1. Oka rẹ ihwo vọ yen Jihova siẹ te oma, diesorọ ayen vwọ davwẹngba vwo yono obo ri je Ọghẹnẹ?

JESU tare nẹ, “ọ gegagọ rẹ uyota na da gọ Ọsẹ na vwẹ [“ẹwẹn,” NW ] vẹ uyota kidie ọtiọye Ọsẹ na guọnọre nẹ a ga ọye.” (Jọn 4:23) Jihova da mrẹ ihwo kerẹ owẹ re guọnọ ga vwọrẹ ẹwẹn vẹ uyota, o siẹ ayen te oma rọyen vẹ Ọmọ rọyen. (Jọn 6:44) Ọnana uphẹn rode! Ẹkẹvuọvo, ofori nẹ ihwo ri vwo ẹguọnọ rẹ uyota na davwe “yono obo ri je Ọrovwohwo,” kidie Eshu ton ona rẹ ophiẹnvwe.​—Ẹfesọs 5:10; Ẹvwọphia 12:9.

2. Djekpahen ẹro rẹ Jihova vwo nẹ ihwo re guọnọ ku ẹga rẹ uyota vẹ ọ rẹ efian kugbe.

² Roro kpahen obo re phiare vwẹ asan ọvo rọ kẹre Ugbenu rẹ Sinai, ọke rẹ ihwo rẹ Izrẹl vwọ vuẹ Erọn nẹ ọ ma oma kẹ ayen. Dede nẹ o nẹ otọ rẹ udu rọyen rhe-e, Erọn rhọnvwere, ọ da ma ọmọ rẹ erhuẹn, o da vuẹ ayen nẹ oma na mudiaphiyọ Jihova. Ọ da ta: “Odẹ rọ cha na ka re orẹ kẹ Ọrovwohwo.” Jihova rhọnvwephiyọ ẹga rẹ uyota vẹ ọ rẹ efian nana rẹ ayen kukugbe na? Ẹjo. Kidie Jihova hwe ihwo ri te omarẹ 3,000 re ga oma na. (Eyanno 32:1-6, 10, 28) Die yen ọnana yono avwanre? Avwanre da guọnọ sẹro rẹ oma avwanre vwevunrẹ ẹguọnọ rẹ Ọghẹnẹ, ofori nẹ avwanre “vwẹ obọ te emu ogbegbe-e,” avwanre je sẹro rẹ uyota na rere emu vuọvo vwo jẹ uyota na egbe ẹgua.​—Aizaya 52:11; Izikiẹl 44:23; Galesha 5:9.

3, 4. Diesorọ a vwọ nabọ roro kpahen iyono rẹ Baibol ọke rẹ avwanre da fuẹrẹn erẹ vẹ irueru ri titiri?

 ³ Ọke rẹ iyinkọn na vwọ hẹ akpọ, ayen davwẹngba rere ihwo ri she nẹ ukoko na vwo jẹ ẹga rẹ uyota na emiovwo. Ẹkẹvuọvo ọ da ohwo mamọ nẹ ọke rẹ iyinkọn na vwo ghwu nu, Inenikristi ri vwo ẹguọnọ rẹ uyota na-a da rhe hwarhiẹ iruemu rẹ egedjọ vẹ erẹ rẹ ayen ro ẹga rẹ Inenikristi. (2 Tẹsalonaika 2:7, 10) Wo che vwo roro kpahen evo usun rẹ erẹ nana, vwo oniso oborẹ ayen titi ẹwẹn rẹ akpọ nana ukperẹ ẹwẹn rẹ Ọghẹnẹ. Vwẹ kidjerhe kidjerhe, erọnvwọn vuọvo yen erẹ rẹ akpọ nana titẹ, e yen urhurusivwe rẹ ugboma, ẹga rẹ efian, kugbe uruemu rẹ orhan. Iruemu nana yen evwo vughe “Babilọn rode.” * (Ẹvwọphia 18:2-4, 23) Karophiyọ nẹ Jihova mrẹ emu rẹ ẹgua rehẹ irueru rẹ egedjọ, rọ dia asan rẹ erẹ buebun rẹ ihwo titẹ nonẹna nurhe. Erẹ tiọyena ji tu Jihova oma nonẹna. O rhe fo nẹ avwanre vwẹ ẹro tiọyena ji vwo ni erẹ na?​—2 Jọn 6, 7.

