یہوواہ کا کلام زندہ ہے

سموئیل کی پہلی کتاب سے اہم نکات

بنی‌اسرائیل کے لئے ایک نیا دَور شروع ہونے والا ہے۔‏ تقریباً تین سو سال پہلے یشوع نے مُلکِ‌موعود پر قبضہ کِیا تھا۔‏ اُس وقت سے لیکر اب تک قضاۃ بنی‌اسرائیل کی راہنمائی کرتے آئے ہیں۔‏ اب ۱۱۱۷ ق.‏س.‏ع.‏ کی بات ہے کہ اسرائیل کے بزرگ سموئیل نبی کے پاس آتے ہیں۔‏ وہ نبی سے درخواست کرتے ہیں کہ وہ ان کیلئے ایک بادشاہ مقرر کرے۔‏ سموئیل نبی اس معاملے میں یہوواہ خدا سے ہدایت مانگتا ہے۔‏ یہوواہ لوگوں کی درخواست مان لیتا ہے۔‏ نتیجتاً اس قوم پر پہلی بار ایک انسانی بادشاہ حکمرانی کرنے لگتا ہے۔‏ اسکا انجام کیا ہوتا ہے؟‏ یقیناً،‏ اس واقعے کی داستان آپکو بڑی دلچسپ لگے گی۔‏ اسکی تفصیل بائبل میں سموئیل کی پہلی کتاب میں درج ہے۔‏

سموئیل،‏ ناتن اور جاد نے اس کتاب کو درج کِیا۔‏ اس میں اُن واقعات کی تفصیل دی گئی ہے جو بنی‌اسرائیل میں سن ۱۱۸۰ سے لیکر ۱۰۷۸ ق.‏س.‏ع.‏ تک یعنی ۱۰۲ سال کے دوران واقع ہوئے تھے۔‏ (‏۱-‏تواریخ ۲۹:‏۲۹‏)‏ سموئیل کی پہلی کتاب چار اسرائیلی رہنماؤں کی داستان ہے۔‏ ان میں سے دو قاضی اور دو بادشاہ تھے،‏ دو یہوواہ خدا کے وفادار رہے اور دو نے اُسکی بےوفائی کی۔‏ اسکے علاوہ یہ کتاب دو مثالی عورتوں کی بھی داستان ہے۔‏ پھر ہم اس میں ایک ایسے جنگجو آدمی کے بارے میں پڑھتے ہیں جو بہادر ہونے کیساتھ ساتھ نرم‌دل بھی تھا۔‏ اس کتاب میں ہمیں اچھی اور بُری مثالیں ملتی ہیں۔‏ ان پر غور کرنے سے ہم بہت کچھ سیکھ سکتے ہیں۔‏ بیشک،‏ سموئیل کی پہلی کتاب مؤثر ہے اور ہمارے اعمال اور دل کے خیالوں کو جانچنے میں کام آ سکتی ہے۔‏—‏عبرانیوں ۴:‏۱۲‏۔‏

عیلی کی جگہ سموئیل قاضی بن جاتا ہے

‏(‏۱-‏سموئیل ۱:‏۱–‏۷:‏۱۷‏)‏

حنّہ نامی عورت شہر رامہ کی رہنے والی ہے۔‏ * اُس نے یہوواہ خدا سے اولاد کے لئے دُعا مانگی تھی اور یہوواہ نے اُس کی سُن لی۔‏ حنّہ اپنے اُس وعدے کو پورا کرنا چاہتی ہے جو اُس نے خدا سے کِیا تھا۔‏ اس لئے وہ عیدِخیام کے موقعے پر ’‏یہوواہ کے گھر‘‏ جاتی ہے اور اپنے لڑکے سموئیل کو وہاں خدمت کرنے کے لئے چھوڑ جاتی ہے۔‏ اس طرح سموئیل ’‏عیلیؔ کاہن کے سامنے یہوواہ کی خدمت کرنے لگتا ہے۔‏‘‏ (‏۱-‏سموئیل ۱:‏۲۴؛‏ ۲:‏۱۱‏)‏ سموئیل صرف بچہ ہی ہے۔‏ اس کے باوجود یہوواہ اس سے ہم‌کلام ہو کر اُس کے ذریعے عیلی کے گھرانے پر سزا سناتا ہے۔‏ جب سموئیل جوان ہو جاتا ہے تو تمام اسرائیلی اسے یہوواہ خدا کے نبی کے طور پر قبول کرتے ہیں۔‏

