1-3. (a) Diesorọ ọmiọvwọn vwọ guọnọ nẹ ọmọ rọyen dia fuanfon? (b) Diesorọ Jihova vwọ guọnọ nẹ ihwo rọyen dia fuanfon?

VWẸ ẹwẹn roro oni ro vwo ẹguọnọ ro muegbe rẹ ọmọ rọyen vwọ kẹ isikuru. Ọ da nabọ họ ọmọ na ji vwo imuẹro nẹ iwun rọyen pha fuanfon. Ọnana che toroba omakpokpọ rẹ ọmọ na je nẹrhẹ ihwo riẹn nẹ ọsẹ vẹ oni rọyen nabọ vwẹrote.

² Ọsẹ avwanre, Jihova guọnọre nẹ avwanre dia fuanfon. (Une Rẹ Ejiro 18:26) Ọ riẹnre nẹ a cha mrẹ  erere siẹrẹ a da dia fuanfon; avwanre je cha ghwa ujiri rhe Jihova.—Izikiẹl 36:22; se 1 Pita 2:12.

³ Die yen o mudiaphiyọ a vwọ dia fuanfon? Diesorọ ẹfuọn vwọ ghanre kẹ avwanre? A cha vwọ fuẹrẹn enọ nana, avwanre sa mrẹ ẹdia evo avwanre da guọnọ ewene evo.

4, 5. (a) Diesorọ o vwo fo nẹ a dia fuanfon? (b) Die yen emama yono avwanre kpahen ẹro rẹ Jihova vwo ni ẹfuọn?

⁴ Avwanre yono ẹfuọn vwo mie Jihova. (Livitikọs 11:44, 45) Orọnvwọn rọ ma kenu ro mu avwanre vwọ dia fuanfon kẹ ọna; avwanre guọnọ “vwẹ ẹro kere Ọghẹnẹ.”— Ẹfesọs 5:1.

⁵ Emama yono avwanre erọnvwọn buebun kpahen ẹro rẹ Jihova vwo ni ẹfuọn. Jihova ma erọnvwọn sansan phiyọ akpọ na ri ru aphopho vẹ ame na fuan. (Jerimaya 10:12) Roro kpahen idjerhe buebun rẹ akpọ na vwo ru oma rọyen fuan dede nẹ ihworakpọ miovwiro. Kerẹ udje, Jihova ma erọnvwọn itete evo ri vwo arhọ, jẹ a sa vwẹ erọ diodi mrẹ aye-en. Erọnvwọn nana wene inuhu phiyọ erọnvwọn ri jẹ ohwo oma ẹwan. Ọnana gbe ohwo unu mamọ. Egberianriẹn tobọ vwẹ ayen vwo rhuẹrẹ asan rẹ ihworakpọ miovwirin.—Rom 1:20.

6, 7. Mavọ yen Urhi rẹ Mosis na vwo djephia nẹ ofori nẹ ihwo re ga Jihova dia fuanfon?

⁶ A je mrẹ ọghanrovwẹ rẹ ẹfuọn vwo nẹ Urhi rẹ Jihova vwọ kẹ ihwo rẹ Izrẹl womarẹ Mosis. Kerẹ udje, ihwo na cha dia fuanfon tavwen Jihova ki che rhiabọreyọ ẹga rayen. Vwẹ Ẹdẹ rẹ Arhuẹrẹ na,  orherẹn rode na họ abọ ivẹ. (Livitikọs 16:4, 23, 24) Vwọba, irhẹrẹn ichekọ na nabọ hworhẹ abọ vẹ awọ rayen tavwen ayen ki ze izobo. (Eyanno 30:17-21; 2 Ikun Rivie 4:6) Vwẹ ẹdia evo, ohwo rha yọnrọn irhi rẹ omaẹfuọn na-a, a sa teyọn hwe.—Livitikọs 15:31; Ukeri 19:17-20.

⁷ Kẹ nonẹna vwo? Avwanre se yono kpahen Jihova womarẹ Urhi na. (Malakae 3:6) Ọnana djephia nẹ ofori nẹ idibo rẹ Jihova dia fuanfon. Irhi rẹ Jihova ji wene-e. Nonẹna, ọ je guọnọ nẹ idibo rọyen je dia fuanfon.—Jems 1:27.

