1, 2. Ojẹ vọ yen avwanre cha jẹ kpahen erọnvwọn ra vwọ diotọ?

VWẸ ẹro roro nẹ wọ guọnọ re omamọ ọvo rọ vwerhan mamọ, wọ da mrẹ nẹ asan ọvo gbonri vwọ. Die yen wo che ru? Wọ sa re omamọ na eje, wo se do kufia, yẹrẹ wọ sa biẹn asan ro gbonri na no, rere wọ re asan ro chekọ. Ọvọ yen wo che ru?

² Vwẹ idjerhe evo, erọnvwọn ra vwọ diotọ họhọ omamọ yena. Ọkiọvo wọ guọnọ vwẹ erọnvwọn evo vwọ diotọ, ẹkẹvuọvo ku wọ rhe mrẹvughe nẹ buebun rẹ erọnvwọn ra vwọ diotọ nonẹna miovwirin, ayen gbonri kerẹ omamọ yena. Ọtiọyena, die wo che ru? Ihwo evo sa rhọnvwe phiyọ obo re brare womarẹ ayen vwo vwobọ vwẹ koka koka rẹ erọnvwọn ra vwọ diotọ. Ihwo efa sa kẹnoma kẹ koka koka rẹ erọnvwọn ra vwọ diotọ rere ayen vwo jẹ obọ evwo vwẹ orharhe rọyen. Efa vwẹ aghwanre vwọ sane i ri shephiyọ, ọtiọyena, ayen ke kẹnoma kẹ e re brare. Ojẹ vọ yen ofori nẹ wọ jẹ rere wọ sa vwọ dia vwevunrẹ ẹguọnọ rẹ Ọghẹnẹ?

3. Die yen avwanre cha ta ota kpahen asaọkiephana?

³ Ojẹ rerha na yen buebun rẹ avwanre cha jẹ. Avwanre riẹnre nẹ ofori a vwọ vwẹ erọnvwọn evo vwọ diotọ, ẹkẹvuọvo i ri shephiyọ ọvo yen avwanre che vwobọ vwọ. Ọtiọyena, ko fori nẹ avwanre roro kpahen  obo re se vwo vughe erọnvwọn ra vwọ diotọ ri shephiyọ kugbe i ri shephiyọ-ọ. Ẹsosuọ, e jẹ avwanre ta ota kpahen oborẹ erọnvwọn ra vwọ diotọ rẹ avwanre vwobọ vwọ se vwo djobọte ẹga avwanre vwọ kẹ Jihova.

4. Mavọ ofori nẹ omaẹvwọkpahotọ avwanre djobọte ojẹ rẹ erọnvwọn ra vwọ diotọ?

⁴ Vwẹ ọkiọvo rọ wanre, oniọvo ọvo rọ kpakore ro bromaphiyame vwẹ ukpe rẹ 1946 da ta: “Mi vwo ẹkuruemu me vwọ dia echidiotọ rẹ ota rẹ omaebrophiyame, je nabọ kerhọ kerẹ asan a da mrẹ nẹ mẹvwẹ yen guọnọ bromaphiyame.” Diesorọ? Ọ da ta: “Idjerhe ọghanghanre ọvo me sa vwọ fuevun kẹ Ọghẹnẹ, ọyen me vwọ karophiyọ omaẹvwọkpahotọ mẹ ọkieje.” Imuẹro herọ nẹ wọ je rhọnvwephiyọ ota yena. Siẹrẹ wọ da karophiyọ nẹ wo veri nẹ wọ cha vwẹ akpeyeren wẹn eje vwọ ga Jihova, ọnana che mu we vwo chirakon. (Se Aghwoghwo 5:4.) Vwọrẹ uyota, wo vwo roro kpahen omaẹvwọkpahotọ wẹn che djobọte ẹro wo vwo ni iruo rẹ Uvie na, ẹdia efa vwẹ akpeyeren wẹn, ji te erọnvwọn ra vwọ diotọ ri shephiyọ. Ọyinkọn Pọl dje uyota nana phia ọke ro vwo si rhe Inenikristi rẹ ọke rọyen nẹ, “owenẹ wọ rere eyẹ wọ dare, eyẹ  kemu kemu wo ruru, ru ayen ejobi vwọ kẹ urinrin rẹ Ọghẹnẹ.”​—1 Kọrẹnt 10:31.

