Vwẹ ẹro roro udje nana: Ọke rẹ Tim vẹ igbeyan rọyen vwọ fa ibọrọ, Tim da fa ibọrọ na vwọ guọghọ ughegbe rẹ imoto rẹ ohwo rọ dia kẹrẹ ayen.

Wọ da dia Tim, die yen wo che ru?

O VWO ERỌNVWỌN ERHA WO SE RU:

1. Djẹ.

2. Guon nyẹ ohwo ọfa.

3. Vuẹ ohwo ro vwo imoto na obo re phiare, rere wọ vuẹ nẹ wọ cha rhuẹrẹ.

Ẹwẹn wẹn sa vuẹ wẹ nẹ wọ jẹ Ojẹ 1. Ẹkẹvuọvo ofori wọ vwọ rhọnvwe echobọ wẹn ọkieje, owenẹ ọ dia ughegbe rẹ imoto yen wo hweri yẹrẹ orọnvwọn ọfa yen wo ruru.

1. Ọyen obo ri fori.

   Baibol na da ta: “Avwanre . . . guọnọ ruẹ emu rẹ ọghọ vwi kemu kemu ejobi.”—Hibru 13:18.

2. Ihwo se vwo ghovwo ihwo re rhọnvwe echobọ rayen.

   Baibol na da ta: “Ohwo ro si ogbeku rọye nu che se yovwi-i, ẹkẹvuọvo ohwo rọ rhọvwerọ ro de siobọ nẹ ayen cha mrẹ arodọvwẹ.”—Isẹ 28:13.

3. Ọ rọ ma ghanre yen, ọ vwerhen Ọghẹnẹ oma.

   Baibol na da ta: “Ohwo ọchọchọ ẹgua kẹ Ọrovwohwo oma, ẹkẹvuọvo ọ vwẹ ẹro sua ohwo rọ dia ọvwata.”—Isẹ 3:32.

Ọke ọmọtẹ re se Karina rọhẹ ẹgbukpe 20 vwẹ United States vwọ djẹ imoto, a da kẹ ọbe kidie ọ djẹ gan nọ, o de si ọbe na nu rere ọsẹ rọyen vwo jẹ mrẹ. Ẹkẹvuọvo, o se sionu bẹdẹ-ẹ. Kiridie Karina tare: “Omarẹ ẹgbukpe ọvo vwọ wan nu, ọsẹ mẹ da mrẹ ọbe na. Ọnana da rhoma toroba ebẹnbẹn mẹ!”

Die yen ọnana se yono avwanre? Karina da ta: “Re vwo si echobọ rẹ ohwo nu toroba ebẹnbẹn na. Kidie a je cha mrẹ otọ rọyen obọ!”

Baibol na da ta: “Avwanre sheri vwẹ oma rẹ emu buebu.” (Jems 3:2) Kirobo ra ta cha na, ra vwọ rhọnvwe echobọ rẹ ohwo ugege re vwo ru emu chọ, ọyen oka rẹ omaevwokpotọ kugbe ọ ra vwọ riẹn nẹ ohwo ghwanre tedje.

Owọẹjẹ rọ vwọ kpahọn ọyen wo vwo yono vwo nẹ echobọ wẹn. Ọmọtẹ ọvo re se Vera da ta: “Me davwẹngba mi vwo ni echobọ mẹ kerẹ uyono rọ cha vwẹ ukẹcha kẹ vwẹ vwọ dia omamọ rẹ ohwo, je nẹrhẹ mi ru yovwinphiyọ ọke ọfa.” E je ni oborẹ wo se vwo ru ọtiọyen.

Wọ djẹ idjighere rẹ ọsẹ wẹn kpo asan, o de miovwin. Die yen wo che ru?

• Dion phiyọ oma, wo roro nẹ ọsẹ wẹn cha riẹ-ẹn.

• Vuẹ ọsẹ wẹn obo re ghene phia.

• Vuẹ ọsẹ wẹn obo re phiare, ẹkẹvuọvo guon nyẹ ohwo ọfa.

Wo sheri vwẹ ọdavwini kidie wo se ẹbe-e. Die yen wo che ru?

• Tanẹ ọdavwini na gan nọ.

• Rhọnvwe nẹ wẹ yen sorọ.

• Tanẹ ivun wẹn vwerhen oyono na-a.

 Gba vwẹ ẹro roro nẹ owẹ yen (1) ọsẹ wẹn kugbe (2) oyono wẹn. Ẹro vọ yen ọsẹ, kugbe oyono wẹn che vwo ni we siẹrẹ wọ da rhọnvwe echobọ wẹn? Ẹro vọ yen ayen che vwo ni we siẹrẹ wo de rhurhu echobọ wẹn?

Gbe roro kpahen echobọ ọvo wo ruru vwẹ ukpe rọ wanre na, rere wọ kpahenphiyọ enọ nana.

Die yen echobọ na? Die yen wo ruru ọke wo vwo ruo?

• Mi rhurhu ro.

• Mi gun ro nyẹ ohwo ọfa.

• Me rhọnvwerọ.

Siẹrẹ wọ rha rhọnvwe echobọ wẹ-ẹn, mavọ yen oma ru we?

• Oma vwerhen owẹ kidie ohwo vuọvo riẹn kpahọ-ọn!

• Udu kpokpo uvwe nẹ mane me ta uyota.

Die yen me yovwin ro fori nẹ wo ru jovwo?

Die yen wo yono vwo nẹ echobọ wẹn rhe?

Diesorọ ihwo evo rhọnvwan echobọ raye-en?

Die yen ihwo che roro siẹrẹ wo de rhurhu echobọ wẹn ọkieje, ẹkẹvuọvo die yen ayen che roro siẹrẹ wọ da rhọnvwe echobọ wẹn?—Luk 16:10.