اگر آپ خدا کے دوست بننا چاہتے ہیں تو آپ کو اُس مذہب پر چلنا چاہئے جسے خدا کی خوشنودی حاصل ہے۔‏ یسوع نے فرمایا کہ ”‏سچے پرستار“‏ خدا کی پرستش ”‏سچائی“‏ سے کرینگے۔‏ (‏یوحنا 4:‏23،‏ 24‏)‏ خدا کی پرستش کرنے کا ایک ہی دُرست طریقہ ہے۔‏ (‏افسیوں 4:‏4-‏6‏)‏ سچا مذہب ہمیشہ کی زندگی کی طرف لے جاتا ہے اور جھوٹا مذہب ہلاکت کی طرف لے جاتا ہے۔‏—‏متی 7:‏13،‏ 14‏۔‏

آپ سچے مذہب کی شناخت اُس پر چلنے والے لوگوں کو دیکھ کر سکتے ہیں۔‏ یہوواہ کی طرح اُسکے سچے پرستاروں کو بھی نیک ہونا چاہئے۔‏ جیسے نارنگی کے اچھے درخت میں اچھی نارنگیاں لگتی ہیں،‏ بالکل اُسی طرح سچا مذہب اچھے لوگ پیدا کرتا ہے۔‏—‏متی 7:‏15-‏20‏۔‏

یہوواہ کے دوست بائبل کا گہرا احترام کرتے ہیں۔‏ وہ جانتے ہیں کہ بائبل خدا کی طرف سے ہے۔‏ وہ بائبل کی باتوں کو اپنی زندگیوں میں راہنمائی کیلئے،‏ اپنے مسائل حل کرنے کے لئے اور خدا کی بابت سیکھنے میں مدد حاصل کرنے کیلئے استعمال کرتے ہیں۔‏ (‏2-‏تیمتھیس 3:‏16‏)‏ وہ اپنی مُنادی کے مطابق عمل کرنے کی کوشش کرتے ہیں۔‏

یہوواہ کے دوست ایک دوسرے کیلئے محبت دکھاتے ہیں۔‏ یسوع نے لوگوں کو خدا کی بابت تعلیم دینے اور بیماروں کو شفا دینے سے لوگوں کیلئے محبت ظاہر کی تھی۔‏ سچے مذہب پر چلنے والے بھی دوسروں کے لئے محبت دکھاتے ہیں۔‏ یسوع کی طرح،‏ وہ بھی غریبوں یا مختلف نسلی گروہوں سے تعلق رکھنے والے لوگوں کو حقیر نہیں جانتے۔‏ یسوع نے فرمایا تھا کہ لوگ  اُس کے شاگردوں کو ایک دوسرے کیلئے محبت ظاہر کرنے سے پہچانیں گے۔‏—‏یوحنا 13:‏35‏۔‏

خدا کے دوست،‏ خدا کے نام،‏ یہوواہ کو پاک مانتے ہیں۔‏ اگر ایک شخص آپ کا نام لینے سے انکار کر دیتا ہے تو کیا وہ آپکا قریبی دوست ہو سکتا ہے؟‏ ہرگز نہیں!‏ جب ہماری کسی سے دوستی ہوتی ہے تو ہم دوسروں کے سامنے اُس دوست کے نام کیساتھ ساتھ اُسکی خوبیاں بھی بیان کرتے ہیں۔‏ پس جو خدا کا دوست بننا چاہتے ہیں اُنہیں اُس کا نام استعمال کرنا چاہئے اور دوسروں کیساتھ اُسکی بابت گفتگو کرنی چاہئے۔‏ یہوواہ چاہتا ہے کہ ہم ایسا کریں۔‏—‏متی 6:‏9؛‏ رومیوں 10:‏13،‏ 14‏۔‏

یسوع کی طرح،‏ خدا کے دوست لوگوں کو خدا کی بادشاہت کی بابت تعلیم دیتے ہیں۔‏ خدا کی بادشاہت آسمانی حکومت ہے جو زمین کو فردوس بنا دیگی۔‏ خدا کے دوست دوسروں کو خدا کی بادشاہت کی اس خوشخبری کے بارے میں بتاتے ہیں۔‏—‏متی 24:‏14‏۔‏

یہوواہ کے گواہ خدا کے دوست بننے کی کوشش کرتے ہیں۔‏ وہ بائبل کا احترام کرتے ہیں اور آپس میں محبت رکھتے ہیں۔‏ وہ خدا کے نام کو استعمال کرتے اور پاک مانتے ہیں اور دوسروں کو خدا کی بادشاہت کی بابت تعلیم بھی دیتے ہیں۔‏ آجکل زمین پر یہوواہ کے گواہ سچے مذہب پر چلتے ہیں۔‏