ایک دن فلستیوں کا لشکر اسرائیل پر حملہ کرتا ہے۔‏ وہ عیلی کے دو بیٹوں کو مار ڈالتے اور خدا کے صندوق کو چرا لیتے ہیں۔‏ جب عیلی یہ خبر سنتا ہے تو وہ بھی مر جاتا ہے۔‏ عیلی ”‏چالیس برس بنی‌اِسرائیل کا قاضی رہا“‏ تھا۔‏ (‏۱-‏سموئیل ۴:‏۱۸‏)‏ خدا کے صندوق کو چرانے کی وجہ سے فلستیوں پر طرح طرح کی آفتیں ٹوٹ پڑتی ہیں۔‏ اسلئے وہ کچھ عرصے بعد صندوق کو واپس کر دیتے ہیں۔‏ عیلی کی موت کے بعد سموئیل قاضی کے طور پر اسرائیل کی راہنمائی کرنے لگتا ہے اور امن اور سلامتی کا دَور شروع ہو جاتا ہے۔‏

صحیفائی سوالوں کے جواب:‏

۲:‏۱۰‏—‏اگرچہ اُس وقت اسرائیل کا کوئی بادشاہ نہیں تھا لیکن حنّہ نے دُعا کی کہ یہوواہ ”‏اپنے بادشاہ کو زور بخشے۔‏“‏ وہ کیوں؟‏ موسیٰ کی شریعت میں اس بات کی پیشینگوئی کی گئی تھی کہ بنی‌اسرائیل ایک نہ ایک دن اپنے لئے بادشاہ مقرر کرینگے۔‏ (‏استثنا ۱۷:‏۱۴-‏۱۸‏)‏ یعقوب نے کہا تھا کہ ”‏یہوؔداہ سے سلطنت نہیں چھوٹے گی۔‏“‏ (‏پیدایش ۴۹:‏۱۰‏)‏ اسکے علاوہ یہوواہ نے سارہ کے بارے میں،‏ جسکی نسل سے بنی‌اسرائیل پیدا ہوئے یوں کہا:‏ ”‏عالم کے بادشاہ اُس سے پیدا ہونگے۔‏“‏ (‏پیدایش ۱۷:‏۱۶‏)‏ اس سے ہم نتیجہ اخذ کر سکتے ہیں کہ حنّہ ایک ایسے بادشاہ کیلئے دُعا کر رہی تھی جو مستقبل میں آنے والا تھا۔‏

۳:‏۳‏—‏کیا سموئیل واقعی پاک‌ترین مقام میں سوتا تھا؟‏ جی‌نہیں۔‏ سموئیل  قہاتیوں کے گھرانے سے تعلق رکھتا تھا اور اس گھرانے کے مرد ہیکل میں کاہنوں کے طور پر خدمت نہیں کرتے تھے۔‏ (‏۱-‏تواریخ ۶:‏۳۳-‏۳۸‏)‏ اسلئے سموئیل کو ’‏مقدس کو دیکھنے کی خاطر اندر آنے‘‏ کی اجازت نہیں تھی۔‏ (‏گنتی ۴:‏۱۷-‏۲۰‏)‏ وہ صرف مسکن کے صحن میں حاضر ہو سکتا تھا۔‏ غالباً سموئیل وہیں رات گزارتا تھا اور عیلی بھی اس صحن میں سوتا تھا۔‏ لہٰذا جملہ ”‏جہاں خدا کا صندوق تھا“‏ بظاہر مسکن کے اِردگِرد کی جگہ کی طرف اشارہ کرتا ہے۔‏

