UYOVWINROTA 35

Mavọ me sa vwọ dia ugbeyan rẹ Ọghẹnẹ?

Womarẹ obo rẹ Jeremy komobọ hirharoku yen ọ rhe vwọ riẹn ọghanrovwẹ re vwo vwo oyerinkugbe vẹ Jihova. Ọ tare nẹ “Me vwọ hẹ ẹgbukpe 12, yen ọsẹ mẹ vwọ yan jẹ avwanre vwo. Ason ọvo me vwọ nẹrhovwo vwẹ ehwa, ke me rẹ Jihova nẹ e jẹ ọsẹ mẹ rhivwin rhe.”

Vwẹ ẹdia rẹ ofudjevwe rọyen na ọ da ton isese ri Baibol phiyọ. Obo rọ mrẹre vwẹ Une Rẹ Ejiro 10:14 de te ẹwẹn rọyen. Ẹkpo yena ta kpahen Jihova nẹ: “omiovwuyovwi phi oma rọye phihọ obọ wẹn; wọwẹ ọchuko rẹ ọmọphrorivwi.” Jeremy da ta: “Me mrẹrẹ nẹ Jihova yen ta ota kẹ vwẹ na, o jẹ uvwe riẹn nẹ ọyen ọchuko mẹ; ọyen ọsẹ mẹ. O vwo ọsẹ ọfa ri mi se vwo ro yovwin vrẹ vwẹ akpọ na-a!”

Ọ DIANẸ wọ hẹ ẹdia rọ họhọ ọ rẹ Jeremy na yẹrẹ ẹdia ọfa, Baibol na ju we riẹn nẹ Jihova guọnọre nẹ wọ dia ugbeyan rọyen. Baibol na da ta: “Si kẹrẹ Ọghẹnẹ, rere o si kẹrẹ owẹ.” (Jems 4:8) Roro kpahen obo rẹ eta yena mudiaphiyọ: Dede nẹ wọ sa mrẹ-ẹ, wẹ vẹ ọyen je dia edje vwẹ idjerhe vuọvo-o jẹ Jihova Ọghẹnẹ durhie uwe nẹ wọ rhe dia ugbeyan rọyen!

Oyerinkugbe wẹn vẹ Jihova cha guọnọ ẹgbaẹdavwọn vwẹ ẹbẹre wẹn. Kerẹ udje: Wọ kọn urhe rẹ ododo vwevunrẹ uwevwin wẹn, wọ riẹnre nẹ ọyen ọvo cha sa djẹ komobọ-ọ. Wo che ku ame kuo ji muo phiyọ asan ro fuoma rere ọ sa vwọ riẹn djẹ. Ọtiọyen oyerinkugbe vẹ Jihova je hepha. Mavọ wo se vwo toroba ẹyan-obaro rẹ oyerinkugbe tiọyena?

Ọghanrovwẹ rẹ Uyono ri Baibol

Oyerinkugbe churobọ si otaẹtakuẹgbe—ra vwọ kerhọ je ta ota kẹ ohwohwo. Ọtiọyen oyerinkugbe avwanre vẹ o rẹ Jihova je hepha. Isese vẹ eyono rẹ Baibol na yen idjerhe rẹ avwanre vwọ kerhọ kẹ obo ri Jihova guọnọ vuẹ avwanre.—Une Rẹ Ejiro 1:2, 3.

Vwọrẹ uyota, ọ sa dianẹ wo ghwe vwo omavwerhovwẹn kpahen uyono-o. Ukperẹ uyono, ighene buebun ni itẹlivishọni, te igemu yẹrẹ nene igbeyan ghwọrọ ọke kuẹgbe. Ẹkẹvuọvo wọ da guọnọ dia ugbeyan ri Jihova wo che ru obo rọ guọnọ mie ihwo re guọnọ dia ugbeyan rọyen. Kẹ ofori nẹ wọ kerhọ rọyen womarẹ wo vwo yono Ota rọyen.

Wo jẹ udu bru we-e. Uyono ri Baibol dia oghwa-a. Ọ da tobọ dianẹ wo vwo omavwerhovwẹn kpahen uyono-o, wo se yono oma wẹn phiyọ obo wọ sa vwọ riavwerhen rọyen. Orọnvwọn rẹsosuọ ro fori nẹ wo ru yen wọ vwọ rhuẹrẹ ọke phiyotọ vwọ kẹ uyono ri Baibol na. “Mi vwo ọrhuẹrẹphiyotọ, emu rẹsosuọ ri mi ruẹ kurhiọke kurhiọke yen mi vwo se uyovwinrota ọvo vwẹ Baibol na,” ọtiọyen ọmọtẹ ọvo re se Lais tare. Maria rọhẹ ẹgbukpe 15 ro vwo ọrhuẹrẹphiyotọ ọfa da ta: “Mi se emerha vwẹ Baibol na tavwen mi ki sherhẹn vwẹ ason.”

