کوئی بھی ہتھیار جو ہمارے خلاف بنایا جائے کام نہ آئے گا

‏”‏کوئی ہتھیار جو تیرے خلاف بنایا جائے کام نہ آئے گا۔‏“‏—‏یسعیاہ ۵۴:‏۱۷‏۔‏

۱،‏ ۲.‏ البانیہ کے یہوواہ کے گواہوں کے تجربے سے کیسے ثابت ہوتا ہے کہ ہم یسعیاہ ۵۴:‏۱۷ میں پائے جانے والے وعدے پر بھروسہ رکھ سکتے ہیں؟‏

البانیہ ایک پہاڑی ملک ہے جو یورپ کے جنوب مشرق میں واقع ہے۔‏ یہوواہ کے گواہ وہاں بہت سالوں سے خدمت کر رہے ہیں۔‏ البتہ تقریباً ۵۰ سال تک البانیہ کی کمیونسٹ حکومت اُن کا نام‌ونشان مٹا دینے کی کوشش کرتی رہی۔‏ یہوواہ کے گواہوں کو ظالمانہ طریقے سے اذیت دی جاتی،‏ اُنہیں بیگار کیمپوں میں ڈالا جاتا اور جھوٹی خبروں کے ذریعے اُنہیں بدنام کِیا جاتا۔‏ جب وہ ایک دوسرے کے ساتھ عبادت کے لئے جمع ہوتے یا تبلیغی کام میں حصہ لیتے تو اُنہیں ہمیشہ خطرہ لاحق ہوتا۔‏ اِن تمام مشکلات کے باوجود البانیہ کے یہوواہ کے گواہ یسوع مسیح کی پیروی کرنے میں ڈٹے رہے اور دلیری سے یہوواہ خدا کے نام کی بڑائی کرتے رہے۔‏ پچھلے سال البانیہ میں یہوواہ کے گواہوں کا نیا برانچ دفتر مخصوص کِیا گیا۔‏ اِس موقعے پر ایک ایسے بھائی نے اپنا تجربہ سنایا جو بہت سالوں سے یہوواہ خدا کی خدمت کر رہے ہیں۔‏ اُنہوں نے کہا کہ ”‏شیطان چاہے کتنی بھی کوشش کیوں نہ کرے وہ ہارتا رہے گا جبکہ یہوواہ خدا جیتتا رہے گا۔‏“‏

^۲ البانیہ کے یہوواہ کے گواہوں کا تجربہ اِس بات کا ثبوت ہے کہ ہم یسعیاہ ۵۴:‏۱۷ میں پائے جانے والے اِس وعدے پر بھروسہ رکھ سکتے ہیں:‏ ”‏کوئی ہتھیار جو تیرے خلاف بنایا جائے کام نہ آئے گا اور جو زبان عدالت میں تجھ پر چلے گی تُو اُسے مُجرم ٹھہرائے [‏گا]‏۔‏“‏ خدا کے خادموں کی تاریخ سے ظاہر ہوتا ہے کہ یہوواہ خدا کی عبادت کو روکنے کی کوششیں ہمیشہ ناکام رہی ہیں۔‏ لہٰذا شیطان کی دُنیا مستقبل میں بھی اِن کوششوں میں ناکام رہے گی۔‏

شیطان کی کوششیں ناکام رہی ہیں

۳،‏ ۴.‏ (‏ا)‏ شیطان نے خدا کے خادموں کے خلاف کونسے ہتھیار آزمائے ہیں؟‏ (‏ب)‏ ہم کیوں کہہ سکتے ہیں کہ شیطان کے ہتھیار ناکام رہے ہیں؟‏

^۳ شیطان نے خدا کے خادموں کے خلاف طرح طرح کے ہتھیار  آزمائے ہیں۔‏ مثال کے طور پر یہوواہ کے گواہوں کے کام پر پابندیاں عائد کی گئی ہیں،‏ وہ فسادیوں کے ہاتھوں ظلم کا نشانہ بنے ہیں،‏ اُنہیں قید میں ڈالا گیا ہے اور اُن کے خلاف ’‏قانون کی آڑ میں بدی گھڑی‘‏ گئی ہے یعنی قانونی کارروائی کی گئی ہے۔‏ (‏زبور ۹۴:‏۲۰‏)‏ یہاں تک کہ آج بھی کئی ملکوں میں یہوواہ کے گواہوں کی وفاداری اذیت کی کسوٹی پر آزمائی جا رہی ہے۔‏—‏مکاشفہ ۲:‏۱۰‏۔‏

