1, 2. Die yen e se ru vwọ dia evunrẹ ẹguọnọ rẹ Ọghẹnẹ?

AVWANRE eje guọnọ vwo omakpokpọ sasasa. Kọyensorọ avwanre vwọ riemu, sasoma, je vwẹrote oma avwanre. Dede nẹ ọnana guọnọ ẹgbaẹdavwọn, avwanre mrẹ erere no cha, ọtiọyena kẹ avwanre ruo ọkieje. Ẹkẹvuọvo, o ji fo nẹ e vwo omakpokpọ vwẹ idjerhe ọfa.

² Avwanre eje nabọ davwẹngba vwo yono kpahen Jihova re, ẹkẹvuọvo, o ji fo nẹ e ru oyerinkugbe rẹ avwanre vẹ Ọghẹnẹ ganphiyọ. Jud vwọ vuẹ Inenikristi nẹ ayen “sẹro rẹ oma rẹ [ayen] vwẹ evun rẹ ẹguọnọ rẹ Ọghẹnẹ,” o de ji dje oborẹ ayen se vwo ruo. Ọ da ta: “Wa nabọ tọn oma rẹ ovwan phihọ evun rẹ esegbuyota ọfuanfon rẹ ovwan.” (Jude 20, 21) Ọtiọyena, mavọ yen a sa vwọ bọn esegbuyota gan?

3-5. (a) Ẹro vọ yen Eshu guọnọre nẹ wo vwo ni irhi rẹ Jihova? (b) Ẹro vọ yen wo vwo ni irhi rẹ Jihova?

³ Ofori nẹ omuwẹro komobọ nẹ idjerhe rẹ Jihova yen me yovwin. Eshu guọnọre nẹ wo roro nẹ irhi rẹ Jihova gan nọ, ọ nẹ oma cha vwerhen owẹ siẹrẹ wẹ  komobọ de brorhiẹn rẹ obo ri yovwirin yẹrẹ obo re brare. Vwo nẹ evunrẹ ogba rẹ Idẹn rhe yen Eshu vwọ davwẹngba rere ihwo vwo se eta yena gbuyota. (Jẹnẹsis 3:1-6) O ji ru ọtiọyen nonẹna.

⁴ Eta rẹ Eshu na ghini uyota? Irhi rẹ Jihova gan nọ? Ẹjo. Kerẹ udje, vwẹro roro nẹ wọ yan vwẹ asan oyoyovwin ọvo. Wo de noso nẹ a gba ogba riariẹ ẹbẹre ọvo. Ọkiọvo wọ guọnọ ẹbẹre ochekọ na ro, kẹ wo roro, ‘Diesorọ a vwọ gba ogba riariẹ ẹbẹre nana?’ Siẹvuọvo na, wo de nyo edo rẹ okpohrokpo rọ guan vwẹ ẹbẹre wọ guọnọ rua na. Ẹro vọ yen wo che vwo ni ogba na? Omuẹro nẹ oma cha vwerhen owẹ nẹ a gba ogba riariẹ asan na rere okpohrokpo na vwo jẹ uwe emuorọ! Irhi rẹ Jihova ghwa họhọ ogba tiọyena, Idẹbono kọyen okpohrokpo na. Baibol na da vwẹ orhọesio nana kẹ avwanre: “Jẹn ẹro hiẹ wẹ, rhẹrẹ. Ukọn wẹn idẹbono na ọ rọ rhẹrẹ kerẹ okpohrokpo rọ guan, ro guọnọ obo rọ rọ.”—1 Pita 5:8.

⁵ Jihova guọnọre nẹ avwanre yerin uvi rẹ akpeyeren. Ọ guọnọ nẹ Idẹbono phiẹn avwanre-e, kọyensorọ ọ vwọ vwẹ irhi rọyen vwọ sẹro rẹ avwanre jẹ nẹrhẹ e vwo omavwerhovwẹn. (Ẹfesọs 6:11) Jems da ta: “Ohwo rọ nabọ ni urhi na fiotọ, urhi rẹ egbomọphẹ na, rọ nabọ fuẹrẹ . . . ko vwo ebruba vwẹ iruo rọye.”—Jems 1:25.