⁴ Kerẹ Inenikristi rẹ uyota, avwanre riẹnre nẹ erẹ evo tu Jihova oma. Ẹkẹvuọvo, ofori avwanre vwo brorhiẹn rere e vwo jẹ obọ evwo vwẹ ayen. Ẹrhomafuẹrẹn oboresorọ erẹ tiọyena vwo tu Jihova oma cha nẹrhẹ orhiẹn rẹ avwanre bruru a vwọ kẹnoma kẹ obo re cha nẹrhẹ avwanre jẹ evunrẹ ẹguọnọ rẹ Ọghẹnẹ ẹdia ganphiyọ.

5. Diesorọ avwanre se vwo vwo imuẹro nẹ ọ dia December 25 yen e vwiẹ Jesu-u?

⁵ Baibol na vwẹ ọke vuọvo ta ota kpahen orẹ rẹ ẹdẹ re vwiẹ Jesu-u. Ohwo vuọvọ tobọ riẹn ẹdẹ re vwiẹrẹ-ẹ. Ẹkẹvuọvo imuẹro herọ nẹ ọ dia December 25 rọ dia ọke rẹ irho vwo she rẹ ekpahen de muẹ mamọ vwẹ ubrakpọ re  de vwiẹ-ẹ. * Luk tare nẹ ọke re vwo vwiẹ Jesu, “Ihwo evo herọ vwẹ ubrakpọ yena ri sun igodẹ vwẹ evun rẹ aghwa vwẹ ason yena.” (Luk 2:8-11) Ọ da dianẹ ọyena ghwa ẹkuruemu rẹ ayen vwo “sun igodẹ vwẹ evun rẹ aghwa” ọkieje, manẹ a rha jokaphiyọ eta yena-a. Ẹkẹvuọvo, kidie nẹ December ọyen ọke rẹ irho vwo she rẹ ekpahen de muẹ mamọ vwẹ Bẹtlẹhẹm, evunrẹ uwevwin kọyen isuigodẹ da vwẹrote igodẹ rayen kidie ayen che se “sun igodẹ vwẹ evun rẹ aghwa” vwẹ ọke yena-a. Vwọba, Josẹf vẹ Meri kpo Bẹtlẹhẹm kidie Ọgọstọs Siza jẹ urhi nẹ e kere ihwo rehẹ ẹkuotọ na. (Luk 2:1-7) O ji muẹro nẹ Siza che se ji urhi tiọyena vwọ kẹ ihwo re rhọnvwephiyọ usuon rẹ Romu-u, nẹ ayen re si odẹ phiyotọ vwẹ asan re de vwiẹ ayen vwẹ ọke rẹ irho vwo she rẹ ekpahen de muẹ mamọ na-a.

6, 7. (a) Tivọ yen irueru rẹ Ikrismasi buebun da tonphiyọ? (b) Ofẹnẹ vọ yen a sa mrẹ vwẹ ẹwẹn rẹ Inenikristi vwọ kẹ okẹ vẹ ọ rẹ Ikrismasi?

⁶ Ikrismasi tonphiyọ vwẹ Baibol na-a, ukperẹ ọtiọyen a reyerọ vwo nẹ orẹ rẹ egedjọ rẹ ihwo rẹ Rom se Saturnalia rhe, e ru orẹ na vwọ kẹ Saturn ọghẹnẹ rẹ ekankọn. Vwẹ idjerhe vuọvo na, New Catholic Encyclopedia je tanẹ ihwo re ga ọghẹnẹ rẹ Mithra ruẹ orẹ rẹ “ẹdẹ re vwiẹ ọnre re che se phikparobọ-ọ,” vwẹ December 25. “Ikrismasi tonphiyọ vwẹ ọke rẹ ẹga ọnre vwọ gan mamọ vwẹ Rom,” omarẹ ikpe ujorin erha re wanre rẹ Kristi vwo ghwu nu.

