کیا آپ جانتے ہیں کہ خدا کا سب سے اچھا خادم کون تھا؟‏ .‏.‏.‏.‏.‏.‏ یسوع مسیح خدا کے سب سے اچھے خادم تھے۔‏ آپ کے خیال میں کیا ہم اُن کی طرح بن سکتے ہیں؟‏ .‏.‏.‏.‏.‏.‏ بائبل میں بتایا گیا ہے کہ یسوع مسیح نے ہمارے لئے مثال قائم کی ہے۔‏ ہمیں اُن کی مثال پر عمل کرنا چاہئے۔‏ جو لوگ اُن کی مثال پر عمل کرتے ہیں،‏ وہ اُن کے شاگرد ہیں۔‏ یسوع مسیح چاہتے ہیں کہ آپ بھی اُن کے شاگرد بنیں۔‏

کیا آپ کو پتہ ہے کہ یسوع مسیح کے شاگرد ہونے میں کیا کچھ شامل ہے؟‏ .‏.‏.‏.‏.‏.‏ اِس میں بہت ساری باتیں شامل ہیں۔‏ پہلے تو ہمیں یسوع مسیح کی مثال سے سیکھنا چاہئے۔‏ لیکن یہ کافی نہیں ہے۔‏ ہمیں یہ یقین رکھنا چاہئے کہ یسوع مسیح کی باتیں صحیح ہیں۔‏ اور ہمیں اِن باتوں پر عمل بھی کرنا چاہئے۔‏

بہت سے لوگ کہتے ہیں کہ وہ یسوع مسیح پر ایمان رکھتے ہیں۔‏ کیا وہ سب واقعی یسوع مسیح کے شاگرد ہیں؟‏ .‏.‏.‏.‏.‏.‏ اُن میں سے بہت سے لوگ یسوع مسیح کے شاگرد نہیں ہیں۔‏ ایسے لوگ شاید چرچ جاتے ہوں۔‏ لیکن وہ صحیح طور پر یہ نہیں جانتے کہ یسوع مسیح نے کون سی باتیں سکھائی تھیں اور وہ اِن باتوں کو سیکھنے کے لئے وقت بھی نہیں نکالتے۔‏ اصل میں صرف وہی لوگ یسوع مسیح کے شاگرد ہیں جو اُن کی مثال پر عمل کرتے ہیں۔‏

جب یسوع مسیح زمین پر تھے تو اُن کے بہت سے شاگرد تھے۔‏ مَیں آپ کو اِن میں سے کچھ کے بارے میں بتاتا ہوں۔‏ یسوع مسیح کے ایک شاگرد کا نام فلپس تھا۔‏ فلپس،‏ یسوع مسیح کے شاگرد بننے کے بعد اپنے دوست نتن‌ایل کو یسوع مسیح کے پاس لائے۔‏ نتن‌ایل کو برتلمائی بھی کہا جاتا تھا۔‏ تصویر میں نتن‌ایل کو ایک درخت کے نیچے بیٹھے ہوئے دکھایا گیا ہے۔‏ جب یسوع مسیح نے نتن‌ایل کو دیکھا تو اُنہوں نے کہا:‏ ”‏اِس کے دل میں کھوٹ  نہیں ہے،‏ یہ سچا انسان ہے۔‏“‏ یسوع مسیح کی بات سُن کر نتن‌ایل بہت حیران ہوئے۔‏ اُنہوں نے یسوع مسیح سے پوچھا:‏ ”‏آپ مجھے کیسے جانتے ہیں؟‏“‏

یسوع مسیح نے جواب دیا:‏ ”‏جب تُم انجیر کے درخت کے نیچے تھے اور فلپس تمہیں بلانے گیا تو مَیں نے تمہیں دیکھا تھا۔‏“‏ نتن‌ایل اِس بات سے بہت حیران ہوئے کہ یسوع مسیح یہ تک جانتے تھے کہ وہ کہاں بیٹھے ہوئے تھے۔‏ اِس لئے اُنہوں نے یسوع مسیح سے کہا:‏ ”‏آپ خدا کے بیٹے ہیں اور اسرائیل کے بادشاہ ہیں۔‏“‏—‏یوحنا ۱:‏۴۹‏۔‏