^۴ مثال کے طور پر ایک ملک میں ۳۲ ایسے واقعے پیش آئے ہیں جن میں یہوواہ کے گواہوں پر مُنادی کے کام کے دوران حملہ کِیا گیا۔‏ اس کے علاوہ وہاں کی پولیس نے ۵۹ مرتبہ تبلیغی کام میں حصہ لینے والے یہوواہ کے گواہوں کو گرفتار کِیا۔‏ اُن میں سے بعض کے ساتھ ایسا ہی سلوک کِیا گیا جیسے مُجرموں کے ساتھ کِیا جاتا ہے،‏ مثلاً اُن کے انگوٹھے کا نشان لیا گیا،‏ اُن کی تصویر کھینچی گئی اور اُنہیں سلاخوں کے پیچھے ڈال دیا گیا۔‏ جبکہ دوسرے بہن‌بھائیوں کو یہ کہہ کر دھمکایا گیا کہ اُنہیں مارا پیٹا جائے گا۔‏ ایک اَور ملک سے اب تک ۱۰۰،‏۱ ایسے واقعات کی رپورٹیں آئی ہیں جن میں یہوواہ کے گواہوں کو گرفتار کِیا گیا،‏ اُن سے جُرمانہ وصول کِیا گیا یا اُن کو مارا پیٹا گیا۔‏ دو سو سے زیادہ ایسے واقعات اُس دن پیش آئے جب وہ یسوع کی موت کی یادگاری کے لئے جمع ہو رہے تھے۔‏ ایسی مشکلات کے باوجود خدا کے سچے خادم نہ صرف اُن ممالک میں بلکہ پوری دُنیا میں بھی اپنی خدمت کو جاری رکھتے ہیں۔‏ یہ صرف خدا کی پاک رُوح کی مدد سے ممکن ہے۔‏ (‏زکریاہ ۴:‏۶‏)‏ دُشمنوں کے حملے ہمیں یہوواہ خدا کی ستائش کرنے سے نہیں روک سکتے ہیں۔‏ خدا کی مرضی پوری ہوگی چاہے ہمارے خلاف کوئی بھی ہتھیار کیوں نہ بنایا جائے۔‏

جھوٹی زبان مُجرم ٹھہرائی گئی

۵.‏ پہلی صدی میں مسیحیوں پر کون سے جھوٹے الزام لگائے گئے؟‏

^۵ یسعیاہ نبی کی پیشینگوئی کے مطابق خدا کے خادم ہر ایسی زبان کو مُجرم ٹھہرائیں گے جو عدالت میں اُن پر جھوٹا الزام لگائے گی۔‏ پہلی صدی میں بھی مسیحیوں پر اکثر جھوٹے الزامات لگائے گئے۔‏ مثال کے طور پر اعمال ۱۶:‏۲۰،‏ ۲۱ میں پولس اور سیلاس پر یوں الزام لگایا گیا:‏ ”‏یہ آدمی .‏ .‏ .‏ ہمارے شہر میں بڑی کھلبلی ڈالتے ہیں اور ایسی رسمیں بتاتے ہیں جن کو قبول کرنا اور عمل میں لانا ہم رومیوں کو روا نہیں۔‏“‏ ایک اَور موقعے پر مخالفین نے شہر کے حاکموں کو مسیحیوں کے خلاف اُکسانے کی کوشش کی۔‏ (‏اعمال ۱۷:‏۶،‏ ۷‏)‏ پولس رسول پر یہ الزام لگایا گیا کہ وہ ایک ”‏بدعتی فرقہ کا سر گروہ“‏ ہے جو دُنیا کے سب یہودیوں میں فتنہ فساد ڈالتا ہے۔‏—‏اعمال ۲۴:‏۲-‏۵‏۔‏

