جیکولین نامی لڑکی پر اچانک حملہ ہوا۔‏ حملہ کرنے والے نے اُنہیں نیچے گِرا دیا اور اُن سے زبردستی کرنے لگا۔‏ جیکولین نے بتایا:‏ ”‏مَیں نے اُس سے لڑنے کے لیے بہت ہاتھ پاؤں مارے۔‏ مَیں چلّائی بھی لیکن میرے گلے سے آواز نہیں نکلی۔‏ مَیں نے اُسے دھکے مارے،‏ ٹھڈے مارے،‏ مکے مارے اور اُسے نوچنے کی کوشش کی۔‏ لیکن تبھی اُس نے مجھے چاقو مار دیا اور مَیں بالکل بےجان سی ہو گئی۔‏“‏

اگر آپ جیکولین کی جگہ ہوتے تو آپ کیا کرتے؟‏

جب آپ رات کو گھر سے باہر جاتے ہیں تو چاہے آپ کتنے بھی چوکنے ہوں،‏ کچھ اُلٹا سیدھا ہو سکتا ہے۔‏ پاک کلام میں بتایا گیا ہے:‏ ’‏نہ تو دوڑ میں تیزرفتار کو سبقت ہے اور نہ عزت اہلِ‌خرد (‏یعنی دانش‌مندوں)‏ کو ملتی ہے بلکہ اُن سب کے لئے وقت اور حادثہ ہے۔‏‘‏—‏واعظ 9:‏11‏۔‏

بعض نوجوانوں پر جنسی حملہ شاید کوئی اجنبی کرتا ہے جیسے جیکولین کے ساتھ ہوا۔‏ لیکن کچھ نوجوان کسی واقف‌کار یا رشتےدار کے ہاتھوں جنسی زیادتی کا نشانہ بنتے ہیں۔‏ مثال کے طور پر نتاشا نامی لڑکی صرف دس سال کی عمر میں جنسی زیادتی کا شکار ہوئیں۔‏ اُن پر حملہ کرنے والا اُن کا ایک نوجوان پڑوسی تھا۔‏ نتاشا نے بتایا:‏ ”‏شروع شروع میں تو مَیں اِتنا خوف اور شرمندگی محسوس کرتی تھی کہ مَیں نے اِس کے بارے میں کسی کو نہیں بتایا۔‏“‏

جیکولین اب بھی اُس واقعے کی وجہ سے شرمندگی محسوس کرتی ہیں۔‏ اُنہوں نے بتایا:‏ ”‏وہ رات میرے ذہن سے نکلتی ہی نہیں۔‏ مجھے لگتا ہے کہ مجھے اُس شخص کا اَور ڈٹ کر مقابلہ کرنا چاہیے تھا۔‏ لیکن چاقو کے وار کی وجہ سے مَیں خوف سے سُن پڑ گئی تھی۔‏ مَیں بہت لاچار ہو گئی تھی۔‏ لیکن اب مجھے لگتا ہے کہ مجھے ہمت نہیں ہارنی چاہیے تھی۔‏“‏

نتاشا بھی ابھی تک شرمندگی کے احساس سے نکل نہیں پائیں۔‏ اُنہوں نے بتایا:‏ ”‏میرے امی ابو نے سختی سے کہا تھا کہ جب بھی مَیں کھیلنے کے لیے جاؤں،‏ ہمیشہ اپنی بہن کے ساتھ جاؤں۔‏ لیکن مَیں نے اُن کی بات نہیں مانی۔‏ مَیں نے اپنے پڑوسی پر کچھ زیادہ ہی بھروسا کر لیا تھا۔‏ اِس لیے مجھے لگتا ہے کہ میری اپنی لاپرواہی کی وجہ سے اُسے میرے ساتھ زبردستی کرنے کا موقع ملا۔‏ میرے گھر والوں کو اِس کی وجہ سے بہت دُکھ پہنچا اور کہیں نہ کہیں اِس کی ذمےدار مَیں ہی ہوں۔‏ اور اِسی بات کا مجھے سب سے زیادہ غم ہے۔‏“‏

