Ofori nẹ mi bromaphiyame?
UYOVWINROTA 37
Ofori nẹ mi bromaphiyame?
Jokaphiyọ eta na sẹ uyota yẹrẹ ofian:
Omaebrophiyame ọyen obo ra guọnọre a ke sa dia Inenikristi.
□ Uyota
□ Ofian
Emuọvo kiriguo rọ nẹrhẹ e bromaphiyame, ọyen ọ vwọ sẹro wẹn vwo nẹ umwemwu.
□ Uyota
□ Ofian
Omaebrophiyame cha nẹrhẹ wo vwo usivwin.
□ Uyota
□ Ofian
Wo rhe bromaphiyame-e, Ọghẹnẹ cha yọnrọn owẹ so imwemwu wẹ-ẹn.
□ Uyota
□ Ofian
Igbeyan wẹn de bromaphiyame kọyen wo ji muegbe wo vwo bromaphiyame re.
□ Uyota
□ Ofian
WO CHE rhe roro kpahen omaebrophiyame ọ da dianẹ wo vwo omamọ oyerinkugbe vẹ Ọghẹnẹ, wo yeren akpọ nene iwan rọyen je vuẹ ihwo efa kpahen esegbuyota wẹn. Ẹkẹvuọvo, mavọ yen wọ cha vwọ riẹn sẹ wo muegbe vwọ kẹ omaebrophiyame re? A vwọ kaphenphiyọ onọ nana, gbe jẹ a fuẹrẹn eta rẹ uyota-yẹrẹ-ofian re djunute vwẹ obenu.
● Omaebrophiyame ọyen obo ra guọnọre a ke sa dia Inenikristi.
Uyota. Jesu jurhi kẹ idibo rọyen nẹ ayen bromaphiyame. (Matiu 28:19, 20) Vwọrẹ uyota, Jesu komobọ ji bromaphiyame. Wo se vwo nene Jesu, ofori nẹ wo bromaphiyame ọ da dianẹ wo muegbe wo vwo brorhiẹn yena, o ji ni ẹwẹn wẹn rhe.
● Emuọvo kiriguo rọ nẹrhẹ e bromaphiyame, ọyen ọ vwọ sẹro wẹn vwo nẹ umwemwu.
Ofian. Omaebrophiyame ọyen odjephia vwẹ azagba nẹ wọ vwomakpahotọ kẹ Jihova re. Omaẹvwọkpahotọ dia kọntrati rọ dobọ wẹn jẹ wo vwo jẹ obo wọ guọnọ ru eruo-o. Ukperẹ ọtiọyen, wọ vwomakpahotọ kẹ Jihova kidie wọ guọnọ yeren akpọ nene iwan rọyen.
● Omaebrophiyame cha nẹrhẹ wo vwo usivwin.
Uyota. Baibol na tare nẹ omaebrophiyame ọyen ọwọẹjẹ ọghanghanre rọ sa nẹrhẹ e vwo usivwin. (1 Pita 3:21) Ọ dia ọnana mudiaphiyọ nẹ omaebrophiyame pha kerẹ ishọransi ra dẹ vwọ sẹro arhọ rẹ ohwo vwẹ ọke rẹ ukpokpogho-o. Wo bromaphiyame, kidie nẹ wo vwo ẹguọnọ ri Jihova, wọ je guọnọ ga bẹdi bẹdẹ vẹ ubiudu wẹn eje.—Mak 12:29, 30.
● Wo rhe bromaphiyame-e, Ọghẹnẹ cha yọnrọn owẹ so imwemwu wẹ-ẹn.
Ofian. Jems 4:17 da ta: “Ohwo rọ riẹn emu esiri ro ru, o rhe ruo-o, kẹ umwemwu ọ dia kẹ”—ọ da tobọ dianẹ o bromaphiyame yẹrẹ o ji bromaphiyame-e. Ọtiọyena, wọ da riẹn obo ri yoma ji vwo ọhọ wo vwo roro kpahen oborẹ wọ cha vwẹ akpeyeren wẹn vwo ru, ọkiọvo, ọna yen ọke wo vwo nene ọsẹ yẹrẹ oni wẹn yẹrẹ Onenikristi ọfa ro tedje ta ota kugbe. Ọnana cha chọn wẹ uko vwọ riẹn obo ro fori nẹ wo ru wo se vwo muwan vwọ kẹ omaebrophiyame.
● Igbeyan wẹn de bromaphiyame kọyen wo ji muegbe wo vwo bromaphiyame re.
Ofian. Ofori nẹ orhiẹn ru wo vwo bromaphiyame nẹ otọ rẹ ẹwẹn wẹn rhe. (Une Rẹ Ejiro 110:3) Ofori nẹ wo bromaphiyame ọke wọ da riẹn obo ra vwọ dia Oseri ri Jihova churobo si, vẹ ọke ro de muwẹro nẹ wo se mu oghwa na.—Aghwoghwo 5:4, 5.
