شراب کے بارے میں خدا کا نظریہ

ہمارے خالق نے ہمیں بہت سی نعمتیں عطا کی ہیں۔‏ اِن میں سے چند ایک کے بارے میں بائبل بیان کرتی ہے:‏ ”‏مے جو اِنسان کے دل کو خوش کرتی ہے اور روغن جو اُس کے چہرہ کو چمکاتا ہے اور روٹی جو آدمی کے دل کو توانائی بخشتی ہے۔‏“‏ (‏زبور ۱۰۴:‏۱۵‏)‏ یسوع مسیح نے بھی ایک شادی کے موقع پر پانی کو ”‏اچھی مے“‏ بنا کر اِس ضیافت کا لطف دوبالا کر دیا تھا۔‏ (‏یوحنا ۲:‏۳-‏۱۰‏)‏ اِس سے ظاہر ہوتا ہے کہ خدا کا کلام اعتدال کے ساتھ یعنی حد میں رہ کر پینے سے منع نہیں کرتا۔‏ *

یہوواہ خدا ہمارا خالق ہے اِس لئے وہ اچھی طرح جانتا ہے کہ شراب کا ہمارے جسم اور دماغ پر کیا اثر ہوتا ہے۔‏ لہٰذا،‏ بائبل کے ذریعے وہ ہمیں ”‏مفید تعلیم دیتا“‏ ہے اور حد سے زیادہ شراب پینے کے خلاف خبردار کرتا ہے۔‏ (‏یسعیاہ ۴۸:‏۱۷‏)‏ آئیں اِس سلسلے میں چند واضح آگاہیوں پر غور کریں:‏

‏”‏شراب میں متوالے نہ بنو کیونکہ اِس سے بدچلنی واقع ہوتی ہے۔‏“‏ (‏افسیوں ۵:‏۱۸‏)‏ ’‏شرابی خدا کی بادشاہی کے وارث نہ ہوں گے۔‏‘‏ (‏۱-‏کرنتھیوں ۶:‏۹-‏۱۱‏)‏ خدا کا کلام ”‏نشہ‌بازی۔‏ ناچ‌رنگ“‏ اور ایسے ہی دیگر کاموں کی بھی مذمت کرتا ہے۔‏—‏گلتیوں ۵:‏۱۹-‏۲۱‏۔‏

اب آئیں بہت زیادہ شراب پینے کے بعض خطرات پر غور کریں۔‏

زیادہ شراب پینے کے خطرات

اگرچہ شراب پینے سے کچھ فائدہ ہوتا ہے مگر اِس سے جسم اور دماغ پر بُرا اثر بھی پڑتا ہے۔‏ حد سے زیادہ شراب پینا نیچے بیان کئے گئے مسائل میں سے کسی ایک کا باعث بن سکتا ہے:‏

زیادہ شراب پینے سے سوچنےسمجھنے کی صلاحیت متاثر ہوتی ہے۔‏ پینے والے کے ”‏مُنہ سے اُلٹی سیدھی باتیں“‏ نکلنے لگتی ہیں۔‏ (‏امثال ۲۳:‏۳۳‏)‏ ہم نے پچھلے مضمون میں ایلن کے بارے میں پڑھا تھا۔‏ وہ بیان کرتا ہے:‏ ”‏شراب پینے کی عادت سے صرف جسم کو ہی نقصان نہیں پہنچتا بلکہ اِس سے سوچ اور  رویے پر بھی بُرا اثر پڑتا ہے۔‏ شراب پینے کی عادت میں مبتلا شخص کو اِس بات کا کوئی ہوش نہیں رہتا کہ وہ دوسروں کو کس قدر دُکھ اور نقصان پہنچا رہا ہے۔‏“‏

