ONỌ 9
Ofori nẹ Mi Vwo Esegbuyota Kpahen Uyono rẹ Arhọ Mamarhe?
DIE WO CHE RU?
Vwẹ ẹro roro udje nana: Alex vwo ẹwẹn ivivẹ. O vwo esegbuyota kpahen Ọghẹnẹ kugbe emama. Ẹkẹvuọvo, nonẹna oyono rọyen tarọ vẹ imuẹro nẹ uyono rẹ arhọ mamarhe uyota, kirobo rẹ ehiahiẹ rẹ isayẹnsi djephia. Alex guọnọ phọphọ oma rọye-en. Ọ da ta kẹ oma rọyen, ‘egbaerianriẹn de se djephia nẹ uyono rẹ arhọ mamarhe uyota, ko ono yen mẹvwẹ rọ cha nọ enọ kpahọn?’
Ọ da dianẹ owẹ yen Alex, wọ cha rhọnvwe nẹ uyono yena uyota kidie isayẹnsi ta ọtiọyen?
FỌ WO RORO!
Ihwo ri se uyono nana gbuyota kugbe ihwo ri ru ọtiọye-en fobọ ta oborẹ ayen segbuyota, jẹ ayen riẹn oboresorọ ayen vwo segbuyota-a.
-
Ihwo evo vwo esegbuyota kpahen emama kidie ọyen obo re yono ayen vwẹ ishọshi.
-
Ihwo evo vwo esegbuyota kpahen uyono rẹ arhọ mamarhe kidie ọyen obo re yono ayen vwẹ isikuru.
ENỌ ESAN E RORO KPAHEN
Baibol na da ta: “Uwevwi kuwevwi ohwo re bọn, ẹkẹvuọvo ọbọn ebabọn rẹ emu ejobi ọye hẹ Ọghẹnẹ.” (Hibru 3:4) E se ghini se ota nana gbuyota?
Ra vwọ tanẹ o vwo Ọmemama rọ ma arhọ-ọ, pha kerẹ ohwo rọ tare nẹ ọ dia ohworakpọ yen bọn uwevwin nana-a
OBORẸ IHWO TA: Kemu kemu vwẹ akpọ na mu va rhe kpregede.
1. Ono yẹrẹ die yen so emu rẹ kpregede nana?
2. Ọ vọ yen ma gba; erọnvwọn eje mu va rhe kpregede gbanẹ ohwo ọvo yen ma ayen?
OBORẸ IHWO TA: Ihworakpọ nẹ oma rẹ eranvwe rhe.
3. Ohworakpọ de nẹ oma rẹ eranvwe kerẹ okpe rhe, diesorọ ọhọ rẹ ohworakpọ vwọ vrẹ ọ rẹ okpe shesheri?
4. Diesorọ ọ vwọ bẹn re se vwo vwo ẹruọ rẹ erọnvwọn itete re “ton” arhọ phiyọ?
OBORẸ IHWO TA: E dje uyono rẹ arhọ mamarhe phiyọ uyota.
5. Ohwo rọ rhọnvwephiyọ uyono nana guọnọ otọ rọyen komobọ re?
6. Bro ihwo yen vwo imuẹro kpahen uyono nana kidie a vuẹ ayen nẹ egbaerianriẹn vwo imuẹro kpahọn?
“Wọ da mrẹ uwevwin ọvo ro vwo erhuvwu vwevunrẹ egbo, wo cha tanẹ, ‘Uwevwin nana vwo erhuvwu dẹn! Irhe na nabọ riẹn she kpahen ohwohwo ọyensorọ uwevwin na sa vwọ dia.’ Wọ cha sa ta ọtiọye-en! Kidie ọhọ herọ-ọ. Kẹ diesorọ avwanre vwo roro nẹ erọnvwọn eje rehẹ akpọ na mu va rhe kpregede?”—Julia.
“Vwẹ ẹro roro nẹ ohwo ọvo vuẹ wẹ nẹ ijini ọvo ra vwọ teyen ẹbe sa re, inki rọhẹ evun rọyen de sare ku igbẹhẹ vẹ enu rẹ uwevwin na, ọnana kọyen rhi hirhephiyọ ọsoso rẹ ọbe rọ fan eta. Ọnana che muwẹro?”—Gwen.
DIESORỌ E VWO SE ỌGHẸNẸ GBUYOTA?
Baibol tare nẹ avwanre vwo “aghwanre.” (Isẹ 3:21) Ọtiọyena, wo jẹ erọnvwọn nana dia oboresorọ wo vwo vwo imuẹro kpahen Ọghẹnẹ-ẹ
-
OBO WO RORORI (Mi rorori nẹ ẹgba ọvo herọ ro kpenu mamọ)
-
ETA RẸ IHWO EFA (Me dia ubrakpọ rẹ ihwo da ga ẹga)
-
ỌNYẸ (Ọsẹ vẹ oni mẹ egọghẹnẹ, kọyensorọ mi vwo vwo imuẹro kpahen Ọghẹnẹ)
Ukperẹ ọtiọyen, ofori nẹ wọ riẹn oboresorọ wo vwo vwo esegbuyota kpahen Ọghẹnẹ.
“Ọke rẹ oyono mẹ de yono avwanre kpahen oborẹ ugboma rẹ avwanre na wian wan, ọnana kẹ vwẹ imuẹro nẹ Ọghẹnẹ herọ. Ẹbẹre sansan rẹ ugboma na vwo iruo rẹ ayen ruẹ, jẹ avwanre tobọ riẹn oborẹ ayen wian wa-an. Vwọrẹ uyota, ugboma rẹ ohworakpọ na vọnre vẹ igbunu!”—Teresa.
“Me da mrẹ egenege ro kpenu mamọ, okọ, yẹrẹ imoto, ke me nọ oma mẹ, ‘Ono yen ruro?’ Ọ guọnọ aghwanre kugbe ona ihwo ki se ru imoto, kidie a guọnọ erọnvwọn buebun re cha wian kugbe tavwen imoto na ke sa djẹ. Ọ da dia ohwo yen ru imoto, kọyen o vwo ohwo rọ ma ohworakpọ.”—Richard.
“Mi vwo yono kpahen isayẹnsi kpobaro phiyọ na, imuẹro mẹ kpahen uyono rẹ arhọ mamarhe jo shekpotọ. . . . Vwọ kẹ vwẹ, a guọnọ ‘esegbuyota’ ọgangan re vwo vwo imuẹro kpahen uyono rẹ arhọ mamarhe, vrẹ re vwo vwo imuẹro kpahen Ọmemama.”—Anthony.
OBO RE RORO KPAHEN
Dede nẹ egbaerianriẹn ghwọrọ ikpe buebun vwo ru ehiahiẹ re, ayen je rhe mrẹ odjefiotọ rẹ ayen eje rhọnvwephiyọ ro djerephia nẹ arhọ mamarhe-e. Egbaerianriẹn rha sa rhọnvwephiyọ uyono ọvo kpahen arhọ mamarhe-e, ọ chọre wọ vwọ nọ enọ kpahen uyono rayen na?
