شوہر اور بیوی میں پیدا ہونے والی نااتفاقیاں

کوئی بھی شوہر یا بیوی آپس میں لڑنےجھگڑنے سے خوش نہیں ہوتے۔‏ لیکن پھربھی میاں‌بیوی کا لڑناجھگڑنا عام بات ہے۔‏ عموماً،‏ ایک ساتھی کوئی ایسی بات کہہ دیتا ہے جو دوسرے کو بُری لگتی ہے۔‏ دونوں شدید غصے میں آکر ایک دوسرے پر برسنے لگتے ہیں۔‏ وہ جذباتی ہوکر ایک دوسرے پر فقرے کستے ہیں۔‏ اس کے بعد خاموشی چھا جاتی ہے دونوں ہٹ‌دھرمی سے ایک دوسرے سے بات‌چیت نہیں کرتے۔‏ جب غصہ ٹھنڈا ہو جاتا ہے تو دونوں ایک دوسرے سے معافی مانگ لیتے ہیں۔‏ پھر دونوں میں صلح ہو جاتی ہے جب تک کہ اگلا جھگڑا شروع نہیں ہوتا۔‏

بیشتر لطیفوں میں میاں‌بیوی کے جھگڑے نمایاں ہوتے ہیں۔‏ حتیٰ‌کہ ٹی‌وی پروگراموں میں شوہر اور بیوی کی نااتفاقیاں کہانی کا موضوع ہوتی ہیں۔‏ لیکن ان لطیفوں اور ڈراموں سے کوئی خوشی نہیں ملتی۔‏ بائبل کی ایک مثل کہتی ہے:‏ ”‏بےتامل بولنے والے کی باتیں تلوار کی طرح چھیدتی ہیں۔‏“‏ (‏امثال ۱۲:‏۱۸‏)‏ جی‌ہاں،‏ تلخ‌کلامی ایسے جذباتی زخم لگاتی ہے جو جھگڑا ختم ہونے کے بعد بھی نہیں بھرتے۔‏ بعض‌اوقات تکرار لڑائی‌جھگڑوں کی صورت اختیار کر سکتی ہیں۔‏—‏خروج ۲۱:‏۱۸‏۔‏

بِلاشُبہ انسان خطا کا پتلا ہے اور شادی‌شُدہ زندگی میں ایسی باتیں ہونا یقینی ہے۔‏ (‏پیدایش ۳:‏۱۶؛‏ ۱-‏کرنتھیوں ۷:‏۲۸‏)‏ تاہم،‏ باربار ہونے والے شدید جھگڑوں کو عام بات سمجھ کر نظرانداز نہیں کِیا جانا چاہئے۔‏ ماہرین کے مطابق باربار ہونے والے جھگڑے بالآخر طلاق کا باعث بنتے ہیں۔‏ اس لئے بیاہتا جوڑوں کو ایسی نااتفاقیوں کو پُرامن طریقے سے حل کرنا سیکھنا چاہئے۔‏

صورتحال کا جائزہ لینا

اگر آپ کی شادی‌شُدہ زندگی میں باربار جھگڑے ہوتے ہیں تو اس کی وجہ جاننے کی کوشش کریں۔‏ اُس وقت عموماً کیا واقع ہوتا ہے جب آپ اور آپ کا بیاہتا ساتھی کسی معاملے پر متفق نہیں ہیں؟‏ کیا صورتحال قابو سے باہر ہوکر بےعزتی اور الزام‌تراشی کی صورت اختیار کر لیتی ہے؟‏ اگر ایسا ہے تو آپ کیا کر سکتے ہیں؟‏

سب سے پہلے تو اس بات کا جائزہ لیں کہ اس معاملے میں آپ کا کیا کردار ہے؟‏ کیا آپ فوراً غصے میں آ جاتے ہیں؟‏ کیا آپ بحث‌وتکرار کرنے والے ہیں؟‏ آپ کا بیاہتا ساتھی اس سلسلے میں آپ کی بابت کیا کہتا ہے؟‏ آخری سوال پر غور کرنا موزوں ہوگا کیونکہ آپ اور آپ کا ساتھی بحث‌وتکرار کے سلسلے میں مختلف نظریات رکھ سکتے ہیں۔‏

