1, 2. (a) Die yen avwanre se roro kpahen ihwo re ghwa rọvwọn nu obọ, diesorọ? (b) Enọ vọ yen avwanre che roro kpahen vwevunrẹ uyovwinrota nana?

OMA vwerhen owẹ wo vwo kpo asan re de ru irueru rẹ orọnvwe? Oma vwerhen ihwo buebun, kiridie ọyen ọke rẹ aghọghọ. Ihwo ivẹ re cha rọvwọn na nabọ sẹn osẹnvwe ro faro. Ọ dia ọyena ọvo-o, opharo rayen je vọn vẹ aghọghọ! Vwẹ ẹdẹ nana, oma vwerhen ayen, ọhọhọre nẹ obaro na vọnre vẹ iphiẹrophiyọ kugbe omavwerhovwẹn.

² Dedena, a cha rhọnvwe nẹ vwẹ ẹdia buebun, orọnvwe vọnre vẹ oyanghan nonẹna. Dede nẹ avwanre rhẹro rọyen nẹ ihwo re ghwa rọvwọn na che phikparobọ, ọkiọvo, avwanre se roro: ‘Omavwerhovwẹn cha dia orọnvwe nana? Ọ cha tọn?’ Oborẹ aye gbe ọshare re rọvwọnre na vwẹroso Ọghẹnẹ wan, ji ru nene uchebro rẹ Ọghẹnẹ yen che dje ẹkpahọnphiyọ rẹ enọ yena phia. (Se Isẹ 3:5, 6.) Ofori nẹ ayen ru ọtiọyen rere ayen sa vwọ dia vwevunrẹ ẹguọnọ rẹ Ọghẹnẹ. Asaọkiephana, e jẹ avwanre roro kpahen ẹkpahọnphiyọ rẹ Baibol na vwọ kẹ enọ ẹne nana: Diesorọ wọ vwọ rọvwọn? Wọ da guọnọ rọvwọn, ono yen dia ọrivẹ rẹ orọnvwe wẹn? Mavọ wo se vwo muegbe vwọ kẹ orọnvwe? Die yen sa vwẹ ukẹcha kẹ ihwo ivẹ re rọvwọnre vwọ dia vwọrẹ omavwerhovwẹn?

3. Diesorọ o vwo je fo nẹ a rọvwọn fikirẹ erọnvwọn ri fiemu-u?

³ Ihwo evo vwo imuẹro nẹ, ohwo ki se vwo omavwerhovwẹn vwẹ akpeyeren, kọ rọvwọn. Iroro yena chọre! Jesu rọ rọvwọnre-e, tare nẹ ohwo vwọ dia kpogono ọyen okẹ, o de jiro kẹ ihwo ri se ru ọtiọyen nẹ ayen dia ọtiọyen. (Matiu 19:11, 12) Ọyinkọn Pọl je ta ota kpahen erhuvwu rọ herọ rẹ ohwo vwọ dia kpogono. (1 Kọrẹnt 7:32-38) Jesu yẹrẹ Pọl vwẹ ota nana ru urhi-i. Vwọrẹ uyota, e kere uruemu ra vwọ “djẹ ihwo orọnvwe” vwọba “uyono rẹ efian rẹ Idẹbono.” (1 Timoti 4:1-3) Dedena, ẹdia ri kpogono nẹrhẹ ihwo re guọnọ ga Jihova muomaphiyọ ẹga rayen. O rhe fo nẹ a rọvwọn fikirẹ erọnvwọn ri fiemu-u, kerẹ ọnyẹ rẹ edjedje.

4. Uchivwo vọ yen omamọ orọnvwe phi phiyotọ kẹ ẹroevwote rẹ emọ?

⁴ Ẹkẹvuọvo, uvi iroro herọ ra vwọ rọvwọn? E. Orọnvwe jẹ okẹ ro nẹ obọ rẹ Ọghẹnẹ rhe. (Se Jẹnẹsis 2:18.) Orọnvwe vwo erere evo, ọ je hwarhiẹ omavwerhovwẹn cha. Kerẹ udje, omamọ rẹ orọnvwe ọyen uchivwo rẹ omamọ rẹ orua. Emọ guọnọ uwevwin ro shephiyọ vẹ emiọvwọn ri che yono ayen, dje ẹguọnọ kẹ ayen, ghwọku, je kpọ ayen vi. (Une Rẹ Ejiro 127:3; Ẹfesọs 6:1-4) Ẹkẹvuọvo, ọ dia a vwọ vwẹrote emọ ọvo yen oboresorọ ohwo vwọ rọvwọ-ọn.