8. Ẹdia vọ yen a da guọnọ nẹ a dia fuanfon?

⁸ Vwẹ ẹro rẹ Jihova, ra vwọ dia fuanfon vrẹ e di vwo ru ugboma, iwun vẹ uwevwin rẹ avwanre fon. Ẹfuọn churobọ si akpeyeren rẹ avwanre eje. O ji churobọ si ẹga, uruemu vẹ iroro rẹ avwanre. Jihova ki se ni avwanre fuanfon, avwanre ke dia ihwo re fonro vwẹ kẹdia kẹdia.

9, 10. Die yen o mudiaphiyọ rẹ ẹga avwanre vwọ dia fuanfon?

⁹ Ẹga rọ fonro. Ofori nẹ a kẹnoma kẹ ẹga rẹ efian vwẹ kidjerhe kidjerhe. E vwo mu ihwo rẹ Izrẹl kpo eviẹn vwẹ Babilọn, ihwo re ga ẹga rẹ efian yen riariẹ ayen phiyọ. Aizaya mraro nẹ ihwo rẹ Izrẹl che rhivwin kpo ẹkuotọ rayen ra rhoma vwẹ ẹga rẹ uyota vwo mu. Jihova da vuẹ ayen: “Yanran nẹ etiyin, wọ vwẹ obọ te emu ogbegbe-e; yan nẹ uherevie rọye, ru oma wẹn fon.” Iyono vẹ iruemu rẹ ẹga rẹ efian rehẹ Babilọn rhe che se miovwo ẹga raye-en.—Aizaya 52:11.

 ¹⁰ Nonẹna, ofori nẹ Inenikristi je kẹnoma kẹ ẹga rẹ efian. (Se 1 Kọrẹnt 10:21.) Erẹ, ẹkuruemu vẹ iyono rẹ ihwo buebun titẹ nonẹna nẹ obọ rẹ ẹga rẹ efian rhe. Kerẹ udje, ihwo buebun vwo imuẹro nẹ o vwo orọnvwọn ro nẹ oma rẹ ohwo siẹrẹ o de ghwu nu ro ji yerẹn, e mu ẹkuruemu buebun kpahen imuẹro nana. (Aghwoghwo 9:5, 6, 10) Ofori nẹ Inenikristi kẹnoma kẹ ẹkuruemu nana eje. Ihwo rẹ orua avwanre sa guọnọ nẹ avwanre vwobọ vwẹ ayen. Ẹkẹvuọvo, kidie nẹ avwanre guọnọre nẹ Jihova ni avwanre fuanfon, a rha rhọnvwan kẹ aye-en.—Iruo Rẹ Iyinkọn Na 5:29.

11. Die yen o mudiaphiyọ ra vwọ dia fuanfon vwọrẹ uruemu?

¹¹ Uruemu rọ fonro. Jihova ki se ni avwanre fuanfon, ofori nẹ a kẹnoma kẹ koka koka rẹ uruemu ọfanrhiẹn. (Se Ẹfesọs 5:5.) Vwẹ Baibol na, Jihova vuẹ avwanre nẹ e “si oma nẹ ọfanrhiẹ.” O djere phephẹn nẹ evwọfanrhiẹn ri kurhẹriẹ-ẹ “cha sa reuku rẹ uvie rẹ Ọghẹnẹ na-a.”—1 Kọrẹnt 6:9, 10, 18; ni Eta rẹ Odjefiotọ 22.

12, 13. Diesorọ o vwo fo nẹ iroro avwanre dia fuanfon?

¹² Iroro rọ fonro. Obo ohwo roro yen o ruẹ phia. (Matiu 5:28; 15:18, 19) Omamọ iroro che mu ohwo vwo ru obo ri yovwirin. Vwọrẹ uyota, avwanre gbare-e, ọtiọyena iroro echọchọ sa rhe ọke sansan. E da rhe, e jẹ a sen ayen kpakpata. E rhe ru ọtiọye-en, ọke vwọ yanran na ubiudu rẹ avwanre rha cha dia fuanfo-on. Ememerha na kẹ avwanre che vwo ẹwẹn re vwo ru obo rẹ avwanre roro kpahan na. Ukperẹ ọtiọyen, ofori nẹ e roro kpahen obo ri yovwirin ọkieje.  (Se Filipae 4:8.) Ọtiọyena, ofori nẹ a kẹnoma kẹ erọnvwọn ra vwọ diotọ ri churobọ si ọfanrhiẹn vẹ ozighi. O ji fo nẹ a nabọ sane obo ra cha ta ota kpahen vẹ obo re che se, ji ni.—Une Rẹ Ejiro 19:8, 9.

