درخت سے ایک اہم سبق

ملک پاپوآ نیو گنی کے ایک گاؤں میں دو یہوواہ کے گواہ اپنی تبلیغ سے فارغ ہو کر گھر واپس جا رہے تھے۔‏ اِن میں سے ایک بزرگ اور دوسرا نوجوان تھا۔‏ راستے میں اُنکی نظر ایک بہت ہی خوبصورت درخت پر پڑی۔‏ بزرگ نے نوجوان سے کہا:‏ ”‏اِس درخت کا نام لگانی آؤنا ہے جسکا مطلب ہے ’‏پتے جھرنے والا درخت۔‏‘‏ گرم ممالک کے دوسرے درختوں کے برعکس اِس درخت کے پتے گرتے اور درخت مرجھا جاتا ہے۔‏ تاہم برسات کے موسم میں درخت سرسبز ہو جاتا ہے۔‏ درخت کے پھول ایک بار پھر اسکی خوبصورتی کو نمایاں کرتے ہوئے کھلنے لگتے ہیں۔‏“‏

ہم اس درخت سے ایک اہم سبق سیکھتے ہیں۔‏ کئی ماہروں کے مطابق لگانی آؤنا دُنیا کے پانچ خوبصورت‌ترین درختوں میں سے ایک ہے۔‏ خشک موسم میں درخت کے پتے اور پھول مرجھا جاتے ہیں لیکن پھر بھی اِس موسم کے دوران درخت پانی ذخیرہ کرتا رہتا ہے۔‏ درخت کی جڑیں بہت مضبوط ہوتی ہیں اور زمین کے نیچے پتھروں کے اِردگِرد پھیلتی ہیں۔‏ اِسطرح درخت اپنے آپ کو آندھیوں کے دوران محفوظ رکھتے ہیں۔‏ جی‌ہاں کٹھن حالات کے دوران بھی یہ درخت پھولتا پھلتا ہے۔‏

اگر ہم اپنے آپ کو ایسے کٹھن حالات میں پاتے ہیں جو ہمارے ایمان کا امتحان لیں تو ہم ان حالات کا مقابلہ کیسے کر سکتے ہیں؟‏ جس طرح لگانی آؤنا درخت پانی ذخیرہ کرتا ہے ہم بھی خدا کے کلام سے سچائی کا ”‏پانی“‏ حاصل کرکے اِسکو ذخیرہ کر سکتے ہیں۔‏ اِسکے علاوہ ہم ’‏اپنی چٹان‘‏ یہوواہ خدا اور اُسکی تنظیم کے قریب رہ کر مشکل حالات کا مقابلہ کر سکتے ہیں۔‏ (‏۲-‏سموئیل ۲۲:‏۳‏)‏ واقعی لگانی آؤنا درخت ہمیں اِس بات کی یاد دلاتا ہے کہ دشوار حالات میں بھی ہم روحانی طور پر مضبوط رہ سکتے ہیں۔‏ ایسا کرنے سے ہم خدا کے ”‏وعدوں کے وارث“‏ ہوں گے اور ان وعدوں میں ہمیشہ کی زندگی بھی شامل ہے۔‏—‏عبرانیوں ۶:‏۱۲؛‏ مکاشفہ ۲۱:‏۴‏۔‏