Erọnvwọn ra rhẹ nẹ ẹbẹre ẹne rẹ ọbara rhe. A rhẹ erọnvwọn efa vwo nẹ ẹbẹre ẹne ra ghare ọbara phiyọ re dia red cells, white cells, platelets, kugbe plasma rhe. Kerẹ udje, vwevunrẹ red cells yen a da mrẹ obo re se hemoglobin. A vwẹ erọnvwọn re si nẹ hemoglobin rẹ ohworakpọ yẹrẹ eranvwe vwo sivwin ihwo ri vwo ọbara-a.

A da ghare Plasma phiyọ ẹbẹre 100, ẹbẹre 90 rọyen ame, plasma vwo erọnvwọn efa kerẹ hormones, inorganic salts, enzymes, nutrients, minerals kugbe sugar. Plasma ji vwo ame rọ họnra vwọsua ọga, erọnvwọn efa re dobọ rẹ ọbara ro hwẹ ji, kugbe albumin. Oka rẹ ọga ọvo de mu ohwo, idọktọ sa tanẹ e duvwun ohwo na egbede rẹ gamma globulin, ra rhẹ nẹ plasma rẹ ohwo ọfa rhe. A sa reyọ erọnvwọn kerẹ interferons vẹ interleukins vwo nẹ White blood cells rhe, vwo sivwin ikansa vẹ ega efa.

Ofori nẹ Inenikristi rhiabọreyọ ena rẹ omaesivwo ri churobọ si erọnvwọn ra rhẹ nẹ ẹbẹre ẹne rẹ ọbara rhe? Baibol na ghwe dje obo re ru vwẹ ẹdia nana-a, ọtiọyena, ohwo ọvuọvo yen che brorhiẹn nana. Ihwo evo sa sen erọnvwọn ra rhẹ nẹ ẹbẹre ẹne rẹ ọbara rhe kiridie Urhi rẹ Ọghẹnẹ vwọ kẹ ihwo rẹ Izrẹl tare nẹ ayen ria ọbara-a, ayen “kuo phihọ otọ.” (Urhi Rivẹ 12:22-24) Ihwo efa sa sen nẹ ayen che se ọbara yẹrẹ ẹbẹre  ẹne ra ghare ọbara ra phiyọ oma-a, ẹkẹvuọvo, ayen se rhiabọreyọ omaesivwo ro churobọ si erọnvwọn ra rhẹ nẹ ẹbẹre ẹne rẹ ọbara rhe. Ayen se roro nẹ o vwo asan ra cha rhẹ ọbara te, o rhe che mudiaphiyọ arhọ rẹ ohwo yẹrẹ eranvwe na ọfa-a.

Ọke wo de che brorhiẹn sẹ wọ cha reyọ erọnvwọn ra rhẹ nẹ ẹbẹre ẹne rẹ ọbara na yẹrẹ wọ cha reyọ-ọ, roro kpahen enọ nana: Me riẹnre nẹ me da sen erọnvwọn ra rhẹ nẹ ẹbẹre ẹne rẹ ọbara rhe, ọyena mudiaphiyọ nẹ me cha reyọ ihuvwun ra vwẹ erọnvwọn tiọyena vwo ru re se vwo sivwin ega evo-o, yẹrẹ re sa dobọ rẹ ọbara ro hwẹ ji? Mi se djefiotọ kẹ idọktọ oboresorọ me vwọ sen yẹrẹ rhiabọreyọ erọnvwọn evo ra rhẹ nẹ ọbara rhe?

Ena rẹ ebabẹrẹ. Enana churobọ si hemodilution kugbe cell salvage. Vwẹ hemodilution, a kpọ ọbara na nẹ oma rẹ ohwo ra cha bẹre na kpo asan ọfa, e mi phi ihuvwun rọ nẹrhẹ ọbara buẹn phiyọ oma rẹ ohwo na, a da bẹre ohwo na nu, a me kpọ ọbara na rhivwin phiyọ oma na. Vwẹ cell salvage, a sẹro rẹ ọbara ro hwẹ ọke ra da bẹrẹ ohwo na, a me rhoma se ọbara na phiyọ oma na siẹrẹ a da bẹre ohwo na nu. A hworhẹ ọbara ro hwẹ nẹ oma na ọke rẹ ohwo da kuonma, a me rhoma se phiyọ oma rẹ ohwo na. Kidie nẹ oborẹ idọktọ sansan vwẹ ena nana vwo sivwin ohwo fẹnẹre, ofori nẹ Onenikristi riẹn oborẹ idọktọ rọ cha bẹrẹ na che ruo wan.

Wo de che brorhiẹn kpahen ena rẹ omaesivwo nana, nọ oma wẹn: ‘Ọ da dianẹ e che se ọbara mẹ nẹ oma mẹ phiyọ  asan ọfa, ẹwẹn obrorhiẹn mẹ je cha rhọnvwe nẹ mi ni ọbara na kerẹ ẹbẹre ọvo rẹ oma mẹ, ọtiọyena mi rhe che “kuo phihọ” otọ-ọ? (Urhi Rivẹ 12:23, 24) A da bẹre ovwẹ, ẹwẹn rẹ obrorhiẹn mẹ re me vwẹ Baibol na yono che kpokpo uvwe siẹrẹ e de se ọbara me nẹ oma mẹ, a da vwẹ ihuvwun evo gua nu, a me rhoma se phiyọ oma mẹ? Me riẹnre nẹ siẹrẹ me da sen ona rẹ  omaesivwo eje ri churobọ si ọbara mẹ, kọyen me tanẹ a davwen ọbara mẹ-ẹ, me je sen hemodialysis?’

Onenikristi yen che brorhiẹn komobọ kpahen obo rọ guọnọre nẹ a vwẹ ọbara rọyen vwo ruiruo siẹrẹ a da guọnọ sivwon. Ọtiọyen je te ra vwọ davwen ọbara nẹ kugbe ona rẹ omaesivwo ro churobọ si e vwo se emerha rẹ ọbara ohwo, a me vwẹ ihuvwun vwọ gua, a me rhoma se phiyọ oma na.