1, 2. Diesorọ oma vwọ vwerhen Jihova siẹrẹ ọ da mrẹ nẹ avwanre davwẹngba avwanre vwọ dia ihwo rẹ uyota? Djudje rọyen.

ONI ọvo vẹ ọmọshare rọyen nẹ evunrẹ oghwa ra da she emu ro otafe. Siẹvuọvo na, ọmọ na de mudia, vẹ oshọ vwẹ opharo rọyen. Ọ yọnrọn itọi rọ tọrọre vwẹ oghwa na. Ọ karophiyọ phi itọi na phiyotọ-ọ, yẹrẹ nọ oni rọyen sẹ ọ cha dẹ kẹ-ẹ. Vẹ omaemuophiyọ o de kperi se oni na. Oni na de jiro, ọ vẹ ọmọ na de rhivwin kpo oghwa na rere o phi itọi na phiyotọ, rere o ji yovwunu. Oborẹ ọmọ na ruru na vwerhen oni oma mamọ. Diesorọ?

² Oma vwerhen emiọvwọn mamọ siẹrẹ ayen da riẹn nẹ emọ rayen riẹn ọgharonvwẹ ra vwọ ta uyota. Ọtiọyen ọ je pha vwọ kẹ Ọsẹ rẹ avwanre rọhẹ odjuvwu, rọ dia “Ọghẹnẹ rẹ uyota.” (Une Rẹ Ejiro 31:5) Avwanre vwọ davwẹngba rere avwanre vwọ dia ihwo rẹ uyota na, ọnana nẹrhẹ oma vwerhen Ọghẹnẹ kidie oyerinkugbe rẹ avwanre vẹ ọrọyen ganphiyọ. Kidie nẹ avwanre guọnọ ru obo re vwerhen Ọghẹnẹ oma, je dia vwevunrẹ ẹguọnọ rọyen na, avwanre ke vwẹrokere Pọl rọ tare nẹ, “Avwanre . . . guọnọ ruẹ emu rẹ ọghọ vwi kemu kemu ejobi.” (Hibru 13:18) E jẹ avwanre roro kpahen ẹdia ẹne kiriguo vwẹ akpeyeren re sa nẹrhẹ ọ bẹn ọke evo ra vwọ dia ihwo rẹ uyota. Avwanre ji che roro kpahen ebruphiyọ evo ri che no rhe.

3-5. (a) Orhọ-esio vọ yen Ota rẹ Ọghẹnẹ vwọ kẹ avwanre kpahen ophiẹnvwe romobọ? (b) Die yen cha chọn avwanre uko vwo jẹ oma rẹ avwanre ẹphiẹn?

³ Obẹnbẹn rẹsosuọ, ọyen uruemu ra vwọ phiẹn omobọ. Kerẹ ihworakpọ ri jẹgba, avwanre fobọ she ufi rẹ ophiẹnvwe romobọ. Kerẹ udje, Jesu vuẹ Inenikristi rehẹ Laodisia nẹ ayen phiẹn oma rayen rẹ ayen vwo roro nẹ ayen feri, jẹ vwọrẹ uyota, ayen “ovwiogbere . . . , orhuẹro, rọ ban phihọ” vwọrẹ ẹwẹn. Ẹdia rẹ ayen hepha na brare mamọ. (Ẹvwọphia 3:17) Ophiẹnvwe romobọ nana nẹrhẹ ẹdia rẹ ayen hepha na vọn vẹ imuoshọ.

⁴ Wọ je sa karophiyọ nẹ odibo Jems si avwanre orhọ: “Ọ da dianẹ ohwo rori nẹ ọye ọgba rẹ egagọ, rọ sẹro rẹ ẹrevwe rọye-e, ẹkẹvuọvo rọ da phiẹn udu rọye, yẹ egagọ rẹ ohwo yena ofefe.” (Jems 1:26) Avwanre de roro nẹ avwanre sa vwẹ ẹrenvwe avwanre vwo ruiruo vwẹ idjerhe ro shephiyọ-ọ, je ga Jihova vẹ ẹwẹn nẹ o che rhiabọreyọ ẹga rẹ avwanre, jẹ avwanre phiẹn oma avwanre. Ẹga avwanre cha dia ofefe. Die yen sa sẹro rẹ avwanre vwo nẹ imuoshọ nana?

