اگر ہم مر جائیں تو کیا خدا ہمیں زندہ کرنا چاہے گا؟‏ آپ کا کیا خیال ہے؟‏ .‏.‏.‏.‏.‏.‏ خدا کے خادم ایوب کو اِس بات کا پکا یقین تھا۔‏ ایک بار ایوب نے سوچا کہ وہ مرنے والے ہیں۔‏ اِس لئے اُنہوں نے خدا سے کہا:‏ ”‏اَے خدا،‏ تُو مجھے پکارے گا اور مَیں تجھے جواب دوں گا۔‏“‏ ایوب نے یہ بھی کہا کہ یہوواہ خدا اپنے خادموں کو زندہ کرنے کی دلی خواہش رکھتا ہے۔‏—‏ایوب ۱۴:‏۱۴،‏ ۱۵‏۔‏

یسوع مسیح اپنے باپ یہوواہ خدا کی طرح ہیں۔‏ وہ بھی ہماری مدد کرنا چاہتے ہیں۔‏ ایک بار ایک آدمی اُن کے پاس آیا جسے کوڑھ کی بیماری تھی۔‏ اِس آدمی نے یسوع مسیح سے کہا:‏ ”‏اگر آپ چاہیں تو مجھے پاک صاف کر دیں۔‏“‏ اِس پر یسوع مسیح نے کہا:‏ ”‏مَیں چاہتا ہوں۔‏ پاک صاف ہو جاؤ۔‏“‏ پھر اُنہوں نے اُس آدمی کو ٹھیک کر دیا۔‏—‏مرقس ۱:‏۴۰-‏۴۲‏۔‏

یہوواہ خدا اور یسوع مسیح کو بچوں سے بہت پیار ہے۔‏ بائبل میں بتایا گیا ہے کہ خدا نے اپنے خادموں کے ذریعے کچھ بچوں کو زندہ کِیا۔‏ مثال کے طور پر ایک دفعہ ایک عورت کا بچہ مر گیا۔‏ اِس عورت نے خدا کے خادم ایلیاہ کے ساتھ بہت اچھا سلوک کِیا تھا۔‏ اِس لئے ایلیاہ نے خدا سے دُعا کی  کہ بچہ زندہ ہو جائے۔‏ اور یہوواہ خدا نے اِس بچے کو زندہ کر دیا۔‏ اِسی طرح یہوواہ خدا نے اپنے خادم الیشع کے ذریعے بھی ایک بچے کو زندہ کِیا۔‏—‏۱-‏سلاطین ۱۷:‏۱۷-‏۲۴؛‏ ۲-‏سلاطین ۴:‏۳۲-‏۳۷‏۔‏

اِس سے ظاہر ہوتا ہے کہ یہوواہ خدا کو بچوں سے بڑا پیار ہے۔‏ یہ بڑی خوشی کی بات ہے،‏ ہے نا؟‏ .‏.‏.‏.‏.‏.‏ جب ہم زندہ ہوتے ہیں تو یہوواہ خدا ہمارا خیال رکھتا ہے۔‏ لیکن کیا وہ تب بھی ہمیں یاد رکھتا ہے جب ہم مر جاتے ہیں؟‏ یسوع مسیح نے کہا تھا کہ جب خدا کے خادم مر جاتے ہیں تو وہ خدا کی نظر میں زندہ ہوتے ہیں۔‏ (‏لوقا ۲۰:‏۳۸‏)‏ اِس سے ظاہر ہوتا ہے کہ خدا اپنے خادموں کو کبھی نہیں بھولتا۔‏ بائبل میں بتایا گیا ہے کہ موت بھی ہمیں خدا کی محبت سے جُدا نہیں کر سکتی۔‏—‏رومیوں ۸:‏۳۸،‏ ۳۹‏۔‏

جب یسوع مسیح زمین پر تھے تو اُنہوں نے ظاہر کِیا کہ یہوواہ خدا کو بچوں سے بڑا پیار ہے۔‏ آپ کو یاد ہوگا کہ یسوع مسیح بچوں کو خدا کے بارے میں سکھانے کے لئے وقت نکالتے تھے۔‏ لیکن کیا آپ کو پتہ ہے کہ یسوع مسیح نے کچھ بچوں کو زندہ کِیا تھا؟‏ .‏.‏.‏.‏.‏.‏ خدا نے اُن کو ایسا کرنے کی طاقت دی تھی۔‏ مثال کے طور پر یسوع مسیح نے ایک بچی کو زندہ کِیا جو ۱۲ سال کی تھی۔‏ آئیں،‏ مَیں آپ کو اِس کی کہانی سناؤں۔‏