۷:‏۷-‏۹،‏ ۱۷‏—‏سموئیل نے مصفاہ میں سوختنی قربانی گزرانی اور رامہ میں ایک مذبح بنایا۔‏ لیکن اسرائیلیوں کو تو صرف اُس جگہ پر قربانیاں گزراننی تھیں جسے یہوواہ نے مقرر کِیا تھا۔‏ (‏استثنا ۱۲:‏۴-‏۷،‏ ۱۳،‏ ۱۴؛‏ یشوع ۲۲:‏۱۹‏)‏ تو پھر سموئیل نے ایسا کیوں کِیا؟‏ خدا کا پاک صندوق شہر سیلا سے ہٹا لیا گیا تھا۔‏ اسکے بعد یہوواہ نے اسی جگہ پر اپنے حضور کو ظاہر نہیں کِیا۔‏ سموئیل یہوواہ کا نمائندہ تھا۔‏ اسلئے یہ بات یہوواہ کو ضرور پسند آئی ہوگی کہ سموئیل نے مصفاہ میں سوختنی قربانی گزرانی اور رامہ میں ایک مذبح بنایا۔‏

ہمارے لئے سبق:‏

۱:‏۱۱،‏ ۱۲،‏ ۲۱-‏۲۳؛‏ ۲:‏۱۹‏۔‏ حنّہ ایک فروتن عورت تھی جو لگاتار خدا سے فریاد کرتی رہی۔‏ اُس نے یہوواہ کی مہربانی کی بڑی قدر کی اور اُسے اپنے بیٹے سے بہت لگن تھی۔‏ اسلئے آج بھی حنّہ عورتوں کیلئے ایک اچھی مثال ہے۔‏

۱:‏۸‏۔‏ القانہ نے حوصلہ بڑھانے کے معاملے میں اچھی مثال قائم کی۔‏ (‏ایوب ۱۶:‏۵‏)‏ جب اُسکی بیوی حنّہ بہت اُداس تھی تو القانہ نے بڑی نرمی سے اُس سے پوچھا:‏ ”‏تیرا دل کیوں آزُردہ ہے؟‏“‏ حنّہ کو اس سوال سے اپنے احساسات کا اظہار کرنے کا حوصلہ ملا۔‏ پھر القانہ نے اپنے پیار کو یوں ظاہر کِیا:‏ ”‏کیا مَیں تیرے لئے دس بیٹوں سے بڑھ کر نہیں؟‏“‏

۲:‏۲۶؛‏ ۳:‏۵-‏۸،‏ ۱۵،‏ ۱۹‏۔‏ جو ذمہ‌داری خدا نے ہمیں سونپی ہے اُسے ہمیں دل لگا کر پوری کرنا چاہئے۔‏ ہمیں خدا کی طرف سے جو تربیت ملتی ہے اُس سے ہمیں فائدہ اُٹھانا چاہئے۔‏ اس کے علاوہ ہمیں دوسروں سے شائستگی اور احترام کے ساتھ پیش آنا چاہئے۔‏ اسطرح ہم بھی ’‏خدا اور انسان دونوں کے مقبول ہوں گے۔‏‘‏

۴:‏۳،‏ ۴،‏ ۱۰‏۔‏ عہد کا صندوق پاک ہونے کے باوجود ایک تعویذ کی مانند نہیں تھا جو اسرائیلیوں کو اپنے دُشمنوں سے بچا سکتا تھا۔‏ ہمیں اپنے آپکو ’‏بُتوں سے بچائے رکھنے‘‏ کی اشد ضرورت ہے۔‏—‏۱-‏یوحنا ۵:‏۲۱‏۔‏

اسرائیل کا پہلا بادشاہ

‏(‏۱-‏سموئیل ۸:‏۱–‏۱۵:‏۳۵‏)‏

سموئیل زندگی‌بھر یہوواہ کا وفادار رہتا ہے۔‏ لیکن اُسکے بیٹے یہوواہ کی راہ پر نہیں چلتے۔‏ جب اسرائیل کے بزرگ درخواست کرتے ہیں کہ اُنکی قوم کیلئے ایک انسانی بادشاہ مقرر کِیا جائے تو یہوواہ انکی درخواست کو پورا کرتا ہے۔‏ وہ سموئیل کو کہتا ہے کہ ساؤل کو بادشاہ کے طور پر مسح کرو۔‏ ساؤل بنیمین کے قبیلہ کا ایک خوب‌رُو آدمی ہے۔‏ جب ساؤل عمونیوں پر فتح حاصل کرتا ہے تو اسرائیل کے تمام لوگ اسکی حمایت کرنے لگتے ہیں۔‏