اِس واقعے سے ایک دن پہلے کچھ اَور لوگ یسوع مسیح کے شاگرد بنے تھے۔‏ اِن کے نام اندریاس،‏ پطرس اور یوحنا تھے۔‏ اندریاس اور پطرس آپس میں بھائی تھے۔‏ ہو سکتا ہے کہ یوحنا کے بھائی یعقوب بھی اُس دن یسوع مسیح کے شاگرد بنے ہوں۔‏ (‏یوحنا ۱:‏۳۵-‏۵۱‏)‏ یہ چاروں آدمی مچھلیاں پکڑتے اور بیچتے تھے۔‏ اُنہوں نے کچھ عرصہ یسوع مسیح کے ساتھ گزارنے کے بعد پھر سے مچھلیاں پکڑنے کا کام شروع کر دیا تھا۔‏ ایک دن  جب یسوع مسیح گلیل کی جھیل کے کنارے چل رہے تھے تو اُنہوں نے پطرس اور اندریاس کو مچھلیاں پکڑتے ہوئے دیکھا۔‏ تب یسوع مسیح نے اُن سے کہا:‏ ”‏میرے پیچھے چلے آؤ۔‏“‏

وہاں سے تھوڑا آگے جا کر یسوع مسیح نے یعقوب اور یوحنا کو دیکھا۔‏ وہ دونوں اپنے باپ کے ساتھ کشتی میں بیٹھے تھے اور ایک جال کی مرمت کر رہے تھے۔‏ یسوع مسیح نے اُن سے بھی کہا:‏ ”‏میرے پیچھے چلے آؤ۔‏“‏ اگر یسوع مسیح نے آپ کو بلایا ہوتا تو آپ کیا کرتے؟‏ کیا آپ فوراً یسوع مسیح کے ساتھ جاتے؟‏ .‏.‏.‏.‏.‏.‏ پطرس،‏ اندریاس،‏ یعقوب اور یوحنا جانتے تھے کہ یہوواہ خدا نے یسوع مسیح کو بھیجا تھا۔‏ اِس لئے وہ فوراً اپنا کام چھوڑ کر یسوع مسیح کے پیچھے چل دئے۔‏—‏متی ۴:‏۱۸-‏۲۲‏۔‏

آپ کے خیال میں کیا یسوع مسیح کے شاگرد ہمیشہ اچھے کام کرتے تھے؟‏ .‏.‏.‏.‏.‏.‏ وہ ہمیشہ اچھے کام نہیں کرتے تھے۔‏ آپ کو یاد ہوگا کہ وہ اکثر آپس میں اِس بات پر بحث کرتے تھے کہ اُن میں سب سے اہم کون ہے۔‏ لیکن یسوع مسیح کی باتیں سُن کر اُنہوں نے اپنی غلط سوچ بدل لی۔‏ اگر ہم بھی اپنی سوچ اور رویہ بدلنے کو تیار ہیں تو ہم بھی یسوع مسیح کے شاگرد بن سکتے ہیں۔‏

یسوع مسیح نے ہر طرح کے لوگوں کو اپنے شاگرد بننے کا موقع دیا۔‏ ایک دفعہ ایک امیر آدمی یسوع مسیح کے پاس آیا۔‏ اُس نے یسوع مسیح سے پوچھا:‏ ”‏مَیں ہمیشہ کی زندگی کیسے حاصل کر سکتا ہوں؟‏“‏ اِس آدمی نے یسوع مسیح کو یہ بھی بتایا:‏ ”‏مَیں بچپن سے خدا کے حکموں پر عمل کر رہا ہوں۔‏“‏ اِس پر یسوع مسیح نے اُس سے کہا:‏ ”‏آؤ،‏ میرے شاگرد بن جاؤ۔‏“‏ کیا آپ کو پتہ ہے کہ پھر کیا ہوا؟‏ .‏.‏.‏.‏.‏.‏

اِس امیر آدمی کو اپنے پیسوں سے بڑی محبت تھی۔‏ لیکن یسوع مسیح نے اُس سے کہا:‏ ”‏میرے شاگردوں کو پیسوں کو زیادہ اہمیت نہیں دینی چاہئے۔‏“‏ اِس پر وہ آدمی بہت مایوس ہوا۔‏ وہ خدا سے زیادہ اپنی دولت سے محبت کرتا تھا۔‏ اِس لئے وہ یسوع مسیح کا شاگرد نہیں بنا۔‏—‏لوقا ۱۸:‏۱۸-‏۲۵‏۔‏

