سوچ‌بچار کے لمحوں کو خوشگوار بنائیں

بعض لوگوں کے خیال میں سوچ‌بچار کرنا ایک بہت ہی مشکل کام ہے۔‏ وہ زیادہ دیر تک کسی بات پر غور کرنا پسند نہیں کرتے۔‏ لیکن جب یہ لوگ بائبل میں غوروفکر کرنے کی اہمیت کے بارے میں پڑھتے ہیں تو اکثر انکا ضمیر اُنہیں ملامت کرنے لگتا ہے۔‏ (‏فلپیوں ۴:‏۸‏)‏ کیا سوچ‌بچار کرنا واقعی ایک مشکل کام ہے؟‏ جب ہم یہوواہ خدا کی خوبیوں،‏ کاموں اور زمین کو فردوس بنانے کے اُسکے وعدوں پر غور کرتے ہیں تو سوچ‌بچار کے لمحے ہمارے لئے خوشگوار ہو سکتے ہیں۔‏

یہوواہ خدا کائنات کا خالق‌ومالک ہے۔‏ وہ اپنے مقصد کو پورا کرنے کیلئے سارا وقت کام کرتا ہے۔‏ (‏یوحنا ۵:‏۱۷‏)‏ اسکے باوجود وہ اپنے خادموں کے خیالات میں گہری دلچسپی لیتا ہے۔‏ یہ جانتے ہوئے داؤد نے لکھا:‏ ”‏اَے [‏یہوواہ]‏!‏ تُو نے مجھے جانچ لیا اور پہچان لیا۔‏ تُو میرا اُٹھنا بیٹھنا جانتا ہے۔‏ تُو میرے خیال کو دُور سے سمجھ لیتا ہے۔‏“‏—‏زبور ۱۳۹:‏۱،‏ ۲‏۔‏

ہو سکتا ہے کہ بعض لوگ داؤد کے ان الفاظ سے مایوس ہو جائیں۔‏ اگر خدا ”‏دُور سے“‏ ہمارے خیالوں کو سمجھ سکتا ہے تو اسکا مطلب ہے کہ وہ ہمارے ہر اچھے بُرے خیال کو جانتا ہے۔‏ ایک لحاظ سے تو یہ اچھی بات ہے کیونکہ یہ جانتے ہوئے ہم اپنے ذہن سے ہر قسم کی غلط سوچ کو دُور کرنے کی کوشش کریں گے۔‏ اگر بُرے خیالات ہمارے ذہن میں آتے بھی ہیں تو ہمیں خدا سے معافی مانگ لینی چاہئے۔‏ وہ ہمیں یسوع مسیح کی قربانی کی بِنا پر ضرور معاف کرے گا۔‏ (‏۱-‏یوحنا ۱:‏۸،‏ ۹؛‏ ۲:‏۱،‏ ۲‏)‏ لیکن خوشی کی بات ہے کہ یہوواہ اپنے بندوں کی خامیوں پر توجہ دینے کی بجائے انکی خوبیوں پر غور کرتا ہے۔‏ یہوواہ اُس وقت بھی انکے خیالوں پر پوری توجہ دیتا ہے جب وہ اُسکے بارے میں سوچ‌بچار کرتے اور اُسکے شکرگزار ہوتے ہیں۔‏

بعض لوگ شاید کہیں کہ خدا اپنے لاکھوں خادموں کے ہر ایک خیال پر توجہ تو نہیں دے گا۔‏ لیکن درحقیقت خدا ایسا کرتا ہے۔‏ یسوع مسیح نے اس بات کو بیان کِیا کہ خدا معمولی چڑیوں پر بھی توجہ دیتا ہے۔‏ پھر اُس نے کہا:‏ ”‏تمہاری قدر تو بہت سی چڑیوں سے زیادہ ہے۔‏“‏ (‏لوقا ۱۲:‏۶،‏ ۷‏)‏ حالانکہ چڑیاں یہوواہ خدا کے بارے میں سوچ‌بچار کرنے کے قابل نہیں توبھی اُسے ان میں سے ہر ایک کی پرواہ ہے۔‏ لیکن خدا کو چڑیوں سے بھی زیادہ ہماری پرواہ ہے۔‏ اسلئے ہم اس بات پر یقین رکھ سکتے ہیں کہ وہ اپنے ہر ایک خادم کی سوچ‌بچار پر توجہ دیتا ہے۔‏ اس وجہ سے ہم داؤد کی طرح یہوواہ سے دُعا کر سکتے ہیں کہ ”‏میرے مُنہ کا کلام اور میرے دل کا خیال تیرے حضور مقبول ٹھہرے۔‏ اَے [‏یہوواہ]‏!‏ اَے میری چٹان اور میرے فدیہ دینے والے!‏“‏—‏زبور ۱۹:‏۱۴‏۔‏

ملاکی کی کتاب بھی ہمیں بتاتی ہے کہ یہوواہ واقعی اپنے خادموں کی سوچ‌بچار میں دلچسپی لیتا ہے۔‏ ملاکی نے ہمارے زمانے کے بارے میں پیشینگوئی کرتے ہوئے لکھا:‏ ”‏تب خداترسوں نے آپس میں گفتگو کی اور [‏یہوواہ]‏ نے متوجہ ہو کر سنا اور اُنکے لئے جو [‏یہوواہ]‏ سے ڈرتے اور اُسکے نام کو یاد کرتے تھے اُسکے حضور یادگار کا دفتر لکھا گیا۔‏“‏ (‏ملاکی ۳:‏۱۶‏)‏ اس آیت کے مطابق یہوواہ ان پر توجہ دیتا ہے جو اُسکے نام کو یاد کرتے اور اُس پر غوروفکر کرتے ہیں۔‏ جب ہم ایسا کرتے ہیں تو سوچ‌بچار کے لمحے ہمارے لئے خوشگوار بن سکتے ہیں۔‏ یقیناً آپ بھی زبورنویس کے ان الفاظ سے اتفاق کریں گے کہ ”‏مَیں تیری ساری صنعت پر دھیان کروں گا اور تیرے کاموں کو سوچوں گا۔‏“‏—‏زبور ۷۷:‏۱۲‏۔‏