ایک دولتمند حکمران کا غیردانشمندانہ فیصلہ

ایک مرتبہ ایک نوجوان دولتمند شخص یسوع مسیح کے پاس آیا۔‏ وہ نیک،‏ شریعت پر عمل کرنے والا اور بڑا مذہبی تھا۔‏ اُس نے یسوع کے آگے گھٹنے ٹیک کر اُس سے پوچھا:‏ ”‏اَے نیک اُستاد مَیں کیا کروں کہ ہمیشہ کی زندگی کا وارث بنوں؟‏“‏

یسوع مسیح نے اُسے جواب دیا کہ زندگی حاصل کرنے کے لئے اُسے خدا کے حکموں پر عمل کرنے کی ضرورت ہے۔‏ جب اُس نے مزید وضاحت چاہی تو یسوع مسیح نے کہا:‏ ”‏خون نہ کر۔‏ زنا نہ کر۔‏ چوری نہ کر۔‏ جھوٹی گواہی نہ دے۔‏ اپنے باپ کی اور ماں کی عزت کر اور اپنے پڑوسی سے اپنی مانند محبت رکھ۔‏“‏ یہ موسیٰ نبی کو دی جانے والی شریعت کے بنیادی احکام تھے۔‏ اُس آدمی نے کہا:‏ ”‏مَیں نے اِن سب پر عمل کِیا ہے۔‏ اب مجھ میں کس بات کی کمی ہے؟‏“‏—‏متی ۱۹:‏۱۶-‏۲۰‏۔‏

یسوع مسیح کو ”‏اُس پر پیار آیا“‏ اور اُس نے اُس نوجوان سے کہا:‏ ”‏ایک بات کی تجھ میں کمی ہے۔‏ جا جو کچھ تیرا ہے بیچ کر غریبوں کو دے۔‏ تجھے آسمان پر خزانہ ملے گا اور آکر میرے پیچھے ہولے۔‏“‏—‏مرقس ۱۰:‏۱۷-‏۲۱‏۔‏

اب اُس نوجوان دولتمند کو ایک مشکل فیصلہ درپیش تھا۔‏ وہ کیا کرے گا؟‏ کیا وہ خوشی سے اپنا مال‌ودولت قربان کرکے یسوع مسیح کا شاگرد بن جائے گا؟‏ یا کیا وہ اپنے مال‌ودولت کو عزیز رکھے گا؟‏ کیا وہ زمین پر خزانہ تلاش کرے گا یاپھر آسمان پر؟‏ اُس کے لئے یہ فیصلہ کرنا یقیناً مشکل تھا۔‏ صاف ظاہر ہے کہ وہ خدا کے ساتھ اپنے رشتے کو عزیز رکھتا تھا۔‏ کیونکہ وہ شریعت پر عمل کرنے کے باوجود یہ پوچھتا ہے کہ خدا کی خوشنودی حاصل کرنے کے لئے وہ اَور کیا کر سکتا ہے۔‏ اُس نے کیا فیصلہ کِیا؟‏ ”‏وہ غمگین ہو کر چلا گیا کیونکہ بڑا مالدار تھا۔‏“‏—‏مرقس ۱۰:‏۲۲‏۔‏

اس نوجوان دولتمند نے دانشمندانہ فیصلہ نہیں کِیا تھا۔‏ اگر وہ یسوع مسیح کا وفادار پیروکار بن جاتا تو وہ اُس ہمیشہ کی زندگی کو حاصل کر سکتا تھا جس کی اُسے تلاش تھی۔‏ بائبل میں یہ تو نہیں بتایا گیا کہ اس نوجوان کے ساتھ کیا واقع ہوا۔‏ مگر ہم یہ جانتے ہیں کہ اس واقعے کے تقریباً چار صدیاں بعد،‏ رومی فوجوں نے یہودیہ کے زیادہ‌تر علاقوں اور یروشلیم کو تباہ‌وبرباد کر دیا تھا۔‏ اس لئے بہت سے یہودیوں کو نہ صرف اپنے مال‌ودولت بلکہ اپنی زندگیوں سے بھی ہاتھ دھونے پڑے۔‏

اُس دولتمند شخص کے برعکس،‏ پطرس رسول اور دیگر شاگردوں نے دانشمندانہ فیصلہ کِیا۔‏ وہ ”‏سب کچھ چھوڑ“‏ کر یسوع مسیح کے پیچھے ہو لئے۔‏ یہ فیصلہ اُن کے لئے کس قدر فائدہ‌مند ثابت ہوا!‏ یسوع نے انہیں بتایا کہ انہوں نے جوکچھ پیچھے چھوڑ دیا ہے وہ اس سے کہیں زیادہ حاصل کریں گے۔‏ سب سے بڑھکر،‏ وہ ہمیشہ کی زندگی حاصل کریں گے۔‏ پس اُنہیں اپنے اس فیصلے پر کبھی پچھتانا نہ پڑا۔‏—‏متی ۱۹:‏۲۷-‏۲۹‏۔‏

ہم سب کو زندگی میں چھوٹے بڑے فیصلے کرنے پڑتے ہیں۔‏ یسوع مسیح نے ایسے فیصلوں کے بارے میں کیا کہا؟‏ کیا آپ اس کی مشورت پر عمل کریں گے؟‏ ایسا کرنے سے آپ بہت سی برکات حاصل کریں گے۔‏ پس ہم یسوع مسیح کی پیروی کیسے کر سکتے ہیں؟‏ نیز جوکچھ اُس نے فرمایا ہم اُس سے کیسے فائدہ اُٹھا سکتے ہیں؟‏ اس کے بارے میں جاننے کے لئے ہم آپ کو یہوواہ کے گواہوں کے ساتھ بائبل مطالعہ کرنے کی دعوت دیتے ہیں۔‏