یسوع کی تعلیم کے فائدے

پہلے مضمون میں ہم دیکھ چکے ہیں کہ یسوع کی تعلیم نے پوری دنیا پر اثر کِیا ہے۔‏ لیکن ہمیں اپنے آپ سے یہ سوال پوچھنا چاہئے کہ ہم یسوع کی تعلیم سے کیا سیکھ سکتے ہیں اور اس کا ہم پر کیا اثر ہوگا؟‏

یسوع نے زندگی کے ہر پہلو پر اہم سبق سکھائے تھے۔‏ اُس نے لوگوں کو سکھایا کہ اُن کی زندگی میں کونسی باتیں واقعی اہم ہونی چاہئیں،‏ مثلاً خدا کا دوست بننا،‏ دوسروں کے ساتھ اچھے تعلقات بڑھانا،‏ مسئلوں کا حل ڈھونڈنا اور تشدد سے پرہیز کرنا۔‏ آئیے ہم اِن باتوں پر ایک ایک کرکے غور کرتے ہیں۔‏

روحانی باتوں کو پہلا درجہ دیں

آج کا زمانہ اتنا تیزرفتار ہے کہ اکثر ہمارے پاس روحانی باتوں کے لئے وقت ہی نہیں بچتا۔‏ ایک نوجوان کی مثال لیجئے جسے روحانی  موضوعات کے بارے میں سیکھنا بہت اچھا لگتا ہے۔‏ لیکن اُسے ایک بات پر افسوس ہے۔‏ وہ کہتا ہے:‏ ”‏روحانی باتوں کے لئے میرے پاس باقاعدہ وقت نہیں ہوتا۔‏ مَیں ہفتے میں ۶ دِن کام کرتا ہوں اور مجھے صرف اتوار کے روز چھٹی ہوتی ہے۔‏ لیکن اُس روز بھی مجھے بہت سے کام ہوتے ہیں جنکو کرنے کے بعد مَیں بہت تھک جاتا ہوں۔‏“‏ کیا آپ بھی ایسا ہی محسوس کرتے ہیں؟‏ تو آئیے ایسی صورتحال سے نپٹنے کے لئے یسوع کے پہاڑی وعظ پر غور کرتے ہیں۔‏

اس وعظ کو سننے کے لئے لوگوں کی ایک بھیڑ پہاڑ پر اکٹھی ہوتی ہے،‏ جس سے مخاطب ہوتے ہوئے یسوع کہتا ہے:‏ ”‏اپنی جان کی فکر نہ کرنا کہ ہم کیا کھائیں گے یا کیا پئیں گے؟‏ اور نہ اپنے بدن کی کہ کیا پہنیں گے؟‏ کیا جان خوراک سے اور بدن پوشاک سے بڑھ کر نہیں؟‏ ہوا کے پرندوں کو دیکھو کہ نہ بوتے ہیں نہ کاٹتے۔‏ نہ کوٹھیوں میں جمع کرتے ہیں تو بھی تمہارا آسمانی باپ اُن کو کھلاتا ہے۔‏ کیا تُم اُن سے زیادہ قدر نہیں رکھتے؟‏.‏ .‏ .‏ اِس لئے فکرمند ہو کر یہ نہ کہو کہ ہم کیا کھائیں گے یا کیا پئیں گے یا کیا پہنیں گے؟‏ کیونکہ ان سب چیزوں کی تلاش میں غیر قومیں رہتی ہیں اور تمہارا آسمانی باپ جانتا ہے کہ تُم ان سب چیزوں کے محتاج ہو۔‏ بلکہ تُم پہلے اُس کی بادشاہی اور اُس کی راستبازی کی تلاش کرو تو یہ سب چیزیں بھی تم کو مل جائیں گی۔‏“‏ (‏متی ۶:‏۲۵-‏۳۳‏)‏ ہم اِس حوالے سے کیا سیکھ سکتے ہیں؟‏