⁵ Vwẹ awọreta yena, Jems reyọ uyota rẹ Ota rẹ Ọghẹnẹ vwo dje ughegbe. Ọ vwẹ uchebro kẹ avwanre nẹ e se Ota rẹ Ọghẹnẹ rere a reyọ vwọ kpọ oma avwanre vi. (Se Jems 1:23-25.) Baibol na sa vwẹ ukẹcha kẹ avwanre vwọ fuẹrẹn oma avwanre ni, rere a mrẹ asan re de se ru yovwinphiyọ. (Uvwerhe 3:40; Hegae 1:5) Avwanre je sa nẹrhovwo rhe Jihova nẹ ọ fuẹrẹn avwanre ni, ọ je chọn avwanre uko vwọ riẹn asan avwanre de ru chọ, rere avwanre sa kpọvi. (Une Rẹ Ejiro 139:23, 24) Ophiẹnvwe ọyen ovwiẹrẹ ra fobọ nẹ sua-a, ọtiọyena ẹro rẹ Ọsẹ rẹ avwanre rọhẹ odjuvwu vwo no, ọyen ofori nẹ avwanre ji vwo no. Isẹ 3:32 da ta: “Ohwo ọchọchọ ẹgua kẹ Ọrovwohwo oma, ẹkẹvuọvo ọ vwẹ ẹro sua ohwo rọ dia ọvwata.” Jihova sa chọn avwanre uko vwo roro kirobo ro roro, ji ni oma rẹ avwanre kirobo  ro nẹ avwanre. Karophiyọ nẹ Pọl tare nẹ, “Avwanre . . . guọnọ ruẹ emu rẹ ọghọ.” Avwanre cha sa dia ihwo re gbare asaọkiephana-a, ẹkẹvuọvo avwanre guọnọ davwẹngba vwọ dia ihwo rẹ uyota.

6. Diesorọ ihwo re rọvwọnre vwọ ta uyota kẹ ohwohwo, imuoshọ vọ yen ọyena nẹrhẹ ayen kẹnoma kẹ?

⁶ Ofori nẹ uruemu ra vwọ ta uyota dia obo re vwo vughe orua rẹ Onenikristi. Ọtiọyena, ọshare vẹ aye rhievun kẹ ohwohwo. O vwo ọke vuọvo vwevunrẹ orọnvwe rẹ Onenikristi ra vwọ rhọnvwephiyọ uruemu ra vwọ frẹfrẹ-ẹ, re vwo mu ugbeyan rẹ odjahọn vwẹ intanẹti yẹrẹ ni ihoho rẹ ihwo re banphiyọ vwẹ kidjerhe kidjerhe-e. Inenikristi evo vwobọ vwẹ oka rẹ uruemu ọchọchọ nana, ayen je djahọn vwọ kẹ ọrivẹ rẹ orọnvwe rayen. Ohwo ro ru ọtiọyen, dia ohwo rẹ uyota-a. Jokaphiyọ eta rẹ Ovie Devid rọ dia ohwo rẹ uyota: “Mi tidia kugbe ihwo ogbarogba-a, eyẹ me vẹ ihwo rẹ okpetu kuoma gbe-e.” (Une Rẹ Ejiro 26:4) Wọ da dia ohwo rọ rọvwọnre, wo vwobọ vwẹ uruemu rọ sa nẹrhẹ wo si oka rẹ ohwo ru vwọ hepha nu kẹ ọrivẹ wẹ-ẹn!

7, 8. Idje rẹ Baibol vọ yen cha chọn emọ uko vwo yono obo rọ ghanre te ra vwọ dia ohwo rẹ uyota?

⁷ Ọyen emu rẹ aghwanre rẹ emiọvwọn vwọ reyọ idje rẹ ihwo rehẹ Baibol vwo yono emọ rayen oborẹ ayen vwọ ta uyota. A mrẹ ikuegbe rẹ ihwo ri  gun efian kerẹ Ekan ro cho uji, ọ da je davwẹngba ro vwo rhurhu uji ro chori na; Gehazi ro gun efian fikirẹ igho; kugbe Judas ro cho uji, ọ da je shẹ Jesu.​—Joshua 6:17-19; 7:11-25; 2 Ivie 5:14-16, 20-27; Matiu 26:14, 15; Jọn 12:6.