ساؤل کا بہادر بیٹا یونتن فلستیوں کی ایک پوری چوکی کو شکست دیتا ہے۔‏ اس پر فلستیوں کا بڑا سا لشکر اسرائیل کے خلاف جمع ہو جاتا ہے۔‏ خوف کے مارے ساؤل یہوواہ کی نافرمانی کرتا ہے اور سموئیل کا انتظار کرنے کی بجائے خود ہی سوختنی قربانی پیش کرتا ہے۔‏ کچھ دیر بعد یونتن اور اُسکا سلاح‌بردار فلستیوں کی ایک اَور چوکی پر حملہ کرتے ہیں۔‏ ساؤل یہ سنتے ہی اپنے لشکر سمیت اُسکی مدد کو آتا ہے۔‏ ساؤل جلدبازی میں ایک قسم کھاتا ہے جسکے نتیجے میں اسکے سپاہی فلستیوں کو مکمل طور پر شکست دینے میں ناکام رہتے ہیں۔‏ اسکے بعد بھی ساؤل ’‏ہر طرف اپنے دُشمنوں سے لڑتا رہتا ہے۔‏‘‏ (‏۱-‏سموئیل ۱۴:‏۴۷‏)‏ جب ساؤل عمالیقیوں پر فتح پاتا ہے تو وہ دوبارہ یہوواہ کے حکم کی خلاف‌ورزی کرتا ہے۔‏ وہ ان چیزوں کو پوری طرح تباہ نہیں کرتا جنکو یہوواہ نے تباہی کیلئے ”‏مخصوص“‏ کِیا ہے۔‏ (‏احبار ۲۷:‏۲۸،‏ ۲۹‏)‏ نتیجتاً یہوواہ ساؤل کو بادشاہ کے طور پر ردّ کر دیتا ہے۔‏

صحیفائی سوالوں کے جواب:‏

۹:‏۹‏—‏اس جملے کا کیا مطلب ہے کہ ”‏جسکو اب نبی کہتے ہیں اُسکو پہلے غیب‌بین کہتے تھے“‏ ؟‏ ان الفاظ سے پتہ چلتا ہے کہ سموئیل کے زمانے سے یہوواہ اپنے زیادہ‌تر پیغامات نبیوں ہی کے ذریعے لوگوں تک پہنچانے لگا۔‏ اسلئے لوگ خدا کے پیغمبروں کو ”‏غیب‌بین“‏ کی بجائے ”‏نبی“‏ کہنے لگے جسکا لفظی مطلب عبرانی زبان میں ”‏پیغام پہنچانے والا“‏ ہے۔‏ سموئیل نے اسرائیل کے نبیوں کے سلسلے کا آغاز کِیا۔‏—‏اعمال ۳:‏۲۴‏۔‏

۱۴:‏۲۴-‏۳۲،‏ ۴۴،‏ ۴۵‏—‏جب یونتن نے ساؤل کی قسم توڑ کر شہد کھایا تو کیا وہ خدا کی خوشنودی سے محروم ہو گیا؟‏ بظاہر یہوواہ یونتن سے ناراض نہیں ہوا۔‏ یونتن اپنے باپ کی قسم سے بےخبر تھا۔‏ اسکے علاوہ ساؤل نے اپنی قسم کے ذریعے سپاہیوں کو بہت نقصان پہنچایا۔‏ شاید اُس نے جوش کا دکھاوا کرنے یا اپنا اختیار  جمانے کیلئے یہ قسم کھائی تھی۔‏ بہرحال خدا ایک ایسی قسم سے خوش نہیں تھا۔‏ اگرچہ یونتن اپنے باپ کی قسم توڑنے کی سزا قبول کر رہا تھا لیکن لوگوں نے اسکی جان بچانے کیلئے آواز اُٹھائی۔‏