مثال کے طور پر،‏ فرض کریں کہ آپ کا بیاہتا ساتھی کم‌گو ہے جبکہ آپ بِلاجھجک اپنے جذبات کا اظہار کر دیتے ہیں۔‏ آپ شاید کہیں:‏ ”‏مَیں نے جس خاندان میں پرورش پائی ہے وہاں سب اسی طرح بات کرتے تھے۔‏ اسے بحث نہیں کہا جا سکتا!‏“‏ ممکن ہے آپ اسے بحث‌وتکرار نہ سمجھتے ہوں۔‏ لیکن آپ کے ساتھی کو اس سے دُکھ پہنچتا ہے اور وہ اسے بحث خیال کرتا ہے۔‏ آپ اور آپ کے ساتھی کا بات‌چیت کرنے کا انداز مختلف ہے۔‏ یہ بات جاننا آپ کو غلط‌فہمیوں سے بچا سکتا ہے۔‏

یہ بھی یاد رکھیں کہ بحث‌وتکرار میں ہمیشہ چیخناچلانا ہی شامل نہیں ہوتا۔‏ پولس رسول نے مسیحیوں کو لکھا:‏ ”‏ہر طرح .‏ .‏ .‏ [‏کا]‏ شوروغل اور بدگوئی .‏ .‏ .‏ تُم سے دُور کی جائیں۔‏“‏ (‏افسیوں ۴:‏۳۱‏)‏ ”‏شوروغل“‏ میں اُونچی آواز میں بات‌چیت کرنا جبکہ ”‏بدگوئی“‏ میں کہی جانے والی باتیں شامل ہیں۔‏ اس بات پر غور کیجئے کہ اگر ہماری باتیں غصہ دلاتی یا کسی کی  حقارت کرتی ہیں تو آہستہ بولنے کے باوجود تکرار کا باعث بنتی ہیں۔‏

مذکورہ‌بالا مشورت کو یاد رکھتے ہوئے اس بات کا دوبارہ جائزہ لیں کہ کیا آپ بحث‌وتکرار کرنے والے ہیں؟‏ جیسےکہ ہم پہلے دیکھ چکے ہیں کہ اس سوال کا جواب بڑی حد تک آپ کے ساتھی کے نقطۂ‌نظر پر منحصر ہے۔‏ یہ سوچ کر اپنے ساتھی کے نقطۂ‌نظر کو نظرانداز نہ کریں کہ وہ تو حد سے زیادہ حساس ہے۔‏ خود کو اس کی نظر سے دیکھنے کی کوشش کریں اور ضروری تبدیلیاں لائیں۔‏ پولس رسول نے لکھا:‏ ”‏کوئی اپنی بہتری نہ ڈھونڈے بلکہ دوسرے کی۔‏“‏—‏ا-‏کرنتھیوں ۱۰:‏۲۴‏۔‏

‏”‏خبردار رہو کہ تم کس طرح سنتے ہو“‏

یسوع مسیح کے الفاظ نااتفاقیوں کو حل کرنے کے ایک دوسرے طریقے کی نشاندہی کرتے ہیں:‏ ”‏خبردار رہو کہ تُم کس طرح سنتے ہو۔‏“‏ (‏لوقا ۸:‏۱۸‏)‏ یہ بات سچ ہے کہ یسوع مسیح شادی میں رابطے کی بابت بات نہیں کر رہا تھا۔‏ لیکن اس اصول کا اطلاق بیاہتا زندگی میں بھی کِیا جا سکتا ہے۔‏ آپ اپنے ساتھی کی بات کو کتنی اچھی طرح سنتے ہیں؟‏ کیا آپ اس کی پوری بات سنتے ہیں؟‏ یا کیا آپ مسئلے کو پوری طرح سمجھے بغیر اس کا کوئی نامناسب حل پیش کرتے ہیں؟‏ بائبل بیان کرتی ہے:‏ ”‏جو بات سننے سے پہلے اُس کا جواب دے یہ اُس کی حماقت اور خجالت ہے۔‏“‏ (‏امثال ۱۸:‏۱۳‏)‏ جب نااتفاقی پیدا ہو جاتی ہے تو آپ اور آپ کے ساتھی کو مسئلے کو حل کرنے کے لئے ایک دوسرے کی بات سننی چاہئے۔‏

اپنے ساتھی کے نقطۂ‌نظر کو کم اہم خیال کرنے کی بجائے ہمدردی دکھائیں۔‏ (‏ا-‏پطرس ۳:‏۸‏)‏ اصلی یونانی متن میں اس اصطلاح کا مطلب دوسرے شخص کے دُکھ میں شامل ہونا ہے۔‏ اگر آپ کا ساتھی کسی وجہ سے پریشان ہے تو آپ بھی اس کے ساتھ پریشان ہوں۔‏ معاملے کو اس کی نظر سے دیکھنے کی کوشش کریں۔‏