۶،‏ ۷.‏ مخالفین کے الزامات کو جھوٹا ثابت کرنے کا ایک طریقہ کیا ہے؟‏

^۶ لہٰذا حیرانی کی بات نہیں ہے کہ آجکل بھی سچے مسیحیوں پر طرح طرح کے جھوٹے الزام لگائے جاتے ہیں اور اُنہیں بدنام کرنے کی کوشش کی جاتی ہے۔‏ لیکن ہم اُن زبانوں کو جو ہم پر چلتی ہیں کس طرح مُجرم ٹھہراتے ہیں؟‏—‏یسعیاہ ۵۴:‏۱۷‏۔‏

^۷ اکثر اوقات یہوواہ کے گواہ ’‏اپنا چال‌چلن نیک رکھنے‘‏ سے اُن جھوٹی زبانوں کو چپ کرا سکتے ہیں۔‏ (‏۱-‏پطرس ۲:‏۱۲‏)‏ سچے مسیحی قانون کے مطابق چلتے ہیں،‏ اچھا اخلاق رکھتے ہیں اور دوسروں کی بھلائی چاہتے ہیں۔‏ ہمارے نیک کاموں کو دیکھ کر زیادہ‌تر لوگ سمجھ جاتے ہیں کہ ہمارے مخالفین کے الزامات جھوٹے ہیں۔‏ اِس کے نتیجہ میں اکثر ایسا ہوتا ہے کہ لوگ ہمارے آسمانی باپ کی تمجید کرنے لگتے ہیں اور تسلیم کرتے ہیں کہ اُس کی راہنمائی ہماری بہتری کے لئے ہے۔‏—‏یسعیاہ ۶۰:‏۱۴؛‏ متی ۵:‏۱۴-‏۱۶‏۔‏

۸.‏ (‏ا)‏ بعض اوقات ہم مخالفین کے الزامات کو جھوٹا ثابت کرنے کے لئے کس سے رجوع کر سکتے ہیں؟‏ (‏ب)‏ یسوع کی طرح ہم جھوٹی زبانوں کو کس طرح چپ کراتے ہیں؟‏

^۸ اپنا چال‌چلن نیک رکھنے کے علاوہ ہم اپنے ایمان کی دلیلیں پیش کرنے سے بھی مخالفین کے الزامات کو جھوٹا ثابت کر سکتے ہیں۔‏ مثال کے طور پر ہم انصاف کے لئے حکومت یا عدالت سے رجوع کر سکتے ہیں۔‏ (‏آستر ۸:‏۳؛‏ اعمال ۲۲:‏۲۵-‏۲۹؛‏ ۲۵:‏۱۰-‏۱۲‏)‏ کبھی‌کبھار یسوع مسیح نے اپنے مخالفین کے سامنے دلیلیں پیش کرنے سے اُن کے الزامات کو جھوٹا ثابت کِیا۔‏ (‏متی ۱۲:‏۳۴-‏۳۷؛‏ ۱۵:‏۱-‏۱۱‏)‏ یسوع کی طرح،‏ جب بھی ہمیں موقع ملتا ہے ہم دوسروں کو اپنے ایمان کی وجوہات بتاتے ہیں۔‏ (‏۱-‏پطرس ۳:‏۱۵‏)‏ ہو سکتا ہے کہ سکول میں،‏ ملازمت کی جگہ پر یا ایسے رشتہ‌داروں سے بات کرتے وقت جو یہوواہ کے گواہ نہیں ہیں،‏ ہمارے ایمان کو ٹھٹھوں میں  اُڑایا جائے۔‏ لیکن اِس کے باوجود بھی ہم دلیری سے خدا کے کلام کی سچائی کو سناتے رہیں گے۔‏—‏۲-‏پطرس ۳:‏۳،‏ ۴‏۔‏

یروشلیم—‏”‏ایک بھاری پتھر“‏

۹.‏ (‏ا)‏ زکریاہ ۱۲:‏۳ کے مطابق یروشلیم جسے ”‏ایک بھاری پتھر“‏ بنایا جائے گا،‏ کس کی طرف اشارہ کرتا ہے؟‏ (‏ب)‏ زمین پر خدا کی بادشاہت کے نمائندے کون ہیں؟‏