5. Mavọ yen Livitikọs 22:18-20 chọn avwanre uko vwọ mrẹ erhọ-esio rọhẹ Rom 12:1?

⁵ Kemu kemu wo ruẹ vwẹ akpeyeren churobọ si ẹga wọ vwọ kẹ Jihova. Vwẹ ilẹta ro si rhe ihwo rẹ Rom, Pọl kanrunumu uyota nana kẹ iniọvo rẹ ọke rọyen. Ọ da vuẹ ayen: “Ovwan sa vwẹ oma rẹ ovwan ze izobo ọkpokpọ, rọ fonro ro fo ẹreyọ kẹ Ọghẹnẹ, kọye hẹ ẹga rẹ [“ẹwẹn,” NW ] rẹ ovwan ga.” (Rom 12:1) Ugboma wẹn churobọ si iroro wẹn, ubiudu wẹn, vẹ ogangan wẹn. Enana eje yen wọ vwọ ga Ọghẹnẹ. (Mak 12:30) Pọl vwẹ ẹga tiọyena vwo dje izobo. Ota yena erhọ-esio yen ọ hepha. Vwẹ Urhi rẹ Mosis, Ọghẹnẹ rhọnvwe reyọ izobo ro vwo oka-a. (Livitikọs 22:18-20) Vwẹ idjerhe vuọvo na, Onenikristi de ze izobo rẹ ẹwẹn ro vwo oka, Ọghẹnẹ cha reyọ-ọ. Idjerhe vọ yen Onenikristi se vwo ru ọnana?

6, 7. Idjerhe vọ yen Onenikristi se vwo gbe oma rọyen ẹgua, die yen se nẹ obuko rọyen rhe?

⁶ Pọl ta kẹ Inenikristi rehẹ Rom: “Ovwan rha vwẹ oma rẹ ovwan ru . . . umwemwu-u.” Pọl je ta kẹ ayen: “Fọ kẹ ugboma re o ghwu.” (Rom 6:12-14; 8:13) Pọl ka ta ota kpahen iruemu rẹ “ugboma” tiọyena jovwo re. Kpahen ihworakpọ ri jẹgba, avwanre de se: “Unu rayen vọnre vẹ ekan.” “Ayen broma re hwe ihwo.” “Oshọẹdjẹ rẹ Ọghẹnẹ hẹ ibiẹro raye-en.” (Rom 3:13-18) Onenikristi che vwo oka siẹrẹ ọ da vwẹ “ugboma” rọyen vwo ru oka rẹ iruemu ọtiọyena. Kerẹ udje, Onenikristi da vwẹ arogba rọyen vwo nẹ ihoho rẹ ihwo re banphiyọ yẹrẹ ifimu rẹ ihwo ri gbe ozighi, kọyen ọ vwẹ ẹro rọyen vwo “ruiruo rẹ umwemwu” ọtiọyena, o gbe oma rọyen ẹgua. Ẹga rọyen eje ofefe, izobo ro vwo oka rẹ Ọghẹnẹ che rhiabọreyọ-ọ. (Urhi Rivẹ 15:21; 1 Pita 1:14- 16; 2 Pita 3:11) Wọ mrẹ obo ro miovwin te ohwo vwo vwobọ vwẹ erọnvwọn ra vwọ diotọ ri shephiyọ-ọ?

⁷ Oghwa rode te Onenikristi rọ vwọ jẹ oka rẹ erọnvwọn ra vwọ diotọ ro che vwobọ vwọ, kidie erhuvwu yẹrẹ umiovwo yen che nẹ obuko rọyen rhe. Ọtiọyena, avwanre che vwobọ vwẹ erọnvwọn ra vwọ diotọ re cha nẹrhẹ Ọghẹnẹ rhiabọreyọ izobo rẹ avwanre, ọ dia i ri che gbe izobo rẹ avwanre ẹgua-a. Asaọkiephana, e jẹ avwanre roro kpahen obo re se vwo vughe erọnvwọn ra vwọ diotọ ri shephiyọ vẹ i ri shephiyọ-ọ.

8, 9. (a) Bro ẹbẹre yen a sa ghare erọnvwọn ra vwọ diotọ phiyọ? (b) Oka rẹ erọnvwọn ra vwọ diotọ vọ yen avwanre cha sen, diesorọ?