یسوع یہ نہیں کہہ رہا تھا کہ ہمیں اپنی اور اپنے خاندان کی ضروریات کو پورا نہیں کرنا چاہئے۔‏ خدا کا کلام کہتا ہے:‏ ”‏اگر کوئی اپنوں اور خاص کر اپنے گھرانے کی خبرگیری نہ کرے تو ایمان کا منکر اور بےایمان سے بدتر ہے۔‏“‏ (‏۱-‏تیمتھیس ۵:‏۸‏)‏ یسوع کہہ رہا تھا کہ اگر ہم اپنی زندگی میں روحانی باتوں کو سب سے پہلا درجہ دیں گے تو خدا ہماری ضروریات کو پورا کرے گا۔‏ اِس نصیحت پر عمل کرنے سے ہم خوشی حاصل کریں گے کیونکہ یسوع نے کہا تھا:‏ ”‏خوش ہیں وہ جو اپنی روحانی ضروریات سے باخبر ہیں۔‏“‏—‏متی ۵:‏۳‏؛‏ این ڈبلیو۔‏

خدا کے دوست بنیں

ایسے لوگ جو اپنی روحانی ضروریات سے باخبر ہیں،‏ وہ خدا کے دوست بننے کو بھی اہم سمجھتے ہیں۔‏ جب ہم کسی کے دوست ہوتے ہیں تو ہم اُس کی سوچ سے واقف ہوتے ہیں۔‏ اس کے علاوہ ہم اپنے دوستوں کی پسند اور ناپسند بھی جانتے ہیں۔‏ اسی طرح اگر ہم خدا کے دوست بننا چاہتے ہیں تو ہمیں اُس کے بارے میں علم حاصل کرنا ہوگا۔‏ ہم ایسا کیسے کر سکتے ہیں؟‏ یسوع نے اپنے شاگردوں کے لئے دُعا مانگتے ہوئے کہا:‏ ”‏ہمیشہ کی زندگی یہ ہے کہ وہ تجھ خدایِ‌واحد اور برحق کو اور یسوؔع مسیح کو جسے تُو نے بھیجا ہے جانیں۔‏“‏ (‏یوحنا ۱۷:‏۳‏)‏ ہم خدا کے کلام کے ذریعے ہی اُس کو جان سکتے اور اُس کے قریب جا سکتے ہیں۔‏ (‏۲-‏تیمتھیس ۳:‏۱۶‏)‏ اِس لئے ہمیں پاک صحائف کو پڑھنے اور انہیں سمجھنے کے لئے ہر روز وقت نکالنا چاہئے۔‏

لیکن خدا کے کلام کو پڑھنا ہی کافی نہیں۔‏ یسوع نے اپنی دُعا میں آگے کہا:‏ ”‏انہوں نے تیرے کلام پر عمل کِیا ہے۔‏“‏ (‏یوحنا ۱۷:‏۶‏)‏ لہٰذا ہمیں خدا کے کلام پر عمل بھی کرنا ہوگا۔‏ اگر ہم جان‌بوجھ کر خدا کے کلام پر عمل نہیں کریں گے تو وہ ہمیں اپنا دوست نہیں بنائے گا۔‏  اُس کی قربت حاصل کرنے کے لئے ہمیں اُس کی سوچ اور اُس کے معیاروں کو اپنانا ہوگا۔‏ ایسا کرنے سے ہی ہم اُس کے دوست بن سکتے ہیں۔‏

