زبان کا زوردار اثر

زرافے کی زبان ۴۵ سینٹی‌میٹر [‏۱۸ اِنچ]‏ لمبی ہے۔‏ وہ اتنی لچکدار اور طاقتور ہے کہ زرافہ اس کے ساتھ درختوں سے پتے نوچ کر کھا سکتا ہے۔‏ نیلی ویل مچھلی کی زبان کا وزن ایک ہاتھی کے وزن کے برابر ہے۔‏ ذرا سوچیں کہ اِسے ہلانے کے لئے اُسے کتنی طاقت چاہئے ہوگی۔‏

انسان کی زبان اتنی لمبی اور وزنی تو نہیں ہے لیکن اس کا بڑا اثر ہوتا ہے۔‏ خدا کے کلام میں یوں کہا گیا ہے:‏ ”‏موت اور زندگی زبان کے قابو میں ہیں۔‏“‏ (‏امثال ۱۸:‏۲۱‏)‏ واقعی،‏ جھوٹی زبانوں نے کتنے ہی لوگوں کی زندگیاں برباد کر دی ہیں،‏ یہاں تک کہ کئی بےقصور لوگوں کو جھوٹی شہادتوں کی وجہ سے سزائےموت بھی سنائی گئی ہے۔‏

اس کے علاوہ زبان دوسروں کو ٹھیس بھی پہنچا سکتی ہے یہاں تک کہ وہ پکی دوستیاں بھی تباہ کر سکتی ہے۔‏ خدا کے بندے ایوب کے ساتھ کچھ ایسا ہی ہوا۔‏ اُس نے اپنے ساتھیوں سے کہا:‏ ”‏تُم کب تک میری جان کھاتے رہو گے اور باتوں سے مجھے چُور چُور کرو گے؟‏“‏ (‏ایوب ۱۹:‏۲‏)‏ یسوع مسیح کے شاگرد یعقوب نے کہا کہ زبان ”‏ایک چھوٹا سا عضو ہے اور بڑی شیخی مارتی ہے۔‏ دیکھو۔‏ تھوڑی سی آگ سے کتنے بڑے جنگل میں آگ لگ جاتی ہے۔‏ زبان بھی ایک آگ ہے۔‏“‏—‏یعقوب ۳:‏۵،‏ ۶‏۔‏

یہ سچ ہے کہ زبان بہت نقصان پہنچا سکتی ہے لیکن یہ بچا بھی سکتی ہے۔‏ مثال کے طور پر تسلی اور ہمدردی کی باتوں نے افسردہ لوگوں کو خودکُشی کرنے سے بچا لیا۔‏ اور اچھی نصیحتوں پر کان لگانے سے کئی اشخاص منشیات اور جُرم کی جان‌لیوا گرفت سے آزاد ہو گئے۔‏ واقعی،‏ صادق کی زبان ”‏حیات کا درخت ہے“‏ اور اس کی باتیں ”‏روپہلی ٹوکریوں میں سونے کے سیب ہیں۔‏“‏—‏امثال ۱۵:‏۴؛‏ ۲۵:‏۱۱‏۔‏

زبان کا بہترین استعمال یہ ہے کہ ہم یہوواہ خدا کی ستائش کریں،‏ خدا کی بادشاہت کی خوشخبری سنائیں اور دوسروں کو پاک صحائف کی تعلیم دیں۔‏ ایسا کرنے کے فائدوں کے بارے میں یسوع مسیح نے کہا:‏ ”‏ہمیشہ کی زندگی یہ ہے کہ وہ تجھ خدایِ‌واحد اور برحق کو اور یسوؔع مسیح کو جِسے تُو نے بھیجا ہے جانیں۔‏“‏—‏یوحنا ۱۷:‏۳؛‏ متی ۲۴:‏۱۴؛‏ ۲۸:‏۱۹،‏ ۲۰‏۔‏