Ọ da ohwo mamọ siẹrẹ a da djẹ ugbeyan yẹrẹ ohwo rẹ orua rẹ avwanre nẹ ukoko fikirẹ umwemwu rọ rhọnvwe siobọnu-u. Uruemu rẹ avwanre kpahen odjekẹ rẹ Baibol vwẹ ota nana, yen che dje oborẹ ẹguọnọ rẹ avwanre vwọ kẹ Ọghẹnẹ vẹ evun-ẹfuọn vwọ kẹ ọrhuẹrẹphiyotọ rọyen gan te. * Roro kpahen enọ evo ri shekpahen ota nana.

Mavọ yen avwanre nene ohwo ra djẹ nẹ ukoko yerin? Baibol na da ta: “We kuoma gbe ohwo ọvuọvo rọ re odẹ rẹ oniọvo kakaka-a rọ da reabe rẹ ọfanrhiẹ egbe eyẹ ọvwurhuru, eyẹ rọ dia ọgọẹdjọ, ọharhekan, ọgbaidi, eyẹ oji​—wọ vẹ ohwo ọtiọye ria emu kuẹgbe-e.” (1 Kọrẹnt 5:11) Vwọ kpahen ohwo rọ rhọnvwe dia “evun rẹ uyono rẹ Kristi na-a,” Baibol na si avwanre orhọ nẹ “wọ reyọ phihọ uwevwi-i eyẹ wo yere-e; kidie ohwo ro yeire yọ vẹ ọye obọ vwẹ iruo rẹ uvumwemwu rọye.” (2 Jọn 9-11) Avwanre nene ihwo ra djẹ nẹ ukoko ta ota rẹ ẹga kuẹgbe yẹrẹ vwẹ ayen mu igbeya-an. Uwevwin Orhẹrẹ rẹ September 15, 1981, aruọbe 25 ọ rẹ Oyibo, tare nẹ, “Uyeren na, ‘Mavọ,’ ọyen owọẹjẹ rẹsosuọ ro suẹn kpo ikuegbe vẹ ohwo ra djẹ nẹ ukoko yẹrẹ rọ nẹrhẹ a reyọ vwo mu ugbeyan. Avwanre guọnọ jẹ owọ rẹsosuọ yena vẹ ohwo ra djẹ nẹ ukoko?”

Ofori nẹ a kẹnoma kẹ ohwo ra djẹre na kare kare? E, fikirẹ iroro evo. Ọrẹsosuọ, ọyena odjephia nẹ avwanre fuevun kẹ Ọghẹnẹ vẹ Ota rọyen. Ọ dia ọke ro de shephiyọ kẹ avwanre ọvo yen avwanre vwọ kerhọ rẹ Jihova-a, ẹkẹvuọvo ọ da tobọ dianẹ ọ je pha bẹnbẹn. Ẹguọnọ rẹ avwanre vwọ kẹ Ọghẹnẹ yen mu avwanre vwọ kerhọ rẹ iji rọyen, ọyen nẹrhẹ avwanre riẹn nẹ Ọghẹnẹ ohwo ọsoso vẹ ẹguọnọ, ẹguọnọ na yen je nẹrhẹ avwanre riẹn nẹ irhi rọyen fi erere kẹ avwanre. (Aizaya 48:17; 1 Jọn 5:3) Ọrivẹ, a vwọ kẹnoma kẹ orumwemwu rọ rhọnvwe kurhẹriẹ-ẹ, sẹro rẹ avwanre vwo nẹ obo ri  che miovwin ẹga vẹ uruemu rẹ avwanre, ọnana nẹrhẹ ukoko na dia fuanfon. (1 Kọrẹnt 5:6, 7) Ọrerha, ohwo ra djẹre na sa mrẹ erere kiridie nẹ avwanre yan nene iyono rẹ Baibol na. Siẹrẹ avwanre da yan nene orhiẹn rẹ ekpako na, o se djobọte ubiudu rẹ orumwemwu rọ rhọnvwe rhiabọreyọ ukẹcha rẹ ekpako na-a. Ọke rẹ ugbeyan rẹ avwanre vẹ ọ rẹ ohwo na da fan, ọnana sa nẹrhẹ “iroro . . . bro rhe,” ọ da mrẹ oborẹ umwemwu rọyen gan te, je jẹ owọ ro vwo rhivwin bru Jihova rhe.​—Luk 15:17.

Ọ da rha dia ohwo rẹ orua rẹ avwanre yen a djẹre vwo? Ọnana sa dia egbabọse rẹ orua na vwọ fuevun kẹ Jihova. Mavọ yen e nene ohwo rẹ orua ra djẹ nẹ ukoko yerin? E che ghwe se djunute ẹdia eje ri shekpahen ohwo rẹ orua ra djẹre vwevunrẹ ọbe nana-a, ẹkẹvuọvo a cha ta ota kpahen ẹdia ivẹ kiriguo.

Ọke ọvo, ohwo ra djẹre na ji nene orua na dia. Rọ vwọ dianẹ ẹdjẹ ra djẹ ohwo na mudiaphiyọ nẹ oyerinkugbe rọyen vẹ ọ rẹ orua rọyen vwoba na-a, ọtiọyena o se vwobọ vwẹ irueru rẹ kẹdẹ kẹdẹ vwevunrẹ uwevwin na. Ẹkẹvuọvo, uphẹn rẹ ohwo na vẹ orua rọyen vwọ ga Ọghẹnẹ kugbe va rọ obọ. Ọtiọyena, ihwo rẹ orua na re fuevun kẹ Jihova rha cha rhọnvwe nẹ ohwo na vẹ ayen ga Jihova kugbe-e. Kerẹ udje, ohwo ra djẹre na da herọ ọke rẹ orua na de che ru ẹga rẹ orua, o che vwobọ vwẹ uyono na-a. Ẹkẹvuọvo ohwo na da dia omotete, oni vẹ ọsẹ rọyen vwo oghwa rẹ ayen vwo yono, je vwẹ ọghwọku vwọ kẹ. Fikirẹ ọtiọyena, emiọvwọn ri vwo ẹguọnọ sa vwẹ uyono rẹ Baibol vwo mu vwọ kẹ ọmọ tiọyena. *​—Isẹ 6:20-22; 29:17.

Vwẹ ẹdia efa, ọ sa dianẹ ohwo ra djẹre na dia uwevwin romobọ rọyen. Ọkiọvo, e se nene ohwo na ta eta ri shekpahen orua na, ẹkẹvuọvo, ofori nẹ e si obọ rẹ oyerinkugbe tiọyena kpotọ mamọ. Inenikristi ri fuevun cha guọnọ asan rẹ ayen  gun phiyọ rere ayen se vwo nene ohwo rẹ orua ra djẹre na ru kugbe-e. Ukperẹ ọtiọyen, evun-ẹfuọn rayen kẹ Jihova vẹ ukoko rọyen che mu ayen vwọ yan nene ọrhuẹrẹphiyotọ rẹ Baibol na kpahen ohwo ra djẹre. Evun-ẹfuọn rayen na, ọyen ukẹcha kẹ ohwo ra djẹre na, ọ sa tobọ nẹrhẹ ohwo na mrẹ erere vwo nẹ ọghwọku ra vwọ kẹ na. *​—Hibru 12:11.