اگر آپ بھی جیکولین اور نتاشا کی طرح محسوس کرتے ہیں تو یاد رکھیں کہ جس شخص کے ساتھ جنسی زبردستی ہوتی ہے،‏ اُس کا اِس میں کوئی قصور نہیں ہوتا۔‏ کچھ لوگ ایسے بھی ہیں جو اِس طرح کے واقعات کو اِتنا سنگین نہیں سمجھتے۔‏ اُن کے خیال میں جو لوگ جنسی زیادتی کا نشانہ بنتے ہیں،‏ وہ اپنی غلطی کی وجہ سے بنتے ہیں۔‏ لیکن کسی کو اپنی ہوس کا شکار بنانا کہاں کی اِنسانیت ہے!‏ اگر آپ کے ساتھ ایسی گھٹیا حرکت ہوئی ہے تو یقین مانیں کہ اِس میں آپ کا کوئی قصور نہیں ہے۔‏

لیکن شاید آپ اِس بات پر یقین کرنا مشکل پائیں۔‏ بعض لوگ کسی کو یہ نہیں بتا پاتے کہ اُن پر کیا بیتی ہے اور گُھٹ گُھٹ کر جیتے ہیں۔‏ لیکن ذرا سوچیں کہ اگر آپ چپ رہتے ہیں تو فائدہ کس کو ہوگا؟‏ آپ کو یا زیادتی کرنے والے کو؟‏ لہٰذا اپنی خاموشی توڑ دیں۔‏

پاک کلام میں بتایا گیا ہے کہ جب خدا کے بندے ایوب کی تکلیف برداشت سے باہر ہو گئی تو اُنہوں نے کہا:‏ ”‏مَیں .‏ .‏ .‏ کھلے طور پر اپنا دلی غم بیان کروں گا۔‏“‏ (‏ایوب 10:‏1‏،‏ اُردو جیو ورشن‏)‏ آپ بھی کسی کے سامنے اپنی تکلیف کا اِظہار کر سکتے ہیں۔‏ کسی قابلِ‌بھروسا شخص سے بات کرنے سے آپ کا درد اور غم کسی حد تک کم ہو جائے گا۔‏

جیکولین کو بھی ایسا کرنے سے تسلی ملی۔‏ اُنہوں نے بتایا:‏ ”‏مَیں نے اپنی ایک دوست سے بات کی اور اُس نے مجھے مشورہ دیا کہ مَیں اپنی کلیسیا (‏یعنی جماعت)‏ کے بزرگوں سے بات کروں۔‏ اور مجھے خوشی ہے کہ مَیں نے ایسا کِیا۔‏ وہ کئی بار مجھ سے ملنے آئے اور مجھے حوصلہ دیا کہ جو کچھ بھی ہوا،‏ اُس میں میری کوئی غلطی نہیں تھی۔‏“‏

آخرکار نتاشا نے اپنے امی ابو کو بتا دیا کہ اُن کے ساتھ کیا ہوا تھا۔‏ نتاشا نے بتایا:‏ ”‏امی ابو نے مجھے بہت حوصلہ دیا اور کہا کہ مَیں اُن کے ساتھ کُھل کر بات کروں۔‏ اُنہوں نے مجھے سمجھایا کہ مَیں اندر ہی اندر کڑھتی نہ رہوں۔‏“‏

نتاشا کو دُعا کرنے سے بھی بہت سکون ملا۔‏ اُنہوں نے کہا:‏ ”‏مجھے خدا سے بات کر کے بہت حوصلہ ملتا تھا،‏ خاص طور پر تب جب مَیں کسی اِنسان کو اپنے دل کا حال نہیں بتا پاتی تھی۔‏ مَیں خدا سے کُھل کر بات کرتی تھی۔‏ اِس سے میرے پریشان دل کو بڑا چین اور اِطمینان ملتا تھا۔‏“‏

وقت کے ساتھ ساتھ آپ کا زخم بھی بھر سکتا ہے۔‏ (‏واعظ 3:‏3‏)‏ اپنی صحت کا خیال رکھیں،‏ اچھی طرح آرام کریں اور اُس بُرے واقعے کو ذہن سے نکالنے کی کوشش کریں جو آپ کے ساتھ ہوا تھا۔‏ سب سے اہم بات یہ ہے کہ یہوواہ پر بھروسا رکھیں جو بڑی تسلی دینے والا خدا ہے۔‏—‏2-‏کُرنتھیوں 1:‏3،‏ 4‏۔‏

