Vwẹ ẹro roro udje nana: Karen hẹ ipati, ọ je rhe vrẹn ibrẹro ihwe-e, o de nyo urhurhu rẹ ugbeyan rọyen.

Karen vwo kuomarhẹriẹ, ọ da mrẹ ugbeyan rọyen Jessica rọ yọnrọn egọ rẹ udi ivẹ ra ghwa kparen nu. Karen riẹnre nẹ ọyen udi ro mu ohwo. Jessica da kẹ ọgọ ọvo, ọ da vuẹ, “Riakpọ, wọ rha dia omotete-e, gbanẹ wẹ jẹ omotete?”

Karen guọnọ sen udi na, ẹkẹvuọvo Jessica ugbeyan rọyen. Karen guọnọre nẹ oma vwerhen Jessica. Vwọ vrẹ ọyena, Jessica ọvo usun rẹ emetẹ ri vwo omamọ rẹ uruemu. Jessica da sa da udi, kọyen ọ ghwa bra ra vwọ da udi-i. Karen da ta vwẹ ẹwẹn rọyen, ‘Udi ghevweghe, ọ dia uhuvwun ọganga-an.’

Ọ da dia owẹ yen hẹ ẹdia rẹ Karen, die wo che ru?

Rere wo se vwo brorhiẹn rẹ aghwanre vwẹ ẹdia nana, ofori nẹ wo vughe oma wẹn. Re vwo vughe oma ohwo, ọyen ẹgba wọ vwọ riẹn oka rẹ ohwo ru wọ hepha kugbe obo wọ guọnọre. Wọ da riẹn ọnana, kọ kẹ wẹ ẹgba wo vwo sun oma wẹn, ukperẹ ihwo efa vwo sun we.—1 Kọrẹnt 9:26, 27.

Mavọ wo se vwo vwo oka rẹ ẹgba yena? Ẹkpahọnphiyọ rẹ enọ nana cha chọn wẹ uko.

Ọmrẹvughe rẹ obo ru wọ riẹn ruẹ kugbe omamọ rẹ uruemu wo vwori kẹ wẹ uduefiogbere.

UDJE RẸ BAIBOL: Ọyinkọn Pọl de si: “Owenẹ mi jẹ ota ẹriẹn ta dede yẹ erianriẹn kanre ovwẹ-ẹ.” (2 Kọrẹnt 11:6) Kidie nẹ Pọl nabọ vwo ẹruọ rẹ Baibol na, kọ sa yọnre gan ọke rẹ ihwo efa vwọ reyọ vwọsuọ. Ọ vwẹ uphẹn kẹ erharhe eta rẹ ihwo efa nẹ e so ọkuọrọn kẹ-ẹ.—2 Kọrẹnt 10:10; 11:5.

FUẸRẸN OMA WẸN: Si ona ọvo ru wo vwori phiyotọ.

Gbe si omamọ rẹ uruemu ọvo ru wo vwori phiyotọ. (Kerẹ udje, wọ davwerhọ rẹ ihwo efa? wọ kẹ okẹ? a sa vwẹroso wẹ? wọ yan mu ọke?)

Kirobo rẹ ubro rẹ ọlẹ ọvo gbe egu kuẹ ye, eriyin omamọ rẹ uruemu wo vwori jovwo se miovwin siẹrẹ wọ da vwẹ uphẹn kẹ ovwiẹrẹ wẹn nẹ o sun we.

UDJE RẸ BAIBOL: Pọl riẹn ovwiẹrẹ rọyen. O de si: “Kidie oma rẹ urhi rẹ Ọghẹnẹ vwerha ovwẹ, vwẹ obo otọ rẹ evun mẹ, ẹkẹvuọvo me rhe mrẹ urhi ọfa vwẹ ekuakua rẹ oma mẹ ro nene urhi rẹ udu mẹ họnra rọ vwẹ ovwẹ ru ọviẹn kẹ urhi rẹ umwemwu rọ hẹ evun rẹ ekuakua rẹ oma mẹ.”—Rom 7:22, 23.

FUẸRẸN OMA WẸN: Ovwiẹrẹ vọ yen ofori nẹ wọ wian kpahen?

Wọ sa ro imoto, wọ me vuẹ ohwo rọ djẹ imoto na nẹ ọ vwẹ owẹ djẹ riariẹ bẹsiẹ ipẹtro rọyen vwo re? Ẹjo, kidie ọyen emu rẹ ẹkpa, kugbe igho ẹghwọrọ!

Uyono na? Wo de bru ẹkẹn kẹ oma, wo rhe che mu akpọ yeri-in. Wo vwo asan wọ guọnọ ra kugbe oborẹ wo ru te asan na.

UDJE RẸ BAIBOL: Pọl siri: “Ọ dianẹ ki mi muẹ djẹ-ẹ.” (1 Kọrẹnt 9:26) Ukperẹ Pọl vwo mu akpọ yerin, o de bru ẹkẹn kẹ oma rọyen, o de ji yerin mu ayen.—Filipae 3:12-14.

FUẸRẸN OMA WẸN: Si ẹkẹn ru wo bru kẹ oma erha ru wọ guọnọ yerin mu ukpe rọ cha na.

Wo rhe vwo oborẹ wo vwo imuẹro kpahe-en, wo che se brorhiẹ-ẹn. Kerẹ eghwughwẹ, wọ cha vwẹrokere igbeyan wẹn, ọnana ghwa oka nẹ, wo vughe oka rẹ ohwo ru wọ hepha-a.

Vwọ fẹnẹ ọyena, wo de vwo imuẹro rẹ obo wo ruẹ, kọyen wọ sẹro rẹ oka re vwo vughe we, otoro oborẹ ihwo efa ruru-u.

UDJE RẸ BAIBOL: Ọ sa dianẹ ọke rẹ ọmraro Daniẹl vwọ hẹ eghene ọyen o vwo “roro” vwẹ ẹwẹn rọyen nẹ o che ru nene urhi rẹ Ọghẹnẹ, dede nẹ o sherabọ kẹ orua rọyen. (Daniẹl 1:8) Womarẹ ọyena, o ru nene obo ro brorhiẹn rọyen. Daniẹl ru nene obo ro vwo imuẹro kpahen.

FUẸRẸN OMA WẸN: Die yen wo vwo imuẹro kpahen? Kerẹ udje: Wo se Ọghẹnẹ gbuyota? Ọ da dia ọtiọyen, diesorọ? Die yen kẹ wẹ imuẹro nẹ Ọghẹnẹ ghene herọ?

Omuwẹro nẹ iji rẹ Ọghẹnẹ ri shekpahen ẹfuọn se fi erere kẹ wẹ? Ọ da dia ọtiọyen, diesorọ?

Ukuotọ rọyen ọ vọ wọ guọnọ dia, ọbe ro she totọ rẹ odju muẹ djuẹ gbanẹ urhe ro mudia, odju ọgangan de djuẹ dede o she-e? Jẹ imuẹro wẹn kpahen oka rẹ ohwo rẹ wọ hepha gan, ku wọ dia kerẹ urhe yena. Ọyena cha chọn wẹ uko vwọ kpahenphiyọ onọ na, oka rẹ ohwo vọ me hepha?