⁸ A je mrẹ ikuegbe rẹ ihwo re ta uyota kerẹ Jekọp rọ vuẹ emọ rọyen nẹ ayen reyọ igho rẹ ayen mrẹre vwẹ ekpu rayen rhivwin, kidie o rorori nẹ echobọ yen ihwo na vwo phi igho na phiyọ ekpu rayen; ọ rẹ Jẹfta vẹ ọmọtẹ rọyen, ro ru nene ive rẹ ọsẹ rọyen dede nẹ uphẹn evo va rọ abọ; kugbe ọ rẹ Jesu ro fiudugberi dje oma rọyen kẹ ihwo re guọnọ hwe rere aroẹmrẹ rẹ Baibol na se vwo rugba, je chochọ rẹ igbeyan rọyen. (Jẹnẹsis 43:12; Iguẹdjo 11:30-40; Jọn 18:3-11) Enana idje evo rehẹ Ota rẹ Ọghẹnẹ re sa chọn emiọvwọn uko vwo yono emọ rayen oborẹ ayen sa vwọ dia ihwo rẹ uyota.

9. Die yen emiọvwọn kẹnoma kẹ siẹrẹ ayen da guọnọ dje omamọ rẹ udje a vwọ ta uyota kẹ emọ rayen, diesorọ udje tiọyena vwọ ghanre?

⁹ Emiọvwọn vwo oghwa rẹ ayen vwo yono emọ rayen uyono ọghanghanre nana. Ọyinkọn Pọl da nọ: “Wẹ ro yono ihwo efa na, wo gbi rhe yono oma wẹn? Wẹ ro ghwoghwo nẹ e cho uji-i, ku wọ rhoma cho uji?” (Rom 2:21) Emiọvwọn evo tighi ẹwẹn rẹ emọ rayen, kidie ayen yono emọ na nẹ ayen gun efia-an, jẹ emiọvwọn na komobọ gun efian. Ayen de cho uji yẹrẹ gun efian, ayen ki brẹ kẹ oma rayen rẹ ayen vwọ tanẹ “Ihwo ri vwo erọnvwọn na riẹnre nẹ ihwo efa cha reyọ ayen” yẹrẹ “Ọyena omofian, ọ chọre-e.” Vwọrẹ uyota, o vwo efian yẹrẹ ujiecho rọ hanvwere-e. * (Se Luk 16:10.) Emọ fobọ vughe omeru, ọnana sa nẹrhẹ ọ bẹn rẹ ayen vwọ dia ihwo rẹ uyota. (Ẹfesọs 6:4) Ẹkẹvuọvo, siẹrẹ ayen de yono obo ra ta uyota vwo nẹ udje  rẹ esẹ vẹ ini rayen, ayen sa rhe dia ihwo re vwẹ urinrin kẹ Jihova vwevunrẹ akpọ nana re de jẹ uyota ẹta na.​—Isẹ 22:6.

10. Siẹrẹ avwanre vẹ iniọvo de gbikun, die ofori nẹ avwanre kọnphiyọ ẹwẹn?

¹⁰ Ra vwọ vwẹ iniọvo rehẹ evunrẹ ukoko na mu ugbeyan, kẹ avwanre uphẹn buebun re vwo yono uruemu ra vwọ dia ohwo rẹ uyota. Kirobo rẹ avwanre yonori vwẹ Uyovwinrota 12, ofori nẹ avwanre jomaotọ kpahen oborẹ avwanre reyọ okẹ rẹ ota vwo ruiruo ma rho vwẹ uvwre rẹ iniọvo avwanre. Ikuegbe ghevweghe se hirhephiyọ iguegun re vwo miovwo ohwo! Siẹrẹ avwanre de gbikun ra riẹn otọ rọye-en, ọyena sa nẹrhẹ avwanre hra efian, ọtiọyena ofori nẹ avwanre sẹro rẹ ẹrenvwe avwanre. (Isẹ 10:19) Vwẹ ẹbẹre ochekọ, avwanre sa riẹn uyota rẹ ota, jẹ ọ dia o vwo mudiaphiyọ nẹ a reyọ vwọba ikun gbe-e. Kerẹ udje, ọ sa dianẹ ota na te avwanre-e, yẹrẹ a vwọ ta ota kpahọn dje uruemu esiri phia-a. (1 Tẹsalonaika 4:11) Ihwo evo de yinvwaro kpahen ihwo efa nu, ayen me tanẹ uyota yen ayen ta, ẹkẹvuọvo ofori nẹ eta rẹ avwanre dia dẹndẹn vẹ avwerhen ọkieje.​—Se Kọlose 4:6.

