پاک صحیفوں کی تعلیم

یسوع مسیح کون ہیں؟‏

اِس مضمون میں ایسے سوالوں پر غور کِیا گیا ہے جن کے بارے میں لوگ اکثر سوچتے ہیں۔‏ اِس میں یہ بھی واضح کِیا گیا ہے کہ آپ پاک صحیفوں میں اِن سوالوں کے جواب کہاں سے حاصل کر سکتے ہیں۔‏ یہوواہ کے گواہ خوشی سے آپ کی مدد کریں گے تاکہ آپ اپنے سوالوں کے جواب حاصل کر سکیں۔‏

۱.‏ یسوع مسیح کون ہیں؟‏

یسوع مسیح وہ واحد انسان تھے جو زمین پر آنے سے پہلے آسمان پر رہتے تھے۔‏ (‏یوحنا ۸:‏۲۳‏)‏ خدا نے سب سے پہلے یسوع مسیح کو بنایا تھا۔‏ اِس کے بعد خدا نے یسوع مسیح کے ساتھ مل کر باقی تمام چیزیں بنائیں۔‏ چونکہ خدا نے صرف یسوع مسیح کو براہِ‌راست خلق کِیا تھا اِس لئے وہ خدا کے ”‏اکلوتے“‏ بیٹے کہلاتے ہیں۔‏ یسوع مسیح کو ”‏کلام“‏ بھی کہا گیا ہے کیونکہ اُنہوں نے لوگوں تک خدا کا پیغام پہنچایا۔‏—‏یوحنا ۱:‏۱-‏۳،‏ ۱۴؛‏ کلسیوں ۱:‏۱۵،‏ ۱۶ کو پڑھیں۔‏

۲.‏ یسوع مسیح زمین پر کیوں آئے؟‏

خدا نے یسوع مسیح کی زندگی مریم کے پیٹ میں ڈال دی جو ایک کنواری عورت تھیں۔‏ اِس لئے کوئی انسان یسوع مسیح کا باپ نہیں تھا۔‏ (‏لوقا ۱:‏۳۰-‏۳۵‏)‏ یسوع مسیح زمین پر آئے تاکہ وہ (‏۱)‏ خدا کے بارے میں تعلیم دیں؛‏ (‏۲)‏ خدا کی فرمانبرداری کے سلسلے میں اچھی مثال قائم کریں اور (‏۳)‏ ’‏اپنی جان فدیے میں دیں۔‏‘‏‏—‏متی ۲۰:‏۲۸؛‏ یوحنا ۱۷:‏۶ کو پڑھیں۔‏

۳.‏ فدیے کی ضرورت کیوں پڑی؟‏

فدیہ ایسی قیمت ہے جو کسی کو رِہا کرانے کے لئے ادا کی جاتی ہے۔‏ خدا یہ نہیں چاہتا کہ انسان بوڑھا ہو اور مرے۔‏ ہم یہ کیسے جانتے ہیں؟‏ جب خدا نے پہلے انسان آدم کو بنایا تو خدا نے اُنہیں بتایا کہ گُناہ کی سزا موت ہے۔‏ اگر آدم گُناہ نہ کرتے تو وہ ہمیشہ تک زندہ رہتے۔‏ لیکن آدم نے گُناہ کِیا۔‏ جب اُنہوں نے گُناہ کِیا تو اُسی دن اُن کے جسم میں موت کا عمل شروع ہو گیا اور کئی سال بعد وہ مر گئے۔‏ (‏پیدایش ۲:‏۱۶،‏ ۱۷؛‏ ۵:‏۵‏)‏ آدم نے آنے والی تمام نسلوں کو گُناہ کا ورثہ دیا۔‏ آدم کی وجہ سے ’‏موت دُنیا میں آئی‘‏ کیونکہ گُناہ کی سزا موت ہے۔‏ اِس لئے ہم سب مرتے ہیں اور ہمیں فدیے کی ضرورت ہے۔‏‏—‏رومیوں ۵:‏۱۲؛‏ ۶:‏۲۳ کو پڑھیں۔‏

