1. Die yen ofori nẹ e ru rere ẹga avwanre vwọ vwerhen Jihova oma, kẹ diesorọ?

JESU da ta: “Ọ gegagọ rẹ uyota na da gọ Ọsẹ na vwẹ [“ẹwẹn,” NW ] vẹ uyota, kidie ọtiọye Ọsẹ na guọnọre nẹ a ga ọye.” (Jọn 4:23; 6:44) E jẹ avwanre eje davwẹngba vwo “yono obo ri je Ọrovwohwo.” (Ẹfesọs 5:10) Ọnana ghwa lọhọ ọkieje-e. Eshu davwẹngba rọ vwọ phiẹn avwanre vwo ru obo ri tu Jihova oma.—Ẹvwọphia 12:9.

2. Die yen phiare vwẹ asan rọ kẹrẹ Ugbenu rẹ Sinai?

² Idjerhe vọ yen Eshu vwọ phiẹn avwanre? Ọkiọvo, o ruo ọ vwọ bẹn kẹ avwanre ra vwọ riẹn obo re brare vẹ obo ri yovwirin. Vwo oniso rẹ obo re phia kẹ ihwo rẹ Izrẹl ọke rẹ ayen vwo won phiyọ asan rọ kẹrẹ Ugbenu rẹ Sinai. Mosis de yerin kpo enu rẹ ugbenu na, ihwo na ke hẹrhẹ. Ayen vwọ hẹrhẹ bẹn, ayen da vuẹ Erọn nẹ ọ ma ọghẹnẹ kẹ ayen. Ọ da vwẹ oro vwo ru ọmọ rẹ erhuẹn kẹ ayen. Ihwo na ejobi ke re orẹ, kẹ ayen gbeha riariẹ ọmọ rẹ erhuẹn na je vwẹ ẹga vwọ kẹ. Ayen rorori nẹ Jihova yen ayen ga. Dede nẹ ayen niro nẹ ọyena  “orẹ kẹ Ọrovwohwo,” ọ dia ọyen ọ vwọ dia uyota-a. Ọnana edjọẹgọ vwẹ ẹro rẹ Jihova, buebun rayen de ghwu. (Eyanno 32:1-6, 10, 28) Die yen ọnana yono avwanre? Wọ phiẹn oma wẹ-ẹn. “Wọ vwẹ obọ te emu ogbegbe-e,” jẹ Jihova yono uwe obo re brare vẹ obo ri yovwirin.—Aizaya 52:11; Izikiẹl 44:23; Galesha 5:9.

3, 4. Diesorọ o vwo fo nẹ a fuẹrẹn oborẹ erẹ buebun ri titiri tonphiyọ wan?

³ Ọke rẹ Jesu vwọ hẹ otọrakpọ na, o yono iyinkọn rọyen nẹ ayen ga ẹga rẹ uyota. O vwo ughwu nu, iyinkọn na da je vwẹ irhi rẹ Jihova vwo yono idibo kpokpọ. Ẹkẹvuọvo, iyinkọn na vwo ghwu nu, iyono rẹ efian da hwarhiẹ iyono echọchọ kugbe irueru vẹ erẹ rẹ igiye vwọ ro ukoko na. Ayen tobọ rhoma mu odẹ kpokpọ kẹ erẹ rẹ igiye na e vwọ họhọ e rẹ Inenikristi. (2 Tẹsalonaika 2:7, 10; 2 Jọn 6, 7) E ji ru buebun rẹ erẹ nana nonẹna, i titi ẹga rẹ efian, tobọ ji te iruemu rẹ orhan. *—Ẹvwọphia 18:2-4, 23.

⁴ Vwẹ akpọneje, ihwo buebun ni erẹ ghanghanre. Ẹkẹvuọvo, wọ da nabọ riẹn ẹro rẹ Jihova vwo nẹ erọnvwọn, ku wọ cha mrẹ ẹdia wo de se ru ewene kpahen erẹ tiọyena. Ọnana sa dia  bẹnbẹn, ẹkẹvuọvo vwo imuẹro nẹ Jihova cha chọn wẹ uko. E jẹ a fuẹrẹn oborẹ erẹ evo ri titiri tonphiyọ wan rere a sa vwọ riẹn ẹro rẹ Jihova vwo ni ayen.

