‏”‏مَیں کب تک مدد کے لئے پکاروں گا؟‏“‏

جین کو کینسر تھا جو اُس کے سارے جسم میں پھیل چکا تھا۔‏ اُس نے روتے ہوئے کہا:‏ ”‏مَیں بس اتنا چاہتی ہوں کہ مجھے اِس درد سے نجات مل جائے!‏“‏ اُس کے خاندان اور دوستوں کی بڑی آرزو تھی کہ کاش وہ اُس کی بیماری اور تکلیف کو ختم کر سکتے!‏ اُنہوں نے جین کی مدد کے لئے خدا سے بڑی دُعائیں بھی کیں۔‏ لیکن کیا خدا کو اُس کی فکر تھی؟‏ کیا خدا نے اُن کی دُعائیں سنیں؟‏

خدا انسانوں کی تکلیف سے واقف ہے۔‏ اُس کا کلام بیان کرتا ہے:‏ ”‏ساری مخلوقات مل کر .‏ .‏ .‏ کراہتی ہے اور دردِزہ میں پڑی تڑپتی ہے۔‏“‏ (‏رومیوں ۸:‏۲۲‏)‏ خدا جانتا ہے کہ جین کی طرح کروڑوں لوگ جسمانی،‏ جذباتی یا ذہنی تکلیف اُٹھاتے ہیں۔‏ ہر روز ۸۰ کروڑ لوگ بھوکے سوتے ہیں۔‏ لاکھوں لوگ اپنے گھروالوں کی طرف سے تشدد کا نشانہ بنتے ہیں۔‏ بہت سے والدین اپنے بچوں کی بھلائی اور مستقبل کے لئے پریشان ہیں۔‏ خدا اِن سب باتوں کو دیکھتا ہے لیکن کیا وہ اِس سلسلے میں کوئی کارروائی کرے گا؟‏ یقیناً وہ ایسا کرے گا۔‏ اگر ہم انسان ہوتے ہوئے اپنے عزیزوں کی مدد کرنا چاہتے ہیں تو کیا خدا انسانوں کی مدد نہیں کرے گا جنہیں اُس نے بڑے پیار سے بنایا ہے؟‏

آجکل بہت سے لوگوں کے ذہن میں ایسے سوال پیدا ہوتے ہیں۔‏ اِس میں حیرانی کی کوئی بات نہیں کیونکہ تقریباً ۶۰۰،‏۲ سال پہلے،‏ حبقوق نبی نے بھی خدا سے ایسے ہی سوال پوچھے تھے:‏ ”‏اَے [‏یہوواہ]‏!‏ مَیں کب تک مدد کے لئے پکاروں گا،‏ کیونکہ تُو سنتا ہی نہیں؟‏ یا مَیں تیرے حضور ظلم،‏ ظلم چلاؤں کیونکہ تُو نہیں بچاتا؟‏ تُو کیا مجھے ناانصافی دکھاتا ہے؟‏ تُو بدکاری کو کیوں برداشت کر لیتا ہے؟‏ بربادی اور ظلم تیرے سامنے ہیں؛‏ فتنہ اور فساد مجھے گھیرے ہوئے ہیں۔‏“‏ (‏حبقوق ۱:‏۲،‏ ۳‏،‏ نیو اُردو بائبل ورشن‏)‏ حبقوق نبی کے زمانے میں ظلم‌وتشدد انتہا کو پہنچ چکا تھا۔‏ آج بھی ہر روز ایسے دل دہلا دینے والے واقعات رُونما ہوتے ہیں جن سے لوگ پریشان ہو جاتے ہیں۔‏

کیا خدا نے حبقوق نبی کی فکرمندی کو معمولی خیال کِیا؟‏ جی‌نہیں۔‏ اُس نے حبقوق کے سوالات کو سنا اور اُسے تسلی دی۔‏ یہوواہ خدا نے اُس سے وعدہ کِیا کہ وہ تمام دُکھ‌تکلیف کو ختم کرے گا جس سے حبقوق کا ایمان مضبوط ہوا۔‏ خدا کے اِسی وعدے سے جین اور اُس کے خاندان کو تسلی ملی اور یقیناً یہ وعدہ آپ کے لئے بھی تسلی کا باعث ہوگا۔‏ اگلے مضامین میں اِن سوالوں کے جواب دئے جائیں گے:‏ اِس بات کا کیا ثبوت ہے کہ خدا ہماری فکر کرتا ہے؟‏ خدا دُکھ‌تکلیف کو کب اور کیسے ختم کرے گا؟‏