⁸ A sa ghare erọnvwọn ra vwọ diotọ phiyọ ẹbẹre ivẹ. Ẹdia ẹsosuọ ọyen erọnvwọn ra vwọ diotọ rẹ Inenikristi cha kẹnoma kẹ; ọrivẹ ke rha erọnvwọn ra vwọ diotọ rẹ Inenikristi se ni nẹ i shephiyọ, yẹrẹ i shephiyọ-ọ. E jẹ e roro kpahen ọrẹsosuọ na tavwen, ọyen erọnvwọn ra vwọ diotọ rẹ Inenikristi cha kẹnoma kẹ.

⁹ Kirobo re yonori vwẹ Uyovwinrota 1, erọnvwọn ra vwọ diotọ evo herọ ri titi oborẹ Baibol na tare nẹ ebrare. Kerẹ udje, roro kpahen Websaiti, ifimu, yẹrẹ ughe efa re nẹ vwẹ itẹlivishọni, vẹ ihwehworo ri titi ozighi, uruemu orhan, ihoho rẹ ihwo re banphiyọ, vẹ koka koka rẹ uruemu ri jẹfuọn. Rọ vwọ dianẹ oborẹ Baibol na senre yen erọnvwọn ra vwọ diotọ tiọyena vwọ phia kerẹ asan a da mrẹ nẹ ebrare-e na, o rhe fo nẹ Inenikristi rẹ uyota vwobọ vwẹ aye-en. (Iruo Rẹ Iyinkọn Na 15:28, 29; 1 Kọrẹnt 6:9, 10; Ẹvwọphia 21:8) Siẹrẹ wọ da kẹnoma kẹ erharhe erọnvwọn ra vwọ diotọ tiọyena, jẹ wo djephia kẹ Jihova nẹ “umwemwu tu [we] oma,” nẹ ọkieje yen wo vwo “bi oma kẹ umiovwo.”  Kọyen, wo vwo “uvi rẹ esegbuyota.”​—Rom 12:9; Une Rẹ Ejiro 34:14; 1 Timoti 1:5.

10. Iroro vọ kpahen erọnvwọn ra vwọ diotọ yen muoshọ, diesorọ?

¹⁰ Ihwo evo se roro nẹ ọ chọre-e rẹ ayen vwo vwobọ vwẹ erọnvwọn ra vwọ diotọ ri titi ọfanrhiẹn. Ayen tanẹ, ‘Mi se ni ughe rẹ ifimu na, ẹkẹvuọvo mi che se ru oborẹ ayen ruru na-a.’ Ọyena iroro rẹ ophiẹnvwe, ro ji muoshọ. (Se Jerimaya 17:9.) Ọ da dianẹ obo re brare vwẹ ẹro rẹ Jihova kọyen avwanre nẹ, ka sa tanẹ “umwemwu tu [avwanre] oma”? Avwanre de vwobọ vwẹ erọnvwọn ra vwọ diotọ ri titi umiovwo ọkieje, ọna che djobọte ẹgba rẹ iroro avwanre. (Une Rẹ Ejiro 119:70; 1 Timoti 4:1, 2) Ọna se djobọte oborẹ avwanre ruẹ yẹrẹ ẹro rẹ avwanre wo ni erharhe uruemu rẹ ihwo efa.

11. Uyota vọ yen Galesha 6:7 vwọphia kpahen erọnvwọn ra vwọ diotọ?

¹¹ Ọnana dia emu kpokpọ-ọ, ọ phiare jovwo re. Inenikristi evo gbe ọfanrhiẹn fikirẹ erharhe rẹ erọnvwọn ra vwọ diotọ rẹ ayen vwobọ vwọ ọkieje. Emu ọbrabra phia kẹ ayen tavwen ayen ke riẹn nẹ “okankọn kẹ okankọn rẹ ohwo kọnre, ọyen o ji che vun.” (Galesha 6:7) Ẹkẹvuọvo a sa kẹnoma kẹ emu ọbrabra tiọyena. Wọ da nabọ kọn omamọ rẹ iroro phiyọ udu wẹn, oma cha vwerhen owẹ vun obo ri yovwirin.​—Ni ekpeti na “ Erọnvwọn ra Vwọ Diotọ vọ Yen Ofori nẹ Mi Vwobọ Vwọ?”