اِس بچی کے باپ کا نام یائیر تھا۔‏ یائیر کے اَور کوئی بچے نہیں تھے۔‏ وہ گلیل کی جھیل کے نزدیک رہتے تھے۔‏ ایک دن یائیر کی بیٹی بہت بیمار ہو گئی۔‏ یائیر کو لگ رہا تھا کہ اُن کی بیٹی مرنے والی ہے۔‏ اُنہوں نے سنا تھا کہ یسوع مسیح لوگوں کی بیماریوں کو دُور کر سکتے ہیں۔‏ اِس لئے وہ اُن کی تلاش میں نکلے۔‏ جب یائیر گلیل کی جھیل کے کنارے پہنچے تو اُنہوں نے دیکھا کہ وہاں بہت سے لوگ جمع ہیں اور یسوع مسیح اُن کو تعلیم دے رہے ہیں۔‏

یائیر لوگوں کے بیچ میں راستہ بنا کر یسوع مسیح تک پہنچے۔‏ اُنہوں نے یسوع مسیح کے سامنے گھٹنے ٹیکے اور کہا:‏ ”‏میری بیٹی بہت بیمار ہے۔‏ مَیں آپ کی مِنت کرتا ہوں کہ آپ آکر اُس کو ٹھیک کر دیں۔‏“‏ یسوع مسیح فوراً یائیر کے ساتھ روانہ ہو گئے۔‏ جو لوگ وہاں موجود تھے وہ بھی اُن کے پیچھےپیچھے گئے۔‏ لیکن ابھی وہ راستے ہی میں تھے کہ یائیر کے گھر سے کچھ آدمیوں نے آکر یائیر کو خبر دی کہ ”‏آپ کی بیٹی مر گئی ہے۔‏ اب اُستاد کو تکلیف دینے سے کیا فائدہ؟‏“‏

 یسوع مسیح نے اِن آدمیوں کی بات سُن لی۔‏ اُن کو پتہ تھا کہ یائیر اِس خبر کی وجہ سے بہت افسردہ ہیں۔‏ اِس لئے اُنہوں نے یائیر سے کہا:‏ ”‏فکر مت کرو۔‏ بس،‏ خدا پر ایمان رکھو تو تمہاری بیٹی بچ جائے گی۔‏“‏ پھر وہ سب مل کر یائیر کے گھر گئے۔‏ وہاں پہنچ کر اُنہوں نے دیکھا کہ بہت سے لوگ جمع ہیں اور وہ سب رو رہے ہیں۔‏ لیکن یسوع مسیح نے اُن سے کہا:‏ ”‏مت روؤ۔‏ بچی مری نہیں بلکہ سو رہی ہے۔‏“‏

یسوع مسیح کی یہ بات سُن کر لوگ اُن کا مذاق اُڑانے لگے کیونکہ وہ جانتے تھے کہ لڑکی مر چکی ہے۔‏ آپ کے خیال میں یسوع مسیح نے کیوں کہا کہ بچی سو رہی ہے؟‏ .‏.‏.‏.‏.‏.‏ کیا آپ جانتے ہیں کہ وہ لوگوں کو کیا سمجھانا چاہتے تھے؟‏ .‏.‏.‏.‏.‏.‏ وہ لوگوں کو یہ سمجھانا چاہتے تھے کہ موت گہری نیند کی طرح ہوتی ہے۔‏ وہ چاہتے تھے کہ لوگ جان جائیں کہ خدا نے اُن کو مُردوں کو زندہ کرنے کی قوت دی ہے۔‏ یسوع مسیح بالکل اِس طرح مُردوں کو جگا سکتے ہیں جیسے ہم کسی سوئے ہوئے شخص کو جگاتے ہیں۔‏

یسوع مسیح نے پطرس،‏ یعقوب اور یوحنا رسول اور اُس لڑکی کے امی‌ابو کو ساتھ لیا اور اُس کمرے میں گئے جہاں لڑکی کو لٹایا گیا تھا۔‏ پھر یسوع مسیح نے لڑکی کا ہاتھ پکڑا اور اُس سے کہا:‏ ”‏بیٹی،‏ اُٹھ جاؤ۔‏“‏ لڑکی فوراً اُٹھ کر چلنےپھرنے لگی۔‏ یہ دیکھ کر اُس کے امی‌ابو بہت خوش ہوئے۔‏—‏مرقس ۵:‏۲۱-‏۲۴،‏ ۳۵-‏۴۳؛‏ لوقا ۸:‏۴۰-‏۴۲،‏ ۴۹-‏۵۶‏۔‏

 اب ذرا سوچیں کہ اگر یسوع مسیح نے اُس بچی کو زندہ کِیا تو کیا وہ دوسروں کو بھی زندہ کر سکتے ہیں؟‏ .‏.‏.‏.‏.‏.‏ آپ کے خیال میں کیا وہ ایسا کریں گے؟‏ .‏.‏.‏.‏.‏.‏ وہ ضرور ایسا کریں گے کیونکہ اُنہوں نے کہا:‏ ”‏وہ وقت آنے والا ہے جب مُردے میری آواز سنیں گے اور قبروں سے باہر نکل آئیں گے۔‏“‏—‏یوحنا ۵:‏۲۸،‏ ۲۹‏۔‏