Wọ sa vwọ ton ọrhuẹrẹphiyotọ rẹ uyono ri Baibol wẹn phiyọ, ni  ekpeti rọhẹ aruọbe 292. Si phiyọ obotọ ọke ru wọ rhuẹrẹ phiyotọ wọ sa vwọ ghwọrọ omarẹ ibrẹro 30 vwo ru uyono ri Baibol wẹn.

․․․․․

A vwọ rhuẹrẹ ọke phiyotọ ghwa ọtonphiyọ. Wọ da ton uyono ri Baibol phiyọ re, wọ sa rhe mrẹvughe nẹ e vwo yono Baibol na ghwa dia obo re lọhọre-e. Wọ sa rhọnvwephiyọ obo rẹ Jezreel rọhẹ ẹgbukpe 11 tare, rọ vwọ ta phephẹn nẹ “Ẹbẹre evo vwẹ Baibol na ghwa vwerhen ese-e, wo che gbẹrophiyotọ tavwen wo ki se vwo ẹruọ rọyen.” Ọ da dia iroro tiọyen yen ji rhe we, wo jẹ oma rhọ wẹ-ẹ. Reyọ phiyọ nẹ ọke ru wo vwo yono Baibol na ọyen ọke ru wọ vwọ kerhọ rẹ ugbeyan wẹn, Jihova. Ukuko rọyen, ku wọ cha riavwerhen je mrẹ erere vwo nẹ uyono ri Baibol wẹn na rhe kirobo ru wọ guọnọre nẹ ọ dia!

Ẹrhovwo Pha Ghanghanre

Womarẹ ẹrhovwo yen avwanre wan ta ota kẹ Ọghẹnẹ. Uphẹn rẹ ẹrhovwo na ghene obọdẹn okẹ! Wo sa nẹrhovwo rhe Jihova kọke kọke vwẹ urhiọke yẹrẹ ason dede. O muegbe rọ vwọ kerhọ wẹn ọkieje. Vwọ vrẹ ọyena dede, ọ guọnọ nyo mie we. Ọyen sorọ Baibol na vwo jiro kẹ wẹ nẹ: “Vwi kemu kemu orẹ kugbe oyare kugbe ẹkpẹvwẹ ta ọdavwẹ wẹn kẹ Ọghẹnẹ.”—Filipae 4:6.

Kirobo rẹ ẹkpo ri Baibol yena tare, o vwo erọnvwọn buebun wọ sa vuẹ Jihova kpahen. Enana se churobọ si ẹwan vẹ ebẹnbẹn wẹn. I ji se churobọ si erọnvwọn wọ guọno dje ọdavwaro kpahen. Gbanẹ wọ kpẹvwẹ igbeyan wẹn fikirẹ omamọ erọnvwọn rẹ ayen ru kẹ wẹ-ẹ? Wo ji se ru ọtiọyen kẹ Jihova ro ru obo re tobọ rho vrẹ oborẹ igbeyan wẹn se ru kẹ wẹ.—Une Rẹ Ejiro 106:1.

Si phiyọ obotọ erọnvwọn ru wọ guọnọ kpẹvwẹ Jihova vwọ kẹ.

․․․․․

Aphro herọ-ọ, o vwo erọnvwọn buebun ru wọ ro ẹnwan rọyen nọke ra ruọke. Une Rẹ Ejiro 55:22 da ta: “Mu oghwa wẹn nyẹ Ọrovwohwo, kọ sẹro we; ọ cha sa rhọvwe nẹ e ­ghwie ọvwata-a.”

Vwẹ irhiẹ rehẹ obotọ na, si edavwẹ romobọ ru wọ guọnọ nẹrhovwo kpahen phiyọ.