۱۵:‏۶‏—‏ساؤل نے قینیوں کی جان کیوں بخش دی؟‏ قینی موسیٰ کے سُسر کی اولاد تھے۔‏ جب بنی‌اسرائیل کوہِ‌سینا سے روانہ ہوئے تو قینیوں نے اُنکی حمایت کی۔‏ (‏گنتی ۱۰:‏۲۹-‏۳۲‏)‏ قینی کافی عرصے تک بنی‌یہوداہ کے علاقے میں آباد رہے۔‏ (‏قضاۃ ۱:‏۱۶‏)‏ بعد میں وہ عمالیقیوں کے مُلک میں بسنے لگے لیکن بنی‌اسرائیل کیساتھ اُنکے تعلقات ہمیشہ اچھے رہے۔‏ اسی وجہ سے ساؤل نے قینیوں کی جان بخش دی۔‏

ہمارے لئے سبق:‏

۹:‏۲۱؛‏ ۱۰:‏۲۲،‏ ۲۷‏۔‏ جب ساؤل کو بادشاہ بنایا گیا تو بعض ’‏شریر‘‏ آدمیوں نے اُسکی مخالفت کی۔‏ تب ساؤل نے عاجزی کا مظاہرہ کرتے ہوئے جلدبازی میں بدلہ نہیں لیا۔‏ جی‌ہاں،‏ عاجزی ایک ایسی خوبی ہے جو ہمیں احمقانہ کاموں سے بچائے رکھ سکتی ہے۔‏

۱۲:‏۲۰،‏ ۲۱‏۔‏ کچھ لوگ انسانی رہنماؤں،‏ فوجی طاقت یا بُتوں پر اعتماد رکھتے ہیں۔‏ لیکن یہ سب ’‏باطل چیزیں‘‏ ہیں۔‏ اُنکی خاطر یہوواہ خدا کی عبادت چھوڑنا کتنی بےوقوفی کی بات ہوگی۔‏

۱۲:‏۲۴‏۔‏ اگر ہم اُن ’‏بڑے کاموں‘‏ پر غور کرتے ہیں جو یہوواہ نے قدیم اور جدید زمانے میں کئے ہیں تو ہم خدا کو ناراض کرنے سے ڈرینگے اور پورے دل سے اُسکی عبادت کرینگے۔‏

۱۳:‏۱۰-‏۱۴؛‏ ۱۵:‏۲۲-‏۲۵،‏ ۳۰‏۔‏ نافرمانی اور گستاخی کی جڑ تکبّر ہی ہے۔‏ اس خامی کو اپنے دل میں ہرگز نہ بٹھائیں۔‏—‏امثال ۱۱:‏۲‏۔‏

ایک چرواہے کو بادشاہ بنایا جاتا ہے

‏(‏۱-‏سموئیل ۱۶:‏۱–‏۳۱:‏۱۳‏)‏

سموئیل یہوداہ کے قبیلے کے داؤد کو آئندہ بادشاہ کے طور پر مسح کرتا ہے۔‏ کچھ عرصے بعد داؤد فلستی جولیت کو فلاخن استعمال کرتے ہوئے ایک ہی پتھر سے مار ڈالتا ہے۔‏ اسکے بعد داؤد اور یونتن کی گہری دوستی ہو جاتی ہے۔‏ ساؤل داؤد کو اپنے سپاہیوں پر مقرر کرتا ہے۔‏ جب داؤد دُشمنوں پر باربار فتحمند ہوتا ہے تو اسرائیل کی عورتیں گاتی ہیں کہ ”‏ساؔؤل نے تو ہزاروں کو پر داؔؤد نے لاکھوں کو مارا۔‏“‏ (‏۱-‏سموئیل ۱۸:‏۷‏)‏ حسد میں آکر ساؤل تین بار داؤد کو قتل کرنے کی کوشش کرتا ہے۔‏ اس وجہ سے داؤد بھاگ جاتا ہے۔‏