5, 6. (a) Kirobo rẹ Aghwoghwo 4:9-12 tare, die yen erere evo igbeyan ivẹ re kpẹkpẹre sa mrẹ? (b) Mavọ orọnvwe sa vwọ dia kerẹ ogẹ erha ra rhuọn kugbe?

⁵ Roro kpahen ẹkpo rẹ Baibol re mu uyovwinrota nana kpahen: “Emu ivẹ yovwi nọ ọvo, kidie ayen vwo erere ro oyoyovwi ọvo vwẹ owian rayen na. Kidie ayen de she, ọvo kọ kpare ọrivẹ vrẹn; ẹkẹvuọvo ekan kẹ ohwo rẹ ọye ọvo yan usun ọke ro de she o rhe vwo ọrivẹ rọ kpaherọ vrẹ-ẹn. Ọfa rọye ihwo ivẹ de shevwerhe kugbe, kẹ ayen rhorha  mu ohwohwo; ẹkẹvuọvo mavọ ohwo ọvo vwọ rhorho mu oma rọye ọvo? Ohwo ọvo da rhe họnre ohwo ọfa ọrivẹ rọye kọ chochọ kẹ. Ogẹ rẹ oruru erha fobọ vwrẹ-ẹ.”​—Aghwoghwo 4:9-12.

⁶ Ẹsosuọ, ẹkpo rẹ Baibol nana ta ota kpahen ọghanrovwẹ rẹ ugbeyan. Vwọrẹ uyota, orọnvwe churobọ si igbeyan ivẹ re riẹn ohwohwo mamọ. Kirobo rẹ ẹkpo rẹ Baibol nana djephia, oyerinkugbe nana sa nẹrhẹ ayen vwẹ ukẹcha kẹ ohwohwo, phiudu phiyọ ohwohwo awọ, je chochọ rẹ ohwohwo. Orọnvwe na ganphiyọ siẹrẹ ogẹ na da vrẹ ihwo ivẹ na ọvo. Kirobo rẹ ẹkpo rẹ Baibol nana djere, a sa hẹriẹ ogẹ ivẹ ra rhuọn kugbe. Ẹkẹvuọvo, ọ cha bẹn a vwọ hẹriẹ ogẹ erha ra rhuọn kugbe. Ọ da dianẹ ọdavwẹ rẹsosuọ rẹ aye vẹ ọshare na ọyen ayen vwo ru obo re cha vwerhen Jihova ivun, orọnvwe rayen na cha họhọ ogẹ erha yena ra rhuọn kugbe. Kọyen Jihova ẹbẹre ọvo rẹ orọnvwe na, ọtiọyena oyerinkugbe rayen na kọ ganphiyọ.

7, 8. (a) Uchebro vọ yen Pọl vwọ kẹ Inenikristi re herọ kpogono ri nene urhurusivwe ehware muabọ? (b) Ẹro abavo re vwo ni erọnvwọn vọ yen Baibol na vwọ kẹ avwanre kpahen orọnvwe?

⁷ Vwevunrẹ orọnvwe ọvo yen a da riavwerhen rẹ ehware. Ẹdia nana ọvo yen ehware da ghene hwarhiẹ omavwerhovwẹn cha. (Isẹ 5:18) Siẹrẹ ohwo rọ herọ kpogono de yerin vrẹ ọke rẹ Baibol na seri nẹ ọke “rẹ urhuru sivwe . . . da gan,” kọyen ọke rẹ urhurusivwe rẹ ehware vwọ gan mamọ, o ji se nene urhurusivwe nana muabọ. E rhe se suo-on, urhurusivwe tiọyena se sun ohwo kpo ọfanrhiẹn. Ẹwẹn ọfuanfon na mu Pọl vwo si uchebro nana vwo rhe ihwo re herọ kpogono: “Ẹkẹvuọvo ayen rhe se chiri oma-a, e gbe jẹn ayen rọvwọ. Kidie o fori ra vwọ rọvwọ nọ ọ ra da ton vẹ urhuru sivwe.”​—1 Kọrẹnt 7:9, 36; Jems 1:15.