دوسروں کیساتھ اچھے تعلقات بڑھائیں

دوسروں کیساتھ اچھے تعلقات بڑھانے کی اہمیت کو سمجھانے کیلئے یسوع نے اپنے شاگردوں کو ایک کہانی سنائی:‏ ایک مالک اپنے نوکروں سے قرض کے پیسے وصول کر رہا تھا۔‏ اُسکے ایک نوکر کا قرض اتنا زیادہ تھا کہ وہ اُسے چکانے کے قابل نہیں تھا۔‏ اِسلئے مالک نے حکم دیا کہ نوکر کو اور اُسکے بیوی‌بچوں کو بیچ کر پیسہ وصول کِیا جائے۔‏ نوکر مالک کے سامنے گھٹنوں کے بل گِر کر گڑگڑانے لگا:‏ ”‏مجھے مہلت دے۔‏ مَیں تیرا سارا قرض ادا کرونگا۔‏“‏ مالک کو اُس پر ترس آیا اور اُس نے قرض بخش دیا۔‏ اِسی نوکر کا ایک ہم‌خدمت تھا جس نے اُس سے ایک معمولی سا قرض لیا تھا،‏ لیکن وہ اس قرض کو ادا نہیں کر پا رہا تھا۔‏ اُس نے بڑی منتیں کیں لیکن اس نوکر نے اپنے ہم‌خدمت کو تب تک قیدخانہ میں ڈلوا دیا جبتک وہ قرض ادا نہ کر لے۔‏ جب مالک کو اس بات کی خبر پہنچی تو اُس نے غصے میں آ کر نوکر سے کہا:‏ ”‏مَیں نے وہ سارا قرض تجھے بخشدیا۔‏ کیا تجھے لازم نہ تھا کہ جیسا مَیں نے تجھ پر رحم کِیا تُو بھی اپنے ہمخدمت پر رحم کرتا؟‏“‏ اِسکے بعد مالک نے اپنے نوکر کو اُس وقت تک قید میں رکھنے کا حکم دیا جبتک وہ قرض ادا نہ کر لے۔‏ یسوع اِس کہانی کا سبق سکھاتے ہوئے کہتا ہے:‏ ”‏میرا آسمانی باپ بھی تمہارے ساتھ اِسی طرح کریگا اگر تُم میں سے ہر ایک اپنے بھائی کو دل سے معاف نہ کرے۔‏“‏—‏متی ۱۸:‏۲۳-‏۳۵‏۔‏

ہم سب اس نوکر کی طرح خدا کے سامنے قرضدار ہیں کیونکہ ہم اکثر گناہ کرتے اور خدا کے احکام کی خلافورزی بھی کرتے ہیں۔‏ اور خدا بھی اُس مالک کی طرح ہمیں معاف کر دیتا ہے۔‏ لیکن وہ تب ہی ایسا کرے گا جب ہم دوسروں کو معاف کرنے کو تیار ہوں گے۔‏ یسوع نے اپنے پیروکاروں کو یوں دُعا کرنا سکھائی:‏ ”‏جس طرح ہم نے اپنے قرضداروں کو معاف کِیا ہے تُو بھی ہمارے قرض ہمیں معاف کر۔‏“‏—‏متی ۶:‏۱۲‏۔‏

دل پر قابو پائیں

یسوع اِنسانی فطرت کو بخوبی سمجھتا تھا۔‏ وہ جانتا تھا کہ انسان اکثر اپنے دل کی وجہ سے مشکل میں پڑتا ہے۔‏ لہٰذا اُس نے دل پر قابو پانے کے لئے دو مثالیں دیں۔‏

متی ۵:‏۲۱،‏ ۲۲ میں یسوع کہتا ہے:‏ ”‏تُم سن چکے ہو کہ اگلوں سے کہا گیا تھا کہ خون نہ کرنا اور جو کوئی خون کرے گا وہ عدالت کی سزا کے لائق ہوگا۔‏ لیکن مَیں تُم سے یہ کہتا ہوں کہ جو کوئی اپنے بھائی پر غصے ہوگا وہ عدالت کی سزا کے لائق ہوگا۔‏“‏ یسوع نے قتل کی جڑ کو واضح کرتے ہوئے سکھایا کہ اِس کی شروعات دل ہی میں ہوتی ہے۔‏ اگر لوگ دل میں نفرت کی آگ کو بھڑکنے نہ دیتے تو تشدد تک نوبت نہ پہنچتی اور دُنیا میں اتنا خون‌خرابہ نہ ہوتا۔‏