جب یسوع مسیح کو خدا کا پیغام سناتے تقریباً ڈیڑھ سال ہو گئے تو اُنہوں نے اپنے شاگردوں میں سے ۱۲ آدمیوں کو ایک خاص کام کے لئے چُنا۔‏ اِن آدمیوں کو رسول کہا جاتا ہے۔‏ کیا آپ جانتے ہیں کہ اِن رسولوں کے نام کیا تھے؟‏ .‏.‏.‏.‏.‏.‏ آئیں،‏ اِن کے نام یاد کرنے کی کوشش کرتے ہیں۔‏ اِن تصویروں کو دیکھیں اور ساتھ دئے گئے ناموں کو پڑھیں۔‏ اب اِن ناموں کو یاد کرنے کی کوشش کریں۔‏

 اِن ۱۲ رسولوں میں سے ایک رسول بعد میں بُرے بن گئے۔‏ اُن کا نام یہوداہ اسکریوتی تھا۔‏ اُن کی جگہ ایک اَور رسول کو چُنا گیا۔‏ کیا آپ کو پتہ ہے کہ اُن کا نام کیا تھا؟‏ .‏.‏.‏.‏.‏.‏ اُن کا نام متیاہ تھا۔‏ پولس اور برنباس کو بھی رسول کہا جاتا ہے لیکن وہ یسوع مسیح کے ۱۲ رسولوں میں شامل نہیں تھے۔‏—‏اعمال ۱:‏۲۳-‏۲۶؛‏ ۱۴:‏۱۴‏۔‏

جیسا کہ ہم نے پہلے باب میں سیکھا تھا،‏ یسوع مسیح بچوں سے بہت پیار کرتے تھے۔‏ کیا آپ جانتے ہیں کہ وہ بچوں سے کیوں پیار کرتے تھے؟‏ .‏.‏.‏.‏.‏.‏ وہ جانتے تھے کہ بچے بھی اُن کے شاگرد بن سکتے ہیں۔‏ کبھی‌کبھی بچے ایسی باتیں کرتے ہیں جن کو سُن کر بڑوں میں بھی عظیم اُستاد کے بارے میں سیکھنے کی خواہش پیدا ہوتی ہے۔‏

یسوع مسیح کے شاگردوں میں بہت سی عورتیں بھی شامل تھیں۔‏ جب یسوع مسیح خدا کی بادشاہت کی مُنادی  کرنے کے لئے دوسرے شہروں میں جاتے تو دوسرے شاگردوں کے ساتھ‌ساتھ کئی عورتیں بھی اُن کے ساتھ جاتی تھیں۔‏ اِن عورتوں میں سے کچھ کے نام مریم مگدلینی،‏ یوأنہ اور سوسناہ تھے۔‏ شاید وہ یسوع مسیح کے لئے کھانا بھی بناتی تھیں اور اُن کے کپڑے بھی دھوتی تھیں۔‏—‏لوقا ۸:‏۱-‏۳‏۔‏

کیا آپ یسوع مسیح کے شاگرد بننا چاہتے ہیں؟‏ .‏.‏.‏.‏.‏.‏ یاد رکھیں کہ صرف مُنہ سے یہ کہنا کافی نہیں ہے کہ ”‏مَیں یسوع مسیح کا شاگرد ہوں۔‏“‏ ہمارے کاموں سے بھی پتہ چلنا چاہئے کہ ہم یسوع مسیح کے شاگرد ہیں۔‏ نہ صرف مذہبی اجلاسوں پر بلکہ ہر موقعے پر ہمارے کاموں سے ظاہر ہونا چاہئے کہ ہم یسوع مسیح کے شاگرد ہیں۔‏ آپ کے خیال میں ہم کن موقعوں پر ظاہر کر سکتے ہیں کہ ہم یسوع مسیح کے شاگرد ہیں؟‏ .‏.‏.‏.‏.‏.‏

جب ہم گھر میں یا سکول میں ہوتے ہیں تو ایسے بہت سے موقعے ملتے ہیں۔‏ یاد رکھیں کہ اگر ہم یسوع مسیح کے سچے شاگرد بننا چاہتے ہیں تو ہمیں ہر وقت اور ہر موقعے پر اُن کی مثال پر عمل کرنا چاہئے۔‏