⁸ Otoro obo re nẹrhẹ ohwo rọvwọ-ọn, ofori nẹ ohwo na vwẹ ẹro abavo vwo ni erọnvwọn. Kirobo rẹ Pọl tare, ihwo “re rọvwọre mrẹ ukpokpogho rẹ akpọ na.” (1 Kọrẹnt 7: 28) Ihwo re herọ kpogono vrabọ rẹ ebẹnbẹn rẹ ihwo re rọvwọnre hirharokuẹ. Wọ da guọnọ rọvwọn, mavọ wọ sa vwọ nẹrhẹ ebẹnbẹn rẹ orọnvwe wẹn havwen rere ebruphiyọ rọyen bunphiyọ? Idjerhe ọvo ọyen a vwọ vwẹ aghwanre sane ọrivẹ rẹ orọnvwe.

9, 10. (a) Mavọ yen Pọl djudje rẹ imuoshọ rọ herọ siẹrẹ ohwo de mu ugbeyan ọkpẹkpẹkpẹ vẹ ohwo rọhẹ ukoko na-a? (b) Siẹrẹ ohwo rha kerhọ rẹ uchebro rẹ Ọghẹnẹ ra vwọ rọvwọn vwevunrẹ ukoko na-a, die yen se nẹ obuko rọyen rhe?

⁹ Ẹwẹn ọfuanfon na mu Pọl vwo si uyono rẹ Baibol rọ pha ghanghanre re vwo ruiruo ọke a da guọnọ ọrivẹ rẹ orọnvwe: “Ovwan vẹ ihwo ri Keferi gba-a.” (2 Kọrẹnt 6:14) O mu udje rọyen kpahen akpeyeren rẹ ọghwẹrẹ. Wo de phi urhekpe phiyọ ohọre rẹ eranvwe ivẹ re rho nọ ohwohwo, eranvwe ivẹ na yen cha rioja. Ọtiọyen ọ hepha, ebẹnbẹn cha dia evunrẹ orọnvwe rẹ Onenikristi vẹ ohwo ro jẹ Onenikristi ẹdia. Siẹrẹ ọvo da guọnọ sẹro rẹ oma rọyen vwẹ ẹguọnọ rẹ Ọghẹnẹ, jẹ ọrivẹ rọyen guọnọre-e, ayen che se vwo iroro ọvo-o, ọnana cha nẹrhẹ ebẹnbẹn buebun vwomaphia. Ọtiọyena, Pọl de jiro vwọ kẹ Inenikristi nẹ ayen rọvwọn “vwẹ odẹ rẹ Ọrovwohwo.”​—1 Kọrẹnt 7:39.

¹⁰ Inenikristi evo re herọ kpogono tare nẹ ra vwọ rọvwọn ohwo rọhẹ evunrẹ ukoko na-a, yovwin vrẹ ra vwọ dia ẹdia rẹ ọruvwohwo rẹ ayen hepha na. Evo chukoku uchebro rẹ Baibol na, ayen da rọvwọn ohwo rọ ga Jihova-a. Ọke buebun, omaemuophiyọ yen nẹ obuko rọyen cha. Ihwo tiọyena mrẹ oma rayen nẹ ayen rọvwọn ohwo rẹ ayen che se nene ta ota kpahen obo re ma ghanre vwẹ akpeyere-en. Ẹdia rẹ ọruvwohwo rẹ ayen cha dia ọke yena sa rho vrẹ ọ rẹ ayen hepha jovwo ayen ke rhe rọvwọn. Ọ vwerhen oma nẹ uriorin buebun rẹ Inenikristi re herọ kpogono, vwẹroso uchebro rẹ Baibol nana, ji ru nene. (Se  Une Rẹ Ejiro 32:8.) Dede nẹ, ayen vwo iphiẹrophiyọ nẹ ayen cha rọvwọn ẹdẹ ọvo, ayen herọ kpogono bẹsiẹ ayen vwọ mrẹ ohwo vwẹ ẹga rẹ Jihova Ọghẹnẹ.