⁷ Vwẹ ọke rẹ erẹ nana, egedjọ vwẹ okẹ kẹ ohwohwo, je ria udemu ride, rọ dia obo re ji ruẹ vwẹ Ikrismasi nonẹna. Ẹkẹvuọvo, buebun rẹ okẹ ra vwọ kẹ ihwo vwẹ Ikrismasi nonẹna shephiyọ vẹ oborẹ 2 Kọrẹnt 9:7 tare-e, nẹ “ohwo ọvuọvo mi ru kirobo rẹ udu rọye dje kẹ, ọ dia ọ rẹ iguegu-u  eyẹ ẹgbahọ-ọ, kidie Ọghẹnẹ guọnọ okẹ rẹ ivun avwerhe.” Ẹguọnọ yen muẹ Inenikristi rẹ uyota vwọ kẹ okẹ, ayen vwo ẹdẹ rẹ oghẹresan rẹ ayen vwọ kẹ okẹ-ẹ, ayen je rhẹro rẹ okẹ ra cha vwọ kẹ ayen rhivwi-in. (Luk 14:12-14; se Iruo Rẹ Iyinkọn Na 20:35.) Vwọba, oma vwerhen ayen kidie ayen vrabọ rẹ okeke kugbe osa rẹ ihwo ria vwẹ uvwre ọke rẹ Ikrismasi na.​—Matiu 11:28-30; Jọn 8:32.

8. Ihwo ri yono kpahen isio na kẹ Jesu okẹ rẹ ẹdẹ re vwiẹrẹ? Dje kpahọn.

⁸ Ẹkẹvuọvo, ihwo evo sa nọ, ihwo ri yono kpahen isio na kẹ Jesu okẹ rẹ ẹdẹ re vwiẹrẹ? Ẹjo. Okẹ rẹ ayen kẹ Jesu, ọyen ẹkuruemu re vwo muọghọ kẹ ohwo rẹ oghẹresan vwẹ ọke rẹ Baibol. (1 Ivie 10:1, 2, 10, 13; Matiu 2:2, 11) Vwọrẹ uyota, ọ dia ason re vwiẹ Jesu yen ayen tobọ rhe-e. Jesu rha dia ọmọboba re mu phiyọ urhuẹ rẹ eranvwe ọke rẹ ihwo na vwọ rhe-e.

9. Die yen e niso kpahen erẹ rẹ ẹdẹ re vwiẹ ohwo ra nẹ iyẹnrẹn rọyen vwẹ Baibol na?

⁹ Dede nẹ ọyen emu rẹ aghọghọ siẹrẹ e de vwiẹ ọmọ, jẹ Baibol na ta ota kpahen odibo rẹ Ọghẹnẹ vuọvo ro ru orẹ rẹ ẹdẹ re vwiẹrẹ-ẹ. (Une Rẹ Ejiro 127:3) Ọ chọrọ ihwo ri si Baibol na ẹro? Ẹjo, kidie e djunute orẹ rẹ ẹdẹ re vwiẹ ihwo ivẹ vwẹ Baibol na, ọ rẹ Fero rẹ Ijipt kugbe ọ rẹ Hẹrọd Antipas. (Se Jẹnẹsis 40:20-22; Mak 6:21-29.) Ẹkẹvuọvo, umiovwo yen nẹ orẹ ivẹ nana rhe, ma rho kẹ ọ rẹ Hẹrọd Antipas kidie e bru uyovwin rẹ Jọn ro bru ihwo phiyame no ẹdẹ yena.

10, 11. Ẹro vọ yen Inenikristi rẹ awanre vwo ni orẹ rẹ ẹdẹ re vwiẹ ohwo, diesorọ?

¹⁰ Ọbe re se The World Book Encyclopedia tare nẹ, “Inenikristi  rẹsosuọ ni orẹ rẹ ẹdẹ re vwiẹ ohwo nẹ orẹ rẹ egedjọ.” Kerẹ udje, Ihwo rẹ Grik rẹ ọke awanre vwo esegbuyota nẹ o vwo amakashe rẹ Idẹbono ọvo rọ dia vwẹ ẹdẹ re vwo vwiẹ ohwo ọvuọvo, nẹ amakashe yena kọyen chochọ rẹ ohwo yena vwẹ akpeyeren rọyen eje. Ọbe re se The Lore of Birthdays da ta: “E vwiẹ ohwo na vwẹ ẹdẹ re vwiẹ ọghẹnẹ ro vwo oyerinkugbe vẹ amakashe yena.” O krire ra mrẹvughe nẹ ẹdẹ re vwiẹ ohwo churobọ si uyono rẹ isio.