زیادہ شراب پینے سے غلط خواہشات کو قابو میں رکھنا مشکل ہوتا ہے۔‏ بائبل بیان کرتی ہے:‏ ”‏مے اور نئی مے سے بصیرت جاتی رہتی ہے۔‏“‏ (‏ہوسیع ۴:‏۱۱‏)‏ یہ کیسے ہو سکتا ہے؟‏ بعض خواہشات اور خیالات ایسے ہوتے ہیں جنہیں ہم عموماً غلط سمجھتے ہیں اور اُنہیں قابو میں رکھتے ہیں۔‏ مگر شراب پینے کے بعد ہمیں صحیح اور غلط کا احساس نہیں رہتا۔‏ یوں بُرائی سے بچنے کا ہمارا ارادہ کمزور پڑ جاتا ہے جو ہمارے لئے روحانی طور پر بہت نقصاندہ ثابت ہوتا ہے۔‏

مثال کے طور پر،‏ جان کا اپنی بیوی کے ساتھ جھگڑا ہو گیا۔‏ وہ غصے میں گھر سے نکل گیا اور بار (‏شراب‌خانے)‏ میں چلا گیا۔‏ اپنا غصہ ٹھنڈا کرنے کے لئے وہ تین یا چار پیگ پی چکا تھا کہ ایک عورت اُس کے پاس آئی۔‏ کچھ اَور پیگ چڑھانے کے بعد جان اُس عورت کے ساتھ چلا گیا اور اُس کے ساتھ بدفعلی کی۔‏ بعد میں جان اپنی اِس حرکت پر بہت پچھتایا۔‏ وہ جانتا تھا کہ اگر اُس نے بہت زیادہ شراب نہ پی ہوتی تو کبھی ایسی حرکت نہ کرتا۔‏

زیادہ شراب پینے سے زبان اور غصے پر قابو رکھنا مشکل ہوتا ہے۔‏ بائبل بیان کرتی ہے:‏ ”‏کون جھگڑالو ہے؟‏ .‏ .‏ .‏ وہی جو دیر تک مےنوشی کرتے ہیں۔‏“‏ (‏امثال ۲۳:‏۲۹،‏ ۳۰‏)‏ بہت زیادہ شراب پینے والا اُس شخص کی مانند ہوتا ہے ”‏جو سمندر کے درمیان لیٹ جائے یا اُس کی مانند جو مستول کے سرے پر سو رہے۔‏“‏ (‏امثال ۲۳:‏۳۴‏)‏ ایسے شخص کو نشے میں کوئی ہوش نہیں ہوتا کہ اُس کے ساتھ کیا واقع ہوا۔‏ اُس کی حالت کو بائبل یوں بیان کرتی ہے:‏ ”‏تُو کہے گا اُنہوں نے تو مجھے مارا ہے پر مجھکو چوٹ نہیں لگی۔‏ اُنہوں نے مجھے پیٹا ہے پر مجھے معلوم بھی نہیں ہوا۔‏“‏—‏امثال ۲۳:‏۳۵‏۔‏

زیادہ شراب پینے سے بہت سی بیماریاں لگنے کا امکان ہوتا ہے۔‏ ‏”‏انجام‌کار [‏شراب]‏ سانپ کی طرح کاٹتی اور افعی کی طرح ڈس جاتی ہے۔‏“‏ (‏امثال ۲۳:‏۳۲‏)‏ میڈیکل سائنس سے یہ بات سچ ثابت ہو چکی ہے کہ زیادہ مقدار میں شراب ایک زہر کی طرح اثر کر سکتی ہے۔‏ اِس سے بہت سی بیماریاں لگنے کا امکان ہوتا ہے۔‏ جیسےکہ مختلف طرح کے کینسر،‏ جگر میں زخم،‏ ذیابیطس،‏ فالج اور دل کا دورہ وغیرہ۔‏ کبھی‌کبھار تو صرف ایک مرتبہ ہی زیادہ شراب پینے سے کوئی کوما (‏طویل بےہوشی)‏ میں جا سکتا یاپھر مر سکتا ہے۔‏ لیکن حد سے زیادہ شراب پینے کے اِس سے بھی زیادہ سنگین نتائج ہو سکتے ہیں جن کا ذکر ہمیں طبّی ماہرین کی کتابوں میں نہیں ملتا۔‏

