جب یسوع مسیح چھوٹے تھے تو یہوواہ خدا نے اُن کی حفاظت کی۔‏ پھر جب وہ تھوڑے سے بڑے ہوئے تو اُن کے امی‌ابو نے اُن کو بتایا ہوگا کہ یہوواہ خدا نے اُن کی حفاظت کیسے کی۔‏ آپ کے خیال میں کیا یسوع نے یہوواہ خدا کا شکریہ ادا کِیا ہوگا؟‏ .‏.‏.‏.‏.‏.‏ یوسف اور مریم نے یسوع کو یہ بھی بتایا ہوگا کہ وہ اُنہیں مصر لے گئے تھے جس کی وجہ سے اُن کی جان بچ گئی تھی۔‏ کیا یسوع نے اُن کا بھی شکریہ ادا کِیا ہوگا؟‏ .‏.‏.‏.‏.‏.‏

ظاہر ہے کہ یسوع مسیح اب ننھے بچے نہیں ہیں۔‏ اب تو وہ زمین پر بھی نہیں رہتے۔‏ لیکن کرسمس کے وقت بہت سی تصویروں میں یسوع مسیح کو ایک ننھے بچے کے طور پر دکھایا جاتا ہے۔‏ کیا آپ نے بھی ایسی تصویریں دیکھی ہیں؟‏ .‏.‏.‏.‏.‏.‏ اِس سے لگتا ہے کہ آج بھی لوگ یسوع مسیح کو ایک ننھا بچہ خیال کرتے ہیں۔‏

یسوع مسیح اب زمین پر نہیں ہیں۔‏ لیکن کیا وہ ابھی زندہ ہیں؟‏ آپ کا کیا خیال ہے؟‏ .‏.‏.‏.‏.‏.‏ جب یسوع مسیح کو مار ڈالا گیا تو خدا نے اُن کو زندہ کِیا۔‏ اب وہ آسمان پر ہیں اور ایک طاقت‌ور بادشاہ ہیں۔‏ کیا وہ اِتنے طاقت‌ور ہیں کہ وہ اپنے خادموں کی حفاظت کر سکتے ہیں؟‏ .‏.‏.‏.‏.‏.‏ جب یسوع مسیح  زمین پر تھے تو اُنہوں نے اپنے شاگردوں کی حفاظت کی۔‏ آئیں،‏ مَیں آپ کو اِس سلسلے میں ایک کہانی سناتا ہوں جس سے ہم سیکھیں گے کہ یسوع مسیح کتنے طاقت‌ور تھے۔‏

ایک بار یسوع مسیح نے سارا دن گلیل کی جھیل کے کنارے لوگوں کو تعلیم دی۔‏ یہ جھیل ۲۰ کلومیٹر (‏۱۳ میل)‏ لمبی اور ۱۲ کلومیٹر (‏ساڑھے ۷ میل)‏ چوڑی ہے۔‏ جب شام ہو گئی تو یسوع مسیح نے اپنے شاگردوں سے کہا:‏ ”‏آؤ،‏ جھیل کے اُس پار چلیں۔‏“‏ وہ سب کشتی میں بیٹھ گئے اور روانہ ہو گئے۔‏ یسوع مسیح کو نیند آ رہی تھی اِس لئے وہ کشتی کے پچھلے حصے میں ایک گدی پر سو گئے۔‏

لیکن شاگرد نہیں سوئے۔‏ وہ کشتی چلاتے رہے۔‏ اچانک تیز ہوا چلنے لگی۔‏ پانی کی لہریں بڑی سے بڑی ہوتی گئیں اور کشتی سے ٹکرانے لگیں۔‏ آہستہ‌آہستہ کشتی میں پانی بھرنے لگا۔‏