¹³ Ra vwọ dia evunrẹ ẹguọnọ rẹ Ọghẹnẹ, ofori nẹ ẹga rẹ avwanre dia fuanfon ji te uruemu vẹ iroro avwanre. Ẹkẹvuọvo Jihova je guọnọ nẹ a dia fuanfon vwọrẹ ugboma.

14. Diesorọ ọ vwọ ghanre nẹ a dia fuanfon vwọrẹ ugboma?

¹⁴ Avwanre vẹ ihwo re dia kẹrẹ avwanre cha mrẹ erere siẹrẹ e de ru ugboma vẹ asan rẹ avwanre dia fuanfon. Oma cha vwerhen avwanre, ihwo efa je cha vwẹrokere avwanre. Ẹkẹvuọvo, vwọ vrẹ enana, o vwo oboresorọ ra vwọ dia fuanfon vwọrẹ ugboma; ọ ghwa ujiri rhe Jihova. Roro kpahen ẹdia nana: Wọ da mrẹ ọmọ rọ pha gbegbe ọkieje, ọ cha nẹrhẹ wọ vwẹ orharhe ẹro vwo ni ọsẹ vẹ oni rọyen. Vwẹ idjerhe vuọvo na, avwanre rha vwẹrote ji ru oma rẹ avwanre fuanfo-on, ihwo je cha vwẹ orharhe ẹro vwo ni Jihova. Pọl da ta: “Avwanre phi ọghrọrọ phihọ idjerhe rẹ ohwo ọvuọvo-o, rere e vwo jẹ ogbeku ẹmrẹ vwẹ odiboegbe rẹ avwanre, ẹkẹvuọvo avwanre dje oma rẹ avwanre phia kerẹ idibo rẹ Ọghẹnẹ vwẹ idjerhe kidjerhe.”—2 Kọrẹnt 6:3, 4

15, 16. Die yen e se ru rere a vwọ dia fuanfon?

¹⁵ Ugboma vẹ iwun rẹ avwanre. Ofori nẹ e ru oma rẹ avwanre fon kẹdẹ kẹdẹ. Kerẹ udje, ofori nẹ a họ kẹdẹ kẹdẹ o da dia obo re se ru. E jẹ a vwẹ odja vẹ  ame vwọ hworhẹ abọ, ma rho tavwen e ki chere emu yẹrẹ riemu, kugbe ọke re de nẹ itọlẹti rhe yẹrẹ djobọte orọnvwọn rọ pha gbegbe. E se no nẹ abọ-ẹhworhẹ fiemu ọvo-o, jẹ ọ sa nẹrhẹ ega jẹ ẹhra nene asan eje. O se ji sivwin arhọ. Avwanre rhe vwo itọlẹti-i, o ji vwo obo re se ru kpahọn. Ihwo rẹ Izrẹl vwo omamọ rẹ itọlẹti-i, ọtiọyena kẹ ayen tọn isọn na phiyọ otọ vwẹ asan ro sheri kẹ uwevwin rẹ ihwo vẹ asan re de vo ame.—Urhi Rivẹ 23:12, 13.

¹⁶ Ofori nẹ iwun rẹ avwanre dia fuanfon. Ọ dianẹ ke cha dia ghanghanre yẹrẹ dia i ri sherhe tavwen i ki shephiyọ-ọ. (Se 1 Timoti 2:9, 10.) Avwanre guọnọre nẹ irhuon rẹ avwanre ghwa ujiri rhe Jihova ọkieje.—Taitọs 2:10.

17. Diesorọ o vwo fo nẹ e ru asan rẹ avwanre dia fuanfon?

 ¹⁷ Asan rẹ avwanre dia. E jẹ uwevwin rẹ avwanre dia fuanfon, otoro obo rọ hepha-a. O ji fo nẹ imoto rẹ avwanre dia fuanfon, ji te imotosaikoro, idjighere yẹrẹ erọnvwọn efa tiọyen, ma rho a da cha ghwa kpo uyono yẹrẹ iruo aghwoghwo na. Wo de no, avwanre vuẹ ihwo kpahen akpọ kpokpọ rọ cha dia fuanfon. (Luk 23:43; Ẹvwọphia 11:18) Asan rẹ avwanre dia da dia fuanfon, o che djephia nẹ avwanre muegbe hẹrhẹ akpọ kpokpọ na.