12. Idjerhe vọ yen Galesha 6:5 vwo churobọ si erọnvwọn ra vwọ diotọ, die yen sa chọn avwanre uko vwo brorhiẹn romobọ?

¹² E jẹ e roro kpahen ẹdia rivẹ, erọnvwọn ra vwọ diotọ ri titi uruemu rẹ Baibol na ghwa sen, yẹrẹ rhọnvwephiyọ-ọ. Siẹrẹ a da guọnọ vwobọ vwẹ oka rẹ  erọnvwọn ra vwọ diotọ tiọyena, Onenikristi ọvuọvo yen che brorhiẹn rẹ i ri shephiyọ kẹ. (Se Galesha 6:5.) Ẹkẹvuọvo, avwanre vwo obo re sa chọn avwanre uko vwọ jẹ ojẹ tiọyena. Iyono buebun rehẹ Baibol na cha chọn avwanre uko vwo roro emu kerẹ oborẹ Jihova roro. A da nabọ kerhọ kẹ iyono tiọyena, kẹ avwanre se vwo ẹruọ rẹ “obo rẹ ọhọre rẹ Ọrovwohwo epha” vwẹ emu ejobi, ji te erọnvwọn ra vwọ diotọ.​—Ẹfesọs 5:17.

13. Die yen che mu avwanre vwọ kẹnoma kẹ erọnvwọn ra vwọ diotọ re sa nẹrhẹ ivun miovwin Jihova?

 ¹³ Ẹgba rẹ ọmrẹvughe rẹ Inenikristi ejobi dia abavo-o. (Filipae 1:9) Vwọba, Inenikristi je mrẹvughe nẹ erọnvwọn ra vwọ diotọ ri je ihwo evo fẹnẹ i ri je ihwo efa. Ọtiọyena, o rhe fo e vwo rhẹro rọyen nẹ orhiẹn vuọvo yen Inenikristi ejobi che bru-u. Dedena, oborẹ avwanre vwẹ uphẹn kẹ Ota rẹ Ọghẹnẹ rere o sun iroro vẹ udu avwanre te, ọtiọyen o ji che mu avwanre vwọ kẹnoma kẹ erọnvwọn ra vwọ diotọ re sa nẹrhẹ ivun miovwin Jihova.​—Une Rẹ Ejiro 119:11, 129; 1 Pita 2:16.

14. (a) Emu ọghanghanre vọ yen e che niso ọke a da sanẹ erọnvwọn ra vwọ diotọ? (b) Mavọ avwanre se vwo phi Uvie na phiyọ ẹdia rẹsosuọ vwẹ akpeyeren avwanre?

¹⁴ Wọ da cha sane erọnvwọn ra vwọ diotọ ru vwo che vwobọ vwọ, emu ọghanghanre ọfa herọ rẹ wo che niso: ọyehẹ ọke wẹn. Kirobo rẹ erọnvwọn ra vwọ diotọ wọ sanere se djephia ubiẹro wo vwo nẹ obo ri yovwirin, eriyin uche ọke wọ cha ghwọrọ phiyọ ji che djephia obo re ma ghanre kẹ wẹ. Ota rẹ Ọghẹnẹ yen obo re ma ghanre kẹ Inenikristi. (Se Matiu 6:33.) Ọtiọyena, die wo se ru o vwo muwẹro nẹ ọdavwẹ rẹ Uvie na yen ka ẹdia rẹsosuọ vwẹ akpeyeren wẹn? Ọyinkọn Pọl da ta: “Nabọ nite obo rẹ ovwan yan, we muẹ yan djidji-i, ẹkẹvuọvo kerẹ evwaghwanre, we kuẹ ọke fia-a.” (Ẹfesọs 5:​15, 16) Vwọrẹ uyota, wọ vwọ rhuẹrẹ ọke phiyọ kẹ erọnvwọn ra vwọ diotọ cha nẹrhẹ wo vwo ọke vwọ kẹ “obo ri yovwiri,” rọ dia obo re sa nẹrhẹ oyerinkugbe wẹn vẹ ọ rẹ Jihova gan.​—Filipae 1:10.