5. Die yen djerephia nẹ ọ dia December 25 yen e vwo vwiẹ Jesu-u?

⁵ Vwẹ asan buebun, December 25 yen ihwo buebun vwo ru Ikrismasi, kidie ayen rorori nẹ ẹdẹ yena yen e vwiẹ Jesu. Baibol na vuẹ avwanre kpahen ẹdẹ yẹrẹ emeranvwe re vwiẹ Jesu-u, ẹkẹvuọvo o djunute uvwre ọke re vwo vwiẹ. Luk tare nẹ ọke re vwo vwiẹ Jesu vwẹ Bẹtlẹhẹm “ihwo evo herọ vwẹ ubrakpọ yena ri sun igodẹ vwẹ evun rẹ aghwa vwẹ ason yena.” (Luk 2:8-11) Vwẹ December, ekpahen muẹ mamọ vwẹ Bẹtlẹhẹm, osio rhọ mamọ, imicho ji she; ọtiọyena, isuigodẹ che se mu igodẹ rayen ro otafe vwẹ aso-on. Die yen ọyena yono avwanre? Ọ dia ọke rẹ ekpahen yẹrẹ December, yen e vwo vwiẹ Jesu-u. Baibol na vẹ ẹbe rẹ ikuegbe djerephia nẹ omarẹ emeranvwe rẹ September fiẹ October yen e vwo vwiẹ Jesu.

6, 7. (a) Mavọ yen irueru rẹ Ikrismasi buebun tonphiyọ wan? (b) Die yen mu avwanre vwo ruẹse?

⁶ Kẹ mavọ yen Ikrismasi tonphiyọ wan? O nẹ erẹ rẹ igiye kerẹ orẹ rẹ ihwo rẹ Rom re se Saturnalia, re ruẹ vwọ kẹ Saturn, rọ dia ọghẹnẹ rẹ ekankọn. The Encyclopedia Americana da ta: “Saturnalia, rọ dia orẹ rẹ ihwo rẹ Rom ruẹ vwẹ uherevie rẹ December, ghwa udje rẹ akpọẹriọ ra mrẹ vwẹ ọke rẹ Ikrismasi. Kerẹ udje, vwevunrẹ orẹ nana, e ru ipati ride, e ruẹse kẹ ihwo, a je vwẹ ikandoro vwo muẹ kirobo re ruẹ vwẹ Ikrismasi.” E ji ru orẹ rẹ ẹdẹ re vwiẹ ọghẹnẹ rẹ ọnre re se Mithra vwẹ December 25.

⁷ Ẹkẹvuọvo, ihwo buebun ri ru Ikrismasi nonẹna  roro kpahen obo rọ tonphiyọ wa-an. Ayen de rhẹro rẹ ọke rẹ Ikrismasi na rere ayen sa vwọ ghwọrọ ọke vẹ ihwo rẹ orua rayen, re omamọ rẹ emu, ji ruẹse kẹ ihwo. Vwọrẹ uyota, avwanre vwo ẹguọnọ kpahen ihwo rẹ orua vẹ igbeyan rẹ avwanre, Jihova guọnọre nẹ avwanre e ruẹse kẹ ohwohwo. Kirobo rẹ 2 Kọrẹnt 9:7 tare, “Ọghẹnẹ guọnọ okẹ rẹ ivun avwerhe.” Jihova guọnọre nẹ avwanre ruẹse kẹ ihwo vwẹ ẹdẹ oghẹresan ọvo-o. Oma vwerhen ihwo rẹ  Ọghẹnẹ rẹ ayen de ruẹse je kuomakugbe igbeyan vẹ ihwo rẹ orua rayen ọkieje, ayen je rhẹro rẹ emuọvo rhivwi-in. Ayen ruẹse kidie ayen vwo ẹguọnọ rẹ ihwo efa.—Luk 14:12-14.

8. Ọke re vwo vwiẹ Jesu obọ yen eshare ri ni isio na vwọ yanrhe rhe mrẹ? Djekpahọn.

⁸ Ihwo buebun tare nẹ ofori nẹ e ruẹse vwẹ ọke rẹ Ikrismasi kidie egbaghwanre erha ruẹse kẹ Jesu vwẹ ọke re vwo vwiẹ. Ọyen uyota nẹ eshare evo rhe mrẹ Jesu ji ruẹse kẹ. Vwẹ ọke awanre, ihwo vwo ẹkuruemu rẹ ayen vwo ruẹse kẹ ohwo rode. (1 Ivie 10:1, 2, 10, 13) Wọ riẹnre nẹ Baibol na tare nẹ eshare nana eyẹn ihwo ri ni isio, ri ruẹ majiki, re ga Jihova-a? Jẹ, ọ dia ọke re vwo vwiẹ Jesu obọ yen ayen vwọ rhe mrẹ-ẹ. Ọke rẹ ayen vwọ rhe, jẹ Jesu te “ọmọ” rọ ghwanrire.—Matiu 2:1, 2, 11.