¹¹ Idibo rẹ Ọghẹnẹ ọke rẹ awanre sen orẹ nana kidie o churobọ si edjọẹgọ kugbe uruemu rẹ orhan, vwọ vrẹn ọyena, ọ je sa dianẹ ayen ru orẹ na-a fikirẹ ẹro rẹ ayen vwo no. Diesorọ? Kidie enana ihwo re vwomakpotọ ri ni ẹdẹ re vwiẹ ayen nẹ ọ ghanre te asan rẹ ayen de ru orẹ rẹ ẹdẹ na-a. * (Maika 6:8; Luk 9:48) Ukperẹ ọtiọyen, ayen jiri Jihova, je kpẹvwẹ fikirẹ okẹ rẹ arhọ rọ pha ghanghanre rọ vwọ kẹ ayen. *​—Une Rẹ Ejiro 8:3, 4; 36:9; Ẹvwọphia 4:11.

12. Mavọ yen ẹdẹ rẹ ughwu sa vwọ rhonọ ẹdẹ rẹ evwiẹ?

¹² Ihwo re fuevun eje ri ghwuru hẹ ẹkarophiyọ rẹ Ọghẹnẹ, ọ cha rhọvwọn ayen vwẹ ọke rọ cha vwẹ obaro. (Job 14:14, 15) Aghwoghwo 7:1 da ta: “Odẹ esiri yovwi nọ udẹ rọ ghare; ẹdẹ rẹ ughwu rhonọ ẹdẹ rẹ evwiẹ.” “Odẹ esiri” rẹ avwanre mudiaphiyọ omamọ rẹ uruemu rẹ avwanre vwori vwẹ ẹro rẹ Ọghẹnẹ womarẹ ẹga rẹ avwanre vwọ kẹ. Ẹkarophiyọ vuọvo ra vuẹ Inenikristi nẹ ayen ru churobọ si ughwu, ọ dia evwiẹ-ẹ, ọyen ughwu rẹ Jesu, rẹ omamọ rẹ “odẹ” rọyen nẹrhẹ avwanre se vwo usivwin.​—Hibru 1:3, 4; Luk 22:17-20.

13, 14. Diesorọ rẹ Inenikristi rẹ uyota ruẹ Ista-a?

¹³ Ista ọyen orẹ rẹ ẹga rẹ efian ruẹ vwọ tanẹ ayen ruẹ ẹkarophiyọ rẹ evrẹnushi rẹ Kristi. Ẹkẹvuọvo, Kristi tare nẹ e ru ẹkarophiyọ rẹ evrẹnushi rọyen? Ẹjo. Ẹbe rẹ ikuegbe vuẹ avwanre nẹ Inenikristi rẹ ẹgbukpe ujorin rẹsosuọ ru orẹ rẹ Ista-a, kidie ọyen orẹ rẹ igiye rẹ awanre. Ọbe re se The Encyclopœdia Britannica da ta: “A mrẹ asan vuọvo vwẹ Ọphọ Kpokpọ na re de ru Ista-a. . . . Inenikristi tobọ ni ẹdẹ vuọvo fuanfo-on.”

¹⁴ Jihova che rhiabọreyọ orẹ rọ tonphiyọ vwẹ obọ rẹ egedjọ nẹ e vwo ru ẹkarophiyọ rẹ evrẹnushi rẹ Ọmọ rọyen? Kakaka! (2 Kọrẹnt 6:17, 18) Vwọrẹ uyota, Baibol na tobọ vwẹ ọke vuọvo tanẹ e ru ẹkarophiyọ rẹ evrẹnushi rẹ Jesu-u. Kọyen ohwo ro ru Ista vẹ ẹwẹn nẹ ẹkarophiyọ rẹ evrẹnushi rẹ Jesu yen o ruẹ, fuevun kẹ Ọghẹnẹ-ẹ.