15. Diesorọ ọ vwọ dia emu aghwanre wo vwo nomaso kpahen oka rẹ erọnvwọn ra vwọ diotọ ru wo vwobọ vwọ?

¹⁵ Ọyen emu aghwanre e vwo nomaso ọke ra da sane erọnvwọn ra vwọ diotọ. Die yen ọyena mudiaphiyọ? Jẹ a rhoma roro kpahen udje rẹ omamọ na. Rere wo vwo jẹ asan ogbonri na ẹriọ, wọ cha biẹn amasan ri gbonri-i  nene asan ri gbonri na. Eriyin ọ je hepha, ofori e vwo nomaso kpahen oka rẹ erọnvwọn ra vwọ diotọ re che vwobọ vwọ. Ọ dia erọnvwọn ra vwọ diotọ rẹ Baibol na tare nẹ e chọre ọvo yen Onenikristi kẹnoma kẹ-ẹ, o ji fo nẹ ọ kẹnoma kẹ i ri se gbowọphiyọ oyerinkugbe rọyen vẹ ọ rẹ Jihova. (Isẹ 4:25-27) Wo de ru nene Ota rẹ Ọghẹnẹ, ọ cha chọn wẹ uko vwo ru ọtiọyen.

16. (a) Mavọ yen avwanre se vwo djephia nẹ ẹro rẹ Jihova vwo nẹ emu yen avwanre ji vwo no? (b) Mavọ yen ra vwọ vwẹ iyono rẹ Baibol vwo ruiruo vwẹ akpeyeren sa vwọ dia ẹkuruemu wẹn?

¹⁶ Ọke rẹ Inenikristi rẹ uyota da sane erọnvwọn a vwọ diotọ, ofori ayen vwo roro kpahen ẹro rẹ Jihova vwo no. Baibol na dje iroro kugbe iruemu rẹ Jihova phia. Kerẹ udje, Ovie Solomọn kere emu buebun ri tun Jihova oma, emu kerẹ “ẹrenvwe rọ vwọrọn efian, vẹ abọ ri sun ọbara ekueku, udu ro roro iroro umwemwu, awọ re djẹ ugbonẹ rẹ umwemwu eruo.” (Isẹ 6:16-19) Mavọ yen ofori nẹ ẹro rẹ Jihova vwo nẹ emu djobọte we wan? Ọbuine na da ta: “Ọrovwohwo guọnọ ihwo ri tuoma rẹ umwemwu.” (Une Rẹ Ejiro 97:10) Ofori nẹ oka rẹ erọnvwọn ra vwọ diotọ ru wo vwobọ vwọ djephia nẹ wo ghini vwo utuoma kpahen oborẹ Jihova vwo utuoma kpahen. (Galesha 5:19-21) Wọ me karophiyọ nẹ obo wo ruẹ vwẹ ehoho yen me dje oka rẹ ohwo ru wọ  hepha dẹn vrẹ obo ru wo ruẹ vwẹ azagba. (Une Rẹ Ejiro 11:4; 16:8) Ọtiọyena, wọ da ghene guọnọ dje iroro vẹ iruemu rẹ Jihova phia vwẹ akpeyeren wẹn ejobi, ọkieje kọyen wọ cha vwọ vwẹ uyono rẹ Baibol vwọ fuẹrẹn oka rẹ erọnvwọn ra vwọ diotọ ru wọ guọnọ vwobọ vwọ. Ọyena che hirhephiyọ ẹkuruemu wẹn vwẹ akpeyeren siẹrẹ wo de ru ọtiọyen.​—2 Kọrẹnt 3:18.

17. Tavwen a ke jẹ ifimu re che ni, enọ vọ yen ofori nẹ avwanre nọ?

¹⁷ Die ọfa wo se ru vwo djephia nẹ ẹro rẹ Jihova vwo nẹ erọnvwọn ra vwọ diotọ yen wo vwo ni ayen? Roro kpahen onọ nana, ‘Idjerhe vọ yen ọnana che vwo djobọte oyerinkugbe mẹ vẹ ọ rẹ Ọghẹnẹ?’ Kerẹ udje, tavwen wo ki brorhiẹn rẹ ifimu wo che ni, nọ oma wẹn, ‘Ifimu na che kpokpo ẹwẹn obrorhiẹn mẹ?’ E jẹ avwanre roro kpahen iyono rẹ Baibol ri shekpahen ota nana.

