1, 2. Diesorọ wo vwo vwo ẹguọnọ rẹ Jihova Ọghẹnẹ?

WO VWO ẹguọnọ rẹ Ọghẹnẹ? Ọ sa dianẹ wo vwo ẹguọnọ rọyen mamọ, wọ da vwomakpahotọ vwọ kẹ. Wọ sa reyọ kerẹ uvi rẹ Ugbeyan wẹn. Ẹkẹvuọvo, Jihova vwo ẹguọnọ wẹn tavwen wọ ke tobọ vwo ẹguọnọ rọyen. Baibol na da ta: “Avwanre guọnerọ, fikiridie ọye re ka guọnọ avwanre.”—1 Jọn 4:19.

² Roro kpahen idjerhe sansan rẹ Jihova vwo dje ẹguọnọ rọyen kẹ avwanre. Ọ ma otọrakpọ na yoyovwin kẹ avwanre, ọ je kẹ avwanre kemu kemu a sa vwọ riavwerhen rẹ akpeyeren. (Matiu 5:43-48; Ẹvwọphia 4:11) Ọ guọnọre nẹ avwanre vẹ ọyen vwo omamọ rẹ oyerinkugbe, o de ji ruo rere avwanre se vwo yono kpahọn. Ọ kerhọ rẹ ẹrhovwo avwanre. (Une Rẹ Ejiro 65:2) Ọ vwẹ ẹwẹn ọfuanfon rọyen vwo sun avwanre je bọn avwanre gan. (Luk 11:13) Ọ tobọ ji Ọmọ ọghanghanre rọyen rhe akpọ na, o vwo si avwanre vwo nẹ umwemwu vẹ ughwu.—Se Jọn 3:16; Rom 5:8.

3. Mavọ yen avwanre sa vwọ sẹro rẹ omamọ rẹ oyerinkugbe vẹ Jihova?

³ Roro kpahen ugbeyan wẹn ọvo rọ nabọ kẹrẹ owẹ,  ro ji tinka mu we vwẹ ọke rẹ omavwerhovwẹn vẹ ọke rẹ ebẹnbẹn. Ọ guọnọ ẹgbaẹdavwọn a ke sa sẹro rẹ oyerinkugbe tiọyena. Ọtiọyen oyerinkugbe avwanre vẹ Jihova je hepha, ọyehẹ ugbeyan rọ ma kẹrẹ avwanre. Ọ sa dia ugbeyan rẹ avwanre bẹdẹ. Kọyensorọ Baibol na vwọ ta: “Sẹro rẹ oma rẹ ovwan vwẹ evun rẹ ẹguọnọ rẹ Ọghẹnẹ.” (Jude 21) Mavọ yen e se vwo ru ọnana? Baibol na da ta: “Ọnana hẹ ẹguọnọ rẹ Ọghẹnẹ na nẹ, avwanre yọnrọn irhi rọye. Yẹ irhi rọye na ghwa họhọ-ọ.”—1 Jọn 5:3.

4, 5. (a) Die yen “ẹguọnọ rẹ Ọghẹnẹ” mudiaphiyọ? (b) Mavọ yen ẹguọnọ wo vwo kpahen Jihova tonphiyọ wan?

⁴ Die yen Baibol na mudiaphiyọ rọ vwọ tanẹ “ẹguọnọ rẹ Ọghẹnẹ”? Ọnana mudiaphiyọ ẹguọnọ avwanre vwo kpahen Ọghẹnẹ, ọ dia ọ ro vwo kpahen avwanre-e. Wọ karophiyọ ọke rẹsosuọ wo vwo vwo ẹguọnọ rẹ Jihova?

⁵ Roro kpahen oborẹ oma ru we ọke wọ ka vwọ riẹn nẹ Jihova guọnọre nẹ wọ dia bẹdẹ vwẹ akpọ kpokpọ. Wo yono kpahen obo ro ruru avwanre sa vwọ dia akpọ yena, wọ da rhe riẹn nẹ ọ kẹ avwanre okẹ ọghanghanre ọvo rọ dia Ọmọ rọyen ro ji rhe akpọ na. (Matiu 20:28; Jọn 8:29; Rom 5:12, 18) Wọ vwọ mrẹ oborẹ Jihova vwo ẹguọnọ wẹ te, ọ da nẹrhẹ wo ji vwo ẹguọnọ rọyen.—Se 1 Jọn 4:9, 10.

