Jihova guọnọre nẹ ihwo re rọvwọnre ru nene ive rẹ orọnvwe rayen. Ọke ro vwo ku ọshare vẹ aye rẹsosuọ kugbe vwẹ orọnvwe, Jihova da ta: “Ọshare . . . kọ rhe gbanọ aye rọye, ayen ke dia oma ọvo.” Ukuko na, Jesu Kristi da rhoma vwariẹn ota yena: “Obo rẹ Ọghẹnẹ tan kugbe nu, e jẹn ohwo hẹriẹ-ẹ.” (Jẹnẹsis 2:24; Matiu 19:3-6) Ọtiọyena, Jihova kugbe Jesu ni orọnvwe kerẹ oyerinkugbe rẹ bẹdẹ, jokpanẹ ọvo usun rayen na ghwuru. (1 Kọrẹnt 7:39) Orọnvwe vwọ dia ọrhuẹrẹphiyotọ ro nẹ obọ rẹ Ọghẹnẹ rhe na, orọnvwe-ẹfan  rha dia obo ra cha vwẹ ẹro otete vwo ni-i. Vwọrẹ uyota, Jihova vwo utuoma kpahen orọnvwe-ẹfan ro shephiyọ oborẹ Baibol na tare-e.​—Malakae 2:15, 16.

Kirobo rẹ Baibol na yonori, die yen sa nẹrhẹ a fan orọnvwe? Jihova vwo utuoma kpahen igberadja kugbe ọfanrhiẹn. (Jẹnẹsis 39:9; 2 Samuẹl 11:26, 27; Une Rẹ Ejiro 51:4) O vwo utuoma kpahen ọfanrhiẹn te ẹdia rọ da rhọnvwe nẹ a sa fan orọnvwe fikirẹ ọfanrhiẹn. (Kpo Uyovwinrota 9, ẹko. 7, vwọ kẹ odjefiotọ rẹ oborẹ ọfanrhiẹn churobọ si.) Jihova kẹ ọrivẹ rẹ orọnvwe ro vwobọ vwẹ ọfanrhiẹn na-a, uturhi ro vwo brorhiẹn sẹ ọ cha dia orọnvwe na yẹrẹ ọ cha fan. (Matiu 19:9) Ọtiọyena, ọrivẹ ro vwobọ vwẹ ọfanrhiẹn na-a, de brorhiẹn rọ vwọ fan orọnvwe na, ọyena chọre vwẹ ẹro rẹ Jihova-a. Ẹkẹvuọvo, ukoko rẹ Inenikristi cha vuẹ ohwo vuọvo nẹ ọ fan orọnvwe-e. Vwọrẹ uyota, ọrivẹ re gbeku na, se jẹ orọnvwe na ẹfan siẹrẹ ọ ro gbe ọfanrhiẹn na de vwo ẹwẹn rẹ okurhẹriẹ. Ẹkẹvuọvo, ihwo ri vwo uturhi rẹ ayen vwọ fan orọnvwe kirobo rẹ Baibol na tare yen che brorhiẹn na komobọ, ayen mi ji rhiabọreyọ kemu kemu ro se no rhe.​—Galesha 6:5.

Vwẹ ẹdia evo re brare mamọ, Inenikristi evo brorhiẹn rẹ ayen vwọ hẹriẹ oma yẹrẹ fan orọnvwe rayen, dede nẹ ọrivẹ rayen gbe ọfanrhiẹ-ẹn. Vwẹ ẹdia tiọyena, Baibol na tare nẹ ọ rọ hẹriẹ oma na “mutidia ọ rha dia ọtiọye-e ọ vẹ” ọrivẹ “rọye gba rhuẹrẹ kugbe.” (1 Kọrẹnt 7:11) Onenikristi tiọyena vwo uturhi rọ vwọ rọvwọn ohwo ọfa-a. (Matiu 5:32) E je roro kpahen ẹdia evo re brare mamọ rẹ ihwo evo niri nẹ ọ sa nẹrhẹ a hẹriẹ oma.