9. Ihwo ivẹ vọ yen ru ẹkarophiyọ rẹ ẹdẹ re vwiẹ ayen?

⁹ Oma vwerhen ohwo siẹrẹ e de vwiẹ ọmọ. (Une Rẹ Ejiro 127:3) Ẹkẹvuọvo, ọ dia ọyen e che vwo ru ẹkarophiyọ rẹ ẹdẹ re vwiẹ ohwo-o. Roro kpahen ọnana: Ihwo ivẹ ọvo yen Baibol na djunute ri rue ẹkarophiyọ rẹ ẹdẹ re vwiẹ ayen. Ihwo ivẹ na yen Fero rẹ Ijipt vẹ Ovie Hẹrọd Antipas. (Se Jẹnẹsis 40:20-22; Mak 6:21-29.) Ayen ivẹ na dia idibo rẹ Jihova-a. Vwọrẹ uyota, o vwo asan vuọvo vwẹ Baibol na rẹ ihwo re ga Jihova de ru ẹkarophiyọ rẹ ẹdẹ re vwiẹ aye-en.

10. Ẹro vọ yen Inenikristi rẹsosuọ vwo ni ẹkarophiyọ rẹ ẹdẹ re vwiẹ ohwo?

¹⁰ The World Book Encyclopedia tare nẹ Inenikristi  rẹsosuọ “ni ẹkarophiyọ rẹ ẹdẹ re vwiẹ ohwo kerẹ irueru rẹ igiye.” E mu irueru tiọyen kpahen iyono rẹ efian. Kerẹ udje, ihwo rẹ Grik rẹ awanre vwo imuẹro nẹ o vwo amakashe ọvo rọ cha vwẹ ẹdẹ re vwiẹ ohwo, kọyen cha chochọn rẹ ohwo na. Ayen niro nẹ amakashe nana vwo oyerinkugbe vẹ ọghẹnẹ re vwiẹre vwẹ ẹdẹ re vwiẹ ohwo na. Vwọba iyono rẹ efian nana, ẹkarophiyọ rẹ ẹdẹ re vwiẹ ohwo ji churobọ si uruemu rẹ orhan.

11. Ẹro vọ yen Jihova vwo ni avwanre siẹrẹ e de ruẹse?

¹¹ Ihwo buebun niro nẹ ofori nẹ ayen dje ọdavwaro phia kpahen ẹdẹ re vwiẹ ayen, ayen mi ji dje ẹguọnọ phia, kidie ọyen ẹdẹ rẹ oghẹresan. Ẹkẹvuọvo, e se dje ẹguọnọ kẹ ihwo rẹ orua vẹ igbeyan rẹ avwanre ọkieje, ukperẹ ẹdẹ rẹ oghẹresan ọvo. Jihova guọnọre nẹ avwanre ruẹse ọkieje. (Se Iruo Rẹ Iyinkọn Na 20:35.) Oma vwerhen avwanre kọke kọke fikirẹ okẹ rẹ arhọ, ọ ghwa dia ẹdẹ re vwiẹ avwanre ọvo-o.—Une Rẹ Ejiro 8:3, 4; 36:9.

12. Mavọ yen ẹdẹ rẹ ohwo ghwuru vwo yovwin nẹ ẹdẹ re vwiẹ ohwo?

¹² Aghwoghwo 7:1 tare: “Odẹ esiri yovwi nọ udẹ rọ ghare; ẹdẹ rẹ ughwu rhonọ ẹdẹ rẹ evwiẹ.” Mavọ yen ẹdẹ rẹ ohwo ghwuru vwo yovwin nẹ ẹdẹ re vwiẹ ohwo? Ọke e vwo vwiẹ avwanre, avwanre ji ru orọnvwọn vuọvo-o, te ọ dia erhuvwu yẹrẹ umiovwo. Ẹkẹvuọvo, a da vwẹ akpeyeren rẹ avwanre eje vwọ ga Jihova ji ru erhuvwu kẹ ihwo efa, ke che vwo “odẹ esiri,” Jihova je cha karophiyọ avwanre ọ da tobọ dianẹ avwanre ghwuru. (Job 14:14, 15) Idibo rẹ  Jihova ru ẹkarophiyọ rẹ ẹdẹ re vwiẹ aye-en yẹrẹ ọ rẹ Jesu-u. Vwọrẹ uyota, irueru vuọvo rẹ Jesu vuẹ idibo rọyen nẹ ayen ru ọyen Ẹkarophiyọ rẹ ughwu rọyen.—Luk 22:17-20; Hibru 1:3, 4.

