پاک صحیفوں کی تعلیم

ہمیں خدا کا نام کیوں لینا چاہئے؟‏

اِس مضمون میں ایسے سوالوں پر غور کِیا گیا ہے جن کے بارے میں لوگ اکثر سوچتے ہیں۔‏ اِس میں یہ بھی واضح کِیا گیا ہے کہ آپ پاک صحیفوں میں اِن سوالوں کے جواب کہاں سے حاصل کر سکتے ہیں۔‏ یہوواہ کے گواہ خوشی سے آپ کی مدد کریں گے تاکہ آپ اپنے سوالوں کے جواب حاصل کر سکیں۔‏

۱.‏ خدا نے اپنا ایک نام کیوں رکھا ہے؟‏

انسان کی پہچان اُس کے نام سے ہوتی ہے۔‏ اِس لئے آپ یہ نہیں چاہیں گے کہ آپ کو ”‏آدمی“‏ یا ”‏عورت“‏ کہہ کر بلایا جائے۔‏ اِس کی بجائے آپ یقیناً یہ چاہیں گے کہ آپ کو آپ کے نام سے بلایا جائے۔‏ یہ سچ ہے کہ بائبل میں خدا کو ”‏مالک،‏“‏ ”‏قادرِمطلق خدا“‏ اور ”‏خالق“‏ کہا گیا ہے۔‏ (‏مکاشفہ ۶:‏۱۰؛‏ پیدایش ۲۸:‏۳؛‏ واعظ ۱۲:‏۱‏)‏ لیکن خدا کا ایک ذاتی نام ہے۔‏ خدا نے اپنا نام اِس لئے رکھا ہے تاکہ ہم اُس کی قربت حاصل کر سکیں۔‏ خدا کا ذاتی نام یہوواہ ہے۔‏‏—‏یسعیاہ ۴۲:‏۸ کو پڑھیں۔‏

بائبل کے بہت سے ترجموں میں سے خدا کا ذاتی نام نکال دیا گیا ہے اور اِس کی جگہ ”‏خدا“‏ اور ”‏خداوند“‏ جیسے لفظ استعمال کئے گئے ہیں۔‏ لیکن حقیقت یہ ہے کہ بائبل کے جو حصے عبرانی زبان میں لکھے گئے تھے،‏ اُن میں یہ نام کوئی ۷۰۰۰ مرتبہ آیا ہے۔‏ اِس سے ظاہر ہوتا ہے کہ یہوواہ خدا یہ چاہتا ہے کہ سب لوگ اُس کا نام جانیں۔‏‏—‏زبور ۱۴۸:‏۱۳ کو پڑھیں۔‏

۲.‏ خدا کا نام جاننا کیوں ضروری ہے؟‏

خدا کا نام جاننے میں صرف یہ شامل نہیں کہ ہمیں پتہ ہو کہ ہم اپنی زبان سے یہ نام کیسے بولیں گے۔‏ اِس میں خدا کی ذات کو قریب سے جاننا شامل ہے۔‏ نام یہوواہ کا مطلب ہے،‏ ”‏وہ جیسا چاہتا ہے ویسا ہی کرتا ہے۔‏“‏ اِس بات سے ہمیں یہ یقین ہوتا ہے کہ خدا اپنا مقصد پورا کرنے کے لئے سب کچھ کر سکتا ہے۔‏ اِس لئے خدا کا نام جاننے میں یہ ایمان رکھنا شامل ہے کہ خدا اپنے سارے وعدے پورے کرے گا۔‏ (‏زبور ۹:‏۱۰‏)‏ جو لوگ ایسا ایمان رکھتے ہیں،‏ اُنہیں خدا پر پورا بھروسا ہوتا ہے اور وہ اُس کا نام استعمال کرتے ہیں۔‏ اُن کی زندگی میں خدا کی خدمت کرنا سب سے اہم ہوتا ہے۔‏ یہوواہ خدا ایسے لوگوں کی حفاظت کرتا ہے۔‏‏—‏زبور ۹۱:‏۱۴ کو پڑھیں۔‏