داؤد کئی سال تک ساؤل سے بھاگتا رہتا ہے۔‏ اس دوران داؤد کو دو بار ساؤل کی جان لینے کا موقع ملتا ہے۔‏ لیکن وہ ایسا نہیں کرتا۔‏ داؤد کی ملاقات ابیجیل سے ہوتی ہے جس سے وہ بعد میں شادی کر لیتا ہے۔‏ فلستی پھر سے اسرائیل کے خلاف جنگ کرنے نکلتے ہیں۔‏ سموئیل فوت ہو چکا ہے۔‏ اسلئے ساؤل خود ہی یہوواہ سے ہدایت مانگتا ہے۔‏ لیکن یہوواہ اُسے کوئی جواب نہیں دیتا۔‏ ساؤل سخت گھبرا جاتا ہے اور ایک ایسی عورت کے پاس جاتا ہے جو جنّات سے رابطہ کرتی ہے۔‏ عورت ساؤل کو بتاتی ہے کہ اُسی جنگ میں وہ مر جائیگا۔‏ اور واقعی ایسا ہی ہوتا ہے۔‏ ساؤل بےعزت ہو کر مر جاتا ہے اور اُسکے تین بیٹوں کو بھی مار ڈالا جاتا ہے۔‏ داؤد اب تک ان واقعات سے بےخبر ہے اور چھپا رہتا ہے۔‏ ان افسوس‌ناک واقعات کیساتھ سموئیل کی پہلی کتاب کا اختتام ہوتا ہے۔‏

صحیفائی سوالوں کے جواب:‏

۱۶:‏۱۴‏—‏ساؤل کو کس قسم کی بُری روح ستاتی تھی؟‏ یہ روح کوئی روحانی ہستی نہیں بلکہ ساؤل کی بُری نیت تھی۔‏ یہوواہ نے اپنی پاک رُوح ساؤل سے ہٹا لی تھی اور اسطرح ساؤل اپنی بُری سوچ کا شکار ہو گیا۔‏ یہوواہ نے اپنی پاک روح ہٹا کر ساؤل کیساتھ ایسا ہونے کی اجازت دی۔‏ اسلئے ہم کہہ سکتے ہیں کہ ساؤل کی بُری نیت ”‏[‏یہوواہ]‏ کی طرف سے ایک بُری روح“‏ کی مانند تھی۔‏

 ۱۷:‏۵۵-‏۵۸‏—‏پہلے سموئیل ۱۶:‏۱۷-‏۲۳ کو مدِنظر رکھتے ہوئے ساؤل نے کیوں پوچھا کہ ’‏داؤد کس کا بیٹا ہے‘‏؟‏ ساؤل صرف داؤد کے باپ کا نام معلوم نہیں کرنا چاہتا تھا۔‏ داؤد نے ابھی ابھی دیونما جولیت کو قتل کِیا تھا۔‏ اسلئے ساؤل یہ جاننا چاہتا تھا کہ ایک ایسے بہادر لڑکے کا باپ کس قسم کا شخص ہے۔‏

ہمارے لئے سبق:‏

۱۶:‏۶،‏ ۷‏۔‏ کسی شخص کی ظاہری صورت پر نظر ڈالنے سے اُسکی اصلیت کا اندازہ نہیں لگایا جا سکتا۔‏ اسکی بجائے ہمیں دوسروں کو یہوواہ کی نظر سے دیکھنا چاہئے۔‏

۱۷:‏۴۷-‏۵۰‏۔‏ جولیت کی طرح آج بھی کئی لوگ یہوواہ کے بندوں کو اذیت پہنچاتے ہیں۔‏ ہم دلیری سے اُنکا مقابلہ کرنے کے قابل ہیں کیونکہ ”‏جنگ تو [‏یہوواہ]‏ کی ہے۔‏“‏

۱۸:‏۱،‏ ۳؛‏ ۲۰:‏۴۱،‏ ۴۲‏۔‏ یہوواہ سے محبت رکھنے والے لوگوں کی دوستی سچی دوستی ہوتی ہے۔‏

