ایک چھوٹے سے بٹے کی بڑی اہمیت

عبرانی لفظ ”‏پیم“‏ کا ذکر بائبل میں صرف ایک ہی بار ہوا ہے یعنی ۱-‏سموئیل ۱۳:‏۲۱ میں۔‏ بادشاہ ساؤل کے زمانے میں بنی‌اسرائیل فلستی لوہاروں سے اپنے اَوزار تیز کرواتے تھے۔‏ بائبل کے ایک جدید ترجمہ نیو ورلڈ ٹرانسلیشن میں ۱-‏سموئیل ۱۳:‏۲۱ کو یوں بیان کِیا گیا ہے:‏ ”‏وہ پھالیوں اور کدالوں اور کانٹوں اور کلہاڑوں کو تیز کرنے اور پینوں کے درست کرنے کی قیمت ایک ایک ’‏پیم‘‏ لگاتے تھے۔‏“‏

‏”‏پیم“‏ کیا چیز ہے،‏ یہ بات صدیوں تک ایک بھید رہی تھی۔‏ پھر ۱۹۰۷ میں قدیم اسرائیل کے شہر جزر کے کھنڈرات میں سے ایک چھوٹا سا بٹا دریافت ہوا جس پر ”‏پیم“‏ لکھا تھا۔‏ سن ۱۹۰۷ سے پہلے بائبل کے مترجمین کو معلوم نہیں تھا کہ ”‏پیم“‏ کیا چیز ہے اسلئے وہ ۱-‏سموئیل ۱۳:‏۲۱ کا ترجمہ اپنی سمجھ کے مطابق کِیا کرتے تھے۔‏ مثال کے طور پر اُردو بائبل میں اس آیت کا یوں ترجمہ کِیا گیا ہے:‏ ”‏کدالوں اور پھالیوں اور کانٹوں اور کلہاڑوں کیلئے اور پینوں کے درست کرنے کیلئے وہ ریتی رکھتے تھے۔‏“‏

قدیم اسرائیل میں وزن کی اِکائی ایک مِثقال تھی۔‏ آجکل علماء جانتے ہیں کہ ”‏پیم“‏ ایک مِثقال کے دو تہائی حصے کے برابر تھا یعنی ۸۲.‏۷ گرام کے برابر۔‏ اسکا مطلب ہے کہ اسرائیلیوں کے اَوزار تیز کرنے کیلئے فلستی لوہار چاندی کے ایک ایسے ٹکڑے کے دام لیتے تھے جسکا وزن ایک ”‏پیم“‏ کے برابر تھا۔‏ لیکن جب ۶۰۷ ق.‏س.‏ع.‏ میں یہوداہ کی سلطنت اور اسکے دارالحکومت یروشلیم کو تباہ‌وبرباد کر دیا گیا تو مِثقال اور ”‏پیم“‏ کا استعمال ختم ہو گیا۔‏ اس بات سے ہم آجکل یہ ثابت کر سکتے ہیں کہ جو تاریخی معلومات خدا کے کلام میں درج ہیں،‏ یہ بالکل صحیح ہیں۔‏ وہ کیسے؟‏

بعض علماء کا کہنا ہے کہ ۱-‏سموئیل کی کتاب سمیت باقی عبرانی صحائف بھی یسوع مسیح کے زمانے سے محض ایک یا دو سو سال پہلے لکھے گئے تھے۔‏ اسلئے وہ کہتے ہیں کہ ”‏بائبل کے عبرانی صحائف سے قدیم اسرائیل کی تاریخ کے بارے میں کچھ بھی معلوم نہیں کِیا جا سکتا۔‏ جو واقعات ان میں درج ہیں یہ تاریخی واقعات نہیں بلکہ یہودی اور عیسائی مصنّفین کی ایجاد ہیں۔‏“‏

لیکن پروفیسر ولیم ڈیور نے ”‏پیم“‏ کے بٹے کے متعلق یوں لکھا:‏ ”‏یہ ہو ہی نہیں سکتا کہ بائبل کے مصنّفین نے ’‏پیم‘‏ کے بٹے کا ذکر سموئیل کے زمانے کے صدیوں بعد کِیا تھا کیونکہ اُس وقت تک ’‏پیم‘‏ کا نام‌ونشان ہی ختم ہو گیا تھا۔‏ .‏ .‏ .‏ ۲۰ ویں صدی تک اس لفظ کا معنی چھپا رہا۔‏ تب قدیم زمانے کے ایسے بٹے دریافت ہوئے جن پر عبرانی لفظ ’‏پیم‘‏ درج تھا۔‏ اگر عبرانی صحائف کے تمام واقعات محض مصنّفین کی ایجاد ہوتے توپھر یہ مصنّفین ’‏پیم‘‏ کے بارے میں کیسے جان سکتے تھے؟‏ کئی لوگ شاید اعتراض کریں کہ ’‏پیم‘‏ تو صرف ایک چھوٹی سی تفصیل ہے اور یہ بالکل درست ہے۔‏ لیکن تاریخ بہت سی چھوٹی تفصیلات پر مشتمل ہوتی ہے۔‏“‏

‏[‏صفحہ ۲۹ پر تصویر]‏

‏”‏پیم“‏ ایک مِثقال کے دو تہائی حصے کے برابر تھا