بدیہی طور پر خداپرست شخص اضحاق نے ایسا ہی کِیا تھا۔‏ بائبل بیان کرتی ہے کہ اس کی بیوی ربقہ اپنے بیٹے یعقوب کے سلسلے میں بہت پریشان تھی۔‏ اس نے اضحاق سے کہا:‏ ”‏مَیں حتی لڑکیوں کے سبب سے اپنی زندگی سے تنگ ہوں۔‏ سو اگر یعقوؔب حتی لڑکیوں میں سے جیسی اِس مُلک کی لڑکیاں ہیں کسی سے بیاہ کر لے تو میری زندگی میں کیا لطف رہے گا؟‏“‏—‏پیدایش ۲۷:‏۴۶‏۔‏

یہ سچ ہے کہ ربقہ نے معاملے کو بڑھاچڑھا کر پیش کِیا۔‏ کیا واقعی وہ اپنی زندگی سے نفرت کرتی تھی؟‏ اگر اس کا بیٹا حتی لڑکیوں سے شادی کرے گا تو کیا وہ واقعی موت کو ترجیح دے گی؟‏ یقیناً نہیں۔‏ تاہم،‏ اضحاق نے ربقہ کے جذبات کو ٹھیس نہیں پہنچائی تھی۔‏ جب اُس نے دیکھا کہ ربقہ کی بات صحیح ہے تو اُس نے اس کے مطابق عمل کِیا۔‏ (‏پیدایش ۲۸:‏۱‏)‏ جب آپ کا ساتھی پریشان ہے تو آپ بھی ایسا ہی کر سکتے ہیں۔‏ اس کی بات کو کم اہم خیال کرنے کی بجائے اس کی بات کو سنیں،‏ اس کے نقطۂ‌نظر کی قدر کریں اور ہمدردی دکھائیں۔‏

غور سے سنیں اور سمجھداری دکھائیں

ایک بائبل مثل کہتی ہے:‏ ”‏آدمی کی تمیز اُس کو قہر کرنے میں دھیما بناتی ہے۔‏“‏ (‏امثال ۱۹:‏۱۱‏)‏ نااتفاقی کی صورت میں بیاہتا ساتھی کی کسی طنزیہ بات پر فوری ردِعمل کی توقع کی جا سکتی ہے۔‏ عام طور پر،‏ اس سے بحث میں اضافہ ہوتا ہے۔‏ تاہم،‏ اپنے ساتھی کی بات کو سنتے  وقت اس کے پیچھے چھپے جذبات کو محسوس کرنے کو اپنی عادت بنائیں۔‏ ایسی سمجھداری جھنجلاہٹ پر قابو پانے اور مسئلے کی جڑ تک پہنچنے میں آپ کی مدد کرے گی۔‏

مثال کے طور پر،‏ اگر آپ کی بیوی کہتی ہے،‏ ”‏آپ مجھے بالکل وقت نہیں دیتے ہیں!‏“‏ آپ فوراً غصے میں آ سکتے اور اس الزام سے انکار کر سکتے ہیں۔‏ آپ شاید یہ کہیں،‏ ”‏مَیں نے پچھلے مہینے پورا دن تمہارے ساتھ گزارا تھا!‏“‏ لیکن اگر آپ غور کریں تو آپ دیکھیں گے کہ آپ کی بیوی آپ سے زیادہ وقت نہیں مانگ رہی۔‏ شاید وہ یہ محسوس کرتی ہے کہ آپ اسے نظرانداز کرتے اور اس سے محبت نہیں کرتے ہیں۔‏

فرض کریں کہ آپ ایک بیوی ہیں اور آپ کا شوہر آپ کی حالیہ خریداری کی بابت تشویش کا اظہار کرتا ہے۔‏ وہ شک کے انداز میں کہتا ہے،‏ ”‏تم نے اتنا زیادہ پیسہ کہاں خرچ کِیا ہے؟‏“‏ بیوی شاید خاندانی اخراجات یا خریدی ہوئی کسی چیز کا حوالہ دیتے ہوئے اپنا دفاع کریں۔‏ تاہم،‏ سمجھداری آپ کو اس بات کو سمجھنے میں مدد کرے گی کہ آپ کا شوہر اخراجات کی بات نہیں کر رہا۔‏ شاید وہ اس لئے پریشان ہے کہ خریداری کے لئے اس سے مشورہ نہیں لیا گیا تھا۔‏

