خدا کے مقصد میں مریم کا کردار

یسوع کی خدمتگزاری کے دوران،‏ بِھیڑ میں سے ایک عورت نے پکار کر اُس سے کہا:‏ ”‏مبارک ہے وہ رحم جس میں تُو رہا اور وہ چھاتیاں جو تُو نے چوسیں۔‏“‏ اگر یسوع مسیح اپنی ماں کی پرستش یا تعظیم کرانا چاہتا تو یہ ایسا کرنے کا اچھا موقع تھا۔‏ لیکن اُس نے جواب دیا:‏ ”‏ہاں۔‏ مگر زیادہ مبارک وہ ہیں جو خدا کا کلام سنتے اور اُس پر عمل کرتے ہیں۔‏“‏—‏لوقا ۱۱:‏۲۷،‏ ۲۸‏۔‏

یسوع نے نہ تو خود اپنی ماں کی پرستش کی اور نہ ہی اپنے پیروکاروں کو ایسا کرنے کے لئے کہا۔‏ پھر بھی بہت سے لوگ مریم کی پرستش کرتے ہیں۔‏ آئیں خدا کے کلام کی روشنی میں یسوع کی ماں مریم کے بارے میں چند تعلیمات پر غور کریں۔‏

‏”‏پُرفضل،‏“‏ ”‏عورتوں میں مبارک“‏

جبرائیل فرشتے نے مریم کو بتایا کہ خدا کے مقصد میں اُس کا کیا کردار ہوگا۔‏ فرشتے نے اُس سے کہا:‏ ”‏سلام تجھ کو جس پر فضل ہوا ہے!‏ [‏یہوواہ]‏ تیرے ساتھ ہے۔‏“‏ (‏لوقا ۱:‏۲۸‏)‏ بائبل کے ایک دوسرے ترجمے میں یہ بیان کچھ اِس طرح ہے:‏ ”‏سلام اَے پُرفضل۔‏ خداوند تیرے ساتھ ہے۔‏“‏ اِس کے کچھ ہی عرصہ بعد الیشبع نے مریم سے ملتے وقت یہ کہا:‏ ”‏تُو عورتوں میں مبارک اور تیرے رحم کا پھل مبارک ہے۔‏“‏ (‏لوقا ۱:‏۴۲‏)‏ کیا یہ بیانات یہ ظاہر نہیں کرتے کہ مریم کی پرستش کی جانی چاہئے؟‏

درحقیقت ایسا نہیں ہے۔‏ اگرچہ جبرائیل اور الیشبع کے الفاظ اُس دعا میں شامل ہیں جو کیتھولک لوگ مریم سے کرتے ہیں لیکن بائبل مریم سے دُعا کرنے کی کوئی وجہ نہیں بتاتی۔‏ چونکہ مریم کو مسیحا کو جنم دینے کا شاندار شرف عطا کِیا گیا اِس لئے جبرائیل اور الیشبع نے اُس کے لئے احترام دکھایا۔‏ تاہم،‏ بائبل کی کوئی آیت یہ بیان نہیں کرتی کہ ہمیں مریم سے دُعا کرنی چاہئے۔‏ جب یسوع مسیح کے شاگردوں نے اُس سے کہا کہ ہمیں دُعا کرنا سکھا تو اُس نے اُنہیں بتایا کہ اُن کی  دُعائیں باپ سے مخاطب ہونی چاہئیں۔‏ یسوع نے اُنہیں جو دُعا کرنی سکھائی وہ اِن الفاظ کے ساتھ شروع ہوتی ہے:‏ ”‏اَے ہمارے باپ تُو جو آسمان پر ہے۔‏“‏ —‏متی ۶:‏۹‏۔‏

یسوع کے ساتھی حکمرانوں میں سے ایک

مریم کے بارے میں ایک تعلیم یہ ہے کہ اب وہ ”‏آسمان کی ملکہ“‏ ہے۔‏ لیکن بائبل میں کہیں بھی مریم کو ایسا لقب نہیں دیا گیا ہے۔‏ تاہم،‏ بائبل خدا کے آسمانی انتظام میں مریم کے کردار کو ضرور واضح کرتی ہے۔‏ آئیں دیکھیں کہ اِس انتظام میں مریم کا کیا کردار ہے؟‏

یسوع مسیح نے ظاہر کِیا کہ اُس کے بعض وفادار شاگرد اُس کی بادشاہت میں اُس کے ساتھ حکمرانی کریں گے۔‏ (‏لوقا ۲۲:‏۲۸-‏۳۰‏)‏ یسوع اِن چنے ہوئے لوگوں کو ’‏خدا کے لئے کاہن‘‏ بننے اور ”‏زمین پر بادشاہی“‏ کرنے کا اختیار دے گا۔‏ (‏مکاشفہ ۵:‏۱۰‏)‏ بائبل کی مدد سے ہم اِس نتیجے پر پہنچ جاتے ہیں کہ مریم بھی اِن چنے ہوئے لوگوں میں شامل ہے۔‏ ہم ایسا کیوں کہہ سکتے ہیں؟‏

