ملک کینیا میں دو پہل‌کار بھائی گھرگھر بادشاہت کی مُنادی کر رہے تھے۔‏ ایک گھر میں اُنہیں اندر آنے کو کہا گیا۔‏ جیسے ہی وہ اندر داخل ہوئے،‏ اُنہوں نے ایک آدمی کو بستر پر لیٹے ہوئے دیکھا۔‏ اُس آدمی کا دھڑ اور بازو بہت چھوٹے تھے۔‏ جب پہل‌کاروں نے اُس آدمی کو بتایا کہ خدا کے کلام میں وعدہ کِیا گیا ہے کہ ”‏لنگڑے ہرن کی مانند چوکڑیاں بھریں گے“‏ تو اُس آدمی کا چہرہ خوشی سے کھل اُٹھا۔‏—‏یسع ۳۵:‏۶‏۔‏

باتوں باتوں میں اِن پہل‌کاروں کو پتہ چلا کہ اُس آدمی کا نام اُنیسمس ہے اور وہ پیدائشی طور پر ہڈیوں کی ایک بیماری میں مبتلا ہے۔‏ اِس بیماری کی وجہ سے اُنیسمس بہت چھوٹے رہ گئے ہیں اور اُن کی ہڈیاں اِتنی نازک ہیں کہ ذرا سا دباؤ پڑنے سے بھی ٹوٹ سکتی ہیں۔‏ ویسے تو اِس بیماری کا کوئی علاج نہیں ہے اور اگر کوئی علاج ہے بھی تو وہ اِتنا مؤثر نہیں ہے۔‏ اِس لئے اُنیسمس کو معلوم تھا کہ اُن کی ساری زندگی ویل‌چیئر پر اور درد کے عالم میں گزرے گی۔‏

اِن بھائیوں نے اُنیسمس کو بائبل کا مطالعہ کرنے کی پیشکش کی جو اُنہوں نے قبول کر لی۔‏ لیکن اُن کی امی نے اُنہیں اِجلاسوں میں جانے کی اِجازت نہ دی۔‏ اُنہیں ڈر تھا کہ اگر کہیں اُنیسمس کو چوٹ لگ گئی تو اُنہیں اَور زیادہ تکلیف سے گزرنا پڑے گا۔‏ لہٰذا بھائی اِجلاس میں پیش کی جانے والی تمام معلومات کو ریکارڈ کرکے اُنیسمس کو دینے لگے تاکہ وہ گھر بیٹھے ہی اِنہیں سُن سکیں۔‏ پانچ مہینے بائبل کا مطالعہ کرنے کے بعد اُنیسمس نے فیصلہ کِیا کہ چاہے کچھ بھی ہو جائے،‏ وہ اِجلاسوں میں جائیں گے۔‏

کیا اِجلاسوں میں جانے سے اُنیسمس کے درد میں اِضافہ ہوا؟‏ جی‌نہیں۔‏ اُنہوں نے بتایا:‏ ”‏اِجلاسوں کے دوران مجھے ایسے لگتا تھا جیسے میرا درد کم ہو گیا ہے۔‏“‏ بائبل کا مطالعہ کرنے سے اُنہیں مستقبل کی ایک نئی اُمید ملی تھی جس کی وجہ سے اب وہ پہلے سے بہتر محسوس کرنے لگے تھے۔‏ اُن کی امی نے بھی دیکھا کہ اُن کا بیٹا اب خوش رہنے لگا ہے۔‏ اِس بات سے وہ اِتنی خوش تھیں کہ وہ خود بھی بائبل کا مطالعہ کرنے پر راضی ہو گئیں۔‏ وہ کہتی تھیں:‏ ”‏خدا کی خدمت ہی میرے بیٹے کے درد کی دوا ہے۔‏“‏

جلد ہی اُنیسمس غیربپتسمہ‌یافتہ مبشر بن گئے اور پھر کچھ عرصے بعد اُنہوں نے بپتسمہ لے لیا۔‏ اور اب وہ کلیسیا میں ایک خادم ہیں۔‏ اگرچہ اُن کی ٹانگیں اور ایک بازو کام نہیں کرتے پھر بھی اُن کی خواہش تھی کہ وہ خدا کی زیادہ سے زیادہ خدمت کریں۔‏ وہ مددگار پہل‌کار بننا چاہتے تھے مگر اِس کے لئے درخواست ڈالنے میں جھجھک محسوس کر رہے تھے۔‏ اُنہیں معلوم تھا کہ ایسا کرنا مشکل ہوگا کیونکہ اُن کی ویل‌چیئر کو دھکیلنے کے لئے ہر وقت کسی نہ کسی کی ضرورت پڑے گی۔‏ جب اُنہوں نے اِس بارے میں کلیسیا کے بہن‌بھائیوں سے ذکر کِیا تو وہ اُنیسمس کی مدد کرنے کے لئے تیار ہو گئے۔‏ یوں اُنیسمس مددگار پہل‌کار کے طور پر خدمت کرنے کے قابل ہوئے۔‏

جب اُنہوں نے کُل‌وقتی خدمت کرنے کے بارے میں سوچا تو تب بھی اُنہیں یہی فکر تھی کہ اُن کی مدد کون کرے گا۔‏ لیکن ایک دن اُنہیں روزانہ کی آیت پڑھ کر بڑی حوصلہ‌افزائی ملی۔‏ یہ زبور ۳۴ کی ۸ آیت تھی جس میں لکھا ہے:‏ ”‏آزما کر دیکھو کہ [‏یہوواہ]‏ کیسا مہربان ہے۔‏“‏ اِس آیت پر سوچ‌بچار کرنے کے بعد اُنیسمس نے پہل‌کار بننے کا فیصلہ کر لیا۔‏ اب وہ ہفتے میں چار دن مُنادی کے کام میں جاتے ہیں۔‏ وہ کئی لوگوں کے ساتھ بائبل کا مطالعہ کر رہے ہیں جو روحانی لحاظ سے آگے بڑھ رہے ہیں۔‏ سن ۲۰۱۰ء میں اُنیسمس کو پہل‌کاروں کے لئے سکول میں جانے کا موقع ملا۔‏ اُنہیں یہ دیکھ کر بہت خوشی ہوئی کہ سکول میں اُن کے اُستادوں میں وہ بھائی بھی شامل تھا جو سب سے پہلے اُن کے گھر آیا تھا۔‏

اُنیسمس اب ۴۰ برس کے ہونے والے ہیں اور اُن کے والدین وفات پا چکے ہیں۔‏ لیکن کلیسیا کے بہن‌بھائی اُن کی ضروریات کا خیال رکھتے ہیں۔‏ اُنیسمس یہوواہ خدا کے شکر گزار ہیں کہ اُس نے اُنہیں سنبھالا ہے اور بہت سی برکتیں دی ہیں۔‏ اب وہ اُس وقت کے منتظر ہیں جب ”‏کوئی نہ کہے گا کہ مَیں بیمار ہوں۔‏“‏—‏یسع ۳۳:‏۲۴‏۔‏