6. Mavọ yen e se vwo vwo imuẹro dẹn nẹ idjerhe rẹ Jihova yen me yovwin?

⁶ E de nene odjekẹ rẹ Jihova, kẹ avwanre che yerin omamọ rẹ akpọ, oyerinkugbe rẹ avwanre vẹ Jihova kọ cha ganphiyọ. Kerẹ udje, avwanre mrẹ erere  siẹrẹ e de nene odjekẹ rẹ Jihova ra vwọ nẹrhovwo rhe ọkieje. (Matiu 6:5-8; 1 Tẹsalonaika 5:17) Oma je vwerhen avwanre siẹrẹ e de nene odjekẹ rẹ Jihova re vwo kuomakugbe vwẹ ẹga, e vwo bru ohwohwo uche, ji vwobọ vwẹ iruo rẹ aghwoghwo vẹ eyono na. (Matiu 28:19, 20; Galesha 6:2; Hibru 10:24, 25) E de roro kpahen oborẹ enana bọn esegbuyota rẹ avwanre gan re, ọ cha nẹrhẹ e vwo imuẹro dẹn nẹ idjerhe rẹ Jihova yen me yovwin.

7, 8. Die yen sa chọn avwanre uko vwo jẹ ẹnwan ẹruọ kpahen edavwini re cha vwẹ obaro na?

⁷ Avwanre sa ro ẹnwan nẹ vwẹ obaro na e che rhiẹromrẹ edavwini re cha vrẹ avwanre oma. Wo de vwo oka rẹ ẹwẹn tiọyena, karophiyọ eta rẹ Jihova nana:  “Mẹvwẹ Ọrovwohwo Ọghẹnẹ wẹn, ro yono uwe vwọ mrẹ erere, ro sun we vwẹ idjerhe ru wọ cha wan na. E ọ dianẹ kẹ wọ kerhọn rẹ irhi mẹ! Mane ufuoma wẹn ka dia kerẹ urhie, ọvwata wẹn ka dia kerẹ omimi rẹ urhie.”—Aizaya 48:17, 18.

⁸ Avwanre da kerhọ rẹ Jihova, ufuoma avwanre kọ cha dia kerẹ urhie rọ kpọ-ọ, ọvwata avwanre kọ cha dia kerẹ omimi rẹ urhie rọ hworhẹ orhoma rẹ urhie ọkeneje. O toro obo re rhiẹromrẹ-ẹ, avwanre sa fuevun kẹ Jihova. Baibol na da ta: “Mu oghwa wẹn nyẹ Ọrovwohwo, kọ sẹro wẹ; ọ cha sa rhọvwe nẹ e ghwie ọvwata-a.”—Une Rẹ Ejiro 55:22.

9, 10. Die yen o mudiaphiyọ ra vwọ dia omiragua?

⁹ Oyerinkugbe wẹn vẹ Jihova da nabọ gan re, ku wo che “ru kerẹ omiragua.” (Hibru 6:1) Die yen o mudiaphiyọ ra vwọ dia omiragua?

¹⁰ Ọ dia ikpe yen Onenikristi vwọ dia omiragua-a. Ohwo rọ dia omiragua reyọ Jihova vwo mu ugbeyan, ko ji nẹ erọnvwọn kirobo rẹ Jihova no. (Jọn 4:23) Pọl de si: “Otu ri nenesi rẹ ugboma na vwenẹ, iruo rẹ ugboma na ayen ruẹ, ẹkẹvuọvo otu ri nenesi rẹ [“ẹwẹn,” NW] na iruo rẹ [“ẹwẹn,” NW ] na kọye ayen ruẹ rhe.” (Rom 8:5) Ohwo ro tedje tiọyen tẹnroviẹ akpọẹriọ yẹrẹ ekuakua rẹ akpeyere-en. Ukperẹ ọtiọyen, ọ tẹnroviẹ ẹga rẹ Jihova, ko ji bru omamọ orhiẹn vwẹ akpeyeren. (Isẹ 27:11; se Jems 1:2, 3.) A sa riẹriẹ vwo ru umiovwo-o. Ọ riẹn obo ri yovwirin, ọ je davwẹngba vwo ruo.