15. Tivọ yen orẹ rẹ Ukpe Kpokpọ da tonphiyọ?

¹⁵ Orẹ ọfa ro ji titi yen orẹ rẹ Ukpe Kpokpọ. Tivọ yen orẹ nana da tonphiyọ? Kirobo rẹ ọbe re se The World Book Encyclopedia tare, “Osun rẹ Rom re se Juliọs Siza yen vwẹ orẹ rẹ Ukpe Kpokpọ na vwo mu vwẹ January 1, vwẹ ukpe rẹ 46 B.C. Ihwo rẹ Rom vwẹ ẹdẹ nana vwọkpahotọ kẹ Janus rọ dia ọghẹnẹ rẹ ẹchẹ kugbe ọtonphiyọ. Janus ọyen ọghẹnẹ ro vwo opharo ivẹ, ọvo nẹ obaro, ọ ro chekọ nẹ obuko, odẹ rọyen yen e vwo se emeranvwe rẹ January.” Irueru kugbe ẹdẹ re vwo ruẹ orẹ rẹ Ukpe Kpokpọ na fẹnẹre vwẹ ẹkuotọ sansan. Vwẹ ẹkuotọ buebun, idi ẹda vrẹ oma kugbe echidiotọ re se suẹ-ẹn eyen ẹbẹre ọvo rẹ orẹ nana. Ẹkẹvuọvo, Rom 13:13 vwẹ uchebro nana kẹ avwanre: “E gbe jẹn avwanre vwẹ oma kpotọ yan vwẹ uvo koko na, ọ  dia o rẹ emu ẹriọ kugbe udi-ẹda-a, ọ dia ophiẹvwe kugbe ozighi-i, ọ dia ohọre kugbe omaeriọ-ọ.” *

16, 17. (a) Diesorọ Inenikristi re guọnọ rọvwọn vwọ vwẹ iyono rẹ Baibol vwọ fuẹrẹn irueru ri shekpahen orọnvwe vwẹ ẹkuotọ rayen? (b) A da ta ota kpahen e vwo do irosu yẹrẹ erọnvwọn efa, die yen ofori nẹ Inenikristi roro kpahen?

¹⁶ Vwẹ ọmọke krẹn, “urhuru rẹ ọpha vẹ ọshare rọye e gbi nyo vwẹ evun [Babilọn Rode] ọfa-a.” (Ẹvwọphia 18:23) Diesorọ? Orọnvwọn ọvo rọ sorọ yen fikirẹ iruemu rẹ orhan rọyen ri se gbe orọnvwe na ẹgua vwo nẹ ẹdẹ rẹ orọnvwe na yanran.​—Mak 10:6-9.

¹⁷ Ẹkuruemu fẹnẹre vwẹ ẹkuotọ sansan. O vwo irueru evo rẹ ihwo niri nẹ echọre-e, ọ sa dianẹ irueru nana tonphiyọ vwẹ Babilọn. Ọ je sa dianẹ ihwo rẹ Babilọn nẹ irueru nana kerẹ obo re vwẹ ‘omamuyovwin’ vwọ kẹ ihwo re rọvwọn na vẹ e re rhe irueru rẹ orọnvwe na. (Aizaya 65:11) Ọvo usun rẹ iruemu yena yen e vwo do irosu yẹrẹ erọnvwọn efa. Ọ sa dianẹ uruemu nana tonphiyọ vẹ esegbuyota nẹ emuọre fun ophu rẹ emekashe rẹ Idẹbono, ọ rha nẹrhẹ ayen wan ihwo re rọvwọnre na oma-a. Vwọba, o krire ra riẹn irosu phiyọ oka rẹ evwo vwiẹ emọ, omavwerhovwẹn, kugbe otọnvwe. Ophẹnri nẹ, kohwo kohwo rọ guọnọ dia vwevunrẹ ẹguọnọ rẹ Ọghẹnẹ cha kẹnoma kẹ iruemu tiọyena.​—Se 2 Kọrẹnt 6:14-18.

18. Iyono rẹ Baibol vọ yen ofori nẹ ihwo re guọnọ rọvwọn vẹ ihwo re durhieri yan nene?

¹⁸ Idibo rẹ Jihova je cha kẹnoma kẹ irueru rẹ akpọ nana ri se djobọte ọghọ rẹ orọnvwe na kugbe irueru rọyen yẹrẹ djobọte ẹwẹn obrorhiẹn rẹ ihwo efa. Kerẹ udje, ayen  kẹnoma kẹ eta ra vwọ vwẹ ohwo jehwẹ, eta ri titi ehware, yẹrẹ eta re cha nẹrhẹ oma vo ihwo re rọvwọnre na vẹ ihwo efa. (Isẹ 26:18, 19; Luk 6:31; 10:27) Ayen je kẹnoma kẹ irueru orọnvwe ride re vwo dje oma ohwo phia, kidie ọyen “eheri rẹ akpọ na.” (1 Jọn 2:16) Wo de muegbe rẹ orọnvwe, karophiyọ nẹ Jihova guọnọre nẹ ẹdẹ rẹ oghẹresan nana dia ẹdẹ ru wọ cha karophiyọ vẹ omavwerhovwẹn, ọ dia omaemuophiyọ-ọ. *