شاگرد ڈر گئے۔‏ اُن کا خیال تھا کہ کشتی ڈوب جائے گی اور وہ سب مر جائیں گے۔‏ لیکن یسوع مسیح بڑے آرام سے سو رہے تھے۔‏ شاگردوں نے اُن کو جگایا اور کہا:‏ ”‏اُستاد!‏ اُستاد!‏ ہمیں بچائیں۔‏ ہم ڈوب  رہے ہیں۔‏“‏ یہ سُن کر یسوع مسیح اُٹھ گئے۔‏ پھر اُنہوں نے پانی اور ہوا کو حکم دیا کہ ”‏خاموش ہو جاؤ اور تھم جاؤ!‏“‏

فوراً ہی ہوا بند ہو گئی اور لہریں تھم گئیں۔‏ شاگرد یہ دیکھ کر بڑے حیران ہوئے۔‏ ایسا پہلے کبھی نہیں ہوا تھا۔‏ وہ آپس میں کہنے لگے کہ ”‏یہ کون ہیں؟‏ یہ تو ہوا اور پانی کو حکم دیتے ہیں اور وہ اُن کی مانتے ہیں۔‏“‏—‏لوقا ۸:‏۲۲-‏۲۵؛‏ مرقس ۴:‏۳۵-‏۴۱‏۔‏

کیا آپ جانتے ہیں کہ یسوع مسیح کون ہیں؟‏ .‏.‏.‏.‏.‏.‏ کیا آپ جانتے ہیں کہ اُن کو معجزے دکھانے کی قوت کس نے دی؟‏ .‏.‏.‏.‏.‏.‏ شاگردوں کو ڈرنا نہیں چاہئے تھا کیونکہ یسوع مسیح اُن کے ساتھ تھے۔‏ یسوع مسیح عام انسان نہیں تھے۔‏ وہ ایسے کام کر سکتے تھے جو کوئی اَور انسان نہیں کر سکتا ہے۔‏ آئیں،‏ مَیں آپ کو اِس کے بارے میں ایک اَور کہانی سناتا ہوں۔‏

ایک شام یسوع مسیح اپنے شاگردوں کے ساتھ گلیل کی جھیل کے کنارے کھڑے تھے۔‏ اُنہوں نے  شاگردوں سے کہا کہ ”‏تُم کشتی میں جھیل کے اُس پار چلے جاؤ۔‏ مَیں بعد میں آؤں گا۔‏“‏ پھر یسوع مسیح اکیلے ایک پہاڑ پر چڑھ گئے اور اپنے باپ یہوواہ سے دُعا کرنے لگے۔‏

شاگرد کشتی میں بیٹھ کر روانہ ہو گئے۔‏ لیکن پھر تیز ہوا چلنے لگی۔‏ اندھیرا ہو چُکا تھا۔‏ شاگردوں نے بادبان کو لپیٹ لیا اور کشتی کو چپّو سے چلانے لگے۔‏ لیکن تیز ہوا کی وجہ سے یہ بہت مشکل تھا۔‏ کشتی اُونچی‌اُونچی لہروں میں ڈگمگانے لگی اور پانی سے بھرنے لگی۔‏ حالانکہ شاگردوں نے بڑی کوشش کی لیکن وہ جھیل کے کنارے تک نہیں پہنچ سکے۔‏

اِس دوران یسوع مسیح پہاڑ پر تھے۔‏ وہ دیر تک وہاں دُعا کرتے رہے۔‏ لیکن اب اُنہوں نے دیکھا کہ اُن کے شاگرد ڈوبنے کے خطرے میں ہیں۔‏ اِس لئے وہ پہاڑ سے اُتر کر جھیل کے کنارے گئے۔‏ وہ اپنے شاگردوں کو بچانا چاہتے تھے اِس لئے وہ اُن تک پہنچنے کے لئے پانی پر چلنے لگے۔‏