 ۴.‏ یسوع مسیح کو کیوں مرنا پڑا؟‏

ہمیں موت سے رِہائی دلانے کے لئے فدیہ کون ادا کر سکتا تھا؟‏ ہم سب پیدائشی طور پر گنہگار ہیں اِس لئے ہم سب موت کے سزاوار ہیں۔‏ لہٰذا ہم کسی دوسرے کے لئے فدیہ ادا نہیں کر سکتے۔‏‏—‏زبور ۴۹:‏۷ کو پڑھیں۔‏

کوئی انسان یسوع مسیح کا باپ نہیں تھا اِس لئے وہ پیدائشی طور پر گنہگار نہیں تھے۔‏ اِس کا مطلب ہے کہ اُن کو مرنے کی ضرورت نہیں تھی۔‏ لیکن خدا کو انسانوں سے اِتنی محبت ہے کہ اُس نے اپنے بیٹے کو بھیجا تاکہ وہ انسانوں کے گُناہوں کی خاطر اپنی جان قربان کر دے۔‏ یسوع مسیح کو بھی انسانوں سے اِتنی محبت ہے کہ اُنہوں نے اپنے باپ کا کہنا مانا اور اپنی جان قربان کر دی تاکہ ہمارے گُناہ معاف ہوں۔‏‏—‏یوحنا ۳:‏۱۶؛‏ رومیوں ۵:‏۱۸،‏ ۱۹ کو پڑھیں۔‏

۵.‏ یسوع مسیح اب کیا کر رہے ہیں؟‏

جب یسوع مسیح زمین پر تھے تو اُنہوں نے بیماروں کو شفا دی،‏ مُردوں کو زندہ کِیا اور اپنی جان قربان کی تاکہ لوگ گُناہ اور موت سے نجات پا سکیں۔‏ اِس طرح اُنہوں نے ظاہر کِیا کہ وہ مستقبل میں خدا کے وفادار لوگوں کے لئے کیا کچھ کریں گے۔‏ (‏لوقا ۱۸:‏۳۵-‏۴۲؛‏ یوحنا ۵:‏۲۸،‏ ۲۹‏)‏ جب یسوع مسیح مر گئے تو خدا نے اُنہیں زندہ کِیا اور روحانی جسم عطا کِیا۔‏ (‏۱-‏پطرس ۳:‏۱۸‏)‏ پھر یسوع مسیح نے اِس بات کا انتظار کِیا کہ خدا اُنہیں زمین پر حکمرانی کرنے کا اختیار دے۔‏ (‏عبرانیوں ۱۰:‏۱۲،‏ ۱۳‏)‏ اب یسوع مسیح آسمان پر بادشاہ کے طور پر حکمرانی کر رہے ہیں اور اُن کے پیروکار پوری دُنیا میں خوشخبری کی مُنادی کر رہے ہیں۔‏‏—‏دانی‌ایل ۷:‏۱۳،‏ ۱۴؛‏ متی ۲۴:‏۱۴ کو پڑھیں۔‏

جلد ہی یسوع مسیح اپنے اختیار کو استعمال کرتے ہوئے تمام بُرائی کو ختم کر دیں گے اور زمین کو فردوس بنا دیں گے۔‏ پھر ایسے لوگ جو یسوع مسیح پر ایمان رکھتے ہیں اور اُن کے حکموں پر عمل کرتے ہیں،‏ ہمیشہ تک زمین پر خوشی سے رہیں گے۔‏‏—‏زبور ۳۷:‏۹-‏۱۱ کو پڑھیں۔‏

مزید معلومات کے لئے یہوواہ کے گواہوں کی شائع‌کردہ کتاب پاک صحائف کی تعلیم حاصل کریں کے باب نمبر ۴ کو دیکھیں۔‏

 ‏[‏صفحہ ۳۱ پر تصویر]‏

لاکھوں لوگ جو یسوع مسیح پر ایمان رکھتے ہیں اور اُن کے حکموں پر عمل کرتے ہیں،‏ ہمیشہ تک زمین پر خوشی سے رہیں گے۔‏