19, 20. Die yen ọbe ọvo tare kpahen uruemu ra vwọ vwẹ iganasi rẹ udi dje ohwohwo, diesorọ Inenikristi vwobọ vwẹ uruemu nana-a?

¹⁹ Ra vwọ vwẹ iganasi rẹ udi dje ohwohwo ọyen uruemu ra mrẹ vwẹ asan re de ruẹ orọnvwe yẹrẹ echidiotọ rẹ akpọẹriọ. Ọbe re se International Handbook on Alcohol and Culture ọ rẹ 1995 tare nẹ, “Ọ sa dianẹ uruemu ra vwọ vwẹ iganasi rẹ udi dje ohwohwo . . . ọyen uruemu rẹ ọke awanre, rẹ ihwo ji ruẹ nonẹna re vwo ku udi kẹ eghẹnẹ na . . . ra vwọ yare ukẹcha rẹ eghẹnẹ womarẹ eta kerẹ ‘otọnvwe’ yẹrẹ ‘oma kpokpọ!’”

²⁰ Vwọrẹ uyota, ihwo buebun se roro nẹ ra vwọ vwẹ iganasi rẹ udi dje ohwohwo chọre-e. Ẹkẹvuọvo, e se ni uruemu ra vwọ kpare iganasi rẹ udi kpo “odjuvwu,” kerẹ uruemu rẹ ohwo vwọ yare ebruphiyọ nẹ obọ rẹ emekashe vwẹ idjerhe rẹ Ota rẹ Ọghẹnẹ rhọnvwephiyọ-ọ.​—Jọn 14:6; 16:23. *

21. Erhọ yen erẹ evo re titẹ rẹ Inenikristi cha kẹnoma kẹ, dede nẹ a vwẹ odẹ rẹ ẹga vwo se aye-en, diesorọ?

²¹ Re vwo djephia nẹ obọ rẹ Babilọn Rode yen orharhe rẹ iruemu buebun re nẹrhẹ akpọ na miovwẹn phiyọ nurhe,  ẹkuotọ evo ru orẹ rẹ kukpe kukpe yẹrẹ Mardi Gras, ri titi ovwerhẹn rẹ ọshare vẹ ọshare kugbe aye vẹ aye kugbe eha-egbe ra da banphiyọ. Ofori nẹ ‘ohwo ro vwo ẹguọnọ rẹ Jihova’ vwobọ vwẹ erẹ tiọyena yẹrẹ nughe rayen? E vwo vwobọ vwẹ erẹ tiọyena djerephia nẹ ohwo ghini vwo utuoma kpahen umwemwu? (Une Rẹ Ejiro 1:1, 2; 97:10) Ọtiọyena, ofori nẹ avwanre vwẹrokere ọbuine na rọ nẹrhovwo nẹ, “rhẹriẹ ẹro mẹ rere o vwo jẹ ogbegbemrẹ e no”!​—Une Rẹ Ejiro 119:37.

22. Ọke vọ yen Onenikristi se vwo brorhiẹn romobọ sẹ o vwobọ vwẹ orẹ yẹrẹ o ru ọtiọye-en?

²² Ọke rẹ ihwo rẹ akpọ nana de ruẹ orẹ, ofori nẹ Onenikristi kẹnoma rere iruemu rọyen vwo jẹ họhọ nẹ o vwobọ vwẹ orẹ na. Pọl siri: “Owenẹ wọ rere eyẹ wọ dare, eyẹ kemu kemu wo ruru, ru ayen ejobi vwọ kẹ urinrin rẹ Ọghẹnẹ.” (1 Kọrẹnt 10:31; ni ekpeti na  “Re Vwo Brorhiẹn rẹ Aghwanre.”) Ẹkẹvuọvo, ọ da dianẹ irueru yẹrẹ orẹ na churobọ si ẹga rẹ efia-an, oseghe rẹ usuo-on, ọ je vwọso iyono rẹ Baibol na-a, Onenikristi ọvuọvo yen che brorhiẹn sẹ o che vwobọ vwọ yẹrẹ o che ru ọtiọye-en. Dedena, o ji che roro kpahen ẹwẹn rẹ obrorhiẹn rẹ ihwo efa rere o vwo jẹ dia ukprowọ kẹ ayen.