18, 19. (a) Mavọ yen uyono rẹ Baibol rọhẹ Filipae 4:8 sa vwẹ ukẹcha kẹ avwanre vwọ sane erọnvwọn ra vwọ diotọ ri shephiyọ? (b) Iyono rẹ Baibol efa vọ yen sa chọn owẹ uko vwọ sane erọnvwọn ra vwọ diotọ ri shephiyọ? (Ni eta rehẹ obotọ na.)

¹⁸ A mrẹ uyono ọghanghanre ọvo vwẹ Filipae 4:8, rọ tare nẹ, “emu ejobi rọ dia uyota, emu ejobi ro vwo ọghọ, emu ejobi rọ dia ọsoso, emu ro yovwiri, emu ejobi ro vwo ẹguọnọ, emu ejobi ro vwo erhuvwu, ọ da dianẹ o vwo uyoyovwi, ọ da dianẹ o vwo obo ro fo ejiro, gbe roro imu nana.” Vwọrẹ uyota, ọ dia ota rẹ erọnvwọn ra vwọ diotọ yen Pọl ta ota kpaha-an, ẹkẹvuọvo ọ ta ota kpahen iroro rẹ ubiudu na, ro fori nẹ e mukpahen obo re vwerhen Ọghẹnẹ oma. (Une Rẹ Ejiro 19:14) Dedena, a je sa vwẹ ota rẹ Pọl na vwo ruiruo vwẹ ẹbẹre rẹ erọnvwọn ra vwọ diotọ. Vwẹ Idjerhe vọ?

¹⁹ Nọ oma wẹn, ‘Ifimu, ividio gemu, uhworo, vẹ erọnvwọn efa ri mi vwobọ vwọ sa nẹrhẹ “emu ro yovwiri” ejobi dia ẹwẹn mẹ?’ Kerẹ udje, ọke wo de ni ifimu nu, oka rẹ ihoho vọ yen dia ẹwẹn wẹn? Ọ da dia  i ri yovwirin, gba riẹn nẹ ifimu wo niri na shephiyọ. Ẹkẹvuọvo, ifimu ru vwo niri da nẹrhẹ wo roro kpahen erọnvwọn ri fori-i, kọyen ifimu na shephiyọ-ọ. (Matiu 12:33; Mak 7:20-23) Diesorọ? Kidie wo de roro kpahen erọnvwọn ri fori-i, enana se djobọte ufuoma rẹ ẹwẹn wẹn, miovwo ẹwẹn rẹ obrorhiẹn wẹn ra vwẹ Baibol yono, ọ je sa guọghọ oyerinkugbe wẹn vẹ ọ rẹ Ọghẹnẹ. (Ẹfesọs 5:5; 1 Timoti 1:5, 19) Rọ vwọ dianẹ erọnvwọn ra vwọ diotọ tiọyena se djobọte we na, gbe brorhiẹn wọ vwọ sen ayen. * (Rom 12:2) Dia kerẹ ọbuine na rọ yare Jihova nẹ, “rhẹriẹ ẹro mẹ rere o vwo jẹ ogbegbemrẹ e no.”​—Une Rẹ Ejiro 119:37.

20, 21. Idjerhe vọ yen 1 Kọrẹnt 10:23, 24 vwo churobọ si ẹsanọ rẹ erọnvwọn ra vwọ diotọ ri shephiyọ?

²⁰ Pọl djunute uyono rẹ Baibol ọvo kiriguo rẹ ofori nẹ e roro kpahen siẹrẹ avwanre de che brorhiẹn romobọ. Ọ da ta: “Emu na ejobi wan urhi, ẹkẹvuọvo emu na ejobi fori-i. E jẹn ohwo ọvuọvo guọnọ erhuvwu rẹ oma rọye-en, ẹkẹvuọvo erhuvwu rẹ ọrivẹ rọyen.” (1 Kọrẹnt 10:23, 24) Mavọ yen uyono rẹ Baibol yena churobọ si ra vwọ sane erọnvwọn ra vwọ diotọ ri shephiyọ? Ofori nẹ wọ nọ oma wẹn, ‘Mavọ yen erọnvwọn ra vwọ diotọ re me sanere na che djobọte ihwo efa?’

