بادشاہتی مُناد رپورٹ دیتے ہیں

دیانتدار لوگ یہوواہ خدا کی ستائش کا باعث ہیں

یہوواہ کے گواہ پوری دُنیا میں اپنی دیانتداری کی وجہ سے مشہور ہیں۔‏ اس سلسلے میں تین مثالوں پر غور کریں۔‏

نائیجیریا کی رہنے والی ایک ۱۷ سالہ لڑکی اولسولا کو ایک دن سکول سے گھر جاتے ہوئے راستہ میں ایک بٹوا پڑا ہوا ملا۔‏ وہ اُسے اگلے ہی دن اپنی پرنسپل کے پاس لے گئی۔‏ جب اُس نے بٹوے میں پڑے پیسوں کو گنا تو وہ ۴۵ ڈالر (‏تقریباً ۶۵۵،‏۲ روپے)‏ تھے۔‏ پرنسپل نے اُس ٹیچر کو جس کا بٹوا کھو گیا تھا بلا کر اُسے یہ واپس کر دیا۔‏ اس ٹیچر نے اولسولا کے لئے اپنی قدردانی کا اظہار کرتے ہوئے اُسے ۷ ڈالر (‏تقریباً ۴۱۳ روپے)‏ دئے اور کہا ان سے اپنی سکول فیس ادا کرنا۔‏ جب دوسرے بچوں کو اس واقعہ کی خبر ہوئی تو اُنہوں نے اولسولا کا مذاق اُڑایا۔‏ چند ہفتوں بعد،‏ ایک طالبعلم نے اپنے پیسے چوری ہو جانے کی رپورٹ کی تو اساتذہ کو تمام بچوں کی تلاشی لینے کے لئے کہا گیا۔‏ ایک ٹیچر نے اولسولا سے کہا،‏ ”‏تم یہاں کھڑی ہو جاؤ۔‏ مَیں جانتا ہوں کہ تم یہوواہ کی گواہ ہو اس لئے تم چوری نہیں کر سکتی۔‏“‏ جب طالبعلموں کی تلاشی لی گئی تو پیسے اُن دو لڑکوں سے ملے جنہوں نے اولسولا کا مذاق اُڑایا تھا اور اُنہیں سخت سزا دی گئی۔‏ اولسولا نے لکھا:‏ ”‏مَیں بہت خوش ہوں کہ لوگ مجھے یہوواہ کی گواہ کے طور پر پہچانتے ہیں جو چوری نہ کرکے یہوواہ خدا کو جلال دیتے ہیں۔‏“‏

ارجنٹینا کے رہنے والے ایک شخص مارسیلو کو اپنے گھر کے پچھلے دروازے سے چند میٹر کے فاصلے پر ایک بریف‌کیس پڑا ہوا ملا۔‏ اُس نے بریف‌کیس کو اپنے گھر لاکر اپنی بیوی کے ساتھ بڑی احتیاط سے کھولا۔‏ اس کے اندر اُن کی سوچ سے بھی زیادہ بڑی رقم تھی۔‏ اس میں کریڈٹ کارڈز اور دستخط‌شُدہ چیک بھی تھے۔‏ ایک چیک پر تو ایک ملین تک کی رقم لکھی ہوئی تھی۔‏ اس بریف‌کیس میں پڑے کاغذات سے اُنہوں نے اس کے مالک کا فون نمبر تلاش کر لیا۔‏ اُنہوں نے اس بریف‌کیس کے مالک کو فون کِیا اور مارسیلو کے کام کی جگہ پر ملنے کا بندوبست بنایا۔‏ جب بریف‌کیس کا مالک وہاں پہنچا تو وہ بہت پریشان لگ رہا تھا۔‏ مارسیلو کے آجر نے اُس سے کہا گھبراؤ نہیں وہ یہوواہ کا ایک گواہ ہے۔‏ بریف‌کیس حاصل کرنے کے بعد اُس شخص نے مارسیلو کو صرف ۶ ڈالر (‏تقریباً ۳۵۴ روپے)‏ دئے۔‏ اس بات پر مارسیلو کے آجر کو بہت غصہ آیا کیونکہ وہ اُس کی دیانتداری سے بہت متاثر تھا۔‏ اس سے مارسیلو کو یہ وضاحت کرنے کا موقع ملا کہ یہوواہ کا ایک گواہ ہوتے ہوئے وہ ہمیشہ دیانتداری کو عمل میں لانا چاہتا ہے۔‏

اگلا تجربہ کرغستان کے مُلک سے ہے۔‏ ایک چھ سالہ لڑکے رینٹ کو اپنے پڑوس میں رہنے والی خاتون کا پرس ملا جس میں تقریباً ۲۵ ڈالر (‏تقریباً ۴۷۵ روپے)‏ تھے۔‏ جب رینٹ اُس عورت کو پرس واپس کرنے کے لئے گیا تو اُس نے پیسوں کو گننے کے بعد رینٹ کی امی سے کہا کہ اس میں ۵ ڈالر (‏تقریباً ۲۹۵ روپے)‏ کم ہیں۔‏ رینٹ نے کہا کہ مَیں نے اس میں سے کوئی پیسے نہیں نکالے۔‏ لہٰذا وہ سب باہر پیسے تلاش کرنے کے لئے چلے گئے باقی پیسے اُس جگہ کے قریب ہی پڑے ہوئے ملے جہاں سے پرس ملا تھا۔‏ وہ عورت اس بات پر بہت حیران ہوئی۔‏ اُس نے رینٹ اور اُس کی امی کا شکریہ ادا کِیا اور اپنے بیٹے کی اچھی مسیحی تربیت کرنے پر اُس کی بہت تعریف کی۔‏