11, 12. (a) Die yen Pọl ta kpahen “ọhọ ri se vwo vughe emu” ra guọnọ mie Onenikristi? (b) Mavọ yen re vwo yerin te Onenikristi ro tedje vwọ họhọ ohwo ro yono eha?

 ¹¹ Ọ guọnọ ẹgbaẹdavwọn a ke sa rho te omiragua. Ọyinkọn Pọl de si: “Emuọre ọgangan ọye a vwọ kẹ omiro gua, kẹ eye ri vwo ọhọ ri se vwo vughe emu esiri vẹ ọbrabra.” (Hibru 5:14) Ubiota rẹ “vwo” na, sa nẹrhẹ e roro kpahen ohwo ro yono oma rọyen phiyọ ehaẹha.

¹² Avwanre da mrẹ ohwo rọ nabọ tẹn ona rẹ eha, avwanre cha riẹn nẹ ọ ghwọrọ ọke vwo yono ọ ke sa tẹn ona na. Ọ dia ọtiọyen e vwiẹrẹ-ẹ. Ọmọboba ghwa riẹn obo rọ cha vwẹ abọ vẹ awọ rọyen vwo ruiruo wa-an. Jẹ ọke vwọ yanran na, ko che yono obo ra yọnrọn erọnvwọn, kugbe oyan. Ọ da nabọ yono oma rọyen, kọ sa tẹn ona rẹ oka rẹ eha ọvo. Vwẹ idjerhe vuọvo na, ọ reyọ ọke vẹ uyono a ke sa dia Onenikristi ro te omiragua.

13. Die yen sa chọn avwanre uko vwọ riẹn iroro rẹ Jihova?

¹³ Vwevunrẹ ọbe nana, avwanre fuẹrẹn obo re se vwo vwo iroro rẹ Jihova, ji ni erọnvwọn kirobo ro no. Avwanre ji yono obo re se vwo vwo ẹguọnọ rẹ irhi rẹ Jihova. E de che brorhiẹn, ofori nẹ a nọ oma avwanre: ‘Ẹkpo rẹ Baibol vọ yen shekpahen ẹdia nana? Mavọ me sa vwọ reyọ vwo ruiruo? Die yen Jihova cha guọnọ nẹ mi ru?’—Se Isẹ 3:5, 6; Jems 1:5.

14. Die yen ofori nẹ avvwanre ru vwọ bọn esegbuyota avwanre gan?

¹⁴ Ọkieje yen e che vwo ru esegbuyota rẹ avwanre gan kpahen Jihova. Kirobo rẹ omamọ emu ru oma rẹ ohwo gan na, ọtiọyen eyono rẹ Ota rẹ Jihova je cha  bọn esegbuyota rẹ avwanre gan. Ọke rẹ avwanre vwọ ton uyono rẹ Baibol phiyọ, e de yono erọnvwọn sansan kpahen Jihova vẹ idjerhe rọyen. Ẹkẹvuọvo, ọke vwọ yanran na, ofori nẹ e vwo ẹruọ rẹ erọnvwọn ikokodo. Ọnana yen oborẹ Pọl mudiaphiyọ rọ vwọ ta: “Emuọre ọgangan ọye a vwọ kẹ omiro gua.” A da vwẹ eta nana vwo ruiruo, ke che vwo aghwanre. Baibol na djere nẹ ọnana yen “ẹtuọhọ rẹ ẹghwanre.”—Isẹ 4:5-7; 1 Pita 2:2.

