مجھے کونسی تعلیم حاصل کرنی چاہئے؟‏

کیا آپکو کبھی ایسا لگتا ہے جیسے آپ پر مسئلوں کا ایک سیلاب ٹوٹ رہا ہے اور آپ اس میں ڈوبے جا رہے ہیں؟‏ شاید آپ یہ بھی جانتے ہیں کہ ان مسئلوں سے نپٹنے کیلئے اگر آپ کوئی غلط فیصلہ کر بیٹھیں تو دوسروں کو نقصان اُٹھانا پڑے گا۔‏ اپنے مسئلوں کے جال سے آزاد ہونے کیلئے ہم سب کبھی نہ کبھی غلط فیصلہ کر بیٹھتے ہیں۔‏ درست فیصلے کرنے کیلئے ہمیں ایک خاص قسم کی تعلیم کی ضرورت ہے۔‏ لیکن یہ کس قسم کی تعلیم ہے؟‏

کئی ماہرین کا کہنا ہے کہ ”‏اچھی ملازمت تو اُن ہی کو ملتی ہے جو اعلیٰ تعلیم حاصل کرتے ہیں۔‏“‏ آجکل بہتیرے لوگ اس بات سے متفق ہیں۔‏ لیکن کیا انسان کے تمام مسئلوں کا حل اعلیٰ تعلیم حاصل کرنے میں ہی ہے؟‏ کیا اعلیٰ تعلیم حاصل کرنے سے ایک شخص ایک بہتر ماں یا باپ،‏ ایک بہتر بیوی یا شوہر یا پھر ایک بہتر دوست بن جاتا ہے؟‏ اکثر یہ دیکھا گیا ہے کہ تعلیم‌یافتہ لوگ اپنی ذہانت پر غرور کرنے لگتے ہیں،‏ اُنکی شادی کامیاب نہیں ہوتی اور کبھی‌کبھار وہ زندگی سے اتنے بیزار ہو جاتے ہیں کہ وہ خودکُشی کر لیتے ہیں۔‏

بعض لوگ کہتے ہیں کہ زندگی کی پیچیدگیوں سے نپٹنے کیلئے بہترین راہنمائی ہمیں مذہب ہی سے مل سکتی ہے۔‏ لیکن اس سلسلے میں بہت سے لوگ مایوس ہوئے ہیں۔‏ اسکی ایک مثال ملک میکسیکو میں رہنے والی امیلیا * کی ہے۔‏ وہ بتاتی ہے کہ ”‏آج سے ۱۵ سال پہلے کی بات ہے کہ مَیں اپنے شوہر سے علیحدہ ہونا چاہتی تھی۔‏ ہم سارا وقت لڑتےجھگڑتے رہتے۔‏ دراصل میرا شوہر بہت شراب پیتا تھا۔‏ مَیں اُسے جتنا روکتی وہ اُتنا ہی اَور پیتا۔‏ اکثر مجھے اُسکی تلاش میں نکلنا پڑتا تھا جبکہ میرے چھوٹے بچے گھر میں اکیلے رہتے تھے۔‏ مَیں بہت تھک چکی تھی۔‏ کئی مرتبہ مَیں یہ سوچ کر چرچ جاتی کہ وہاں مجھے اپنے مسئلوں کا حل ضرور ملے گا۔‏ لیکن ایسا نہ ہوا۔‏ پادری کبھی‌کبھار بائبل میں سے پڑھ کر سناتا لیکن اُس نے مجھے کوئی ایسی صلاح نہیں دی جس سے میری مشکل آسان ہو جاتی۔‏ چرچ جا کر چند ایک دُعائیں دُہرانے سے مجھے کوئی تسلی نہیں ملی۔‏“‏ پھر ایسے بھی لوگ ہیں جو اپنے مذہبی راہنماؤں کی بُری حرکتوں کو دیکھ کر پریشان ہو جاتے ہیں۔‏ اور وہ مایوس ہو کر سوچنے لگتے ہیں کہ مذہب اُنکو اپنے مسئلوں سے نپٹنے کی راہ نہیں دکھا سکتا۔‏

شاید آپ بھی خود سے یہ سوال کر رہے ہیں کہ زندگی میں کامیاب ہونے کیلئے مجھے کونسی تعلیم حاصل کرنی چاہئے؟‏ کیا یسوع مسیح کی تعلیم پر چلنے سے ہم اپنے مسئلوں سے نپٹنے میں کامیاب ہوں گے؟‏ ان سوالات کا جواب اگلے مضمون میں دیا جائے گا۔‏

‏[‏فٹ‌نوٹ]‏