ایک اَور مرتبہ یسوع لوگوں سے کہتا ہے:‏ ”‏تُم سن چکے ہو کہ کہا گیا تھا کہ زِنا نہ کرنا۔‏ لیکن مَیں تُم سے یہ کہتا ہوں کہ جس کسی نے بُری خواہش سے کسی عورت پر نگاہ کی وہ اپنے دل میں اُسکے ساتھ زِنا کر چکا۔‏ پس اگر تیری دہنی آنکھ تجھے ٹھوکر کھلائے تو اُسے نکالکر اپنے پاس سے پھینک دے۔‏“‏ (‏متی ۵:‏۲۷-‏۲۹‏)‏ یسوع سمجھا رہا تھا کہ لوگ دل میں بُری خواہش رکھنے کی وجہ سے زِنا کرتے ہیں۔‏ اگر ایک شخص کے دل میں بُری خواہش اُبھرے بھی تو اُسے اس خواہش کو ’‏نکالکر اپنے پاس سے پھینک دینا‘‏ چاہئے۔‏ اسطرح وہ زِنا جیسا گناہ کرنے سے بچا رہیگا۔‏

‏”‏تلوار کو میان میں کر لے“‏

جس رات یسوع کو گرفتار کِیا گیا اُس کے ایک شاگرد نے اُس کی حفاظت کرنے کے لئے اپنی تلوار کھینچی۔‏ یسوع نے کہا:‏ ”‏اپنی تلوار کو میان میں کر لے کیونکہ جو تلوار کھینچتے ہیں وہ سب تلوار  سے ہلاک کئے جائیں گے۔‏“‏ (‏متی ۲۶:‏۵۲‏)‏ اگلے روز یسوع نے پُنطیُس پیلاطُس سے کہا:‏ ”‏میری بادشاہی اس دُنیا کی نہیں۔‏ اگر میری بادشاہی اس دُنیا کی ہوتی تو میرے خادم لڑتے تاکہ مَیں یہودیوں کے حوالے نہ کِیا جاتا۔‏ مگر اب میری بادشاہی یہاں کی نہیں۔‏“‏ (‏یوحنا ۱۸:‏۳۶‏)‏ کیا یسوع کی ان باتوں پر عمل کرنا ممکن ہے؟‏

یسوع کے پہلے پیروکاروں کے بارے میں ایک کتاب بیان کرتی ہے:‏ ”‏یسوع ہر قسم کے تشدد اور جنگ کے خلاف تھا۔‏ اُس کے شاگرد اُس کی اِس تعلیم کے فرمانبردار رہے۔‏ اس لئے اُنہوں نے کسی بھی قسم کی خونریزی میں حصہ لینے سے انکار کِیا۔‏“‏ اگر تمام مسیحی یسوع کی اِس تعلیم کے فرمانبردار رہتے تو تاریخ میں خون کی ندیاں نہ بہتیں۔‏

نوعِ‌انسان کیلئے بہترین تعلیم

لوگ یسوع کی تعلیم آسانی سے سمجھ سکتے تھے۔‏ اس کے علاوہ یہ تعلیم ان پر اثر کرنے کی طاقت بھی رکھتی تھی۔‏ یسوع کی تعلیم پر عمل کرنے سے نوعِ‌انسان کو بہت فائدہ ہو سکتا ہے۔‏ *

یسوع دُنیا کا سب سے دانشمند آدمی تھا۔‏ اُس کی تعلیم سے فائدہ اُٹھانے کے لئے یہوواہ کے گواہ خوشی سے آپ کی مدد کریں گے۔‏ اُن سے رابطہ کرنے کے لئے مہربانی سے اِس رسالے کے صفحہ ۲ پر دئے گئے پتے پر لکھیں۔‏

‏[‏فٹ‌نوٹ]‏

‏[‏صفحہ ۵ پر تصویر]‏

‏’‏تمہارا خدا انکو کھلاتا ہے‘‏

‏[‏صفحہ ۷ پر تصویر]‏

یسوع کی تعلیم پر عمل کرنے سے آپکو بہت فائدہ ہو سکتا ہے