15. Mavọ yen ẹguọnọ re vwo kpahen Jihova vẹ iniọvo na ghanre te?

¹⁵ Ohwo ki se vwo omakpokpọ sasasa ọkieje, ko fori nẹ ọ vwẹrote oma rọyen kọke kọke. Vwẹ idjerhe vuọvo na, ohwo rọ dia omiragua riẹn obo rọ guọnọre o se vwo ru oyerinkugbe rọyen vẹ Jihova gan. Pọl da karophiyọ avwanre: “Wa davwe oma rẹ ovwan ni sẹ ovwan churu obọ mu esegbuyota rẹ ovwan na.” (2 Kọrẹnt 13:5) Dedena, ọ ghwa dia esegbuyota ọgangan ọvo a guọnọre-e. O ji fo nẹ e ru ẹguọnọ rẹ avwanre vwo kpahen Jihova vẹ iniọvo na ganphiyọ. Pọl da ta: “Mi de vwo . . . erianriẹn ejobi, ọ da dianẹ mi vwo eseguyota, ro se ghwie ugbenu, ẹkẹvuọvo yi mi vwo ẹguọnọ-ọ, yo mẹvwẹ ohwo diodi.”—1 Kọrẹnt 13:1-3.

16. Oka rẹ iroro vọ yen Eshu guọnọ nẹ avwanre vwo?

¹⁶ Eshu guọnọre nẹ avwanre roro nẹ e che se ru obo re vwerhen Jihova oma-a. Ọ guọnọ nẹ ofu dje avwanre, e mi roro nẹ ebẹnbẹn rẹ avwanre che se no-o. Ọ guọnọ nẹ avwanre vwẹroso iniọvo rẹ avwanre-e, ọ je tobọ guọnọ nẹ avwanre vwo omavwerhovwẹ-ẹn. (Ẹfesọs 2:2) Eshu riẹnre nẹ orharhe rẹ iroro cha wan  avwanre oma ji miovwo oyerinkugbe rẹ avwanre vẹ Jihova. Ẹkẹvuọvo, Jihova kẹ avwanre orọnvwọn rọ sa chọn avwanre uko vwo phi erharhe rẹ iroro kparobọ. Ọyehẹ iphiẹrophiyọ.

17. Mavọ yen iphiẹrophiyọ ghanre te?

¹⁷ Vwẹ 1 Tẹsalonaika 5:8, Baibol na da vwẹ iphiẹrophiyọ rẹ avwanre vwo dje erhu rẹ isodje kuẹphiyọ vwẹ ofovwin, ọ tare nẹ a “vwẹ esivwo ru erhu vwo tughẹ.” Iphiẹrophiyọ re vwo kpahen ive rẹ Jihova cha sẹro iroro rẹ avwanre, je chọn avwanre uko vwọ sen erharhe rẹ iroro.

18, 19. Die yen ru iphiẹrophiyọ rẹ Jesu gan?

¹⁸ Iphiẹrophiyọ bọn Jesu gan. Vwẹ ason rọ koba rọyen vwẹ otọrakpọ na, o nene ẹdia sansan muabọ. Ugbeyan rọyen shẹrẹ. Ọfa senrọ. Efa djẹ jovwo. Ihwo rẹ ẹkuotọ rọyen vwọsuọ, ayen da je tanẹ ehwe. Die  yen vwẹ ukẹcha kẹ vwo chirakon rẹ erọnvwọn nana eje? Jesu “vwi fiki rẹ aghọghọ rọ hẹ obaro kẹ chiri odjadja rẹ [“urhe roja,” NW] na, ọ davwerhọn rẹ omaẹvuọ na-a, o de rhi tidia obọrhe rẹ ekete rẹ Ọghẹnẹ.”—Hibru 12:2.

