بنی‌اسرائیل کو ایک اَور اہم سبق کی یاد دلائی جاتی ہے جو اُنہوں نے بیابان میں سیکھا تھا:‏ ”‏انسان صرف روٹی ہی سے جیتا نہیں رہتا بلکہ ہر بات سے جو [‏یہوواہ]‏ کے مُنہ سے نکلتی ہے وہ جیتا رہتا ہے۔‏“‏ اب اُنہیں ”‏ان سب حکموں کو ماننا“‏ تھا۔‏—‏استثنا ۸:‏۳؛‏ ۱۱:‏۸‏۔‏

جب اسرائیلیوں نے ملکِ‌موعود میں آباد ہونا تھا تو اُنہیں اس شریعت کی ضرورت تھی۔‏ شریعت میں پائے جانے والے قوانین عبادت کے علاوہ عدالت،‏ حکومت،‏ جنگ اور معاشرتی اور گھریلو معاملوں میں بھی اسرائیل کی راہنمائی کرینگے۔‏ موسیٰ ان تمام قوانین کو دہراتا ہے اور یہوواہ سے پیار کرنے اور اُسکے فرمانبردار ہونے پر زور دیتا ہے۔‏

صحیفائی سوالات کے جواب:‏

۸:‏۳،‏ ۴‏—‏یہ کیسے ممکن تھا کہ بیابان میں اسرائیلیوں کے کپڑے پُرانے نہیں ہوئے اور نہ ہی اُنکے پاؤں سوجے؟‏ جسطرح یہوواہ  نے اسرائیلیوں کو معجزانہ طور پر کھانے کیلئے من دیا تھا اُسی طرح یہوواہ نے اُنکے کپڑے پُرانے نہیں ہونے دئے اور نہ ہی اُنکے پاؤں سوجنے دئے۔‏ اسرائیلیوں نے وہی کپڑے اور جوتے استعمال کئے جو مصر سے بیابان میں آتے وقت اُنکے پاس تھے۔‏ غالباً جب ایک بالغ مر جاتا تو اُسکے کپڑے کسی جوان کو دے دئے جاتے تھے۔‏ اسرائیل کا شمار بیابان میں آتے وقت اور وہاں سے جاتے وقت بھی کِیا گیا تھا اور اُس دوران اسرائیلیوں کی تعداد میں اِضافہ نہیں ہوا تھا۔‏ اِسکا مطلب ہے کہ جتنے کپڑے اور جوتے اُنکے پاس تھے وہ اُن سب کیلئے کافی تھے۔‏—‏گنتی ۲:‏۳۲؛‏ ۲۶:‏۵۱‏۔‏

۱۴:‏۲۱‏—‏اسرائیلی ایسے جانوروں کا گوشت نہیں کھا سکتے تھے جن کا خون بہایا نہ گیا ہو۔‏ پھر انہیں یہ گوشت پردیسیوں کو دینے یا بیچنے کی اجازت کیوں دی گئی تھی؟‏ بائبل میں ”‏پردیسی“‏ اُن کو کہا جاتا ہے جو اسرائیلی نہیں تھے۔‏ ان میں نومرید بھی شامل تھے۔‏ یہ لوگ شریعت کے ماتحت تھے اس لئے وہ ایسے جانوروں کا گوشت نہیں کھا سکتے تھے جن کا خون بہایا نہ گیا ہو۔‏ (‏احبار ۱۷:‏۱۰‏)‏ تاہم ان پردیسیوں میں ایسے لوگ بھی شامل تھے جو اسرائیلیوں کے بیچ تو رہتے تھے لیکن یہوواہ کی عبادت نہیں کرتے تھے۔‏ انہیں اسرائیل کے بنیادی قاعدے اور قوانین کے مطابق زندگی بسر کرنی تھی لیکن وہ شریعت کے ماتحت نہیں تھے۔‏ اس لئے وہ ایسے جانوروں کا گوشت استعمال کر سکتے تھے۔‏ اسرائیلیوں کو اِن لوگوں کو ایسا گوشت دینے یا بیچنے کی اجازت تھی۔‏