 اگر آپ ایک لڑکی ہیں اور آپ کا بوائے فرینڈ آپ پر سیکس کرنے کے لیے دباؤ ڈالتا ہے تو اُسے یہ کہنے میں کوئی بُرائی نہیں کہ ”‏ایسا کرنا غلط ہے،‏“‏ ”‏مجھے ہاتھ مت لگاؤ!‏“‏ یا ”‏اپنا ہاتھ پیچھے ہٹاؤ!‏“‏ اِس بات سے نہ ڈریں کہ آپ کا بوائے فرینڈ آپ سے ناراض ہو جائے گا۔‏ اگر وہ اِس وجہ سے آپ کو چھوڑتا ہے تو وہ آپ کی محبت کے لائق ہی نہیں۔‏ آپ کو ایسا ساتھی چاہیے جو آپ کی عزت اور معیاروں دونوں کا لحاظ رکھے۔‏

‏”‏جب مَیں سیکنڈری سکول میں تھی تو لڑکے مجھے اِدھر اُدھر ہاتھ لگاتے تھے اور مجھ سے گندی گندی باتیں کرتے تھے۔‏ وہ کہتے تھے کہ ”‏اگر تُم ہمارے ساتھ سوؤ گی تو تمہیں بڑا مزہ آئے گا۔‏“‏“‏—‏کوریٹا۔‏

آپ کے خیال میں کیا یہ لڑکے .‏ .‏ .‏

1. کوریٹا کو تنگ کر رہے تھے؟‏

2. اُن کے ساتھ فلرٹ کر رہے تھے؟‏

3. اُن کے ساتھ جنسی چھیڑچھاڑ کر رہے تھے؟‏

‏”‏بس میں ایک لڑکا مجھ سے گندی گندی باتیں کرنے لگا اور مجھ سے لپٹنے لگا۔‏ مَیں نے اُس کا ہاتھ پیچھے جھٹکا اور اُسے دُور ہٹنے کے لیے کہا۔‏ اُس نے مجھے یوں دیکھا جیسے مَیں کوئی پاگل ہوں۔‏“‏—‏کینڈس۔‏

آپ کے خیال میں کیا یہ لڑکا .‏ .‏ .‏

1. کینڈس کو تنگ کر رہا تھا؟‏

2. اُن کے ساتھ فلرٹ کر رہا تھا؟‏

3. اُن کے ساتھ جنسی چھیڑچھاڑ کر رہا تھا؟‏

‏”‏پچھلے سال ایک لڑکا میرے پیچھے ہی پڑ گیا۔‏ وہ کہتا تھا کہ اُسے مجھ سے پیار ہو گیا ہے اور وہ مجھے ڈیٹ پر لے جانا چاہتا ہے۔‏ مگر مَیں اُسے منع کرتی رہی۔‏ کبھی کبھی وہ میرے بازو پر ہاتھ پھیرتا اور میرے منع کرنے کے باوجود بھی باز نہ آتا۔‏ ایک بار جب مَیں جھک کر اپنے تسمے باندھ رہی تھی تو اُس نے میری پیٹھ پر ہاتھ مارا۔‏“‏—‏انیتا۔‏

آپ کے خیال میں کیا یہ لڑکا .‏ .‏ .‏

1. انیتا کو تنگ کر رہا تھا؟‏

2. اُن کے ساتھ فلرٹ کر رہا تھا؟‏

3. اُن کے ساتھ جنسی چھیڑچھاڑ کر رہا تھا؟‏

اِن سب سوالوں کا صحیح جواب آپشن C ہے۔‏

جنسی چھیڑچھاڑ کسی کو تنگ کرنے یا اُس کے ساتھ فلرٹ کرنے سے کیسے فرق ہے؟‏

جنسی چھیڑچھاڑ کرنے والا شخص بس اپنے مزے کے لیے ایسا کرتا ہے۔‏ دوسرا شخص چاہے اُسے جتنا بھی منع کرے،‏ وہ باز نہیں آتا۔‏

یہ بہت سنگین معاملہ ہے کیونکہ یہ جنسی تشدد کا باعث بن سکتا ہے۔‏