Ọshare rha rhọnvwe vwẹrote orua rọye-en. Uweren sa gan kẹ orua na te ẹdia rẹ erọnvwọn ra guọnọre vwẹ akpeyeren me kanre ayen, kidie nẹ ọshare na rhọnvwe vwẹrote aye-en, dede nẹ o vwo ẹgba ro vwo ru ọtiọyen. Baibol na da ta: “Ohwo rọ rha kọn okọn phihọ otọ kẹ imoni rọye-e, marho kẹ ekru robọ rọye, yọ yọnrọn esegbuyota na-a yẹ ohwo yena bra nọ ohwo ro ji segbuyota-a.” (1 Timoti 5:8) Ọshare tiọyena  rha rhọnvwe wene-e, aye rọyen se brorhiẹn rọ vwọ hẹriẹ oma rere ọ vẹ emọ rọyen vwo jẹ oja ẹriọ, ẹkẹvuọvo o ru ọtiọyen vwo nene oborẹ urhi guọnọre. Siẹrẹ a da rhe nẹ iyẹnrẹn kpahen ọshare rọ rhọnvwe vwẹrote orua rọye-en, ofori nẹ ekpako na nabọ fuẹrẹn ota na. A sa djẹ ọshare tiọyena nẹ ukoko siẹrẹ ọ rha rhọnvwe vwẹrote orua rọye-en.

Ehwe rẹ ọkieje. Siẹrẹ ohwo rọ rọvwọnre de hwe ọrivẹ rẹ orọnvwe rọyen ọkieje, arhọ rẹ ọ re hwe na sa dia ẹdia rẹ imuoshọ. Ọ ro hwe ọrivẹ na da dia Onenikristi, e jẹ ekpako na nabọ fuẹrẹn ota na. A sa djẹ ohwo nẹ ukoko fikirẹ ophuemuo ọgangan vẹ iruemu rẹ ozighi efa.​—Galesha 5:19-21.

Ohwo rọ rọvwọnre rha rhọnvwe nẹ ọrivẹ rọyen ga Jihova-a. Ọrivẹ rẹ orọnvwe se vwo ẹkuruemu rọ nẹrhẹ ọ dia bẹnbẹn kẹ ọrivẹ rọyen rọ vwọ ga ẹga rẹ uyota yẹrẹ tobọ nẹrhẹ o ru erọnvwọn evo re vwọso urhi rẹ Ọghẹnẹ. Vwẹ ẹdia tiọyena, ọ ra rhọnvwe kẹ nẹ ọ ga Jihova na-a yen che brorhiẹn sẹ idjerhe vuọvo ro se vwo “mu ọghọ kẹ Ọghẹnẹ nọ ihwo rẹ akpọ” yen ọ vwọ hẹriẹ oma vwo nene oborẹ urhi tare.​—Iruo Rẹ Iyinkọn Na 5:29.

Vwẹ ẹdia re brare mamọ kerẹ i re djunute vwẹ obenu na, e jẹ ohwo vuọvo vuẹ ọ re gbeku na nẹ ọ hẹriẹ oma yẹrẹ o jẹ ọtiọyen eruo-o. Dede nẹ iniọvo re ghwanre tedje kugbe ekpako na sa vwẹ uchebro re mu kpahen Baibol na vwọphia, ayen cha sa riẹn emu eje re phiare vwẹ uvwre rẹ ọshare vẹ aye-e. Jihova ọvo yen sa riẹn. Vwọrẹ uyota, aye rọ dia Onenikristi dje ọghọ phia kẹ Ọghẹnẹ yẹrẹ ọrhuẹrẹphiyotọ rẹ orọnvwe na-a siẹrẹ o de brẹba oborẹ ebẹnbẹn rẹ orua na gan te kidie nẹ ọ guọnọ hẹriẹ oma, eriyin ji te ọshare. Jihova riẹn oboresorọ wọ vwọ guọnọ hẹriẹ oma, o torobo rẹ wo sironu te-e. Vwọrẹ uyota, “emu na ejobi rhie phihọ ghwroro kẹ ohwo rẹ avwanre vẹ ọye gbe yerẹ kuẹgbe na.” (Hibru 4:13) Ẹkẹvuọvo e jẹ a vwẹ Onenikristi guẹdjọ kidie nẹ ọ hẹriẹ oma fikirẹ ebẹnbẹn rehẹ orua rọye-en. Kidie vwẹ obaro obọ “ohwo ọvuọvo kọ cha vwẹ unu gbe ikun rẹ oma rọye kẹ Ọghẹnẹ.”​—Rom 14:10-12.