13, 14. Die yen orẹ rẹ Ista churobọ si?

¹³ Ihwo buebun vwo imuẹro nẹ ayen ru orẹ rẹ  evrẹnushi rẹ Jesu ọke rẹ ayen de ru Ista. Vwọrẹ uyota, e djere nẹ orẹ rẹ Ista na churobọ si Eostre rọ dia ọghẹnẹ aye rẹ edegburhiọke vẹ ọke rẹ osio, rẹ ihwo rẹ Anglo-Saxon ga. The Dictionary of Mythology tare nẹ Eostre jẹ ọghẹnẹ rẹ evwiẹ. Irueru rẹ Ista evo churobọ si enana. Kerẹ udje, ọbe re se Encyclopædia Britannica tare nẹ ukọhọ “titiri mamọ kerẹ orọnvwọn re vwo dje arhọ kpokpọ vẹ evrẹnushi.” Vwẹ ikpe buebun rhire na, ẹga efian reyọ afiotọ vwo dje evwiẹ. O phẹnre nẹ Ista churobọ si evrẹnushi rẹ Jesu-u.

¹⁴ Kẹ, oma vwerhen Jihova ọ da mrẹ ihwo ri churu irueru rẹ ẹga efian siẹ evrẹnushi rẹ Ọmọ rọyen? Ẹjo, kakaka. (2 Kọrẹnt 6:17, 18) Vwọrẹ uyota, Jihova tobọ guọnọ nẹ avwanre ru orẹ rẹ evrẹnushi rẹ Jesu-u.

15. Mavọ yen irueru rẹ orẹ rẹ Ukpe Kpokpọ tonphiyọ wan?

¹⁵ Ẹkuotọ ọvuọvo vwo idjerhe rẹ ayen vwo ruẹ orẹ rẹ Ukpe Kpokpọ na. Ẹkẹvuọvo vwẹ asan buebun, ipati ride yen e me ruẹ vwẹ December 31. Udiẹda vroma, kugbe ọfanrhiẹn yen a ma mrẹ vwẹ ipati tiọyena. Vwọrẹ uyota, ihwo rẹ igiye yen ton orẹ nana phiyọ. Ọbe re se The World Book Encyclopædia da ta: “Ihwo rẹ Rom vwẹ ẹdẹ nana vwo muọghọ kẹ Janus, rọ dia ọghẹnẹ rẹ anurhoro, ẹchẹ vẹ ọtonphiyọ. Odẹ rẹ ọghẹnẹ nana yen e vwo se emeranvwe re se January. Janus vwo opharo ivẹ; ọvo nẹ obaro, ọ ro chekọ nẹ obuko.”

16, 17. Die yen ofori nẹ avwanre roro kpahen siẹrẹ e de muegbe rẹ orọnvwe?

¹⁶ Irueru rẹ orọnvwe nẹrhẹ oma vwerhen ohwo. O vwo idjerhe sansan re vwo ruẹ irueru rẹ orọnvwe vwẹ akpọneje. Ihwo nama roro kpahen oborẹ irueru rẹ orọnvwe tonphiyọ wa-an, ọtiọyena ayen rha riẹn nẹ irueru evo nẹ obọ rẹ igiye rhe-e. Ọtiọyena ofori nẹ Inenikristi ri muegbe rẹ orọnvwe vwo imuẹro nẹ irueru rẹ orọnvwe rayen cha vwerhen Jihova oma. Ayen da riẹn kpahen ọtonphiyọ rẹ irueru evo rẹ orọnvwe, ọnana cha chọn ayen uko vwo brorhiẹn rọ gbare.—Mak 10:6-9.

