Iniọvo Eghanghanre ri Vwo Ẹguọnọ rẹ Jihova:

Jesu tare nẹ “ovwan ke riẹn uyota na, uyota na ko ru ovwan phihọ ọmuvwiẹ.” (Jọn 8:32) Eta yena phiuduphiyọ avwanre awọ! E, vwẹ “oba rẹ ẹdẹ” nana re pha brabra na, rọ je vọn vẹ efian na, a sa riẹn uyota na. (2 Timoti 3:⁠1) Wọ karophiyọ obọ rẹsosuọ re vwo dje uyota na kẹ wẹ vwo nẹ Baibol na rhe? Oma vwerhen owẹ mamọ!

Ẹkẹvuọvo, kirobo rọ ghanre te re vwo vwo erianriẹn ọgbagba rẹ uyota na, je vuẹ ihwo efa kpahọn, ọtiọyen ọ je ghanre te ra vwọ vwẹ uruemu djephia nẹ avwanre yerẹn nene uyota na. E se vwo ru ọyena, ofori nẹ avwanre sẹro rẹ oma rẹ avwanre vwevunrẹ ẹguọnọ rẹ Ọghẹnẹ. Die yen ọnana churobọ si? Eta rẹ Jesu vuẹ idibo rọyen vwẹ ason o ki rhi ghwu kpahenphiyọ onọ na. Ọ da vuẹ idibo rọyen ri fuevun: “Ovwan da sẹro rẹ irhi mẹ, ovwan ke je dia vwẹ evun rẹ ẹguọnọ mẹ, kirobo re me sẹro rẹ irhi rẹ Ọsẹ mẹ re me da dia vwẹ ẹguọnọ rọye.”​​—⁠Jọn 15:⁠10.

Jokaphiyọ nẹ Jesu diarọ vwevunrẹ ẹguọnọ rẹ Ọghẹnẹ kidie ọ yọnrọn irhi rẹ Ọsẹ rọyen. Ọtiọyen o ji fo nẹ ọ dia kẹ avwanre nonẹna. Ra vwọ dia vwevunrẹ ẹguọnọ rẹ Ọghẹnẹ, ofori nẹ avwanre yerin nene uyota na kẹdẹ kẹdẹ vwẹ akpeyeren rẹ avwanre. Vwẹ ason vuọvo yena, Jesu da ta: “Ovwan da riẹn imu nana, ebruba kẹ ovwan rẹ ovwan de ru ayen.”​​—⁠Jọn 13:⁠17.

O mu avwanre ẹro nẹ ọbe nana cha vwẹ ukẹcha kẹ wẹ vwo yerin nene uyota na vwẹ akeyeren ri kẹdẹ kẹdẹ wẹn rere wọ vwọ sẹro rẹ oma wẹn “vwẹ evun rẹ ẹguọnọ rẹ Ọghẹnẹ” rere wo se vwo vwo “arhọ rọye ri bẹdẹ na.”​​—⁠Jude 21.