آپ کو یاد ہوگا کہ یسوع کی موت کے بعد مریم یسوع کے شاگردوں اور اُس کے بھائیو ں کے ساتھ ”‏دُعا میں مشغول“‏ تھی۔‏ اِس موقع پر ۱۲۰ شاگرد حاضر تھے اور اِن میں ’‏چند عورتیں‘‏ بھی شامل تھیں۔‏ (‏اعمال ۱:‏۱۲-‏۱۵‏)‏ بائبل بیان کرتی ہے کہ ”‏جب عیدِپنتیکست کا دن آیا تو وہ سب ایک جگہ جمع تھے“‏ اور خدا کی پاک رُوح اُن پر نازل ہوئی اور اُنہیں غیر زبانیں بولنے کی طاقت بخشی۔‏—‏اعمال ۲:‏۱-‏۴‏۔‏

جی ہاں،‏ مریم اُن شاگردوں کے ساتھ حاضر تھی جن پر رُوح‌اُلقدس ناز ل ہوئی۔‏ اِس سے ظاہر ہوتا ہے کہ مریم اور اُس کے ساتھ دیگر عورتیں بھی آسمان پر یسوع مسیح کے ساتھ حکمرانی کریں گی۔‏ پس یہ بات بالکل واضح ہے کہ اب مریم یسوع مسیح کے ساتھ آسمان پر ہے۔‏ (‏رومیوں ۸:‏۱۴-‏۱۷‏)‏ آئیں اب اِس بات پر غور کریں کہ خدا کے مقاصد کو پورا کرنے کے سلسلے میں مریم اور یسوع کے دیگر ساتھی حکمران کیا کردار ادا کریں گے۔‏

انسانوں کو ابدی فوائد پہنچانے میں مریم کا کردار

بائبل میں مکاشفہ کی کتاب بیان کرتی ہے کہ ۰۰۰،‏۴۴،‏۱ اشخاص یسوع مسیح کے ساتھ آسمان میں جلال پانے کے لئے کاہنوں،‏ منصفوں اور بادشاہوں کے طور پر زندہ کئے جائیں گے۔‏ (‏مکاشفہ ۱۴:‏۱،‏ ۴؛‏ ۲۰:‏۴،‏ ۶‏)‏ کاہنوں کے طور پر وہ تمام فرمانبردار انسانوں کو یسوع کے فدیے سے حاصل ہونے والے فوائد پہنچانے میں حصہ لیں گے جس کے نتیجے میں آخر کار انسان روحانی،‏ اخلاقی اور جسمانی طور پر بےعیب ہو جائیں گے۔‏ (‏مکاشفہ ۲۱:‏۱-‏۴‏)‏ یہوواہ خدا کے وفادار خادموں کے لئے یہ سب کچھ ہوتے دیکھنا واقعی ایک شرف ہوگا۔‏ *

مریم نے خدا کے مقاصد کے سلسلے میں ایک اہم کردار ادا کِیا اور اب تک کر رہی ہے۔‏ مریم ایک فروتن عورت تھی،‏ اُس نے یہوواہ خدا پر مضبوط ایمان رکھا اور اُس کی فرمانبرداری کی۔‏ اِس کے علاوہ،‏ اُس نے ماں کے طور پر اپنی ذمہ‌داری کو بھی احسن طریقے سے پورا کِیا اور سب سے بڑھ کر اُس نے کامیابی سے مشکلات کا مقابلہ کِیا۔‏ یوں اُس نے ہمارے لئے ایک عمدہ مثال قائم کی۔‏ پس مسیحا کو جنم دینے اور انسانوں کو ابدی فوائد پہنچانے میں مریم کے کردار کو تسلیم کرتے ہوئے اُس کا احترام کِیا جانا چاہئے۔‏

تاہم،‏ ہم مریم سے سب سے اہم بات یہ سیکھتے ہیں کہ اُس نے خدا کے دیگر وفادار خادموں کے ساتھ مل کر صرف یہوواہ خدا ہی کی عبادت کی۔‏ آسمان میں مسیح کے دیگر ساتھی حکمرانوں کے ساتھ مریم بھی بلند آواز سے یہ پکارتی ہے کہ ”‏[‏یہوواہ خدا]‏ جو تخت پر بیٹھا ہے اُس کی اور برّہ [‏یسوع مسیح]‏ کی حمد اور عزت اور تمجید اور سلطنت ابدالآباد رہے۔‏“‏—‏مکاشفہ ۵:‏۱۳؛‏ ۱۹:‏۱۰‏۔‏

‏[‏فٹ‌نوٹ]‏

‏[‏صفحہ ۱۰ پر عبارت]‏

مریم کی فروتنی،‏ ایمان اور فرمانبرداری کی نقل کی جانی چاہئے