18. Diesorọ o vwo fo nẹ e ru asan rẹ avwanre da ga Ọghẹnẹ fuanfon?

¹⁸ Asan rẹ avwanre da ga Ọghẹnẹ. Avwanre djephia nẹ ẹfuọn pha ghanghanre siẹrẹ e de ruẹ asan rẹ avwanre da ga Ọghẹnẹ fuanfon, te ọ dianẹ Ọguan Ruvie yẹrẹ asan re de ruẹ ọghwẹkoko. Ihwo da rhe Ọguan Ruvie na obọ rẹsosuọ, ayen vwo oniso rẹ ẹfuọn rẹ avwanre. Ọnana ghwa ujiri rhe Jihova. Avwanre eje vwo uphẹn re vwo toroba orufon rẹ Ọguan Ruvie na kugbe ẹrhuẹrẹ rẹ asan ri miovwirin.—2 Ikun Rivie 34:10.

19. Die yen ofori nẹ a kẹnoma kẹ?

¹⁹ Baibol na ghwe djunute iruemu ebrare eje ra cha kẹnoma kẹ-ẹ, dedena, ọ vwẹ odjekẹ phia re cha vwẹ ukẹcha kẹ avwanre vwọ riẹn ẹro rẹ Jihova vwo ni erọnvwọn tiọyena. Jihova guọnọre nẹ e phopho isigati-i, a da udi vroma-a yẹrẹ a reyọ ihuvwun eganga-an. Avwanre da dia ugbeyan rẹ Ọghẹnẹ, a cha kẹnoma kẹ erọnvwọn nana. Diesorọ? Kidie avwanre  ni arhọ ghanghanre. Iruemu tiọyena sa so ughwu kẹ avwanre kpregede, so ọga kẹ avwanre vẹ ihwo efa re kerẹ avwanre. Ihwo buebun davwẹngba ayen vwọ dobọ rẹ iruemu nana ji fikirẹ omakpokọ rayen. Ẹkẹvuọvo, kerẹ igbeyan rẹ Jihova, ẹguọnọ rẹ avwanre vwo kpahen Ọghẹnẹ, yen mu avwanre vwọ kẹnoma kẹ ayen. Eghene rẹ aye ọvo da ta: “Womarẹ ukẹcha rẹ Jihova, mi de siobọnu isigati ephopho, udiẹda vroma, vẹ ihuvwun egangan ẹreyọ, mi de ji ru akpeyeren mẹ fon. . . . Mi niro nẹ mi che se ru ewene nana komobọ-ọ.” E jẹ a fuẹrẹn ẹkpo rẹ Baibol iyorin re cha vwẹ ukẹcha kẹ ohwo vwọ dobọ rẹ iruemu nana ji.

20, 21. Iruemu vọ yen Jihova guọnọre nẹ a kẹnoma kẹ?

²⁰ “Imoni re ghare, rẹ avwanre vwo vwo ive nana nure na, e gbe jẹn avwanre họ oma rẹ avwanre nẹ ẹgua rẹ ugboma vẹ [“ẹwẹn,” NW], re ru ẹfuọn gba vwẹ oshọẹdjẹ rẹ Ọghẹnẹ.” (2 Kọrẹnt 7:1) Jihova guọnọre nẹ a kẹnoma kẹ erọnvwọn ri se miovwin ugboma vẹ iroro rẹ avwanre.

²¹ E dje oboresorọ ro vwo fo nẹ a “họ oma rẹ avwanre nẹ ẹgua” vwevunrẹ 2 Kọrẹnt 6:17, 18. Jihova da vuẹ avwanre: “Wọ vwẹ obọ te emu ogbegbe-e.” O de ji ve: “Ki mi dede ovwan reyọ ke me dia ọsẹ kẹ ovwan, ovwan ke dia emeshare mẹ vẹ emetẹ mẹ.” Jihova che ghini vwo ẹguọnọ avwanre kirobo ọsẹ vwo ẹguọnọ rẹ emọ rọyen, siẹrẹ a da kẹnoma kẹ kemu kemu rọ cha nẹrhẹ a dia gbegbe vwẹ ẹro rọyen.