اگر آپ پانی پر چلنے کی کوشش کرتے تو کیا ہوتا؟‏ .‏.‏.‏.‏.‏.‏ آپ ڈوب جاتے۔‏ لیکن خدا نے یسوع مسیح کو خاص قوت دی تھی۔‏ اِس وجہ سے وہ پانی پر چل سکتے تھے۔‏ کشتی کنارے سے کافی دُور تھی۔‏ اِس لئے یسوع مسیح کو کشتی تک پہنچنے میں کافی دیر لگی۔‏ اب صبح ہونے والی تھی۔‏ جب شاگردوں نے یسوع مسیح کو پانی پر کشتی کی طرف آتے دیکھا تو وہ بہت گھبرا گئے۔‏ اُن کو یقین نہیں آ رہا تھا کہ کوئی انسان پانی پر چل سکتا ہے۔‏ اِس لئے وہ ڈر کے مارے چلّانے لگے۔‏ یسوع مسیح نے اُن سے کہا:‏ ”‏ڈرو مت۔‏ مَیں ہوں۔‏“‏

جونہی یسوع مسیح کشتی میں بیٹھ گئے،‏ ہوا تھم گئی۔‏ شاگرد بڑے حیران ہوئے۔‏ وہ یسوع مسیح کے سامنے گِر کر کہنے لگے:‏ ”‏یقیناً آپ خدا کے بیٹے ہیں۔‏“‏—‏متی ۱۴:‏۲۲-‏۳۳؛‏ یوحنا ۶:‏۱۶-‏۲۱‏۔‏

یسوع مسیح بڑی قوت رکھتے تھے،‏ ہے نا؟‏ .‏.‏.‏.‏.‏.‏ کیا آپ جانتے ہیں کہ یسوع مسیح نے یہ معجزے کیوں دکھائے تھے؟‏ .‏.‏.‏.‏.‏.‏ اُنہوں نے یہ معجزے اِس لئے دکھائے کیونکہ وہ اپنے شاگردوں سے بڑا پیار کرتے تھے اور اُن کی حفاظت کرنا چاہتے تھے۔‏ وہ لوگوں کو یہ بھی دکھانا چاہتے تھے کہ خدا نے اُنہیں خاص طاقت دی ہے۔‏ وہ یہ بھی دکھانا چاہتے تھے کہ وہ خدا کی بادشاہت کے بادشاہ کے طور پر لوگوں کے لئے کیا کچھ کریں گے۔‏

 یسوع مسیح آج بھی اپنے شاگردوں کی حفاظت کرنے کے لئے اپنی طاقت استعمال کرتے ہیں۔‏ اکثر یسوع مسیح اُس وقت ہماری حفاظت کرتے ہیں جب ہم لوگوں کو خدا کی بادشاہت کے بارے میں بتاتے ہیں اور شیطان ہمیں روکنے کی کوشش کرتا ہے۔‏ لیکن یسوع مسیح ہمیں بیمار ہونے سے نہیں بچاتے ہیں۔‏ اور جب ہم بیمار ہو جاتے ہیں تو وہ ہمیں ٹھیک کرنے کے لئے اپنی قوت استعمال نہیں کرتے ہیں۔‏ یاد رکھیں کہ یسوع مسیح کے سارے رسول بھی فوت ہو گئے تھے۔‏ یوحنا رسول کے بھائی یعقوب کو قتل کر دیا گیا تھا اور یوحنا رسول کو قید میں ڈال دیا گیا تھا۔‏—‏اعمال ۱۲:‏۲؛‏ مکاشفہ ۱:‏۹‏۔‏

آج بھی لوگ بیمار ہوتے ہیں اور مر جاتے ہیں،‏ چاہے وہ یہوواہ خدا کے خادم ہوں یا نہیں۔‏ لیکن یسوع مسیح جلد ہی زمین پر اچھے حالات لائیں گے کیونکہ وہ خدا کی بادشاہت کے بادشاہ ہیں۔‏ تب ہمیں کسی چیز سے ڈرنے کی ضرورت نہیں ہوگی کیونکہ یسوع مسیح اُن سب لوگوں کی مدد کریں گے جو اُن کا کہنا مانتے ہیں۔‏—‏یسعیاہ ۹:‏۶،‏ ۷‏۔‏