Vwẹ 1 Kọrẹnt 6:1-8, ọyinkọn Pọl ta ota kpahen Inenikristi ri mu ohwohwo kpo aguare. O gberunu nẹ Inenikristi evo vwẹ Kọrẹnt “se ẹdjọ vwẹ ẹguare ri Keferi.” (Owọ 1) Pọl dje oboresorọ ọ vwọ ghanre Inenikristi vwo jẹ ohwohwo emuo kpo aguare, ukperẹ ọtiọyen, ayen rhuẹrẹ ebẹnbẹn na phiyọ vwevunrẹ ukoko na. E jẹ avwanre roro kpahen erọnvwọn evo re sorọ ra vwọ vwẹ uchebro rẹ Baibol nana phia kugbe ẹdia efa rẹ uchebro nana ghwa ta ota kpahe-en.

Avwanre vẹ iniọvo rẹ avwanre de vwo ota fikirẹ ekiẹchuọ, ofori nẹ avwanre rhuẹrẹ ota na phiyọ vwo nene idjerhe rẹ Jihova, ọ dia ọ rẹ avwanre-e. (Isẹ 14:12) Kirobo rẹ Jesu tare, ofori ra vwọ rhuẹrẹ ẹghwọ nẹ otọ kpakpata bẹsiẹ o vwo hirhe phiyọ okpota. (Matiu 5:23-26) Ẹkẹvuọvo, ọ da ohwo mamọ nẹ Inenikristi evo si ota te asan rẹ e de mu ota kpo aguare. Pọl da ta: “Ọye omaẹphọphọ kẹ ovwan rẹ ohwohwo vwo siọbe se ohwohwo vwẹ ẹguare.” Diesorọ? Orọnvwọn kiriguo rọ sorọ yen, owọẹjẹ tiọyena sa ghwa ophọphọvwe rhe ukoko na kugbe odẹ rẹ Ọghẹnẹ. Ọtiọyena, avwanre gbe roro kpahen onọ rẹ Pọl na: “Kidie we gbi diẹ oruchọ na phihọ oma-a?”​—Owọ 7.

Pọl je tanẹ Ọghẹnẹ reyọ omamọ rẹ ọrhuẹrẹphiyotọ mu vwevunrẹ ukoko na ra sa vwọ rhuẹrẹ ẹghwọ phiyọ. Ekpako na ihwo ri vwo aghwanre fikirẹ erianriẹn rẹ Baibol na rẹ ayen vwori, kọyensorọ Pọl vwọ tanẹ ayen se “brorhiẹ rẹ imoni” siẹrẹ a da ta “eta rẹ akpọ nana.” (Awọ 3-5) Jesu djunute owọẹjẹ erha ra jẹ siẹrẹ a da guọnọ rhuẹrẹ ẹghwọ rọ ganre mamọ phiyọ kerẹ, e vwo miovwo ohwo kugbe ọghware. Owọẹjẹ rẹsosuọ, ihwo ivẹ ri vwo ẹghwọ na davwẹngba ayen vwọ rhuẹrẹ kugbe vwẹ obuko, ọrivẹ, owọẹjẹ rẹsosuọ na de shefia, se ohwo ọvo yẹrẹ ivẹ  nene oma, ọrerha, vwẹ ota na phia kẹ ekpako na.​—Matiu 18:15-17.

Vwọrẹ imuẹro, ekpako na dia iguẹdjọ yẹrẹ ineki-i, ọtiọyena, o rhe fo rẹ ayen vwo phi oma phiyọ ẹdia yena-a. Ọ dia ayen yen cha vwẹ iwan mu kẹ iniọvo na rẹ ayen ru nene siẹrẹ a da rhuẹrẹ eta ri shekpahen ekiẹchuọ phiyọ-ọ. Ukperẹ ọyena, ayen vwẹ ukẹcha kẹ ihwo ri vwo ẹghwọ na rere ayen sa vwọ vwẹ iyono rẹ Baibol na vwọ rhuẹrẹ ẹghwọ na phiyọ vwọrẹ ufuoma. Ota na da bẹn kẹ ayen, ayen sa riẹnmie oniruo okinriariẹ yẹrẹ oghọn rukoko rẹ Iseri rẹ Jihova. Ẹkẹvuọvo, o vwo ẹdia efa rẹ Pọl djunute vwẹ uchebro nana-a. Die yen evo usun rẹ rayen?

Vwẹ ẹdia evo, re vwo mu ota kpo aguare ọyen owọẹjẹ ra ghwa guọnọ rere ufuoma sa vwọ dia. Kerẹ udje, ọ sa dianẹ aguare ọvo yen a da sa kẹ ohwo ọbe ra vwọ fan orọnvwe, brorhiẹn rẹ ohwo rọ cha yọnre ọmọ, brorhiẹn rẹ uchunu rẹ igho ra cha hwa vwọ vwẹrote ọmọ, brorhiẹn rẹ ihwo ra vwẹ igho kẹ siẹrẹ eki de she, kugbe re vwo brorhiẹn rẹ ohwo rọ cha riuku. O ji vwo ẹdia rẹ ohwo re mu kpo aguare da sa rhoma mu ohwo ro muro na kpo aguare. *

Ọ rha dia ẹwẹn rẹ eghrẹn yen e vwo mu ota na kpo aguare-e, kọyen ọ sa dianẹ ayen ru nene oboresorọ Pọl vwọ vwẹ uchebro rẹ Baibol yena phia. * Ẹkẹvuọvo, ọdavwẹ rẹ Inenikristi ọyen ayen vwo ru odẹ rẹ Jihova fon, je sẹro rẹ ufuoma kugbe oyerinkugbe rẹ ukoko na. Ẹguọnọ yen orọnvwọn kiriguo re vwo vughe Inenikristi, yẹ “Ẹguọnọ ghwe churu obọ muẹ ọrọye ọvo-o.”​—1 Kọrẹnt 13:4, 5; Jọn 13:34, 35.