Omaebrophiyame Wene Akpeyeren rẹ Ohwo
Omaebrophiyame ọyen ojẹ ro wene akpeyeren rẹ ohwo, ọ ghwa ebruphiyọ buebun cha. Vwẹ ọke vuọvo na, o ji churobọ si oghwa ọghanghanre ọvo—ọyen wo vwo yerin mu ive ru wo vẹ kẹ Jihova.
Wo muegbe wọ vwọ vwẹ oma wẹn kpahotọ kẹ Jihova re? Ọ da dia ọtiọyen, kọyen o vwo oboresorọ oma vwọ vwerhen owẹ. Uphẹn rọ ma rho kparobọ yehẹ obaro hẹrhẹ owẹ na, ọnana uphẹn wọ vwọ ga Jihova vwo nẹ otọ rẹ ẹwẹn wẹn rhe, ji djephia vwẹ akpeyeren wẹn nẹ wọ vwomakpahotọ vwọ kẹ.—Matiu 22:36, 37.
VWẸ UYOVWINROTA RỌ VWỌ KPAHEN ỌNANA
Yono kpahen oborẹ wo se vwo vwo obo ra tẹnrovi rere wo se vwo yeren omamọ rẹ akpọ.
ẸKPO RI BAIBOL RE MURO KPAHEN
“Ovwan vwẹ oma rẹ ovwan kpahotọ kerẹ izobo ọkpokpọ, rọ fonro, ro fo ẹreyọ kẹ Ọghẹnẹ, rọ dia ẹga ọfuanfon womarẹ ẹgba iroro rẹ ovwan.”—Rom 12:1. NW
IROROẸJẸ
Womarẹ ukẹcha rẹ ọsẹ vẹ oni wẹn, guọnọ ohwo vwẹ ukoko na rọ sa chọn wẹ uko vwo yerin te ẹdia rẹ omaebrophiyame.—Iruo Rẹ Iyinkọn Na 16:1-3
WỌ RIẸNRE JOVWO? . . . ?
Omaebrophiyame ọyen ẹbẹre ọghanghanre ọvo ra vwọ “ka oka” phiyọ ohwo vwọ kẹ usivwin.—Izikiẹl 9:4-6.
OBORẸ MI SE RU!
Mi se vwo yerin te ẹdia rẹ omaebrophiyame, mi che yono kpobarophiyọ kpahen iyono ri Baibol nana: ․․․․․
Oborẹ me guọnọ nọ ọsẹ yẹrẹ oni mẹ kpahen uyovwinrota nana yen ․․․․․
DIE WO RORORI?
● Diesorọ omaebrophiyame vwọ dia ojẹ ọghanghanre?
● Die yen sa nẹrhẹ eghene brokpakpa ro vwo bromaphiyame?
● Die yen sa nẹrhẹ eghene siomauko rọ vwọ vwomakpahotọ ji bromaphiyame?
[Ẹkpo rọ teyenphia vwẹ aruọbe]
“Me vwọ riẹn nẹ mi bromaphiyame re, chọn vwẹ uko vwo bru omamọ orhiẹn je kẹnoma kẹ erọnvwọn re sa so okpetu kẹ vwẹ.”—Holly
[Ekpeti/Uhoho]
Enọ re Dje Ẹnẹnọ Kpahen Omaebrophiyame
Die yen omaebrophiyame mudiaphiyọ? Re vwo divwin ohwo phiyọ ame je kparọ vrẹn mudiaphiyọ nẹ ọ kpairoro vrẹ ẹvwọtua rẹ ojevwe romobọ re, enẹna o muegbe ro vwo ru ọhọre ri Jihova.
Die yen o mudiaphiyọ ra vwọ vwomakpahotọ kẹ Jihova? O mudiaphiyọ wọ vwọ vwẹ oma vwo ze, vwo ve kẹ Jihova nẹ ọhọre rọyen kọyen ka obaro vwọ kẹ kemu kemu wo ruẹ. (Matiu 16:24) Ofori wọ vwọ vwomakpahotọ kẹ Jihova vwẹ ẹrhovwo tavwen wo ki bromaphiyame.
Die yen ofori nẹ wo ru tavwen wo ki bromaphiyame? Ofori nẹ wo yeren akpọ nene Ota rẹ Ọghẹnẹ je vuẹ ihwo efa kpahen oborẹ wo segbuyota. Ofori nẹ wọ bọn oyerinkugbe vẹ Ọghẹnẹ womarẹ ẹrhovwo ẹnẹ vẹ eyono rẹ Ota rọyen. Ofori nẹ wọ ga Jihova kidie ọyen obo ru wọ guọnọ ru—ọ dia kidie nẹ a gba wẹ ruo-o.
