بائبل کا نفیس ترجمہ

جرمنی میں ۱۷ویں اور ۱۸ویں صدی کے دوران لُوتھرن چرچ کے زیادہ‌تر اراکین نے اپنے مذہبی عقیدوں پر عمل کرنا چھوڑ دیا تھا۔‏ چند افراد اس صورتحال کی وجہ سے کافی پریشان تھے۔‏ اسلئے اُنہوں نے عوام میں دینداری کو فروغ دینے کیلئے ایک نئی تحریک کو جنم دیا۔‏ البتہ اس تحریک کے پیروکاروں کو اکثر ٹھٹھوں میں اُڑایا جاتا،‏ یہاں تک کہ اُنکو اذیت کا نشانہ بھی بنایا جاتا۔‏ بعض مشہور علماء بھی اس تحریک سے تعلق رکھتے تھے۔‏ اُن میں سے کئی اپنی جان کی خاطر شہر بیرلےبُرگ کو بھاگ گئے۔‏ اس شہر کے نواب جنکا نام کازیمیر تھا بڑے مذہبی تھے اور ایسے لوگوں کا بہت احترام کرتے تھے جو اپنے مذہبی عقیدوں کے پکے تھے۔‏ اسلئے نواب کازیمیر ان علماء کو پناہ دینے کو تیار تھے۔‏ اسکے نتیجے میں شہر بیرلےبُرگ کے محفوظ ماحول میں بائبل کا جرمن زبان میں ترجمہ ہونے لگا۔‏ یہ ترجمہ آج تک ”‏بیرلےبُرگ بائبل“‏ کے نام سے مشہور ہے۔‏ اسکا ترجمان کون تھا؟‏

اسکے ترجمان یوحن ہاؤگ نامی ایک عالم تھے۔‏ اُنہیں اپنی مذہبی تعلیمات کی وجہ سے اپنے آبائی شہر کو چھوڑنے پر مجبور کر دیا گیا تھا۔‏ وہ بہت سی زبانوں میں ماہر تھے۔‏ بیرلےبُرگ پہنچنے کے کچھ عرصہ بعد اُنہوں نے دوسرے علماء کو اپنا ارادہ بتایا۔‏ تاریخ کی ایک کتاب اس سلسلے میں بیان کرتی ہے کہ ”‏وہ بائبل کا نفیس‌ترین ترجمہ کرنا چاہتے تھے۔‏ جو غلطیاں لُوتھر کے ترجمے میں پائی جاتی تھیں،‏ ہاؤگ اُنہیں اپنے ترجمے میں درست کرنا چاہتے تھے۔‏ وہ چاہتے تھے کہ خدا کا کلام صحیح طرح سے سمجھا جائے۔‏“‏ ہاؤگ یہ بھی خواہش رکھتے تھے کہ خدا کا کلام عام لوگوں کو آسانی سے سمجھ میں آ جائے۔‏ وہ اکیلے میں کام نہیں کر رہے تھے بلکہ یورپ کے بہت سے دوسرے علماء بھی اس میں اُنکا ہاتھ بٹا رہے تھے۔‏ آخرکار ۲۰ سال کے بعد،‏ یعنی سن ۱۷۲۶ میں یہ عمدہ ترجمہ مکمل ہو گیا۔‏ ہاؤگ نے اسکے حاشیہ پر آیتوں کی تشریح بھی کی تھی۔‏ اس تشریح کی وجہ سے ترجمہ کا مواد اتنا زیادہ ہو گیا کہ اسے آٹھ جِلدوں میں شائع کرنا پڑا۔‏

بیرلےبُرگ بائبل کی چند خصوصیات پر غور کیجئے۔‏ مثال کے طور پر اس میں خروج ۶:‏۲،‏ ۳ کو ایسے بیان کِیا گیا ہے:‏ ”‏خدا نے موسیٰؔ سے مخاطب ہوتے ہوئے کہا:‏ خداوند مَیں ہی ہُوں!‏ اور مَیں اؔبرہام،‏ اِضحاؔق اور یعقوؔب کو قادرِمطلق خدا کے طور پر دکھائی دیا۔‏ لیکن اپنا نام یہوؔواہ مَیں نے اُن پر ظاہر نہیں کِیا۔‏“‏ پھر اس آیت کی تشریح یوں کی گئی ہے:‏ ”‏یہوؔواہ وہ نام ہے جسے خدا نے اپنے لئے مخصوص کِیا ہے اور جسے اُس نے انسان پر ظاہر کِیا ہے۔‏“‏ اس آیت کے علاوہ خدا کا نام یہوواہ خروج ۳:‏۱۵ اور خروج ۳۴:‏۶ کی تشریح میں بھی استعمال کِیا گیا ہے۔‏

بیرلےبُرگ بائبل کے علاوہ جرمن زبان کی بہت سی دوسری بائبلوں میں بھی خدا کا نام یہوواہ استعمال کِیا گیا ہے۔‏ مثال کے طور پر یہوواہ کے گواہوں نے بائبل کا ایک ترجمہ شائع کِیا ہے جو نیو ورلڈ ٹرانسلیشن کے نام سے مشہور ہو گیا ہے۔‏ اس ترجمہ میں بھی یہوواہ کا نام استعمال کِیا گیا ہے جس سے خدا کی بڑائی ہوتی ہے۔‏