11. Die yen sa vwẹ ukẹcha kẹ wẹ vwọ sane ohwo ru wọ cha rọvwọn vẹ aghwanre? (Ni ekpeti na “ Die Yen Mi Ni Vwẹ Oma rẹ Ohwo re Me Cha Rọvwọn?.”)

¹¹ Vwọrẹ uyota, ọ dia idibo rẹ Jihova eje yen ọrivẹ rẹ orọnvwe ro shephiyọ-ọ. Wọ da guọnọ rọvwọn, guọnọ ohwo rẹ uruemu rọyen, obo rọ vwọ tua vwẹ ẹga rẹ Ọghẹnẹ, vẹ ẹguọnọ ro vwo kpahen Ọghẹnẹ shephiyọ vẹ ọwẹn. Odibo rọ fuevun rọ je ghwanre na teyen ẹbe buebun re ta ota kpahen uyovwinrota nana, ofori nẹ wo roro kpahen uchebro rẹ Baibol nana womarẹ ẹrhovwo, rere ọ chọn wẹ uko vwo brorhiẹn nana rọ pha ghanghanre na. *​—Se Une Rẹ Ejiro 119:105.

12. Ẹkuruemu vọ kpahen orọnvwe yen a mrẹ vwẹ ẹkuotọ buebun, udje rẹ Baibol vọ yen kẹ avwanre odjekẹ re nene?

¹² Vwẹ ẹkuotọ buebun, ọsẹ vẹ oni yen sane ọrivẹ rẹ orọnvwe kẹ emọ rayen. Ihwo buebun ghwa rhọnvwe vwẹ ẹkuotọ tiọyena nẹ ọsẹ vẹ oni yen vwo aghwanre kugbe erianriẹn ra vwọ jẹ ojẹ ọghanghanre tiọyena. Ọke buebun, oka rẹ orọnvwe nana nabọ wian, kirobo rẹ ọ hepha vwẹ ọke re vwo si Baibol na. Udje rẹ Ebraham ro ji odibo rọyen ra guọnọ aye kẹ Aizik, ọyen omamọ rẹ uyono vwọ kẹ esẹ vẹ ini rehẹ ẹdia tiọyena nonẹna. Ebraham nenesi rẹ igho vẹ otitivwe-e. Ukperẹ ọtiọyen, ọ davwẹngba rọ vwọ guọnọ aye kẹ Aizik uvwre rẹ ihwo re ga Jihova. *​—Jẹnẹsis 24:3, 67.

13-15. (a) Mavọ yen uyono rọhẹ Isẹ 24:27 sa vwẹ ukẹcha kẹ ọshare ro roro kpahen orọnvwe? (b) Die yen aye se ru vwo muegbe kẹ orọnvwe?

¹³ Wo de roro kpahen orọnvwe mamọ, nọ oma wẹn, ‘Mi ghini muegbe re?’ Wọ kpahanphiyọ onọ na kiridie nẹ wọ guọnọ emọ yẹrẹ ohwo ru wẹ vẹ ọyen dia, yẹrẹ fikirẹ ehware-e. Ukperẹ ọtiọyen, o vwo obo ra tẹnrovi ro fori nẹ ọshare yẹrẹ aye rọ guọnọ rọvwọn roro kpahen.