۲۴:‏۶‏—‏‏”‏چکی کو یا اُس کے اُوپر کے پاٹ کو گرو“‏ رکھنا ”‏آدمی کی جان کو گرو“‏ رکھنے کے برابر کیوں تھا؟‏ چکی یا اُس کے اُوپر کا پاٹ خوراک تیار کرنے کے لئے نہایت ضروری تھا۔‏ اس لئے یہ چیزیں آدمی کی ”‏جان“‏ کے برابر تھیں۔‏ اگر کوئی اِن دونوں میں سے کسی ایک کو گرو رکھتا تو وہ ایک خاندان کو اپنی زندگی برقرار رکھنے والی چیز سے محروم کر دیتا۔‏

۲۵:‏۹‏—‏جب ایک آدمی اپنے بھائی کی بیوہ سے شادی کرنے سے انکار کر دیتا تو اُسکے پاؤں سے جوتی اُتار کر اُسکے مُنہ پر تھوکا جاتا۔‏ اِسکی کیا اہمیت تھی؟‏ اسرائیل میں ”‏چھڑانے .‏ .‏ .‏ کے بارے میں یہ معمول تھا کہ مرد اپنی جوتی اُتار کر اپنے پڑوسی کو دے دیتا تھا۔‏“‏ (‏روت ۴:‏۷‏)‏ جب ایک آدمی اپنے بھائی کی بیوہ سے شادی کرنے سے انکار کر دیتا تو اُسکی جوتی اُتاری جاتی۔‏ اس سے ظاہر ہوتا تھا کہ وہ اپنے مُردہ بھائی کیلئے وارث پیدا کرنے سے انکار کر رہا ہے۔‏ یہ بہت ہی شرمناک بات تھی۔‏ (‏استثنا ۲۵:‏۱۰‏)‏ اُسکی بےعزتی کرنے کیلئے اُسکے مُنہ پر تھوکا جاتا۔‏—‏گنتی ۱۲:‏۱۴‏۔‏

ہمارے لئے سبق:‏

۶:‏۶-‏۹‏۔‏ اسرائیلیوں کی طرح ہمیں بھی یہوواہ کے قوانین کو اچھی طرح سے جاننا چاہئے۔‏ اسکے علاوہ اپنے بچوں کو بھی خدا کے قوانین کے بارے میں سکھانا بہت اہم ہے۔‏ ہمیں چاہئے کہ ہم خدا کے قوانین کو ’‏اپنے ہاتھ پر باندھیں۔‏‘‏ اِسکا مطلب ہے کہ ہمیں ہر کام میں یہوواہ کا فرمانبردار ہونا چاہئے۔‏ ہماری فرمانبرداری ہماری ”‏پیشانی پر ٹیکوں کی مانند“‏ ہونی چاہئے یعنی سب کو صاف ظاہر ہونا چاہئے کہ ہم یہوواہ کے فرمانبردار ہیں۔‏

۶:‏۱۶‏۔‏ ایسا کبھی نہ ہو کہ ہم یہوواہ خدا کو آزمائیں جیسے اسرائیلیوں نے مسہ میں کِیا تھا،‏ جہاں پانی نہ ہونے کی وجہ سے وہ بڑبڑائے تھے۔‏—‏خروج ۱۷:‏۱-‏۷‏۔‏

۸:‏۱۱-‏۱۸‏۔‏ دولت کے لالچ میں ہم یہوواہ کو بھول سکتے ہیں۔‏

۹:‏۴-‏۶‏۔‏ اپنے نیک کاموں کا ڈھنڈورا پیٹنے سے بچیں۔‏

 ۱۳:‏۶‏۔‏ ہمیں کسی کے بہکانے پر یہوواہ کی عبادت سے مُنہ نہیں موڑنا چاہئے۔‏

۱۴:‏۱‏۔‏ اپنے آپ کو زخمی کرنا منع ہے کیونکہ ہمارا جسم یہوواہ کی طرف سے ایک تحفہ ہے اور ہمیں اِسکی اچھی طرح سے دیکھ‌بھال کرنی چاہئے۔‏ اسکے علاوہ یہ رواج جھوٹے مذہب سے بھی تعلق رکھتا ہے۔‏ (‏۱-‏سلاطین ۱۸:‏۲۵-‏۲۸‏)‏ ہم جانتے ہیں کہ وہ لوگ جو مر چکے ہیں پھر سے جی اُٹھینگے۔‏ اسلئے ماتم کا ایسا اظہار کرنا مناسب نہیں ہے۔‏

