مخالفت کے باوجود ثابت‌قدم

ایک متشدد مذہبی گروہ پولس رسول کے دو ساتھیوں گیسُ اور ارسترخس کو پکڑ کر افسس کی تماشاگاہ میں لے گیا۔‏ وہاں یہ غضبناک بِھیڑ دو گھنٹے تک چلّاتی رہی:‏ ”‏افسیوؔں کی ارتمسؔ بڑی ہے۔‏“‏ (‏اعمال ۱۹:‏۲۸،‏ ۲۹،‏ ۳۴‏)‏ کیا پولس رسول کے ساتھی اس مخالفت کا سامنا کرنے کیلئے تیار تھے؟‏ نیز اس صورتحال کی وجہ کیا تھی؟‏

پولس رسول تین سال سے افسس میں بڑی کامیابی کیساتھ منادی کر رہا تھا۔‏ جسکی وجہ سے افسس کے بہتیرے لوگوں نے بُت‌پرستی چھوڑ دی۔‏ (‏اعمال ۱۹:‏۲۶؛‏ ۲۰:‏۳۱‏)‏ افسس کے شہر میں چاندی کا ایک چھوٹا سا بتُ باروری کی دیوی ارتمس کا تھا جسکا شاندار مندر پورے شہر میں دُور دُور تک دکھائی دیتا تھا۔‏ اس مندر کی چھوٹی چھوٹی علامتوں کو لوگ اپنے گلوں میں پہنتے اور گھروں میں سجاتے تھے۔‏ بِلاشُبہ کوئی مسیحی ان بُتوں کو کبھی نہیں خریدیگا۔‏—‏۱-‏یوحنا ۵:‏۲۱‏۔‏

دیمیتریس نامی ایک سناُر کا کہنا تھا کہ پولس کی منادی انکے نفع‌بخش کاروبار کیلئے خطرہ تھی۔‏ اُس نے سچائی کا ایک رُخ بیان کرتے ہوئے اپنے ساتھی کاریگروں کو یہ یقین دلایا کہ تمام ایشیائےکوچک کے لوگوں نے ارتمس دیوی کی پوجا کرنا چھوڑ دی ہے۔‏ لہٰذا وہ سب قہرآلودہ ہوکر ارتمس کی حمایت میں چلّانے لگے۔‏ اس وجہ سے عوام میں بلوا ہوگیا اور پورے شہر میں ہلچل مچ گئی۔‏—‏اعمال ۱۹:‏۲۴-‏۲۹‏۔‏

ہزارہا لوگ تماشاگاہ کی طرف چل پڑے جہاں ۰۰۰،‏۲۵ تماشائیوں کے بیٹھنے کی گنجائش تھی۔‏ جب پولس نے اُس بےقابو ہجوم میں جانا چاہا تو بعض مہربان حاکموں نے اُسے وہاں جانے سے منع کِیا۔‏ بالآخر شہر کے محرر نے لوگوں کو ٹھنڈا کِیا۔‏ تاہم،‏ گیسُ اور ارسترخس بغیر کسی نقصان کے بچ نکلے۔‏—‏اعمال ۱۹:‏۳۵-‏۴۱‏۔‏

آجکل بھی خدا کے لوگ منادی کی وجہ سے مخالفت کا سامنا کرتے ہیں۔‏ اسکے باوجود وہ اُن جگہوں پر جہاں بُت‌پرستی،‏ بداخلاقی اور جرائم عام ہیں بادشاہی کی خوشخبری کی منادی کرتے ہیں۔‏ بِلاشُبہ وہ دلیری سے پولس رسول کے نمونے کی نقل کرتے ہیں جو افسس میں ”‏علانیہ اور گھرگھر سکھانے سے کبھی نہ جھجکا۔‏“‏ (‏اعمال ۲۰:‏۲۰‏)‏ وہ یہوواہ کے کلام کو زور پکڑ کر پھیلتا اور غالب ہوتا دیکھ کر بہت خوش ہیں۔‏—‏اعمال ۱۹:‏۲۰‏۔‏

‏[‏صفحہ ۳۰ پر تصویر]‏

افسس میں تباہ‌شُدہ تماشاگاہ