6. Die yen o mudiaphiyọ re vwo vwo ẹguọnọ rẹ ohwo? Die yen ẹguọnọ rẹ Ọghẹnẹ mu we vwo ru?

⁶ Ẹkẹvuọvo ẹwẹn re vwo vwo ẹguọnọ rẹ Ọghẹnẹ ọyena ghwa ọtonphiyọ. Kerẹ udje, avwanre de vwo  ẹguọnọ rẹ ohwo, ọ vrẹ a de vwọ tanẹ “Mi vwo ẹguọnọ wẹ.” Ẹguọnọ yen mu avwanre vwo ru obo re cha vwerhen ohwo na oma. Ọtiọyen ọ je hepha, ẹguọnọ wo vwo kpahen Jihova che mu we vwo ru obo re vwerhọn oma. Ẹguọnọ na vwọ ganphiyọ na, ọ sa dianẹ o mu we vwọ vwomakpahotọ kẹ ji bromaphiyame. Womarẹ ọnana, wo de ve kẹ Jihova nẹ wọ cha ga bẹdẹ bẹdẹ. (Se Rom 14:7, 8.) Mavọ wọ sa vwọ yanmu ive yena?

7. E de vwo ẹguọnọ rẹ Jihova, die yen e che ru? Erhọ yen evo usun rẹ irhi rọyen?

⁷ Kidie nẹ avwanre vwo ẹguọnọ rẹ Jihova, kẹ “avwanre yọnrọn irhi rọye.” Idjerhe vọ yen avwanre vwo ru ọnana? Avwanre nyupho rọyen. Womarẹ Baibol na, avwanre riẹn oborẹ Jihova guọnọre nẹ avwanre yeren akpọ wan. Kerẹ udje, ọ vuẹ avwanre nẹ a da udi vroma-a, e chuji-i yẹrẹ gun efia-an, e gbe ọfanrhiẹ-ẹn, a ga ohwo vuọvọ yẹrẹ orọnvwọn vuọvo-o jokpanẹ ọyen ọvo.—1 Kọrẹnt 5:11; 6:18; 10:14; Ẹfesọs 4:28; Kọlose 3:9.

8, 9. Mavọ yen avwanre sa vwọ riẹn oborẹ Jihova guọnọ mie avwanre vwẹ ẹdia rẹ Baibol na ghwe ji urhi kpahe-en? Djudje rọyen.

⁸ Ẹkẹvuọvo, re vwo ru obo re vwerhen Jihova oma, vrẹ a de vwọ yọnrọn irhi rọyen. O ghwe si irhi ri shekpahen kẹdia kẹdia rẹ akpeyeren eje kẹ avwanre-e. Ọtiọyena, ọke evo a cha ghwa mrẹ urhi rẹ Baibol ọvo rọ cha vuẹ avwanre obo re ru-u. Mavọ kọyen e se vwo bru omamọ orhiẹn? (Ẹfesọs 5:17) Odjekẹ hẹ evunrẹ Baibol na, ri yono avwanre ẹro rẹ Jihova vwo  nẹ erọnvwọn. Womarẹ isese rẹ Baibol na, avwanre ke rhe riẹn Jihova kerẹ obọdẹn rẹ ohwo. Avwanre ke je rhe riẹn iroro rọyen, obo ro vwo ẹguọnọ kpahen vẹ obo ro vwo utuoma kpahen.—Se Une Rẹ Ejiro 97:10; Isẹ 6:16-19; ni Eta rẹ Odjefiotọ 1.

⁹ Kerẹ udje, mavọ yen avwanre vwo brorhiẹn rẹ obo re che ni vwẹ itẹlivishọni yẹrẹ intanẹti? Jihova ghwa vuẹ avwanre obo re che ru phiọgu-un. Jẹ odjekẹ rọyen cha vwẹ ukẹcha kẹ avwanre vwo bru omamọ orhiẹn. Ughe re nẹ nonẹna vọnre vẹ ohwekufia kugbe ọfanrhiẹn. Vwevunrẹ Baibol na, Jihova vuẹ avwanre nẹ “oma tuẹ erhi rọye kpahe ohwo ro gbe ozighi” ọ je tanẹ ọ “cha vwẹ ọvwọfanrhiẹ kugbe otu ri gbe igberadja guẹdjọ.” (Une Rẹ Ejiro 11:5; Hibru 13:4) Mavọ yen odjekẹ nana sa vwọ chọn avwanre uko vwo bru omamọ orhiẹn? Avwanre da ghwa riẹn nẹ Jihova vwo utuoma kpahen orọnvwọn yẹrẹ o niro brabra, e jẹ a kẹnoma kẹ.

10, 11. Diesorọ avwanre vwo nyupho rẹ Jihova?