¹⁹ Jesu riẹnre nẹ evun-ẹfuọn rọyen cha ghwa urinrin rhe Ọsẹ rọyen, o ji che dje Eshu phiyọ ọvwọrofian. Iphiẹrophiyọ nana nẹrhẹ o vwo aghọghọ rode. Ọ je riẹn nẹ o rhe che kri-i, kọ cha vwomaba Ọsẹ rọyen vwẹ odjuvwu. Iphiẹrophiyọ nana vwẹ ukẹcha kẹ vwo chirakon. Kerẹ Jesu, e jẹ a tẹnrovi iphiẹrophiyọ avwanre. Ọ cha chọn avwanre uko vwo chirakon otoro obo re phiare-e.

20. Die yen sa chọn wẹ uko vwọ sẹro rẹ iphiẹrophiyọ wẹn?

²⁰ Jihova mrẹ esegbuyota vẹ akoechiro wẹn. (Aizaya 30:18; se Malakae 3:10.) O veri nẹ ọ cha “vwẹ  obo rẹ udu wẹn guọnọre kẹ wẹ.” (Une Rẹ Ejiro 37:4) Ọtiọyena, gbe mu ẹwẹn kpahen iphiẹrophiyọ wẹn. Eshu guọnọre nẹ iphiẹrophiyọ wẹn vawabọ, rere wo roro nẹ ive rẹ Jihova che rugba-a. Ẹkẹvuọvo, wo jẹ ọ phiẹn wẹ-ẹn! Wo de noso nẹ iphiẹrophiyọ wẹn rha nabọ muwẹro-o, gba guọnọ ukẹcha rẹ Jihova. Karophiyọ eta rehẹ Filipae 4:6, 7: “Wa ro ẹnwan rẹ emuọvo-o, ẹkẹvuọvo vwi kemu kemu orẹ kugbe oyare kugbe ẹkpẹvwẹ ta ọdavwẹ wẹn kẹ Ọghẹnẹ. Ufuoma rẹ Ọghẹnẹ rọ nọ ẹruọ ejobi, kọ yọnrọn udu vẹ iroro rẹ ovwan vwi Kristi Jesu.”

21, 22. (a) Die yen ọhọrẹ rẹ Ọghẹnẹ vwọ kẹ otọrakpọ na? (b) Die yen orhiẹn-ebro wẹn?

²¹ Ghwọrọ ọke vwo roro kpahen akpọ kpokpọ na kọke kọke. O rhe che kri-i, ihwo eje rehẹ otọrakpọ na ke cha ga Jihova. (Ẹvwọphia 7:9, 14) Di roro oborẹ akpọ yena cha dia! O che yovwin vrẹ kemu kemu rẹ avwanre rorori! Eshu vẹ emekashe rọyen kugbe umwemwu eje che no. Ọga vẹ ughwu rha cha dia ọfa-a. Ukperẹ ọtiọyen, ku wo che vrẹn kẹdẹ kẹdẹ vẹ omakpokpọ sasasa. Ihwo eje ke cha wiankugbe vwo ru akpọ na phiyọ iparadaisi. Omamọ rẹ emuọre yen a cha re, asan eje cha vọn vẹ ufuoma. A rha cha mrẹ ozighẹ yẹrẹ ozighi ọfa-a, ihwo eje ki che vwo ẹguọnọ rẹ ohwohwo. Ihworakpọ eje cha riavwerhen rẹ “urinrin rẹ egbemọphẹ rẹ emọ rẹ Ọghẹnẹ.”—Rom 8:21.

²² Jihova guọnọre nẹ wọ dia ugbeyan rọyen. Ọtiọyena, gba davwẹngba wẹn eje vwọ kerhọ rọyen ji sikẹrẹ kẹdẹ kẹdẹ. Wo de ru ọtiọyen, ku wọ sa dia evunrẹ ẹguọnọ rẹ Ọghẹnẹ bẹdẹ!—Jude 21.