سب سے بڑا خطرہ۔‏ حد سے زیادہ شراب پی کر شاید کوئی قابو سے باہر تو نہ ہو مگر اِس سے روحانی نقصان ضرور ہو سکتا ہے۔‏ اِس سلسلے میں بائبل واضح طور پر بیان کرتی ہے:‏ ”‏اُن پر افسوس جو صبح سویرے اُٹھتے ہیں تاکہ نشہ‌بازی کے درپے ہوں اور جو رات کو جاگتے ہیں جب تک شراب اُن کو بھڑکا نہ دے!‏“‏ ایسے لوگوں پر افسوس کیوں کِیا گیا ہے؟‏ بائبل اِس سوال کا جواب یوں دیتی ہے:‏  ‏”‏وہ [‏یہوواہ]‏ کے کام کو نہیں سوچتے اور اُس کے ہاتھوں کی کاریگری پر غور نہیں کرتے۔‏“‏—‏یسعیاہ ۵:‏۱۱،‏ ۱۲‏۔‏

خدا کا پاک کلام مشورہ دیتا ہے کہ ہمیں ”‏شرابیوں میں شامل“‏ نہیں ہونا چاہئے۔‏ (‏امثال ۲۳:‏۲۰‏)‏ بوڑھی عورتوں کو بھی ہدایت کی گئی ہے کہ ”‏زیادہ مے پینے میں مبتلا نہ ہوں۔‏“‏ (‏ططس ۲:‏۳‏)‏ اِس کی کیا وجہ ہے؟‏ وجہ یہ ہے کہ بعض‌اوقات کسی شخص کو پتہ بھی نہیں چلتا اور وہ تھوڑی‌تھوڑی کرکے بہت زیادہ پینا شروع کر دیتا ہے۔‏ آخرکار،‏ شراب کے لئے اُس کی طلب اِس حد تک بڑھ جاتی ہے کہ وہ سوچنے لگتا ہے کہ ”‏مَیں کب جاگوں گا تاکہ ایک اَور جام‌نوش کر سکوں؟‏“‏ (‏امثال ۲۳:‏۳۵‏،‏ نیو اُردو بائبل ورشن‏)‏ کچھ لوگ تو رات کو بہت زیادہ پینے کے بعد بھی صبح اُٹھتے ہی سب سے پہلے شراب پیتے ہیں۔‏ وہ یہ سمجھتے ہیں کہ شراب پئے بغیر اُن کی آنکھ نہیں کھلے گی۔‏ یوں وہ نہایت خطرناک صورتحال میں مبتلا ہو جاتے ہیں۔‏

بائبل آگاہ کرتی ہے کہ ”‏مےخواری۔‏ ناچ‌رنگ۔‏ نشہ‌بازی“‏ کرنے والے لوگ ”‏اُسی کو حساب“‏ دیں گے ”‏جو زندوں اور مُردوں کا انصاف کرنے کو تیار ہے۔‏“‏ (‏۱-‏پطرس ۴:‏۳،‏ ۵‏)‏ اِس کے علاوہ،‏ جس زمانے ہم رہ رہے ہیں اُس کے بارے میں یسوع مسیح نے بیان کِیا:‏ ”‏پس خبردار رہو۔‏ ایسا نہ ہو کہ تمہارے دل خمار اور نشہ‌بازی اور اِس زندگی کی فکروں سے سُست ہو جائیں اور [‏یہوواہ کا]‏ دن تُم پر پھندے کی طرح ناگہاں آ پڑے۔‏“‏—‏لوقا ۲۱:‏۳۴،‏ ۳۵‏۔‏

پس،‏ آئیں دیکھیں کہ حد سے زیادہ شراب پینے والے اپنی حالت سدھارنے کے لئے کیا کر سکتے ہیں۔‏

‏[‏فٹ‌نوٹ]‏

‏[‏صفحہ ۵،‏ ۴ پر تصویریں]‏

حد سے زیادہ شراب پینا سنگین مسائل کا باعث بن سکتا ہے