23, 24. Mavọ yen avwanre se vwo se omamọ oseri kpahen iwan ọvwata rẹ Jihova?

²³ Ihwo buebun ni ẹdẹ rẹ erẹ nana nẹ ọyen uphẹn rẹ ayen vẹ orua rayen vwo siomakoko. Ọtiọyena, siẹrẹ ohwo de roro nẹ ojẹ rẹ avwanre re mu kpahen Baibol na gan nọ yẹrẹ o dje ẹguọnọ phia-a, avwanre sa vuẹ nẹ Iseri rẹ Jihova vwẹ ẹro ọghanghanre vwo nẹ osikoko rẹ orua kugbe ọ rẹ igbeyan ri shephiyọ. (Isẹ 11:25; Aghwoghwo 3:12, 13; 2 Kọrẹnt 9:7) Avwanre vẹ ihwo rẹ avwanre vwo ẹguọnọ  kpahen riavwerhen rẹ oyerinkugbe vwẹ ọke sansan vwẹ ukpe na, ẹkẹvuọvo, fikirẹ ẹguọnọ rẹ avwanre vwo kpahen Ọghẹnẹ vẹ iwan ọvwata rọyen, avwanre guọnọ miovwin ọke rẹ omavwerhovwẹn tiọyena womarẹ irueru ri tuoma-a.​—Ni ekpeti na “ Ẹga rẹ Uyota kẹ Ohwo Uvi rẹ Omavwerhovwẹn.”

²⁴ Iseri rẹ Jihova evo reyọ ekpọ evo rehẹ uyovwinrota 16 rẹ ọbe rẹ What Does the Bible Really Teach? * vwọ kpahenphiyọ enọ ri shekpahen erẹ nana vwọ kẹ ihwo re ghene guọnọ riẹn, erhuvwu ji no rhe. Karophiyọ nẹ ọdavwẹ rẹ avwanre ọyen e vwo sivwin ayen, ọ dia ra vwọ phraphro-o. Ọtiọyena, dje ọghọ phia, vwẹ ẹwẹn kpotọ, rere “ota rẹ ovwan dia dẹndẹn rere ota avwerhe nẹ unu rẹ ovwan rhe.”​—Kọlose 4:6.

25, 26. Mavọ yen emiọvwọn sa vwọ vwẹ ukẹcha kẹ emọ rayen vwo ru esegbuyota kugbe ẹguọnọ rayen kpahen Jihova gan?

²⁵ Kerẹ idibo rẹ Jihova, avwanre ihwo ra nabọ yono. Avwanre riẹn oboresorọ rẹ avwanre vwo vwobọ vwẹ irueru evo, a me rha kẹnoma kẹ efa. (Hibru 5:14) Ọtiọyena emiọvwọn, yono emọ wẹn obo re roro kpahen iyono rẹ Baibol. Wo de ru ọtiọyen, jẹ wọ bọn esegbuyota rayen gan, wọ je chọn ayen uko vwọ vwẹ Baibol kpahenphiyọ enọ ra nọ ayen kpahen esegbuyota rayen, wo ji dje kẹ ayen nẹ Jihova vwo ẹguọnọ rayen.​—Aizaya 48:17, 18; 1 Pita 3:15.

²⁶ Ihwo ejobi re vwẹ “[“ẹwẹn,” NW ] vẹ uyota” ga Ọghẹnẹ, kẹnoma kẹ erẹ ri nẹ Baibol na rhe-e, ayen je davwẹngba vwọ dia ihwo rẹ uyota vwẹ akpeyeren rayen. (Jọn 4:23) Nonẹna, ihwo buebun roro nẹ avwanre cha sa dia ihwo rẹ uyota-a. Ẹkẹvuọvo kirobo re che yono vwẹ uyovwinrota rọ vwọ kpahen ọnana, idjerhe rẹ Ọghẹnẹ yen me yovwin.