۲۰:‏۵-‏۷؛‏ ۲۴:‏۵‏۔‏ شاید ہمیں ایک بہت ہی اہم کام انجام دینے میں کسی شخص کی مدد درکار ہو۔‏ لیکن پھر بھی ہمیں اسکی ذاتی صورتحال کا لحاظ کرنا چاہئے۔‏

۲۲:‏۲۳-‏۲۷‏۔‏ اگر کوئی کسی عورت کی عصمت‌دری کرنے کی کوشش کرتا ہے تو عورت کو اپنے دفاع میں چیخنا چلّانا چاہئے۔‏

‏”‏زندگی کو اختیار کر“‏

‏(‏استثنا ۲۷:‏۱–‏۳۴:‏۱۲‏)‏

اپنی تیسری تقریر میں موسیٰ بتاتا ہے کہ یردن کو پار کرنے کے بعد اسرائیلیوں کو بڑے پتھروں پر شریعت کی سب باتیں لکھنا ہونگی۔‏ پھر انہیں ان لعنتوں کو سنانا ہوگا جو نافرمانوں پر آئینگی اور اُن برکتوں کا ذکر کرنا ہوگا جو فرمانبرداروں پر نازل ہونگی۔‏ چوتھی تقریر کے آغاز میں اُس عہد کو دہرایا جاتا ہے جو یہوواہ اور اسرائیلیوں کے درمیان باندھا گیا تھا۔‏ موسیٰ اسرائیلیوں کو نافرمانی سے بچنے کی تاکید کرتا ہے اور اُنہیں ”‏زندگی کو اختیار“‏ کرنے کی حوصلہ‌افزائی بھی کرتا ہے۔‏—‏استثنا ۳۰:‏۱۹‏۔‏

اِن چار تقاریر کے بعد موسیٰ اسرائیلیوں کو بتاتا ہے کہ وہ مرنے والا ہے لہٰذا اُنکا پیشوا بدل جائیگا۔‏ موسیٰ اُنہیں ایک بہت ہی خوبصورت گیت بھی سکھاتا ہے۔‏ گیت میں یہوواہ خدا کی حمد کے علاوہ بیوفائی کرنے کی سزا کا ذکر بھی کِیا جاتا ہے۔‏ موسیٰ ۱۲۰ سال کی عمر میں ہر قبیلے کو برکت دینے کے بعد مر جاتا ہے۔‏ اُسکا ماتم تیس دن تک جاری رہتا ہے۔‏

صحیفائی سوالات کے جواب:‏

۳۲:‏۱۳،‏ ۱۴‏۔‏ اسرائیلیوں کیلئے چربی کھانا منع تھا۔‏ پھر یہ کیوں کہا گیا ہے کہ وہ ”‏بّروں کی چربی“‏ کھاتے تھے؟‏ یہاں ”‏بّروں کی چربی“‏ کو علامتی طور پر استعمال کِیا گیا ہے،‏ جسکا مطلب ہے کہ وہ گلّے کے سب سے اچھے جانور کھاتے تھے۔‏ اُسی حوالے میں علامتی طور پر کہا جاتا ہے کہ اسرائیلی ”‏گندم کا گودا“‏ کھاتے اور ”‏خونِ‌انگور“‏ پیتے تھے۔‏ (‏کیتھولک ورشن‏)‏