22-25. Ẹkpo rẹ Baibol vọ yen cha chọn avwanre uko vwọ kẹnoma kẹ iruemu ebrabra?

²² “Guọnọ Ọrovwohwo Ọghẹnẹ wẹn vwẹ udu wẹn ejobi, vwẹ ẹnwẹn wẹn ejobi, kugbe iroro wẹn  ejobi.” (Matiu 22:37) Ọnana yen urhi rọ ma rho kparobọ. (Matiu 22:38) Jihova muwan rẹ ẹguọnọ rẹ avwanre. Mavọ yen e se vwo vwo ẹguọnọ rọyen, siẹrẹ avwanre de ru obo re sa so ughwu kẹ avwanre yẹrẹ miovwo afọnrhe avwanre? Ukperẹ ọtiọyen, e jẹ avwanre djephia ọkieje nẹ avwanre ni arhọ ghanghanre.

²³ “[Jihova] kẹ ihwo ejobi arhọ kugbe ẹnwẹn kugbe kemu kemu.” (Iruo Rẹ Iyinkọn Na 17:24, 25) Ugbeyan wẹn da kẹ wẹ okẹ ọghanghanre, wo che do kufia yẹrẹ guọghọ? Arhọ ọyen okẹ ọghanghanre ro nẹ obọ rẹ Jihova rhe. Ofori nẹ a vwẹ ẹro ọghanghanre vwo ni okẹ nana. Ọtiọyena, e jẹ e yerin akpọ vwẹ idjerhe rọ cha ghwa ujiri vwo rhe Jihova.—Une Rẹ Ejiro 36:9.

²⁴ “Guọnọ ọrivẹ wẹn kirobo wọ guọnọ oma wẹn.” (Matiu 22:39) Iruemu ebrabra na ji djobọte ihwo efa. E sa so omaẹwan kẹ ihwo re kẹrẹ avwanre, re dia ihwo rẹ avwanre vwo ẹguọnọ kpahen mamọ. Kerẹ udje, ohwo ro nene ohwo ro phopho isigati dia uwevwin sa muọga ọgangan kidie ọ wẹn ivwirhin rẹ isigati na reyọ. Ẹkẹvuọvo, a da dobọ rẹ iruemu ebrabra ji, jẹ avwanre djephia nẹ e vwo ẹguọnọ rẹ ihwo re kẹrẹ avwanre.—1 Jọn 4:20, 21.

²⁵ “Karophihọ ihwo na nẹ ayen vwẹ oma kpotọ kẹ ayen otu ri suẹn ihwo, kugbe ihwo ride ri vwo ogangan.” (Taitọs 3:1) Vwẹ ẹkuotọ buebun, ọ vwọso urhi re vwo vwo ihuvwun egangan yẹrẹ reyọ ayen. Ọ vwọ dianẹ Jihova ji urhi nẹ e muọghọ kẹ ihwo ri suẹn na, ko ji fo nẹ a yọnrọn irhi tiọyena.—Rom 13:1.

26. (a) Die yen ofori nẹ e ru Jihova ki se rhiabọreyọ ẹga rẹ avwanre? (b) Diesorọ a vwọ dia fuanfon vwẹ ẹro rẹ Ọghẹnẹ vwọ dia idjerhe rẹ akpeyeren ro me yovwin?

 ²⁶ Avwanre da guọnọ dia ugbeyan rẹ Jihova, ọ sa dianẹ ofori nẹ e ru ewene evo. Ọ da dia ọtiọyen, e jẹ a tuọnphiyọ enẹna. Ọ lọhọre ra vwọ dobọ rẹ iruemu ebrabra ji-i, ẹkẹvuọvo e se ruo! Jihova veri nẹ ọ cha chọn avwanre uko. Ọ da ta: “Mẹvwẹ Ọrovwohwo Ọghẹnẹ wẹn, ro yono uwe vwọ mrẹ erere, ro sun we vwẹ idjerhe ru wọ cha wan na.” (Aizaya 48:17) Avwanre da davwẹngba vwọ dia fuanfon, ke che vwo imuẹro nẹ avwanre ghwa ujiri rhe Ọghẹnẹ.