¹⁰ Diesorọ avwanre vwo nyupho rẹ Jihova? Ọnana ghwa dia a de vwọ vrabọ rẹ ojaẹriọ yẹrẹ ebẹnbẹn rẹ orharhe rẹ orhiẹn ghwa cha-a. (Galesha 6:7) Ukperẹ ọtiọyen, avwanre nyupho rẹ Jihova kidie avwanre vwo ẹguọnọ rọyen. Kirobo rẹ emọ guọnọ nẹ oma vwerhen ọsẹ rayen, avwanre je guọnọ nẹ oma vwerhen Ọsẹ avwanre rọhẹ odjuvwu. Ọyen aghọghọ rode siẹrẹ a da riẹn nẹ oma avwanre vwerhen Jihova!—Une Rẹ Ejiro 5:12; Isẹ 12:2; ni Eta rẹ Odjefiotọ 2.

¹¹ Ọ dia ọke rọ vwọ lọhọ ọvo yen avwanre vwo nyupho rẹ Jihova-a. Ọ dia avwanre je cha sane irhi re  che nene yẹrẹ i re che jẹ enene-e. (Urhi Rivẹ 12:32) Ukperẹ ọtiọyen, avwanre nyupho rọyen ọkieje, kerẹ ọbuine na rọ tare nẹ, “Me mrẹ omavwerhe mẹ vwẹ evun rẹ irhi wẹn, re me guọnọre.” (Une Rẹ Ejiro 119:47; Rom 6:17) Avwanre guọnọ vwẹrokere Noa, rọ nabọ dje ẹguọnọ rọyen kẹ Jihova ro vwo ru oborẹ Jihova vuẹrẹ eje. Baibol na da ta kpahen Noa: “O de ru emu ejobi.” (Jẹnẹsis 6:22) Wọ guọnọ nẹ Jihova ta ota ọtiọyen kpahen owẹ?

12. Mavọ yen avwanre se vwo ru ubiudu rẹ Jihova ghọghọ?

¹² Mavọ yen oma ru Jihova siẹrẹ avwanre de nyupho rọyen? Ọ nẹrhẹ “udu [rọyen] ghọghọ.” (Isẹ 11:20; 27:11) Di roro kpahọn tavwen! Avwanre se ru obo re cha nẹrhẹ Ohwo rọ ma akpọ vẹ odjuvwu ghọghọ siẹrẹ e de nyupho rọyen. Ẹkẹvuọvo, ọ gba avwanre vwo ruo-o. Ukperẹ ọtiọyen, ọ kẹ avwanre egbomọphẹ. Ọnana mudiaphiyọ nẹ avwanre vwo egbomọphẹ re vwo ru erhuvwu yẹrẹ umiovwo. Jihova guọnọre nẹ ẹguọnọ rẹ avwanre vwo kpahọn mu avwanre vwo bru omamọ orhiẹn rere e se vwo yeren omamọ akpọ.—Urhi Rivẹ 30:15, 16, 19, 20; ni Eta rẹ Odjefiotọ 3.

13, 14. Mavọ yen avwanre ru riẹn nẹ irhi rẹ Ọghẹnẹ gan nọ-ọ? Djudje rọyen.

¹³ Avwanre de roro nẹ irhi rẹ Jihova gan nọ yẹrẹ e cha nẹrhẹ egbomọphẹ avwanre va avwanre abọ vwo? Baibol na da ta: “Irhi rọye na ghwa họhọ-ọ.” (1 Jọn 5:3) Ubiota rẹ Grik ra fan kpo “họhọ” na mudiaphiyọ “orọnvwọn ro vwo ọnyẹ.” Vwẹ ẹkpo rẹ Baibol efa,  a vwẹ ubiota nana vwo djisẹ rẹ irhi okamuka yẹrẹ ihwo ri sun ihwo efa re je wan ayen oma. (Matiu 23:4; Iruo Rẹ Iyinkọn Na 20:29, 30) Ọtiọyena, irhi rẹ Jihova ghwa “họhọ-ọ” kọyen, a sa yọnrọn ayen. Ọ cha sa nokpẹn rẹ obo re gan vrẹ avwanre vwo mie avwanre-e.