11, 12. (a) Idjerhe vọ yen ihwo evo ri ru umwemwu vwọ nẹrhẹ umwemwu na ganphiyọ? (b) Efian vọ yen Eshu guẹn kpahen umwemwu, mavọ avwanre sa vwọ họnre vwọsuọ? (c) Mavọ avwanre se vwo djephia nẹ avwanre fuevun kẹ ukoko rẹ Jihova?

 ¹¹ Ra vwọ ta uyota kẹ ekpako rẹ ukoko na ọyen obo re ghanre mamọ. Iniọvo evo ri ru umwemwu nẹrhẹ umwemwu na ganphiyọ rẹ ayen vwo si umwemwu na nu, ekpako na da nọ ayen kpahọn, ayen mi gun efian. Iniọvo tiọyena ki me ruẹ nẹ ayen ga Jihova, jẹ ayen yeren akpọ rẹ umwemwu vwẹ odjahọn. Ọtiọyena, oka rẹ uruemu nana nẹrhẹ idjerhe rẹ akpeyeren rẹ ohwo na eje dia efian. (Une Rẹ Ejiro 12:2) Vwọ kẹ iniọvo efa, ayen vuẹ ekpako na ẹbẹre ọvo rẹ uyota na, ẹkẹvuọvo, ayen mi rhe si ẹbẹre rọ ma ghanre nu kẹ ekpako na. (Iruo Rẹ Iyinkọn Na 5:1-11) Oka rẹ efian nana obọ rẹ Eshu ọyen o nẹ cha.​—Ni ekpeti na “ Efian rẹ Eshu Gun Kpahen Umwemwu.”

¹² O ji fo nẹ avwanre fuevun kẹ ukoko rẹ Jihova siẹrẹ avwanre de si evuẹ vwo rhe ayen. Kerẹ udje, avwanre jomaotọ e vwo jẹ efian eguon siẹrẹ avwanre da nẹ iyẹnrẹn rẹ iruo rẹ Uvie rẹ avwanre. Ọtiọyen ọ je hepha, siẹrẹ avwanre de fili rẹ ifomu ri shekpahen uphẹn rẹ ẹga, avwanre gun efian kpahen ẹdia rẹ omakpokpọ avwanre-e, yẹrẹ ẹdia efa ri shekpahen avwanre-e.​—Se Isẹ 6:16-19.

13. Mavọ yen avwanre sa vwọ dia ihwo rẹ uyota siẹrẹ avwanre vẹ oniọvo ọfa da chueki yẹrẹ ruiruo kugbe?

¹³ Ra vwọ dia ohwo rẹ uyota vwevunrẹ ukoko na ji churobọ si ekiẹchuọ. Ọke evo, iniọvo sa chueki kugbe. Ayen jomaotọ rere ekiẹchuọ rayen na vwo jẹ gbowọphiyọ ẹga rayen vwevunrẹ Ọguan Ruvie yẹrẹ vwẹ aghwoghwo na. Ọ sa dianẹ ohwo ọvo ọga ọ rẹ ochekọ ke rha ọwiowian. Ọ da dianẹ iniọvo kọyen wian kẹ avwanre, ofori nẹ avwanre fuevun kẹ ayen womarẹ a vwọ hwosa kẹ ayen vwẹ ọke ro fori, hwa uchunu ra rhọnvwephiyọ, je kẹ ayen erere ro fori nẹ a ke ayen. (1 Timoti 5:18; Jems 5:1-4) Ọ da rha dianẹ  avwanre kọyen oniọvo reyọ phiyọ iruo, ofori nẹ avwanre wian ẹkẹn rẹ iruo ra ghare kẹ avwanre. (2 Tẹsalonaika 3:10) Avwanre rhe roro nẹ kiridie avwanre iniọvo, ke che ruẹse rẹ oghẹresan kẹ avwanre yẹrẹ vwẹ ọke kẹ avwanre vwo ronvwoma-a.​—Ẹfesọs 6:5-8.