¹⁷ Ihwo evo vwo imuẹro nẹ irueru rẹ orọnvwe evo nẹrhẹ ihwo ivẹ re rọvwọnre na vwo ‘omamọ urhiẹvwe.’ (Aizaya 65:11) Kerẹ udje, vwẹ asan evo ihwo do irosu yẹrẹ erọnvwọn efa vwo kuẹ ihwo ivẹ re rọvwọnre na. Ayen roro nẹ ọnana cha nẹrhẹ ihwo ivẹ re rọvwọnre na vwiẹ emọ, vwo omavwerhovwẹn vẹ otọnvwe, je sẹro rayen. Ẹkẹvuọvo, ofori nẹ Inenikristi kẹnoma kẹ irueru eje ri churobọ si ẹga rẹ efian.—Se 2 Kọrẹnt 6:14-18.

18. Uchebro rẹ Baibol efa vọ yen shekpahen irueru rẹ orọnvwe?

¹⁸ Inenikristi re rọvwọnre guọnọre nẹ irueru rẹ orọnvwe rayen vọn vẹ omavwerhovwẹn ji dje ọghọ phia, rere ihwo eje re rhere vwọ riavwerhen rọyen. Ihwo re rhe irueru rẹ orọnvwe rẹ Onenikristi kẹnoma kẹ eta ri je fo, eta rẹ ọfanrhiẹn yẹrẹ eta re sa so ophọphọvwe vwọ kẹ ihwo ivẹ re rọvwọnre na yẹrẹ ihwo efa. (Isẹ 26:18, 19; Luk 6:31; 10:27) E jẹ irueru  rẹ orọnvwe rẹ Onenikristi dje “eheri rẹ akpọ na” phia-a. (1 Jọn 2:16) Wo de muegbe irueru rẹ orọnvwe, vwo imuẹro nẹ orọnvwe na cha kẹ wẹ omavwerhovwẹn siẹrẹ wọ da karophiyọ.—Ni Eta rẹ Odjefiotọ 28.

19, 20. Mavọ yen uruemu ra vwọ vwẹ iganasi rẹ udi vwo dje ohwohwo vwọ tonphiyọ?

¹⁹ Uruemu ọvo re ruẹ vwẹ asan re de ru irueru rẹ orọnvwe yẹrẹ vwẹ echidiotọ rẹ akpọẹriọ yen a vwọ vwẹ iganasi rẹ udi vwo dje ohwohwo. Ọke ra da vwẹ iganasi rẹ udi vwo dje ohwohwo, ohwo ọvo da ta ota nu, ihwo ichekọ me kpare iganasi rayen kpenu. Ẹro vọ yen Inenikristi vwo ni uruemu nana?

²⁰ Ọbe re se International Handbook on Alcohol and Culture tare nẹ ọ sa dianẹ iganasi rẹ udi re vwo dje ohwohwo na nẹ obọ rẹ igiye rhe “rẹ ayen vwo ku udi kuotọ kẹ ọghẹnẹ rayen.” Ayen ru ọnana “vwọ guọnọ ẹrhovwo rẹ ‘otọnvwe’ yẹrẹ ‘omakpokpọ.’ ” Vwẹ ọke awanre, ihwo kpare iganasi rayen kpenu vwọ guọnọ ebruphiyọ nẹ obọ rẹ eghẹnẹ rayen. Ẹkẹvuọvo, ọ dia idjerhe yena yen Jihova vwọ kẹ avwanre ebruphiyọ-ọ.—Jọn 14:6; 16:23.

21. Erẹ efa vọ yen ofori nẹ Inenikristi je kẹnoma kẹ?

²¹ Wọ da guọnọ brorhiẹn sẹ wo che vwobọ vwẹ irueru rẹ orẹ, gbe roro kpahen iruemu rẹ orẹ na titẹ.  Kerẹ udje, erẹ evo churobọ si eha-egbe rẹ ọfanrhiẹn, idiẹda vroma, kugbe ọfanrhiẹn. Erẹ tiọyena se titi ehware rẹ eshare ivẹ kugbe ọ rẹ eya ivẹ, ọtiọyen ji te ẹkuotọ rẹ ohwo. E de vwobọ vwẹ erẹ nana, a sa tanẹ avwanre ghini vwo utuoma rẹ obo ri tu Jihova oma?​—Une Rẹ Ejiro 1:​1, 2; 97:10; 119:37.

