گُناہ کے متعلق لوگوں کی بدلتی سوچ

ایک وقت تھا جب شہوت‌پرستی،‏ حرص،‏ کاہلی،‏ قہر،‏ حسد اور تکبر کو گُناہ سمجھا جاتا تھا۔‏ مذہبی رہنما اپنی تقریروں میں لوگوں کو ایسے گُناہوں سے خبردار کِیا کرتے تھے۔‏ وہ لوگوں کو گُناہ اور اِس کے سنگین نتائج کے بارے میں بتاتے تھے اور اِس سے توبہ کرنے کی نصیحت کرتے تھے۔‏ مگر اب ایسا نہیں ہے۔‏ اِس سلسلے میں ایک مصنف بیان کرتا ہے:‏ ”‏آجکل مذہبی رہنما لوگوں کی پسند کی باتیں کرتے ہیں۔‏ وہ ایسی باتوں کا ذکر ہی نہیں کرتے جن سے لوگوں کو یہ احساس ہو کہ اُن سے کوئی گُناہ ہوا ہے۔‏“‏

صحافیوں کے بیانات سے بھی ظاہر ہوتا ہے کہ گُناہ کے متعلق اب لوگوں کی سوچ میں بہت تبدیلی آ گئی ہے۔‏ آئیں چند بیانات پر غور کریں۔‏

▪ ”‏لوگ گُناہ سے بچنے اور معافی حاصل کرنے کے بارے میں سننا پسند نہیں کرتے بلکہ ایسی باتیں سننا پسند کرتے ہیں جن سے اُن کا ضمیر خاموش ہو جائے۔‏“‏—‏سٹار بیکن اشتابولا اوہائیو۔‏

▪ ”‏لوگوں میں گُناہ کا احساس ختم ہوتا جا رہا ہے۔‏“‏‏—‏نیوزویک۔‏

▪ ”‏لوگ خدا سے برکات تو حاصل کرنا چاہتے ہیں مگر اُنہیں خدا کے حکم ماننے کی کوئی فکر نہیں۔‏“‏—‏شیکاگو سن ٹائمز۔‏

آج کی دُنیا میں لوگوں کو اِس بات کی کوئی پرواہ نہیں کہ کون کیا کرتا ہے اور کیا سوچتا ہے۔‏ وہ دوسروں کی زندگی میں دخل‌اندازی کرنا پسند نہیں کرتے۔‏ دراصل وہ کسی غلط کام کو غلط کہنے کی بجائے اُس پر اعتراض یا نکتہ‌چینی کو غلط سمجھتے ہیں۔‏ لہٰذا،‏ عام نظریہ ہے کہ ’‏اپنے خیالات دوسروں پر نہیں تھوپنے چاہئیں۔‏ ضروری نہیں کہ جو بات آپ کی نظر میں ٹھیک ہو دوسرے بھی اُسے قبول کریں۔‏ ہر ایک کی سوچ اور زندگی گزارنے کا طریقہ مختلف ہوتا ہے۔‏‘‏

اِس نظریے کی وجہ سے لوگوں کے ذہن سے گُناہ کا تصور بالکل مٹ گیا ہے۔‏ مثال کے طور پر،‏ پہلے شادی کے بغیر اکٹھے رہنا شرمناک سمجھا جاتا تھا مگر آجکل یہ بہت عام ہے۔‏ اِس کے علاوہ،‏ مرد سے مرد کی شادی کو بھی بُرا خیال نہیں کِیا جاتا۔‏ یہاں تک کہ گندی باتوں کو مزاحیہ انداز میں بیان کِیا جاتا ہے۔‏

اِن تمام باتوں سے ظاہر ہوتا ہے کہ گُناہ کے بارے میں لوگوں کی سوچ بالکل بدل گئی ہے۔‏ مگر لوگوں کی سوچ میں اِس تبدیلی کی وجوہات کیا ہیں؟‏ نیز،‏ اِس معاملے میں خدا کا نظریہ کیا ہے؟‏