بِلاشُبہ ہر جوڑے کا اکٹھے وقت گزارنے یا خریداری سے متعلق فیصلوں پر بات‌چیت کرنے کا طریقہ مختلف ہوتا ہے۔‏ تاہم اہم بات یہ ہے کہ نااتفاقی پیدا ہونے کی صورت میں سمجھداری غصے کو کم کرنے کے ساتھ ساتھ معاملے کو سمجھنے میں بھی ہماری مدد کرے گی۔‏ بغیر سوچے سمجھے عمل کرنے کی بجائے یعقوب کی آگاہی پر دھیان دیتے ہوئے ”‏سننے میں تیز اور بولنے میں دھیرا اور قہر کرنے میں دھیما“‏ بنیں۔‏—‏یعقوب ۱:‏۱۹‏۔‏

یاد رکھیں کہ آپ کا اپنے ساتھی سے بات‌چیت کرنے کا انداز بہت اہم ہے۔‏ بائبل بیان کرتی ہے:‏ ”‏دانشمند کی زبان صحت‌بخش ہے۔‏“‏ (‏امثال ۱۲:‏۱۸‏)‏ جب آپ اور آپ کے ساتھی میں نااتفاقی پیدا ہو جاتی ہے تو کیا آپ کے الفاظ دُکھ پہنچاتے ہیں یا یہ نااتفاقی کو ختم کرتے ہیں؟‏ کیا یہ بات‌چیت کرنے کے لئے راہ ہموار کرتے ہیں یا رکاوٹ بنتے ہیں؟‏ جیساکہ ہم پہلے دیکھ چکے ہیں غصہ اور نامناسب ردِعمل نااتفاقیوں کو اَور زیادہ بڑھا دیتے ہیں۔‏—‏امثال ۲۹:‏۲۲‏۔‏

اگر نااتفاقی بڑھ کر بحث‌وتکرار کی شکل اختیار کر لیتی ہے تو مسئلے کو حل کرنے کی اَور زیادہ کوشش کریں۔‏ نااتفاقی کی وجہ جاننے کی کوشش  کریں۔‏ اس بات پر غور کریں کہ کیا صحیح ہے نہ کہ کون صحیح کہہ رہا ہے۔‏ اس بات کا خاص خیال رکھیں کہ آپ کے الفاظ بحث‌وتکرار کو اَور زیادہ نہ بڑھا دیں۔‏ بائبل بیان کرتی ہے:‏ ”‏کرخت باتیں غضب‌انگیز ہیں۔‏“‏ (‏امثال ۱۵:‏۱‏)‏ جی‌ہاں،‏ آپ کے الفاظ اور کہنے کا انداز اس بات کا تعیّن کریں گے کہ آیا آپ اپنے ساتھی کے ساتھ مل کر کام کرنا چاہتے ہیں یا نہیں۔‏

بحث‌وتکرار جیتنے کی بجائے مسئلہ حل کرنا

نااتفاقیوں سے نپٹتے وقت ہمارا مقصد بحث جیتنے کی بجائے اسے ختم کرنا ہے۔‏ آپ مسئلے کو کیسے حل کر سکتے ہیں؟‏ اس کا یقینی راستہ بائبل مشورت کا اطلاق کرنا ہے۔‏ خاص طور پر شوہروں کو اس سلسلے میں پہل کرنی چاہئے۔‏ مشکلات اور مسائل پر شدید ردِعمل ظاہر کرنے کی بجائے کیوں نہ معاملے کو یہوواہ کی نظر سے دیکھیں۔‏ اُس سے دُعا کریں اور اُس کے اطمینان کی تلاش کریں جو آپ کے دلوں اور خیالوں کو محفوظ رکھے گا۔‏ (‏افسیوں ۶:‏۱۸؛‏ فلپیوں ۴:‏۶،‏ ۷‏)‏ نہ صرف اپنے بلکہ اپنے ساتھی کے احوال پر نظر رکھنے کے لئے سنجیدہ کوشش کریں۔‏—‏فلپیوں ۲:‏۴‏۔‏