․․․․․

Obo Wo Rhiẹromrẹ Komobọ

Ọ vwo ẹbẹre ọfa vwẹ oyerinkugbe wẹn vẹ Ọghẹnẹ ro fori nẹ wo kuẹrofia kẹ-ẹ. Ọbuine Devid siri: “Davwe re wọ mrẹ nẹ Ọrovwohwo yoma!” (Une Rẹ Ejiro 34:8) Ọke rẹ Devid vwo si Une Rẹ Ejiro 34, o ghwe rhiẹromrẹ emu rẹ imuoshọ nu obọ. Vwẹ ọke yena ọ djẹ kẹ Ovie Sọl, ọnana ẹdia rẹ ukpokpoma rode vwọ kẹ Devid. Ọ da nẹrhẹ ọ rhe dia ohri rẹ ivwighrẹn rọyen re dia ihwo rẹ Filistia. Ọ vwọ mrẹ nẹ o che ghwu, Devid da vwẹ aghwanre vwo ru kerẹ ohwo rọ mwa orhuẹ rere ọ sa vwọ djẹ vrabọ.—1 Samuẹl 21:10-15.

Devid nama roro nẹ aghwanre romobọ rọyen yen ọ sa vwọ djẹ vrabọ-ọ. Ukperẹ ọtiọyen ọ vwẹ ujiri na kẹ Jihova. Vwẹ une ro siri re djunute vwẹ obenu na, Devid da so: “Me guọnọ Ọrovwohwo, o de nyo kẹ vwẹ, o de sivwi uvwe nẹ oshọ mẹ ejobi.” (Une Rẹ Ejiro 34:4) Womarẹ obo rẹ Devid rhiẹromrẹ komobọ yen o se vwo jiro kẹ ihwo efa nẹ “davwe re wọ mrẹ nẹ Ọrovwohwo yoma.” *

Wo se roro kpahen orọnvwọn ọvo ru wo rhiẹromrẹ vwẹ akpeyeren wẹn ro djerephia nẹ Jihova ghene vwẹrote we? Ọ da dia ọtiọyen gbe sio phiyọ obotọ na. Obo re sa chọn wẹ uko: Ọ dia oborẹ wo rhiẹromrẹ ru wo che si phiyotọ na cha dia okpo orọnvwọn tavwe-en. Roro kpahen ebruphiyọ itete ru wo rhiẹromrẹ kẹdẹ kẹdẹ ra sa tobọ ni kuẹrofia dede.

․․․․․

Ọkiọvo ọsẹ vẹ oni wẹn yono uwe kpahen Baibol na re. Ọ da dia ọtiọyen, ọyena ebruphiyọ. Dedena, ofori nẹ wẹ komobọ vwo oyerinkugbe vẹ Ọghẹnẹ. Ọ da dianẹ wo ji ru ọtiọye-en, wọ sa vwẹ obo rehẹ uyovwinrota nana vwọ tonphiyọ. Jihova che bruba ẹgbaẹdavwọn wẹn. Baibol na tare: “Nọ, ka kẹ wẹ: guọnọ ke wọ mrẹ.”—Matiu 7:7.

SE EVUẸ EFA KPAHEN UYOVWINROTA NANA VWẸ IYOVWINROTA 38 VẸ 39 RẸ UKORI 1

VWẸ UYOVWINROTA RỌ VWỌ KPAHEN ỌNANA

Wọ mrẹ bẹnbẹn wọ vwọ ta ota kẹ ihwo efa kpahen Ọghẹnẹ? Yono obo wọ sa vwọ chochọn rẹ esegbuyota wẹn.

[Eta rehẹ obotọ na]

KEY SCRIPTURE

“Omavwerhovwẹn dia kẹ ihwo ri vwo ọdavwẹ rẹ Ota rẹ Ọghẹnẹ.”—Matiu 5:3, NW.

WỌ RIẸNRE JOVWO . . .

Wo vwo se ọbe nana je yan nene uchebro ri Baibol rehẹ evun rọyen na ghwe djephia nẹ Jihova ghini wo ọdavwẹ wẹ.—Jọn 6:44.

[Ẹkpo rọ teyenphia vwẹ aruọbe 291]

Me vwariẹn ẹrhovwo mẹ, ọke me vwọ hẹ omotete. Enẹna me davwẹngba vwọ nẹrhovwo kpahen erọnvwọn re phiare vwẹ ẹdẹ vuọvo, te iyovwirin yẹrẹ ebrarhe. Ọ vwọ dianẹ ẹdẹ ivẹ vuọvo họhọ ohwohwo na-a, kọ nẹrhẹ me rha vwanriẹn eta vuọvo vwẹ ẹrhovwo mẹ kẹdẹ kẹdẹ-ẹ.—Eve

 [Uhoho rọhẹ aruọbe 290]

Kirobo rẹ urhe rẹ ododo guọnọ owian ye, ọtiọyen oyerinkugbe vẹ Jihova je guọnọ owian