^۹ زکریاہ نبی کی ایک پیشینگوئی سے ظاہر ہوتا ہے کہ اِس دُنیا کی قومیں سچے مسیحیوں کی مخالفت کیوں کرتی ہیں۔‏ زکریاہ ۱۲:‏۳ میں ہم یوں پڑھتے ہیں:‏ ”‏مَیں اس روز یرؔوشلیم کو سب قوموں کے لئے ایک بھاری پتھر بنا دوں گا۔‏“‏ اِس آیت میں جس یروشلیم کا ذکر ہوا ہے یہ ”‏آسمانی یرؔوشلیم“‏ ہے یعنی آسمان کی بادشاہت جس میں یسوع مسیح کے علاوہ ممسوح مسیحی بھی حکمرانی کرتے ہیں۔‏ (‏عبرانیوں ۱۲:‏۲۲‏)‏ اب کم ہی ممسوح مسیحی زمین پر باقی ہیں جبکہ زمینی اُمید رکھنے والی ”‏اَور بھی بھیڑیں“‏ اُن کا ساتھ دیتی ہیں۔‏ مسیحیوں کے یہ دونوں گروہ لوگوں کو خدا کی بادشاہت کی حمایت کرنے کی تاکید کرتے ہیں۔‏ (‏یوحنا ۱۰:‏۱۶؛‏ مکاشفہ ۱۱:‏۱۵‏)‏ اِس پر قوموں نے کیسا ردِعمل دکھایا ہے؟‏ یہوواہ خدا اُن لوگوں کی حفاظت کیسے کرتا ہے جو اُس کی بادشاہت کی حمایت کرتے ہیں؟‏ آئیں ہم زکریاہ ۱۲ باب پر غور کرتے ہوئے اِن سوالوں کا جواب ڈھونڈیں۔‏ ایسا کرنے سے ہمیں پورا اعتماد ہو جائے گا کہ ’‏کوئی ہتھیار جو خدا کے ممسوح مسیحیوں اور اُن کے ساتھیوں کے خلاف بنایا جائے کام نہ آئے گا۔‏‘‏

۱۰.‏ (‏ا)‏ یہوواہ خدا کے خادموں کو راستے سے ہٹانے کی کوشش کیوں کی جاتی ہے؟‏ (‏ب)‏ اِن قوموں کا کیا انجام ہوا جنہوں نے اِس ”‏بھاری پتھر“‏ کو اُٹھانے کی کوشش کی ہے؟‏

^۱۰ زکریاہ ۱۲:‏۳ میں بتایا گیا ہے کہ جو قومیں اِس بھاری پتھر کو اُٹھائیں گی وہ ’‏سب گھایل ہوں گی۔‏‘‏ یہ پیشینگوئی کیسے پوری ہوئی؟‏ خدا کے حکم کے مطابق یہوواہ کے گواہ بادشاہت کی خوشخبری سنا رہے ہیں۔‏ اُن کا پیغام یہ ہے کہ انسان کے تمام مسائل خدا کی بادشاہت کے ذریعے ہی حل ہوں گے۔‏ یہ پیغام قوموں کو ”‏ایک بھاری پتھر“‏ کی طرح ناگوار گزرتا ہے۔‏ اِس لئے وہ اِس پتھر کو راستے سے ہٹانے کی کوشش کرتے ہیں یعنی خدا کے خادموں کو چپ کرانا چاہتے ہیں۔‏ لیکن ایسا کرنے میں یہ قومیں گھایل یعنی زخمی ہو گئی ہیں۔‏ وہ خدا کے سچے خادموں کو چپ نہیں کرا سکی ہیں اِس لئے اُن کی بدنامی ہوئی ہے۔‏ یہوواہ کے گواہ ”‏ابدی خوشخبری“‏ سنانے کے شرف پر فخر کرتے ہیں اِس لئے اُن کو خاموش نہیں کِیا جا سکتا ہے۔‏ (‏مکاشفہ ۱۴:‏۶‏)‏ ایک افریقی ملک میں جہاں یہوواہ کے گواہوں کے ساتھ بہت ہی ظلم کِیا گیا،‏ ایک سپاہی نے کہا:‏ ”‏اِن لوگوں کو ستانا بالکل فضول ہے۔‏ وہ اپنا ایمان کبھی نہیں چھوڑیں گے۔‏ اُن کی تعداد بڑھتی ہی جائے گی۔‏“‏

