ضعیف مگر روحانی طور پر مضبوط

مُلک سویڈن میں ۶۰ لوگوں کی عمر ۱۰۵ سال یا اس سے اُوپر ہے۔‏ ان میں سے ایک ایلن نامی خاتون ہیں۔‏ ان کی عمر ۱۰۵ سال ہے اور وہ ۶۰ سال سے یہوواہ کی ایک گواہ ہیں۔‏ ضعیفی کی وجہ سے وہ گھر سے باہر نہیں جا سکتیں۔‏ لیکن اس کے باوجود وہ ہر موقع پر دوسروں سے اپنے ایمان کے بارے میں بات کرتی ہیں۔‏

ایسا کرنے میں وہ پولس رسول کے نقشِ‌قدم پر چل رہی ہیں۔‏ پولس رسول جب کچھ عرصہ کیلئے اپنے گھر میں قید تھے تو اُنہوں نے اِن لوگوں میں تبلیغ کی جو اُن کے گھر آتے۔‏ (‏اعمال ۲۸:‏۱۶،‏ ۳۰،‏ ۳۱‏)‏ اسی طرح ایلن بھی خدا کے کلام کی خوشخبری اُن لوگوں کو سناتی ہیں جو اُن کے گھر آتے ہیں،‏ مثلاً ہیرڈریسر،‏ ڈینٹسٹ،‏ ڈاکٹر،‏ نرسیں اور صفائی کرنے والے،‏ وغیرہ۔‏ یہوواہ کے گواہوں کی مقامی کلیسیا کے افراد ایسے لوگوں کو ایلن کے پاس لاتے ہیں جو پاک صحائف کی تعلیم حاصل کر رہے ہیں۔‏ ایلن ان تمام لوگوں کو بہت سی اچھی باتیں سکھاتی ہیں۔‏

کلیسیا کے افراد اس بات سے بہت متاثر ہیں کہ ایلن ہمیشہ خوش‌باش رہتی ہیں اور دوسروں میں دلچسپی لیتی ہیں۔‏ کلیسیا کا ایک فرد یوں بتاتا ہے:‏ ”‏ایلن بہن کلیسیا کی کارگزاریوں میں بھرپور حصہ لیتی ہیں۔‏ وہ سارے بچوں کے نام جانتی ہیں اور کلیسیا کے نئے افراد کو بھی بنام جانتی ہیں۔‏“‏ سب لوگ ایلن کو اس لئے بھی پسند کرتے ہیں کیونکہ وہ مہمان‌نواز اور ہنس‌مکھ ہیں۔‏

ایلن اپنی خوشی اور روحانیت کو کیسے برقرار رکھتی ہیں؟‏ وہ کتابچے روزبروز کتابِ‌مُقدس کی تحقیق کرنا میں سے ہر دن ایک صحیفے پر غور کرتی ہیں۔‏ خاص چشمے کی مدد سے وہ روزانہ بائبل میں بھی پڑھتی ہیں۔‏ وہ اس مواد کو بھی پڑھتی ہیں جس پر یہوواہ کے گواہوں کے ہفتہ‌وار اجلاسوں پر غور کِیا جاتا ہے۔‏ وہ خود تو ان اجلاسوں پر حاضر نہیں ہو سکتیں لیکن وہ کیسٹ پر ان کی ریکارڈنگ سنتی ہیں۔‏ ہم اس ضعیف خاتون سے کیا سیکھ سکتے ہیں؟‏ چاہے ہم جوان ہوں یا عمررسیدہ ہم سب خدا کے کلام میں پڑھنے،‏ اِس پر مبنی کتابوں پر غور کرنے اور مسیحی اجلاسوں پر حاضر ہونے سے بہت فائدہ حاصل کر سکتے ہیں۔‏ اس طرح ہماری زندگی بامقصد اور خوشحال ہوگی۔‏—‏زبور ۱:‏۲؛‏ عبرانیوں ۱۰:‏۲۴،‏ ۲۵‏۔‏