14. Siẹrẹ Inenikristi da chueki kugbe, emu rẹ aghwanre vọ yen ofori nẹ ayen ru, diesorọ?

¹⁴ Ọ da rha dianẹ ihwo ivẹ kọyen toro igho yẹrẹ momo igho vwọ chueki kugbe vwo? Baibol na vwẹ uyono ọvo rọ pha ghanghanre vwọphia: Si emu ejobi phiyotọ! Kerẹ udje, ọke rẹ Jerimaya vwọ dẹ otọ, o ru ọbe rọ vwọ dẹ otọ na vẹ iseri re ghwobọphiyọ ọbe na, ọ da nabọ sẹro rọyen fikirẹ ọkiọfa. (Jerimaya 32:9-12; ji ni Jẹnẹsis 23:16-20.) Siẹrẹ Inenikristi da chueki kugbe, re vwo si emu ejobi phiyotọ, ghwobọphiyọ, ji vwo iseri, ọ dia o mudiaphiyọ nẹ avwanre vwẹroso iniọvo rẹ avwanre-e. Ukperẹ ọtiọyen, ọ cha nẹrhẹ a kẹnoma kẹ jẹ ẹruọ rẹ ohwohwo evwo, re vwo ku ohwo phiyotọ, vẹ ẹghwọ rọ sa so eghrẹn. Inenikristi ri chueki kugbe karophiyọ nẹ o vwo eki vuọvo rọ ghanre te asan rọ da guọghọ oyerinkugbe vẹ ufuoma rọhẹ ukoko na-a. *​—1 Kọrẹnt 6:1-8.

15. Ẹro vọ yen Jihova vwo ni ekiẹchuọ rẹ ọghware, ẹro vọ yen Inenikristi vwo no?

¹⁵ Ọ dia vwevunrẹ ukoko na ọvo yen a da guọnọ nẹ Inenikristi dia ihwo rẹ uyota-a. Ọyinkọn Pọl da ta: “Avwanre . . . guọnọ ruẹ emu rẹ ọghọ vwi kemu kemu ejobi.” (Hibru 13:18) Ọmemama rẹ avwanre guọnọre nẹ avwanre dia ihwo rẹ uyota ọke rẹ avwanre de nene ihwo rẹ akpọ nana chueki kuẹgbe. Vwevunrẹ ọbe rẹ Isẹ, e djunute ovwanvwen rẹ efian abọ buebun. (Isẹ 11:1; 20:10, 23) Vwẹ ọke  awanre, ovwanvwen kugbe uwan yen a vwọ wian siẹrẹ a da chueki rere a sa vwọ vwanvwen obo ra dẹ re vẹ osa ra cha hwa. Ineki re ghwa ihwo ria reyọ ovwanvwen ivẹ vwọ shẹ emu, ovwanvwen ọvo ọyen ọ rẹ ayen vwọ ghwa ihwo ria. * Jihova vwo utuoma kpahen oka rẹ uruemu tiọyena! Rere a sa vwọ dia vwevunrẹ ẹguọnọ rẹ Ọghẹnẹ, ofori nẹ avwanre kẹnoma kẹ koka koka rẹ ekiẹchuọ rẹ ọghware.

16, 17. Oka rẹ iruemu efian vọ yen vọn akpọ na nonẹna, die yen Inenikristi rẹ uyota brorhiẹn rẹ ayen vwo ru?

¹⁶ Kidie nẹ Eshu yen osun rẹ akpọ nana, o rhe gbe avwanre unu siẹrẹ a da mrẹ ihwo ri gun efian re vọn asan eje-e. Ọ sa dianẹ kẹdẹ kẹdẹ yen avwanre vwo hirharokuẹ ọdavwini rẹ avwanre vwo gun efian. Siẹrẹ ihwo de si evuẹ phiyotọ kpahen oka rẹ iruo rẹ ayen se ru ọke rẹ ayen da guọnọ iruo, ayen gun efian. Ihwo je reyọ evuẹ rẹ efian vwọphia ọke rẹ ayen de fili rẹ ifọmu re vwo kpo ẹkuotọ ọfa, ọ rẹ osa uyovwin vẹ efa tiọyena rere oborẹ ayen guọnọ se vwo te ayen obọ. Buebun rẹ emọ ri kpo isikuru vwobọ vwẹ ọghware vwẹ edavwini, yẹrẹ ayen de si iyẹnrẹn vwọ kẹ isikuru na, ayen mi kpo Intanẹti ra guọnọ evuẹ rẹ ihwo efa, ayen me reyọ vwọphia kerẹ evuẹ rẹ obọ rayen. Siẹrẹ ihwo de nene ihwo rehẹ akọn rẹ iruo rẹ igọmẹti re dia ihwo rẹ uyota-a, ayen ke judi rere obọ rẹ ayen guọnọ se vwo te ayen obọ. Avwanre rhẹro rẹ oka rẹ uruemu nana vwevunrẹ akpọ rẹ ihwo buebun da “guọnọ omaobọ rẹ ayen nọ, . . . guọnọ igho nọ, . . . tuoma rẹ emu esiri.”​—2 Timoti 3:1-5.