۲۱:‏۱۲،‏ ۱۳‏۔‏ جب ہم زندگی کی راہ پر کسی مشکل کا سامنا کرتے ہیں تو ہمیں دانائی اور عقلمندی سے کام لینا چاہئے۔‏ یہوواہ ہم سے یہی توقع کرتا ہے۔‏ وہ اپنے کلام کے ذریعے ہم کو ہوشیاری،‏ علم اور تمیز جیسی خوبیاں سکھاتا ہے۔‏ (‏امثال ۱:‏۴‏)‏ اسکے علاوہ کلیسیا کے بزرگ بھی ہماری مدد کر سکتے ہیں۔‏

۲۴:‏۶؛‏ ۲۶:‏۱۱‏۔‏ داؤد نے یہوواہ کے ممسوح کا احترام کرتے ہوئے ہمارے لئے ایک عمدہ نمونہ قائم کِیا ہے۔‏

۲۵:‏۲۳-‏۳۳‏۔‏ ابیجیل کی عقلمندی واقعی مثالی ہے۔‏

۲۸:‏۸-‏۱۹‏۔‏ جنّات لوگوں کو گمراہ کرنے یا انکو نقصان پہنچانے کی کوشش کرتے ہیں۔‏ اسلئے وہ کبھی‌کبھار انسان کی شکل اختیار کر لیتے ہیں۔‏ ہمیں ہر قسم کی جادوگری سے دُور رہنے کی اشد ضرورت ہے۔‏—‏استثنا ۱۸:‏۱۰-‏۱۲‏۔‏

۳۰:‏۲۳،‏ ۲۴‏۔‏ داؤد کا یہ فیصلہ گنتی ۳۱:‏۲۷ پر مبنی ہے۔‏ اس سے ظاہر ہوتا ہے کہ یہوواہ اپنے ان خادموں کی قدر بھی کرتا ہے جو کلیسیا میں چھوٹے چھوٹے کام کرتے ہیں۔‏ اسلئے جو بھی کام آپکو سونپا جائے اسے ’‏جی سے کریں،‏ یہ جان کر کہ یہوواہ کیلئے کرتے ہیں نہ کہ آدمیوں کیلئے۔‏‘‏—‏کلسیوں ۳:‏۲۳‏۔‏

‏’‏فرمانبرداری قربانی سے بہتر ہے‘‏

ہم سموئیل اور داؤد کی اچھی مثالوں اور عیلی اور ساؤل کی بُری مثالوں سے کیا سیکھ سکتے ہیں؟‏ یہ کہ ”‏فرمانبرداری قربانی سے اور بات ماننا مینڈھوں کی چربی سے بہتر ہے۔‏ کیونکہ بغاوت اور جادوگری برابر ہیں اور سرکشی اَیسی ہی ہے جیسی مورتوں اور بُتوں کی پرستش۔‏“‏—‏۱-‏سموئیل ۱۵:‏۲۲،‏ ۲۳‏۔‏

آجکل ہمیں خدا کی بادشاہت کی منادی کرنے اور شاگرد بنانے کے کام میں حصہ لینے کا بڑا شرف حاصل ہے۔‏ ایسا کرنے سے ہم ’‏اپنے لبوں سے قربانیاں گذرانتے ہیں۔‏‘‏ یاد رکھیں کہ جب یہوواہ خدا اپنے کلام یا اپنی زمینی تنظیم کے ذریعے ہماری ہدایت کرتا ہے تو ہمیں اس پر عمل کرنا چاہئے۔‏—‏ہوسیع ۱۴:‏۲؛‏ عبرانیوں ۱۳:‏۱۵‏۔‏

‏[‏فٹ‌نوٹ]‏

‏[‏صفحہ ۲۴ پر تصویر]‏

ساؤل نے اپنے دل میں عاجزی اور فروتنی کے بدلے گھمنڈ اور تکبّر پیدا ہونے دیا

‏[‏صفحہ ۲۵ پر تصویر]‏

مخالفت کا سامنا کرتے وقت ہماری مدد کون کریگا؟‏