ایک ”‏نہایت قیمتی پتھر“‏

یوحنا رسول نے ایک رویا میں آسمان پر ایک بہت ہی شاندار تخت دیکھا۔‏ اس تخت پر ایک شخص بیٹھا تھا جو ’‏سنگِ‌یشب اور عقیق سا معلوم ہوتا تھا۔‏‘‏ (‏مکاشفہ ۴:‏۲،‏ ۳‏)‏ آجکل سنگِ‌یشب اور عقیق کا لقب ایسے قیمتی پتھروں کی طرف اشارہ کرتا ہے جو عموماً غیرشفاف ہوتے ہیں۔‏ توپھر جس شخص کو یوحنا نے رویا میں دیکھا تھا کیا وہ ایک غیرشفاف پتھر کی مانند تھا جس میں چمک نہیں ہوتی؟‏

قدیم زمانے میں جن قیمتی پتھروں کو یہ لقب دیا جاتا تھا دراصل وہ مختلف رنگوں والے شفاف پتھر ہوتے تھے۔‏ ان میں چمکدار ہیرے بھی شامل تھے۔‏ بائبل کے ایک عالم کے مطابق مکاشفہ ۴:‏۳ میں جس ”‏سنگِ‌یشب کا ذکر کِیا گیا ہے یہ ایک نہایت قیمتی اور مہنگا پتھر تھا۔‏“‏ اسکے علاوہ مکاشفہ کی کتاب میں یوحنا آسمانی شہر یروشلیم کا ذکر کرتے ہوئے کہتا ہے کہ ”‏اُسکی چمک نہایت قیمتی پتھر یعنی اُس یشب کی سی تھی جو بلور کی طرح شفاف ہو۔‏“‏ (‏مکاشفہ ۲۱:‏۱۰،‏ ۱۱‏)‏ اس سے ظاہر ہوتا ہے کہ یوحنا جن قیمتی پتھروں کا ذکر کر رہا تھا وہ غیرشفاف نہیں تھے بلکہ روشنی میں ہیروں کی طرح چمکتے تھے۔‏

یوحنا رسول نے اپنی رویا میں جس شخص کو تخت پر بیٹھے دیکھا تھا وہ بھی ایک قیمتی ہیرے کی طرح نہایت شفاف ہے۔‏ دراصل یوحنا کائنات کی سب سے شاندار ہستی یہوواہ خدا کے بارے میں بیان کر رہا تھا۔‏ یہوواہ خدا سے زیادہ پاک اس کائنات میں اَور کوئی نہیں۔‏ اسلئے یوحنا رسول نے لکھا کہ ”‏خدا نور ہے اور اُس میں ذرا بھی تاریکی نہیں۔‏“‏ (‏۱-‏یوحنا ۱:‏۵‏)‏ اور اُس نے مسیحیوں کو نصیحت دی کہ ’‏اپنے آپکو ویسا ہی پاک کر جیسا وہ پاک ہے۔‏‘‏—‏۱-‏یوحنا ۳:‏۳‏۔‏

پاک ہونے کے لئے ہمیں کیا کرنا چاہئے؟‏ ہمیں اس بات پر پورا یقین کرنا چاہئے کہ ہمارے گُناہ یسوع کے بہائے ہوئے خون کے ذریعے ہی معاف ہو سکتے ہیں۔‏ اسکے علاوہ ہمیں باقاعدگی سے خدا کے کلام پر غور کرنا اور اِس پر عمل بھی کرنا چاہئے۔‏ اسطرح ہم ’‏نور میں چلنے‘‏ کے قابل ہونگے۔‏—‏۱-‏یوحنا ۱:‏۷‏۔‏