 ۳.‏ خدا کیوں چاہتا ہے کہ سب لوگ اُس کا نام جانیں؟‏

خدا یہ اِس لئے چاہتا ہے کیونکہ اُس کا نام جاننے سے لوگوں کو فائدہ ہوگا۔‏ خدا کا نام جاننے سے وہ اُس کے دوست بن سکتے ہیں اور ہمیشہ کی زندگی حاصل کر سکتے ہیں۔‏ اِس لئے یہوواہ خدا چاہتا ہے کہ ہم دوسروں کو اُس کا نام بتائیں۔‏‏—‏یوحنا ۱۷:‏۳؛‏ رومیوں ۱۰:‏۱۳،‏ ۱۴ کو پڑھیں۔‏

یسوع مسیح نے لوگوں کو خدا کے نام سے واقف کرایا۔‏ اُنہوں نے ایسا کس طرح کِیا؟‏ اُنہوں نے خدا کے حکموں اور وعدوں کے بارے میں تعلیم دینے سے ایسا کِیا۔‏ آج‌کل بھی یسوع مسیح کے سچے شاگرد پوری دُنیا میں لوگوں کو خدا کے نام سے واقف کراتے ہیں۔‏ وہ خدا کے ’‏نام کی اُمت‘‏ یعنی قوم کے طور یہ کام کر رہے ہیں۔‏‏—‏اعمال ۱۵:‏۱۴؛‏ یوحنا ۱۷:‏۲۶ کو پڑھیں۔‏

۴.‏ خدا اپنے نام کو پاک کیسے ٹھہرائے گا؟‏

خدا اپنے نام کو پاک ٹھہرانا چاہتا ہے کیونکہ اُس کی بہت بدنامی کی گئی ہے۔‏ مثال کے طور پر بعض لوگ کہتے ہیں کہ خدا نے انسانوں کو پیدا نہیں کِیا اِس لئے اُس کے حکم ماننا ضروری نہیں ہے۔‏ بعض لوگوں کا تو یہ خیال ہے کہ خدا کو انسانوں کی کوئی فکر نہیں ہے۔‏ دُنیا میں جتنی بھی پریشانیاں اور تکلیفیں ہیں،‏ اُن سب کا ذمہ‌دار خدا ہے۔‏ ایسی باتیں کرنے والے لوگ خدا کی بدنامی کرتے ہیں۔‏ لیکن خدا ہمیشہ تک اپنی بدنامی کو برداشت نہیں کرے گا۔‏ وہ ایسے لوگوں کو ختم کر دے گا جو اُس کے نام کو رسوا کرتے ہیں۔‏‏—‏زبور ۸۳:‏۱۷،‏ ۱۸ کو پڑھیں۔‏

یہوواہ خدا اپنی بادشاہت کے ذریعے تمام حکومتوں کو ختم کر دے گا اور زمین پر پھر سے امن اور سلامتی قائم کرے گا۔‏ یوں وہ اپنے نام کی بڑائی کرے گا۔‏ (‏دانی‌ایل ۲:‏۴۴‏)‏ وہ وقت جلد آنے والا ہے جب سب لوگوں کو یہ ماننا پڑے گا کہ یہوواہ ہی سچا خدا ہے۔‏‏—‏حزقی‌ایل ۳۶:‏۲۳؛‏ متی ۶:‏۹ کو پڑھیں۔‏

یہ سب کچھ جاننے کے بعد آپ کو کیا کرنا چاہئے؟‏ آپ کو خدا کے قریب جانے کی کوشش کرنی چاہئے۔‏ اِس کے لئے ضروری ہے کہ آپ بائبل کا مطالعہ کریں اور اُن لوگوں کے ساتھ مل کر یہوواہ خدا کی عبادت کریں جو اُس سے محبت کرتے ہیں۔‏ جب یہوواہ خدا اپنی بادشاہت کے ذریعے اپنے نام کو پاک ٹھہرائے گا تو وہ اپنے وفادار بندوں کو یاد رکھے گا اور اُنہیں برکت دے گا۔‏—‏ملاکی ۳:‏۱۶‏۔‏

مزید معلومات کے لئے کتاب پاک صحائف کی تعلیم حاصل کریں کے باب نمبر ایک کو دیکھیں۔‏ یہ کتاب یہوواہ کے گواہوں نے شائع کی ہے۔‏

‏[‏صفحہ ۱۶ پر تصویر]‏

خدا کا نام ایک پُرانے عبرانی نسخے میں