¹⁴ Ofori nẹ ọshare rọ guọnọ aye nabọ roro kpahen iji rẹ Baibol nana: “Ghwẹ ekuakua rẹ ona wẹn kpo ọsuere, tọrọ ekọn wẹn ejobi kpahe vwẹ obo aghwa.” (Isẹ 24:27) Die yen ẹkpo na? Vwẹ ọke awanre, ọshare da guọnọ rọvwọn rere o vwo orua rẹ obọ rọyen, kọ nọ oma rọyen, ‘Me choma me vwọ ghẹrẹ aye vẹ emọ ọ da dianẹ avwanre vwiẹre?’ Ọshare yena cha wian tavwen, kọyen ọ cha vwẹrote udju yẹrẹ ekankọn rọyen. Ọtiọyen ọ je hepha nonẹna. Ọshare rọ guọnọ rọvwọn ko muegbe ro vwo mu oghwa rẹ orọnvwe na. Ọ da dianẹ asan vuọvo she chọ vwẹ oma rọye-en, kọ wian. Baibol na tare nẹ ọshare rọ sa vwẹrote ọdavwẹ rẹ ugboma, ọ rẹ iroro, kugbe ọ rẹ ẹwẹn rẹ orua rọye-en, ọ bra nẹ ohwo ro vwo esegbuyota-a!​—Se 1 Timoti 5:8.

¹⁵ Aye rọ je choma rọ vwọ rọvwọn ji muegbe ro vwo mu oghwa ọhọhọhọ evo. Baibol na jiri ena kugbe iruemu evo ri fori nẹ aye vwo rere ọ sa vwọ chọn ọshare rọyen uko vwọ vwẹrote orua na. (Isẹ 31:10-31) Eshare vẹ eya ri brokpakpa rọvwọn dede nẹ ayen ji rhi muegbe re vwo mu oghwa rẹ orọnvwe-e vwo erorokẹ-ẹ, kidie ayen se roro kpahen oborẹ ayen che ru kẹ ọrivẹ orọnvwe raye-en. Ma rho, ofori nẹ ihwo re guọnọ rọvwọn choma rẹ ayen vwọ vwẹ iyono rẹ Baibol vwo ruiruo vwẹ orọnvwe rayen.

16, 17. Iyono rẹ Baibol vọ yen ofori nẹ ihwo re guọnọ rọvwọn roro kpahen?

 ¹⁶ Re vwo muegbe rẹ orọnvwe churobọ si re vwo roro kpahen iruo rẹ Ọghẹnẹ vwọ kẹ aye gbe ọshare. Ofori nẹ ọshare riẹn obo ro mudiaphiyọ ra vwọ dia ọgbuyovwin rẹ orua rẹ Onenikristi. Ẹdia nana dia uphẹn rọ vwọ dia ọgbuyovwin rọ djoma-a. Ukperẹ ọtiọyen, ofori nẹ ọ vwẹrokere Jesu kerẹ ọgbuyovwin. (Ẹfesọs 5:23) Ọtiọyen o ji fo nẹ aye rọ dia Onenikristi vwo ẹruọ rẹ ẹdia rẹ ọghọ ra reyerọ vwo mu vwevunrẹ orua na. Aye na vwo owenvwe rọ vwọ dia “otọ rẹ urhi” rẹ ọshare rọyen? (Rom 7:2) Aye na hẹ otọ rẹ urhi rẹ Jihova vẹ Kristi nure. (Galesha 6:2) Ẹgba rẹ usuon rẹ ọshare rọyen vwevunrẹ orua na mudiaphiyọ urhi ọfa. Aye na se bicha, ji vwomakpotọ kẹ usuon rẹ ohwo rọ gbare-e? O de roro nẹ ọ cha sa vwomakpotọ kẹ usuon rẹ ọshare na-a, o che yovwin ọ vwọ dia kpogono.

¹⁷ Kpobarophiyọ, ofori nẹ ihwo ivẹ re rọvwọnre na muegbe rẹ ayen vwọ davwerhọ rẹ ọdavwẹ rẹ ohwohwo. (Se Filipae 2:4.)Pọl de si: “E jẹn ohwo ọvuọvo guọnọ aye rọye kerẹ omobọ rọye, e gbe rhe jẹn aye vwẹ oma kpotọ kẹ ọshare.” Ẹwẹn ọfuanfon mu Pọl vwọ mrẹvughe nẹ ọshare na guọnọre nẹ aye na muọghọ okokodo kẹ. Aye na je guọnọ nẹ ọshare na dje ẹguọnọ vwọ kẹ.​—Ẹfesọs 5:21-33.