آپ کے خیال میں کیا یسوع مسیح مُردوں کو زندہ کرنا چاہتے ہیں؟‏ .‏.‏.‏.‏.‏.‏ بائبل میں بتایا گیا ہے کہ یسوع مسیح کو ایسے لوگوں سے بڑی ہمدردی ہے جن کے عزیز مر چکے ہیں۔‏ آئیں،‏ مَیں آپ کو اِس سلسلے میں ایک کہانی سناتا ہوں۔‏

ایک بار ایک جوان لڑکے کا جنازہ شہر نائین کے پھاٹک سے باہر جا رہا تھا۔‏ اِس لڑکے کی ماں جنازے کے ساتھ‌ساتھ چل رہی تھی۔‏ کچھ عرصہ پہلے اِس عورت کا شوہر مر گیا تھا اور اب اُس کا بیٹا بھی مر گیا۔‏ وہ بالکل اکیلی رہ گئی تھی۔‏ وہ بہت دُکھی تھی اور رو رہی تھی۔‏ شہر کے بہت سے لوگ لڑکے کے جنازے میں شامل تھے۔‏ وہ اِس عورت کو تسلی دینے کی کوشش کر رہے تھے لیکن وہ چپ نہیں ہو رہی تھی۔‏

اُس وقت یسوع مسیح اپنے شاگردوں کے ساتھ شہر نائین سے گزر رہے تھے۔‏ جب یسوع مسیح نے اِس عورت کو روتے دیکھا تو اُن کو بہت دُکھ ہوا۔‏ اُن کو اِس عورت پر بڑا ترس آیا۔‏ وہ اُس کی مدد کرنا چاہتے تھے۔‏

یسوع مسیح نے اُس عورت کے پاس جا کر بڑی نرمی سے کہا:‏ ”‏مت رو۔‏“‏ لوگ رُک کر اُن کو دیکھنے لگے۔‏ اِس کے بعد یسوع مسیح نے جا کر لاش کو چُھوا۔‏ یہ دیکھ کر لوگوں نے سوچا کہ ”‏یہ آدمی کیا کر رہا ہے؟‏“‏ پھر یسوع مسیح نے کہا:‏ ”‏اَے جوان،‏ اُٹھ جاؤ۔‏“‏ وہ فوراً اُٹھ کر بیٹھ گیا اور باتیں کرنے لگا۔‏—‏لوقا ۷:‏۱۱-‏۱۷‏۔‏

ذرا سوچیں کہ یہ سب کچھ دیکھ کر لڑکے کی ماں نے کیسا محسوس کِیا ہوگا؟‏ اگر یسوع مسیح نے آپ کے کسی عزیز کو زندہ کِیا ہوتا تو آپ کیسا محسوس کرتے؟‏ .‏.‏.‏.‏.‏.‏ آپ کے خیال میں اِس کہانی سے کیا ظاہر ہوتا ہے؟‏ .‏.‏.‏.‏.‏.‏ اِس سے ظاہر ہوتا ہے کہ یسوع مسیح کو لوگوں سے بہت پیار ہے اور وہ اُن کی مدد کرنا چاہتے ہیں۔‏  آنے والی نئی دُنیا میں بہت سے لوگوں کو زندہ کِیا جائے گا۔‏ وہ کتنا اچھا وقت ہوگا!‏—‏۲-‏پطرس ۳:‏۱۳؛‏ مکاشفہ ۲۱:‏۳،‏ ۴‏۔‏

اُس وقت کچھ ایسے لوگوں کو زندہ کِیا جائے گا جن کو ہم جانتے ہیں۔‏ جب وہ زندہ ہوں گے تو ہم اُن کو پہچان سکیں گے،‏ بالکل اُسی طرح جیسے یائیر نے اپنی بیٹی کو پہچان لیا تھا۔‏ اُس وقت ایسے لوگوں کو بھی زندہ کِیا جائے گا جو ہزاروں سال پہلے مر گئے تھے۔‏ چاہے اُن کو مرے ہوئے کتنے بھی سال ہو گئے ہوں،‏ خدا اُن کو یاد رکھتا ہے اور اُن کو زندہ کرے گا۔‏

اِس سے ظاہر ہوتا ہے کہ یہوواہ خدا اور اُس کے بیٹے یسوع مسیح کو ہم سے بڑی محبت ہے۔‏ وہ چاہتے ہیں کہ ہم صرف چند سال کے لئے نہیں بلکہ ہمیشہ تک زندہ رہیں۔‏ یہ جان کر آپ کیسا محسوس کرتے ہیں؟‏ .‏.‏.‏.‏.‏.‏