جب مجروح احساسات اور بےقابو جذبات ہماری سوچ اور کاموں پر حاوی ہوتے ہیں تب یہ خراب صورتحال کو مزید خراب کر سکتے ہیں۔‏ دوسری طرف،‏ خدا کے کلام کی مشورت میل‌ملاپ رکھنے،‏ یکدل رہنے اور یہوواہ کی برکت حاصل کرنے کا باعث بن سکتی ہے۔‏ (‏۲-‏کرنتھیوں ۱۳:‏۱۱‏)‏ اس لئے،‏ ”‏جو حکمت اُوپر سے آتی ہے“‏ اس کی راہنمائی میں خدائی خوبیاں پیدا کریں اور ”‏صلح کرانے والوں“‏ کے طور پر اس کے فوائد حاصل کریں۔‏—‏یعقوب ۳:‏۱۷،‏ ۱۸‏۔‏

واقعی،‏ سب کو نااتفاقیوں سے پُرامن طریقے سے نپٹنا چاہئے خواہ اپنی ذاتی ترجیحات کی قربانی کیوں نہ دینی پڑے۔‏ (‏ا-‏کرنتھیوں ۶:‏۷‏)‏ بِلاشُبہ پولس کی مشورت پر عمل کرتے ہوئے ”‏غصہ اور قہر اور بدخواہی اور بدگوئی اور مُنہ سے گالی بکنا چھوڑ دو۔‏ .‏ .‏ .‏ کیونکہ تُم نے پُرانی انسانیت کو اُس کے کاموں سمیت اُتار ڈالا۔‏ اور نئی انسانیت کو پہن لیا ہے۔‏“‏—‏کلسیوں ۳:‏۸-‏۱۰‏۔‏

بعض‌اوقات،‏ آپ کچھ ایسی باتیں کہہ دیں گے جن پر آپ کو پچھتانا پڑ سکتا ہے۔‏ (‏یعقوب ۳:‏۸‏)‏ ایسی صورتحال میں اپنے ساتھی سے معافی مانگیں۔‏ کوشش جاری رکھیں۔‏ وقت آنے پر آپ اور آپ کا ساتھی اس بات کو سمجھ جائیں گے کہ نااتفاقیوں کے ساتھ کامیابی سے کیسے نپٹا جا سکتا ہے۔‏

‏[‏صفحہ ۲۲ پر بکس/‏تصویر]‏

نااتفاقیوں کو کم کرنے کے تین اقدام

‏• اپنے ساتھی کی بات سنیں۔‏ امثال ۱۰:‏۱۹

‏• اُس کے نقطۂ‌نظر کی قدر کریں۔‏ فلپیوں ۲:‏۴

‏• پُرمحبت ردِعمل دکھائیں۔‏ ۱-‏کرنتھیوں ۱۳:‏۴-‏۷

‏[‏صفحہ ۲۳ پر بکس/‏تصویر]‏

آپ اِس وقت کیا کر سکتے ہیں

اپنے بیاہتا ساتھی سے مندرجہ‌ذیل سوالات پوچھیں اور اس کے جواب کو غور سے سنیں۔‏ آپ کا ساتھی بھی ایسا ہی کرے۔‏

‏• کیا مَیں بحث‌وتکرار کرنے والا/‏والی ہوں؟‏

‏• جب خیالات کا اظہار کِیا جاتا ہے تو کیا مَیں غور سے سنتا/‏سنتی ہوں یا کیا مَیں آپ کی بات ختم ہونے سے پہلے ہی بول پڑتا/‏پڑتی ہوں؟‏

‏• کیا میرے الفاظ آپ کو غصہ دلاتے ہیں؟‏

‏• ہم دونوں اپنے رابطے کو بہتر بنانے کے لئے کیا کر سکتے ہیں خاص طور پر اُس وقت جب کسی معاملے پر نااتفاقی ہو جاتی ہے؟‏

‏[‏صفحہ ۲۱ پر تصویر]‏

کیا آپ سنتے ہیں؟‏

‏[‏صفحہ ۲۲ پر تصویر]‏

‏”‏مجھے لگتا ہے کہ اُسے میری کوئی پرواہ نہیں“‏

‏[‏صفحہ ۲۲ پر تصویر]‏

‏”‏آپ مجھے بالکل وقت نہیں دیتے!‏“‏

‏[‏صفحہ ۲۲ پر تصویر]‏

‏”‏مَیں نے پچھلے مہینے تمہارے ساتھ پورا دن گزارا تھا!‏“‏