22. Die yen sa vwẹ ukẹcha kẹ Onenikristi vwo brorhiẹn sẹ o che vwobọ vwẹ orẹ ọvo?

²² Ofori nẹ Inenikristi nabọ nomaso je kẹnoma kẹ korẹ korẹ ro dje ọghọ kẹ Ọghẹnẹ-ẹ. Ọyinkọn Pọl de si: “Owenẹ wọ rere eyẹ wọ dare, eyẹ kemu kemu wo ruru, ru ayen ejobi vwọ kẹ urinrin rẹ Ọghẹnẹ.”(1 Kọrẹnt 10:31; ni Eta rẹ Odjefiotọ 29.) Vwọrẹ uyota, ọ dia erẹ ejobi yen churobọ si ọfanrhiẹn, ẹga rẹ efian, yẹrẹ otitivwe rẹ ẹkuotọ-ọ. Siẹrẹ orẹ na rha vwọso irhi rẹ Baibol na-a, ohwo ọvuọvo yen che brorhiẹn sẹ o che vwobọ vwọ. O ji fo nẹ e roro kpahen oborẹ orhiẹn rẹ avwanre che djobọte ihwo efa wan.

23, 24. Mavọ yen avwanre sa vwọ vwẹ ukẹcha kẹ ihwo rẹ orua rẹ avwanre re dia Iseri-i vwọ riẹn oboresorọ avwanre vwọ kẹnoma kẹ erẹ evo?

²³ Ọ sa dianẹ wọ nabọ kẹnoma kẹ erẹ ri je fo. Ẹkẹvuọvo, ihwo rẹ orua wẹn evo re dia Iseri rẹ Jihova-a se roro nẹ wo rhe vwo ẹguọnọ raye-en yẹrẹ wọ guọnọ nene ayen ghwọrọ ọke kugbe-e. Ayen se roro nẹ ọke rẹ orẹ tiọyena yen ọke vuọvo rẹ orua na se vwo kuomakugbe. Kẹ, die yen wo se ru? Idjerhe  buebun herọ wo se vwo djephia nẹ wo vwo ẹguọnọ rayen, ayen je ghanre kẹ wẹ. (Isẹ 11:25; Aghwoghwo 3:12, 13) Wo se durhie ayen, je nene ayen ghwọrọ ọke kugbe vwẹ ọke efa.

²⁴ Ihwo rẹ orua wẹn da guọnọ riẹn oboresorọ wọ vwọ kẹnoma kẹ erẹ evo, wọ sa hiẹ ẹbe rẹ ukoko na vẹ jw.org re sa chọn wẹ uko vwo djefiotọ kẹ ayen. Wo jẹ ayen roro nẹ wọ guọnọ gba ayen reyọ ota wẹ-ẹn. Vwẹ ukẹcha kẹ ihwo rẹ orua wẹn vwọ riẹn nẹ wo roro kpahen erọnvwọn buebun tavwen wo ki brorhiẹn. Vwẹ ẹwẹn kpotọ, jẹ “ota [wẹn] dia dẹndẹn rere ota avwerhe nẹ unu [wẹn] rhe.”—Kọlose 4:6.

25, 26.Mavọ yen emiọvwọn sa vwọ chọn emọ rayen uko vwo vwo ẹguọnọ rẹ irhi rẹ Jihova?

²⁵ Ofori nẹ avwanre eje riẹn oboresorọ avwanre komobọ vwọ kẹnoma kẹ erẹ evo. (Hibru 5:14) Avwanre guọnọ ru obo re cha vwerhen Jihova oma. Avwanre da dia emiọvwọn, e jẹ a nabọ ghwọrọ ọke vwọ vwẹ ukẹcha kẹ emọ rẹ avwanre vwo vwo ẹruọ rẹ Baibol na ji vwo ẹguọnọ rọyen. Ayen da mrẹ Jihova kerẹ ohwo dẹn, kẹ ayen che vwo ẹwẹn rẹ ayen vwo ru ọhọre rọyen.—Aizaya 48:17, 18; 1 Pita 3:15.

²⁶ Oma vwerhen Jihova siẹrẹ ọ da mrẹ nẹ avwanre davwẹngba vwọ ga vwẹ idjerhe rẹ uyota. (Jọn 4:23) Ẹkẹvuọvo, ihwo buebun roro nẹ a cha sa dia ohwo rẹ uyota vwẹ akpọ nana-a. Ọyena uyota? E jẹ a fuẹrẹn ọyena vwẹ uyovwinrota rọ vwọ kpahen ọnana.