۱۱.‏ زکریاہ ۱۲:‏۴ میں پایا جانے والا وعدہ کیسے پورا ہوا ہے؟‏

^۱۱ مہربانی سے زکریاہ ۱۲:‏۴ کو پڑھیں۔‏ اِس آیت میں خدا نے وعدہ کِیا ہے کہ وہ اُن لوگوں کو ”‏حیرت‌زدہ“‏ اور اندھا کر دے گا جو بادشاہت کی منادی کرنے والوں کی مخالفت کرتے ہیں۔‏ یہوواہ خدا نے اپنا وعدہ پورا کِیا ہے۔‏ مثال کے طور پر ایک ایسے ملک میں جہاں یہوواہ کے گواہوں کے کام پر پابندی تھی مخالفین نے اُن کو روحانی خوراک سے محروم رکھنے کی سخت کوشش کی۔‏ لیکن خدا کے خادم بائبل پر مبنی رسالے اور کتابیں حاصل  کرنے میں ہمیشہ کامیاب رہے۔‏ اِس لئے ایک اخبار میں دعویٰ کِیا گیا کہ یہ کتابیں اور رسالے باہر سے غباروں کے ذریعے ملک میں پہنچائے جاتے ہیں۔‏ خدا نے اپنا یہ وعدہ پورا کِیا ہے کہ ’‏مَیں قوموں کے سب گھوڑوں کو اندھا کر دوں گا۔‏‘‏ بادشاہت کے دُشمن شکست کھا کر اتنا غصہ ہوتے ہیں کہ اُن کی عقل اندھی پڑ جاتی ہے۔‏ ہمیں خدا پر پورا بھروسہ ہے کہ وہ اپنے لوگوں کو محفوظ رکھے گا۔‏—‏۲-‏سلاطین ۶:‏۱۵-‏۱۹‏۔‏

۱۲.‏ (‏ا)‏ یسوع نے کس طرح زمین پر آگ بھڑکائی؟‏ (‏ب)‏ جو پیغام ممسوح مسیحی پھیلاتے ہیں اِس پر لوگوں کا کیا ردِعمل رہا ہے؟‏

^۱۲ مہربانی سے زکریاہ ۱۲:‏۵،‏ ۶ کو پڑھیں۔‏ اصطلاح ”‏یہوؔداہ کے فرمانروا“‏ خدا کے لوگوں کے نگہبانوں کی طرف اشارہ کرتی ہے۔‏ یہوواہ خدا اپنے لوگوں میں بادشاہت کے لئے ایسا جوش پیدا کرتا ہے گویا اُن کے دل میں آگ لگی ہے۔‏ یسوع مسیح نے اپنے شاگردوں سے کہا کہ ”‏مَیں زمین پر آگ بھڑکانے آیا ہوں۔‏“‏ (‏لوقا ۱۲:‏۴۹‏)‏ اور اُس نے واقعی آگ بھڑکائی۔‏ اُس نے بڑے جوش سے خدا کی بادشاہت کی منادی کی اور یہ پیغام آگ کی طرح یہودی قوم میں پھیل گیا۔‏ (‏متی ۴:‏۱۷،‏ ۲۵؛‏ ۱۰:‏۵-‏۷،‏ ۱۷-‏۲۰‏)‏ اِسی طرح ہمارے دَور میں بھی سچے مسیحی ایسے پیغامات پھیلاتے ہیں جو ”‏لکڑیوں میں جلتی انگیٹھی اور پولوں میں مشعل“‏ کی طرح ہیں۔‏ سن ۱۹۱۷ میں کتاب دی فِنشڈ مسٹری * شائع ہوئی جس میں جھوٹے مسیحیوں کی ریاکاری بےنقاب کی گئی۔‏ اِس پر پادری طبقہ آگ‌بگولا ہو گیا۔‏ حال ہی میں بادشاہتی خبر نمبر ۳۷ کو تقسیم کِیا گیا جس کا عنوان ہے:‏ ”‏جھوٹے مذاہب کا خاتمہ نزدیک ہے۔‏“‏ اِسے پڑھنے  کے بعد بہت سے لوگوں نے اپنے ردِعمل سے ظاہر کِیا کہ آیا وہ خدا کی بادشاہت کی حمایت کرتے ہیں یا اُس کی مخالفت۔‏