²¹ Ẹwẹn rẹ obrorhiẹn wẹn sa nẹrhẹ wọ riavwerhen rẹ erọnvwọn ra vwọ diotọ ru wo rorori nẹ “urhi” rhọnvwephiyọ. Ẹkẹvuọvo, wọ da riẹn nẹ ẹwẹn obrorhiẹn rẹ iniọvo efa rhọnvwephiyọ oka rẹ erọnvwọn ra vwọ diotọ yena-a, wo se brorhiẹn nẹ wo rhe che vwobọ vwọ-ọ. Diesorọ? Kiridie Pọl tare nẹ, wọ guọnọ “ru unwemwu kpahen omoni wẹn,” yẹrẹ “ru umwemwu kpahen  Kristi,” womarẹ wọ vwọ nẹrhẹ ọ bẹn kẹ oniọvo wẹn rọ sa vwọ yọnre esegbuyota rọyen kpahen Ọghẹnẹ-ẹ. Wọ karophiyọ eta nana: “Wọ sua eshe” kẹ ihwo-o. (1 Kọrẹnt 8:12; 10:32) Inenikristi rẹ uyota nonẹna kerhọ rẹ uchebro rẹ Pọl nana womarẹ ayen vwọ kẹnoma kẹ erọnvwọn ra vwọ diotọ rẹ “urhi,” rhọnvwephiyọ, ẹkẹvuọvo i “fori-i.”​—Rom 14:1; 15:1.

22. Diesorọ Inenikristi vwọ vwẹ uphẹn kẹ ẹro rẹ ihwo efa vwo nẹ emu vwẹ eta romobọ?

²² Ẹkẹvuọvo, ota ro shekpahen a vwọ guọnọ erhuvwu rẹ ihwo efa na ji vwo ẹbẹre ọfa. Onenikristi rẹ ẹwẹn obrorhiẹn rọyen vwẹ uphẹn kẹ nẹ o vwobọ vwẹ oka rẹ erọnvwọn ra vwọ diotọ evo-o, gba ihwo eje rehẹ ukoko na nẹ ayen dia kerẹ ọye-en. O de ru ọtiọyen, kọyen ọ họhọ ohwo rọ djẹ imoto vwẹ idjerhe, rọ tanẹ ihwo ejobi re djẹ imoto vwẹ idjerhe na djẹ kirobo rẹ ọyen guọnọre. Ọyena dia emu rẹ aghwanre-e. Fikirẹ ẹguọnọ rẹ Inenikristi, ofori ohwo rẹ ẹwẹn obrorhiẹn rọyen vwẹ uphẹn kẹ nẹ o vwobọ vwẹ oka rẹ erọnvwọn ra vwọ diotọ evo-o, muọghọ kẹ orhiẹn-ebro rẹ iniọvo re vẹ ọyen gba ga siẹrẹ e rha vwọso uyono rẹ Baibol na-a. Ọtiọyena, ọ nẹrhẹ “ihwo riẹn akoechiro” rọyen.​—Filipae 4:5; Aghwoghwo 7:16.

23. Mavọ wọ sa vwọ sane erọnvwọn ra vwọ diotọ ri shephiyọ?

²³ Ra vwọ djẹkoko, mavọ yen wọ sa vwọ sane erọnvwọn ra vwọ diotọ ri shephiyọ? Kẹnoma kẹ erọnvwọn ra vwọ diotọ ri titi umiovwo vẹ iruemu re vwọso Ota rẹ Ọghẹnẹ. Yan nene iyono rẹ Baibol rere wo se vwo brorhiẹn rẹ erọnvwọn ra vwọ diotọ evo rẹ Baibol na ghwa ta ota kpahe-en. Kẹnoma kẹ erọnvwọn ra vwọ diotọ ri se djobọte ẹwẹn obrorhiẹn wẹn, vẹ i ri se miovwin ihwo efa ivun, ma rho kẹ iniọvo rẹ avwanre. E jẹ orhiẹn ru vwo bruru wo vwo ru ọtiọyen ghwa urinrin bru Ọghẹnẹ, ọ me je sẹro wẹn vẹ orua wẹn vwevunrẹ ẹguọnọ rọyen.