¹⁷ Inenikristi rẹ uyota brorhiẹn rẹ ayen vwo jẹ obọ evwo vwẹ oka rẹ iruemu tiọyena. Oboresorọ rọ vwọ dia bẹnbẹn a vwọ dia ohwo rẹ uyota vwẹ akpọ nana vwẹ ọke ọvo kọ na, ọhọhọre nẹ ihwo ri gun efian na yen o me yovwẹn  kẹ. (Une Rẹ Ejiro 73:1-8) Ẹkẹvuọvo, Inenikristi se jẹ igho evwo kidie nẹ ayen guọnọ dia ihwo rẹ uyota vwẹ “kemu kemu ejobi.” O ghini fo nẹ a dia ohwo rẹ uyota? E! Diesorọ? Ebruphiyọ vọ yen herọ siẹrẹ avwanre da dia ihwo rẹ uyota?

18. Diesorọ uruemu a vwọ dia ohwo rẹ uyota vwọ ghanre mamọ?

¹⁸ Erọnvwọn re ghanre vrẹ a vwọ dia ohwo rẹ uyota yẹrẹ ohwo ra sa vwẹroso vwẹ akpọ nana ghwe bu-un. (Ni ekpeti na “ Mẹvwẹ Ohwo rẹ Uyota?”) Kohwo kohwo se vwo uruemu nana! Ọ dia ona, efe, erhuvwu, yẹrẹ asan re nurhe yen a guọnọre tavwen a ke sa dia ohwo rẹ uyota-a. Dedena, buebun rẹ ihwo vwo omamọ rẹ uruemu nana-a. A fobọ mrẹ-ẹ. (Maika 7:2) Ihwo evo sa vwẹ owẹ jehwẹ kidie nẹ wọ ta uyota, ẹkẹvuọvo ihwo efa che dje ọdavwaro phia kẹ wẹ, muọghọ kẹ wẹ, je vwẹroso wẹ. Buebun rẹ Iseri rẹ Jihova tobọ mrẹ erere rẹ igho kidie nẹ ayen dia ihwo rẹ uyota. Ọke ra da djẹ ihwo ri gun efian nẹ iruo, a djẹ aye-en, kidie ayen ihwo rẹ uyota, ayen je mrẹ iruo siẹrẹ a da guọnọ ihwo rẹ uyota re che phi phiyọ iruo.

19. Mavọ yen uruemu a vwọ dia ohwo rẹ uyota se djobọte ẹwẹn obrorhiẹn rẹ avwanre, kugbe oyerinkugbe avwanre vẹ ọ rẹ Jihova?

¹⁹ Owenẹ ọ phia kẹ wẹ re yẹrẹ ọ je phia kẹ wẹ-ẹ, wọ cha mrẹvughe nẹ ra vwọ dia ohwo rẹ uyota hwarhiẹ erere rode cha. Wo che vwo ẹwẹn obrorhiẹn ro fiotọ. Pọl siri nẹ, “O mu avwanre ẹro nẹ evun rẹ avwanre pha phẹphẹ.” (Hibru 13:18) Kpobarophiyọ, Ọsẹ rẹ avwanre rọhẹ odjuvwu vwo oniso rẹ omamọ uruemu wẹn na, o ji vwo ẹguọnọ rẹ ihwo re ta uyota. (Se Une Rẹ Ejiro 15:1, 2; Isẹ 22:1.) A vwọ dia ohwo rẹ uyota chọn avwanre uko vwọ dia vwevunrẹ ẹguọnọ rẹ Ọghẹnẹ, ọyen osa rọ ma rho ro se te avwanre obọ. E jẹ avwanre roro kpahen uyovwinrota ọfa ro churobọ si ọnana: Ẹro rẹ Jihova vwo ni iruo.