۳۳:‏۱-‏۲۹‏—‏موسیٰ نے جس دُعایِ‌خیر کے ذریعے بنی‌اسرائیل کو برکت دی تھی اُس میں شمعون کو کیوں شامل نہیں کِیا گیا؟‏ کیونکہ شمعون اور اُسکا بھائی لاوی ’‏تُندخو اور سخت قہرآلود‘‏ اشخاص تھے۔‏ (‏پیدایش ۳۴:‏۱۳-‏۳۱؛‏ ۴۹:‏۵-‏۷‏)‏ شمعون اور لاوی کی میراث دوسرے قبیلوں سے فرق تھی۔‏ بنی‌لاوی کی میراث کا حصہ ۴۸ شہر تھے۔‏ بنی‌شمعون کی میراث بنی‌یہوداہ کے حصہ میں سے لی گئی تھی۔‏ (‏یشوع ۱۹:‏۹؛‏ ۲۱:‏۴۱،‏ ۴۲‏)‏ اِسلئے موسیٰ نے اس قبیلے کو خاص طور پر برکت نہیں دی لیکن وہ اُس برکت میں شامل تھا جو موسیٰ نے مجموعی طور پر بنی‌اسرائیل کو دی تھی۔‏

ہمارے لئے سبق:‏

۳۱:‏۱۲‏۔‏ بچوں اور نوجوانوں کو چاہئے کہ وہ بالغوں سمیت کلیسیا کے اجلاسوں کے پروگرام کو غور سے سنیں اور اسے سمجھنے کی کوشش کریں۔‏

۳۲:‏۴‏۔‏ یہوواہ خدا کے سب کام شاندار ہیں۔‏ اور وہ انصاف،‏ حکمت،‏ محبت اور قوت کی خوبیوں کو پورے توازن کیساتھ ظاہر کرتا ہے۔‏

استثنا کی کتاب ہمارے لئے بہت ہی قیمتی ہے

استثنا کی کتاب میں بیان کِیا جاتا ہے کہ ’‏یہوواہ خدا ایک ہی ہے۔‏‘‏ (‏استثنا ۶:‏۴‏)‏ یہ کتاب اُس اُمت کے بارے میں ہے جسکو یہوواہ کے قریب ہونے کا شرف حاصل تھا۔‏ استثنا کی کتاب ہمیں بُت‌پرستی سے خبردار کرتی اور صرف یہوواہ خدا کی عبادت کرنے کی ہدایت دیتی ہے۔‏

واقعی استثنا کی کتاب آج بھی ہمارے لئے بہت اہم ہے۔‏ اگرچہ موسیٰ کی شریعت تو ہم پر لاگو نہیں ہوتی پھر بھی ہم استثنا کی کتاب سے بہت کچھ سیکھ سکتے ہیں۔‏ یہ کتاب ہمیں ”‏اپنے سارے دل اور اپنی ساری جان اور اپنی ساری طاقت سے [‏یہوواہ]‏ اپنے خدا سے محبت“‏ کرنے میں مدد دے سکتی ہے۔‏—‏استثنا ۶:‏۵‏۔‏

‏[‏فٹ‌نوٹ]‏

‏[‏صفحہ ۲۴ پر نقشہ]‏

‏(‏تصویر کے لئے چھپے ہوئے صفحے کو دیکھیں)‏

شعیر

قادس‌برنیع

کوہِ‌سینا (‏حورب)‏

بحرِقلزم

‏[‏تصویر کا حوالہ]‏

Based on maps copyrighted

by Pictorial Archive

‏(‎Near Eastern History‎)‏

Est. and Survey of Israel

‏[‏صفحہ ۲۴ پر تصویر]‏

استثنا کی کتاب کا زیادہ‌تر حصہ موسیٰ کی تقریروں پر مشتمل ہے

‏[‏صفحہ ۲۶ پر تصویر]‏

یہوواہ نے اسرائیلیوں کو خوراک کے طور پر من دیا تھا۔‏ اِس سے ہم کیا سبق سیکھ سکتے ہیں؟‏

‏[‏صفحہ ۲۶ پر تصویر]‏

چکی کو یا اُسکے اُوپر کے پاٹ کو گرو رکھنا ”‏آدمی کی جان کو گرو“‏ رکھنے کے برابر تھا