18. Diesorọ ihwo ivẹ re kọnphiyọ ohwohwo vwo sun oma rayen?

¹⁸ Ọke ra vwọ kọnphiyọ ohwohwo dia ọke rẹ eha-a. Ọyen ọke rẹ aye vẹ ọshare na vwo yono obo re vwo yerinkugbe rere ayen sa vwọ riẹn sẹ ayen cha rọvwọn ohwohwo. Ọnana ọke ra vwọ guọnọ omaẹriẹnsuon! Ọdavwini re vwo she ufi rẹ ọfanrhiẹn sa rhe ganphiyọ uvwre rẹ ọke yena, kidie a ma avwanre re vwo vwo ẹguọnọ rẹ ohwohwo. Ẹkẹvuọvo, ihwo ri ghini vwo ẹguọnọ rẹ ohwohwo  cha kẹnoma kẹ iruemu ri se miovwo oyerinkugbe rẹ ọrivẹ rayen vẹ Ọghẹnẹ. (1 Tẹsalonaika 4:6) Ọtiọyena wọ da kọnphiyọ ohwo, sun oma wẹn, kidie wọ sa mrẹ erere vwo nẹ uruemu yena rhe vwẹ akpeyeren wẹn, owenẹ wọ rọvwọn yẹrẹ wọ rọvwọnre-e.

19, 20. Mavọ yen ẹro rẹ Onenikristi vwo ni orọnvwe vwọ fẹnẹ ọ rẹ ihwo rẹ akpọ na? Dje kpahọn.

¹⁹ Ihwo ivẹ re rọvwọnre na da guọnọ nẹ orọnvwe rayen tọn, ofori nẹ ayen vwẹ ẹro abavo vwo ni ive rẹ orọnvwe na. Orọnvwe ọyen ọtonphiyọ rẹ obo rẹ Jihova guọnọre nẹ ọ dia bẹdẹ, ọ dia orọnvwọn ro che vwo oba-a. (Jẹnẹsis 2:24) Ọ da ohwo mamọ nẹ ọ dia ẹro nana yen ihwo buebun vwo no-o. Vwẹ ẹkuotọ evo, ihwo ni orọnvwe kerẹ “ifi re churu kugbe.” Ayen se jẹ ẹruọ rẹ oborẹ idjedje yena dje ẹro rẹ ihwo buebun vwo ni orọnvwe evwo. Idjerhe vọ? Dede nẹ ofori nẹ ifi ra nabọ churu kugbe gan, o ji fo nẹ ọ dia obo ra sa rhan siẹrẹ a da guọnọ.

²⁰ Ihwo buebun nonẹna reyọ orọnvwe phiyọ emu rẹ ọmọke krẹn. Ayen rọvwọn vẹ ẹwẹn nẹ o che shephiyọ ọhọre rayen, ọ rha dia ọtiọye-en, ayen choma ayen vwọ fan orọnvwe na. Karophiyọ nẹ Baibol na vwẹ oyerinkugbe rẹ orọnvwe vwo dje ogẹ. E ru ogẹ yẹrẹ ifi rẹ okọ gan, otorobo rẹ ogiribo gan te-e, e cha sa rha-an. Ọtiọyen ọ je hepha, ofori nẹ orọnvwe tọn. Karophiyọ nẹ Jesu tare nẹ, “obo rẹ Ọghẹnẹ tan kugbe nu, e jẹn ohwo hẹriẹ-ẹ.” (Matiu 19:6) Wọ da rọvwọn, ofori nẹ wọ vwẹ ẹro nana vwo ni orọnvwe. Ota rẹ Jesu yena nẹrhẹ orọnvwe na dia oghwa? Ẹjo.