¹⁴ Kerẹ udje, roro nẹ wọ vwẹ ukẹcha kẹ ugbeyan wẹn rọ guọnọ kua kpo uwevwin kpokpọ. O mu ekuakua na eje phiyọ ekpeti sansan. Evo pharhere, efa guọnọ ihwo ivẹ e ki se mu ayen kidie e pha họhọhọ. Ugbeyan wẹn sa vuẹ wẹ nẹ wẹwẹ ọvo mu ekpeti rọ họhọre mamọ? Ẹjo, kakaka! Diesorọ? Kidie ọ guọnọ nẹ wọ wan oma-a. Jihova pha kerẹ ugbeyan yena, ọ cha sa vuẹ avwanre nẹ e ru orọnvwọn rọ gan nọ kẹ avwanre-e. (Urhi Rivẹ 30:11-14) Jihova riẹn oborẹ avwanre hepha. Ọ “riẹn obo ra ma avwanre wan; ọ karohọ nẹ avwanre iwurhie.”—Une Rẹ Ejiro 103:14.

15. Diesorọ o vwo mu avwanre ẹro nẹ irhi rẹ Jihova cha ghwa erere rhe avwanre?

¹⁵ Mosis vuẹ ihwo rẹ Izrẹl nẹ irhi rẹ Jihova cha dia “erhuvwu [kẹ ayen] bẹdẹ,” ayen da yan nene ọ cha nẹrhẹ ayen “sivwi . . . rhọ.” (Urhi Rivẹ 5:28-33; 6:24) Ọtiọyen ọ je hepha nonẹna. Kemu kemu rẹ Jihova vuẹ avwanre nẹ e ru cha ghwa erere vwo rhe avwanre. (Se Aizaya 48:17.) Ọsẹ avwanre, Jihova, riẹn obo ri me yovwin kẹ avwanre ọkieje. (Rom 11:33) Baibol na tare nẹ, “Ọghẹnẹ hẹ ẹguọnọ.” (1 Jọn 4:8) Ọnana mudiaphiyọ nẹ kemu kemu rẹ Jihova tare yẹrẹ o ruru, ẹguọnọ yen muro vwọ ta ji ruo.

16. Mavọ yen avwanre ru riẹn nẹ e se nyupho rẹ Ọghẹnẹ vwevunrẹ akpọ ọbrabra nana dede nẹ avwanre gbare-e?

¹⁶ Ọ ghwa lọhọ re vwo nyupho rẹ Ọghẹnẹ ọkieje-e.  Avwanre yerẹn vwẹ akpọ rẹ Eshu suẹn. Ọ riẹriẹ ihwo vwo ru obo re brare. (1 Jọn 5:19) Avwanre ji nene jẹgba romobọ muabọ, kidie ọ sa nẹrhẹ a churhi rẹ Ọghẹnẹ. (Rom 7:21-25) Ẹkẹvuọvo ẹguọnọ rẹ avwanre vwo kpahen Jihova kẹ avwanre ẹgba vwo ru obo ri yovwirin. Ọ mrẹ ẹgbaẹdavwọn rẹ avwanre, ọ je chọn avwanre uko womarẹ ẹwẹn ọfuanfon rọyen. (1 Samuẹl 15:22, 23; Iruo Rẹ Iyinkọn Na 5:32) Ẹwẹn ọfuanfon na chọn avwanre uko vwo vwo iruemu re sa nẹrhẹ ọ lọhọ kẹ avwanre re vwo nyupho rọyen.—Galesha 5:22, 23.

17, 18. (a) Die yen e che yono vwẹ ọbe nana? (b) Die yen e che yono vwẹ uyovwinrota rọ vwọ kpahọn ọnana?

¹⁷ Vwevunrẹ ọbe nana, avwanre che yono kpahen oborẹ akpeyeren avwanre sa vwọ ghwa aghọghọ rhe Jihova. E ji che yono obo ra sa vwọ reyọ irhi vẹ odjekẹ rẹ Baibol vwo ruiruo vwẹ akpeyeren. Karophiyọ nẹ Jihova gba avwanre vwo nyupho rọye-en. Avwanre de brorhiẹn re vwo nyupho rọyen, akpọ avwanre ko che yovwin, avwanre ji che vwo omamọ iphiẹrophiyọ kpahen obaro na. Ma rho, ẹmienyo avwanre cha nẹrhẹ Ọghẹnẹ riẹn nẹ avwanre vwo ẹguọnọ rọyen mamọ.—Ni Eta rẹ Odjefiotọ 4.

¹⁸ Avwanre sa vwọ riẹn obo ri yovwirin vẹ obo re chọre, Jihova da kẹ avwanre ẹwẹn obrorhiẹn. A da nabọ yono ẹwẹn obrorhiẹn avwanre, ọ sa vwẹ ukẹcha kẹ avwanre vwo “yọnrọn irhi rọye.” Ọtiọyena, die yen ẹwẹn obrorhiẹn, mavọ yen e se vwo yono? A cha mrẹ ẹkpahọnphiyọ na.