‏’‏خدا یہوداہ کے خیموں کو رہائی بخشے گا‘‏

۱۳.‏ (‏ا)‏ اصطلاح ”‏یہوؔداہ کے خیموں“‏ کا اشارہ کن لوگوں کی طرف ہے؟‏ (‏ب)‏ یہوواہ خدا اُنہیں کیوں رہائی بخشتا ہے؟‏

^۱۳ مہربانی سے زکریاہ ۱۲:‏۷،‏ ۸ کو پڑھیں۔‏ قدیم زمانے میں دیہاتی علاقوں میں چرواہے اور کسان اکثر خیموں میں رہتے تھے۔‏ اگر دُشمن یروشلیم پر حملہ کرنے کی خاطر ملک میں گھس آتا تو سب سے پہلے خیموں میں رہنے والے دیہاتی لوگ دُشمن کی زد میں آتے۔‏ اصطلاح ”‏یہوؔداہ کے خیموں“‏ کا اشارہ زمین پر رہنے والے ممسوح مسیحیوں کی طرف ہے جو علامتی طور پر کُھلے میدان میں رہ رہے ہیں۔‏ اِس کا مطلب ہے کہ وہ شیطان کے حملوں کی زد میں ہیں۔‏ لیکن وہ بڑی دلیری سے مسیح کی بادشاہت کا دفاع کر رہے ہیں۔‏ اِس وجہ سے یہوواہ خدا ’‏یہوؔداہ کے خیموں کو رہائی بخشتا ہے۔‏‘‏

۱۴.‏ یہوواہ خدا ممسوح مسیحیوں کی حفاظت کیسے کرتا ہے؟‏

^۱۴ یہوواہ کے گواہوں کی تاریخ سے ظاہر ہوتا ہے کہ خدا واقعی ممسوح مسیحیوں کی حفاظت کرتا ہے۔‏ وہ علامتی طور پر ”‏خیموں“‏ میں رہ کر خدا کی بادشاہت کی حمایت کرتے ہیں۔‏ جب وہ دُشمنوں کے حملوں کی وجہ سے ”‏کمزور“‏ پڑنے کے خطرے میں ہوتے ہیں تو یہوواہ خدا اُنہیں داؤد کی طرح مضبوط اور بہادر بنا دیتا ہے۔‏

۱۵.‏ (‏ا)‏ یہوواہ خدا ”‏سب مخالف قوموں کی ہلاکت“‏ کا ارادہ کیوں کرتا ہے؟‏ (‏ب)‏ وہ اپنے اِس ارادے کو کب پورا کرے گا؟‏

^۱۵ مہربانی سے زکریاہ ۱۲:‏۹ کو پڑھیں۔‏ یہوواہ خدا ”‏سب مخالف قوموں کی ہلاکت“‏ کا ارادہ کیوں کرتا ہے؟‏ کیونکہ وہ مسیح کی بادشاہت کی مخالفت کرتے ہیں اور خدا کے خادموں کو اذیت دیتے ہیں۔‏ جلد ہی زمین پر شیطان کے حمایتی خدا کے لوگوں پر حملہ کریں گے۔‏ اِس طرح وہ جنگ شروع ہوگی جسے بائبل میں ہرمجدون کہا گیا ہے۔‏ (‏مکاشفہ ۱۶:‏۱۳-‏۱۶‏)‏ کائنات کا حاکمِ‌اعلیٰ یہوواہ خدا اپنے لوگوں کو اُن حملوں سے بچائے گا اور قوموں کے سامنے اپنے عظیم نام کی بڑائی کرے گا۔‏—‏حزقی‌ایل ۳۸:‏۱۴-‏۱۸،‏ ۲۲،‏ ۲۳‏۔‏