O vwo ikpe wo che te wo ki bromaphiyame? Ọ dia ikpe rẹ ohwo hepha yen ma ghanre-e. Dedena, ofori nẹ wọ nabọ ghwanre tedje wo se vwo vwo ẹruọ oborẹ omaẹvwọkpahotọ mudiaphiyọ.
Ọ da rha dianẹ wọ guọnọ bromaphiyame jẹ ọsẹ vẹ oni wẹn tare nẹ wọ hẹrhẹ vwo? Ọkiọvo, ọ sa dianẹ ayen guọnọre nẹ wọ riẹn kpobarophiyọ kpahen obo ro mudiaphiyọ ra vwọ dia Onenikristi. Ni uchebro rayen na ghanghanre, rere wọ vwẹ ọke nana vwọ kpurhiẹn phiyọ oyerinkugbe wẹn vẹ Jihova.—1 Samuẹl 2:26.
[Ekpeti]
Ọbe re se siẹ eta phiyọ
Wọ Guọnọ Bromaphiyame?
Reyọ enọ vẹ eta rehẹ obotọ na vwọ fuẹrẹn ẹyan obaro wẹn. Jo muwẹro nẹ wo se ẹkpo ri Baibol ra rionbọ ra na tavwen wo ki siẹ ẹkpahọnphiyọ wẹn.
Idjerhe vọ yen wo vwo djephia enẹna nẹ wọ vwẹroso Jihova?—Une Rẹ Ejiro 71:5. ․․․․․
Mavọ yen wo vwo djephia nẹ wo vwo ọhọ wo vwo phi ofẹnẹ phiyọ obo re brare vẹ obo ri yovwirin?—Hibru 5:14. ․․․․․
Ọkieje yen wọ vwọ nẹrhovwo? ․․․․․
Die dẹn yen wọ nẹ kpahan, mavọ yen ayen vwo djephia nẹ wo vwo ẹguọnọ rẹ Jihova?—Une Rẹ Ejiro 17:6. ․․․․․
Si oborẹ wọ guọnọ tẹnrovi kpahen ẹrhovwo wẹn vwẹ obotọ. ․․․․․
Wọ yan muẹ ọrhuẹrẹphiyotọ rẹ uyono ri Baibol romobọ wẹn?—Joshua 1:8. ․․․․․
Die yen wo yono vwẹ uyono romobọ wẹn? ․․․․․
Si oborẹ wọ guọnọ tẹnrovi kpahen uyono romobọ wẹn vwẹ obotọ. ․․․․․
Wọ nabọ ruiruo rẹ aghwoghwo wẹn fiotọ? (Kerẹ udje: Wo se dje iyono ri Baibol evo fiotọ kẹ ihwo efa? Wo rhivwin bru ihwo ri dje omavwerhovwẹn phia? Wọ wian rere wo se vwo vwo ohwo wọ vwẹ Baibol yono?)
□ E □ Ẹjo
Wo kpo iruo rẹ aghwoghwo ọ da tobọ dianẹ ọsẹ yẹrẹ oni wẹn rare-e?—Iruo Rẹ Iyinkọn Na 5:42.
□ E □ Ẹjo
Si oborẹ wọ guọnọ tẹnrovi kpahen iruo rẹ aghwoghwo wẹn vwẹ obotọ.—2 Timoti 2:15. ․․․․․
Ọkieje yen wo vwo kpo uyono gbanẹ wo chojojo ra?—Hibru 10:25. ․․․․․
Idjerhe vọ yen wo vwo vwobọ vwẹ emẹvwa? ․․․․․
Wo kpo uyono siẹrẹ ọsẹ yẹrẹ oni rha ra-a (ọ da dianẹ ayen rhọvwen kẹ wẹ nẹ wọ ra)?
□ E □ Ẹjo
Wọ sa tanẹ wo vwo omavwerhovwẹn wo vwo ru ọhọre rẹ Ọghẹnẹ?—Une Rẹ Ejiro 40:8.
□ E □ Ẹjo
Wo se si kpahen ọke evo wo vwo phi ọdavwini rẹ edjedje kparobọ?—Rom 12:2. ․․․․․
Iroro vọ yen wọ jẹre wo vwo ru ẹguọnọ wẹn kpahen Jihova ganphiyọ?—Jud 20, 21. ․․․․․
Wọ cha ga Jihova ọ da tobọ dianẹ ọsẹ yẹrẹ oni wẹn kugbe igbeyan wẹn dobọ rẹ ẹga ri Jihova ji?—Matiu 10:36, 37.
□ E □ Ẹjo
[Uhoho]
Kerẹ orọnvwe, omaebrophiyame ọyen ojẹ ro wene akpeyeren rẹ ohwo—ọ dia obo ra vwẹ ẹro ri phovwin vwo ni-i