21. Uruemu vọ yen ofori nẹ aye gbe ọshare vwo kpahen ohwohwo, die yen sa vwẹ ukẹcha kẹ ayen vwo ru ọtiọyen?

²¹ Ofori nẹ aye gbe ọshare vwẹ ẹro rẹ abavo vwo ni ohwohwo. Siẹrẹ ayen da tẹnrovi omamọ rẹ iruemu rẹ  ohwohwo, orọnvwe na cha dia ọ rẹ omavwerhovwẹn. A ghene sa tẹnrovi omamọ rẹ iruemu rẹ ọrivẹ rẹ orọnvwe rọ dia ohwo rọ gbare-e? Oborẹ avwanre se ru yen Jihova nọ mie avwanre, kọyensorọ avwanre vwọ vwẹrosuọ nẹ ọ vwẹ ẹro abavo vwo ni avwanre. Ọbuine na da nọ: “Ọ dianẹ, E Ọrovwohwo, ku wo kerẹ orukuruku, Ọrovwohwo kono ri se mudia?” (Une Rẹ Ejiro 130:3) Ofori nẹ aye gbe ọshare vwo ghovwo ohwohwo.​—Se Kọlose 3:13.

22, 23. Idjerhe vọ yen Ebraham vẹ Sera vwọ dia omamọ rẹ udje kẹ ihwo re rọvwọnre nonẹna?

 ²² Orọnvwe sa ghwa ebruphiyọ rode rhe rẹ ikpe na vwọ yan obaro na. Baibol na dje oborẹ orọnvwe rẹ Ebraham vẹ Sera hepha ọke rẹ ayen vwọ ghwore. Egbabọse vẹ ebẹnbẹn kanre akpeyeren raye-en. Roro kpahen obo rọ hepha vwọ kẹ Sera, aye rọ sa vrẹ ẹgbukpe 60 re, ra vwọ vuẹ nẹ o vrẹ nẹ omamọ rẹ uwevwin rọyen rọhẹ orere rẹ Ur rọ vọnre vẹ efe, rere ọ ra dia utughẹ vwẹ akpeyeren rọyen eje. Dedena, ọ vwomakpotọ kẹ ọshare rọyen. Sera omamọ rẹ aye rọ vwẹ ukẹcha kẹ Ebraham vwo brorhiẹn rẹ esiri. Omaevwokpotọ rọyen dia ọ rẹ omeru-u. Sera tobọ se ọshare rọyen ọrovwovwe vwẹ “evun” rọyen. (Jẹnẹsis 18:12; 1 Pita 3:6) Omaevwokpotọ rọyen vwọ kẹ Ebraham nẹ otọ rẹ ubuidu rọyen rhe.

²³ Vwọrẹ uyota, ọ dia ọnana mudiaphiyọ nẹ Ebraham vẹ Sera rhọnvwephiyọ kemu kemu-u. Sera jẹ iroro ọvo ro “tun Ebraham oma.” Dedena, vwo nene odjekẹ rẹ Jihova, ọ da vwomakpotọ kerhọ rẹ aye rọyen, iroroẹjẹ yena kọ rhe dia ebruphiyọ kẹ orua na. (Jẹnẹsis 21:9-13) Nonẹna, eya gbe eshare, tobọ ihwo re rọvwọnre ikpe buebun se yono erọnvwọn buebun mie Ebraham vẹ Sera.

24. Oka rẹ orọnvwe vọ yen brọghọ phiyọ Jihova oma, diesorọ?

²⁴ Vwevunrẹ ukoko na, orọnvwe buebun herọ rẹ omavwerhovwẹn hepha, kidie aye na muọghọ okokodo kẹ ọshare rọyen, ọshare na vwo ẹguọnọ rẹ aye na, o je brọghọ phiyọ oma, ayen wian kuẹgbe ji phi eruo rẹ ọhọre rẹ Jihova phiyọ ẹdia rẹsosuọ vwẹ akpeyeren rayen. Wọ da guọnọ rọvwọn, vwẹ aghwanre sane ọrivẹ wẹn, nabọ muegbe vwọ kẹ orọnvwe na, wian gan rere orọnvwe wẹn vwọ dia ọ rẹ ufuoma vẹ ẹguọnọ ro che brọghọ phiyọ Jihova Ọghẹnẹ oma. Ọke yena, orọnvwe wẹn kọ cha chọn wẹ uko vwọ sẹro rẹ oma wẹn vwevunrẹ ẹguọnọ rẹ Ọghẹnẹ.