۱۶،‏ ۱۷.‏ (‏ا)‏ ’‏خدا کے بندوں کی میراث‘‏ کیا ہے؟‏ (‏ب)‏ شیطان کے حملوں کو صبر سے برداشت کرنے سے ہم کس بات کا ثبوت دیتے ہیں؟‏

^۱۶ شیطان کا کوئی بھی ہتھیار خدا کے لوگوں کے ایمان اور اُن کے جوش کو کمزور نہیں بنا سکتا۔‏ یہوواہ خدا اپنے لوگوں کو روحانی لحاظ میں بھی محفوظ رکھتا ہے کیونکہ خدا کا تحفظ ’‏اُس کے بندوں کی میراث ہے۔‏‘‏ (‏یسعیاہ ۵۴:‏۱۷‏)‏ کوئی دُشمن ہماری اِس میراث کو چھین نہیں سکتا۔‏ (‏زبور ۱۱۸:‏۶‏)‏ شیطان مخالفت اور اذیت کی آگ بھڑکاتا رہے گا۔‏ اِن مشکلات کو صبر سے برداشت کرنے سے ہم اِس بات کا ثبوت دیتے ہیں کہ خدا کی روح ہم پر سایہ کرتی ہے۔‏ (‏۱-‏پطرس ۴:‏۱۴‏)‏ خدا کی بادشاہت کی خوشخبری دُنیابھر میں سنائی جا رہی ہے۔‏ شیطان کی دُنیا ہمیں اِس کام سے روکنے کی کوشش کرتی ہے۔‏ اِس لئے وہ ہم پر ”‏فلاخن کے پتھروں“‏ جیسی اذیت ڈھاتی ہے۔‏ لیکن یہوواہ خدا اُن پتھروں کا پایمال کرتا ہے۔‏ (‏زکریاہ ۹:‏۱۵‏)‏ جی‌ہاں،‏ کوئی بھی دُشمن ممسوح مسیحیوں اور اُن کے ساتھیوں کو روک نہیں سکتا۔‏

^۱۷ ہم اُس وقت کے مشتاق ہیں جب ہم شیطان کے حملوں سے نجات پائیں گے۔‏ لیکن جب تک وہ وقت نہ آئے ہمیں اِس بات سے تسلی ملتی ہے کہ ’‏کوئی ہتھیار جو ہمارے خلاف بنایا جائے کام نہ آئے گا اور جو زبان عدالت میں ہم پر چلے گی ہم اُسے مُجرم ٹھہرائیں گے۔‏‘‏

‏[‏فٹ‌نوٹ]‏

آپ کیا جواب دیں گے؟‏

‏• کن مثالوں سے ثابت ہوتا ہے کہ شیطان کے ہتھیار ناکام رہے ہیں؟‏

‏• آسمانی یروشلیم کس لحاظ سے ”‏ایک بھاری پتھر“‏ ہے؟‏

‏• یہوواہ خدا ”‏یہوؔداہ کے خیموں کو“‏ کس طرح رہائی بخشتا ہے؟‏

‏• جوں جوں یہ دُنیا ہرمجدون کی طرف بڑھ رہی ہے آپ کس بات پر بھروسہ رکھتے ہیں؟‏

‏[‏مطالعے کے سوالات]‏

‏[‏صفحہ ۲۳ پرتصویریں]‏

شیطان کے حملوں کا نشانہ بننے کے باوجود البانیہ میں یہوواہ کے گواہ وفادار رہے

‏[‏صفحہ ۲۵ پر تصویر]‏

یسوع مسیح نے مخالفین کے الزامات کو جھوٹا ثابت کِیا

‏[‏صفحہ ۲۶ پر تصویریں]‏

کوئی ہتھیار جو خوشخبری کی منادی کرنے والوں کے خلاف بنایا جائے کام نہ آئے گا